Byenveni dan Lekol Minister Teokratik

DAN lemonn antye, dan plis ki 200 pei, plizyer milyon zelev pe benefisye sak semenn atraver ledikasyon dan Lekol Minister Teokratik. Serten i nouvo. Lezot in asiste lekol pour bokou lannen. Sa lekol i an mars dan dizenn milye landrwa. Nenport landrwa kot ou reste lo later, menm progranm ledikasyon i disponib pour ou. Dimoun tou laz, group etnik, ek nivo ledikasyon pe resevwar sa lenstriksyon, gratwit.

An 1943 ler lekol ti konmanse dan bann kongregasyon Temwen Zeova, son lobzektif ti ganny detaye dan sa bann parol swivan: “Pour prepar tou ‘zonm fidel,’ sa bann ki’n antann Parol Bondye e demontre zot lafwa ladan, ‘pour kapab ansenny lezot’ . . . afen ki sakenn . . . i pli byen ekipe pour prezant piblikman sa lesperans ki dan li.” (Course in Theocratic Ministry, p. 4) Lobzektif sa lekol in reste parey ziska ozordi.

An realite, ki pli bon keksoz ki nou tou nou kapab fer avek nou don pour koze ki sorti kot Bondye? Labib i donn larepons: “Tou sa ki respire—loue Ya.” (Pson. 150:6) Ler nou fer sa, nou anmenn lazwa dan leker nou Papa seles. Nou montre li ki nou prop leker pe reazir avek rekonesans anver son labonte ek lanmour. Se pour sa rezon ki bann Kretyen i ganny ankouraze pour “rann glwar Bondye, setadir, annou toultan loue son non par nou labous.” (Ebr. 13:15) Pour kapab ed ou amelyor ou abilite pour servi sa don sorti kot Zeova pour loue li, nou swet ou labyenveni konman en zelev dan Lekol Minister Teokratik.

Menm si bokou lanfaz i ganny mete lo lir an piblik e lo lar pour koze e ansennyen dan lekol, bann benefis Lekol Minister Teokratik i pa enplik zis sa bann laspe. Anmezir ki ou partisipe, ou pou resevwar led pour devlop bann abilite ki annan valer tel parey lektir personnel, ekoute e rapel, etidye, fer resers, analize e organize, fer konversasyon, reponn kestyon, e met ou lide an ekrir. Labib ek bann piblikasyon baze lo Labib pou fourni baz pour etidye, fer komanter e pour fer bann prezantasyon dan lekol. Anmezir ki ou ranpli ou lespri avek bann laverite presye ki trouve dan Parol Bondye, ou pou aprann panse Bondye e devlop menm panse. Sa i vreman anmenn bokou benefis dan tou laspe lavi! Konsernan valer Parol Bondye, en ansennyan liniversite dan 20 tyenm syek, William Lyon Phelps ti ekrir: “Nou kapab vreman dir ki tou dimoun ki annan en konnesans profon lo Labib i byen edike. . . . Mon krwar ki en konnesans lo Labib san en degre liniversite i annan plis valer ki annan en degre liniversite san en konnesans lo Labib.”

Konman pour benefisye o maksimonm

Byensir, pour kapab tir benefis atraver ledikasyon ki ganny donnen dan Lekol Minister Teokratik, ou, konman zelev, ou devret fer en zefor personnel. Zapot Pol ti ankouraz Timote son konpanyon Kretyen: “Pran byen a-ker sa responsabilite e met tou ou zefor ladan, pour ki tou dimoun i a war ou progre.” (1 Tim. 4:15) Dan ki bann fason pratik ki ou kapab met tou ou zefor dan sa lekol?

Otan ki i posib, asiste Lekol Minister Teokratik sak semenn. Servi byen sa liv letid, Benefisye atraver Ledikasyon Lekol Minister Teokratik. Ekrir ou non dan sa lespas vid lo sa paz ki annan tit. Sak fwa ki ou asiste lekol anmenn sa liv avek ou. Sa liv letid i osi en liv ki ou kapab ekrir ladan. Ler ou lir li e ou vwar bann pwen enportan ki pou itil pour ou, ou kapab souliny zot. Servi sa gran lespas vid ki lo sak kote paz pour ekrir bann pwen pratik ki ou aprann pandan diskisyon dan lekol.

En kopi progranm pour Lekol Minister Teokratik pou ganny fourni separeman. Dan sa progranm pou osi enkli bann detay lo konman ki lekol pou deroule. Ou kapab vwar li itil pour kit sa progranm dan sa liv, kot ou kapab fasilman ganny akse avek.

Ler ou pe prepar progranm lekol pour sak semenn, kit antet ki Labib i sa liv prensipal ki nou etidye. Fer li en priyorite pour lir tou sa porsyon Labib ki ganny progranmen pour lasemenn. E osi si ou kapab lir lenformasyon pour diferan ekspoze lo progranm, sa osi pou benefisye ou.

Pandan lekol, i kapab annan loportinite pour lodyans partisipe. Profit plennman sa bann loportinite. Partisip dan bann tel diskisyon i en fakter enportan pour ou kapab rapel sa ki ou antann e pour kapab aplik zot dan ou lavi personnel.

Byensir, tou zelev pou ganny loportinite pour prezant bann ekspoze oubyen fer demonstrasyon devan kongregasyon. Servi byen tou sa bann loportinite. Vreman met tou ou zefor pour amelyor nenport abilite pour kominike ki ou gannyen pour travay lo la. Bi bann konsey ki ou pou resevwar se pour ed ou kontinyen fer progre. Aksepte sa led ki ou gannyen. Dan ou liv, ekri bann sizesyon spesifik konsernan sa ki ou kapab fer pour amelyore. Vi ki i difisil pour en dimoun vwar son lekor parey lezot i vwar, alor bann bon sizesyon ki baze lo Labib ek konsey ki ganny fourni i kapab kontribye bokou dan ou progre. Sa i leka menm si i fer bokou lannen depi ki ou dan lekol.—Prov. 1:5.

Eski ou ti a kontan fer progre pli rapidman? Sa i posib, si ou demontre linisyativ. Etidye davans bann lenformasyon ki pou ganny kouver dan sak ekspoze ki bann zelev pou fer. Si en ranplasman i neseser, ou pou dan en pozisyon pour volonter, e sa pou donn ou plis leksperyans. Ler lezot i prezant bann ekspoze, ekout atantivman lafason ki zot devlop sa bann lenformasyon. Nou aprann avek kanmarad.

Deplis, si ou sitiasyon i permet, ou kapab akseler ou progre par personnelman etidye pli devan dan sa liv letid. Apre ki ou’n byen konpran sa 15 premye letid, kontinyen pour etidye sa seksyon “Progranm pour devlop Abilite konman en Orater ek en Ansennyan,” ki konmans lo paz 78. Premyerman, etidye sak leson, e fer sa bann legzersis ki’n ganny dekrir avek sak leson. Aplik sa ki ou’n aprann dan ou minister. Sa i kapab ogmant bokou ou progre konman en orater e konman en ansennyan Parol Bondye.

Ou ledikasyon Lekol Minister Teokratik pou ed ou prepar pour sa ki pli enportan dan lavi. Vi ki nou vivan akoz lavolonte Bondye, pour loue li i vedir realiz sa vre bi nou legzistans. Zeova Bondye i merit meyer louanz posib. (Rev. 4:11) Sa ledikasyon ki nou resevwar dan lekol i en mwayen pour akonpli sa bi afen ki nou kapab reflesir klerman, azir sazman, e kominik dan en fason efikas sa bann laverite merveye ki trouve dan Parol enspire Bondye.