Zes ek Lekspresyon lo Figir

DAN serten kiltir dimoun i fer zes pli libreman ki bann ki sorti dan lezot lorizin. Toudmenm, preski tou dimoun i fer sanzman dan lekspresyon lo zot figir e fer serten kalite zes ler zot pe koze. Sa i evidan ki swa dan konversasyon personnel e ler pe koz devan piblik.

I ti natirel pour Zezi e pour son bann disip fer zes. En fwa en dimoun ti raport avek Zezi ki son manman ek son bann frer ti anvi koz avek li. Zezi ti reponn: “Ki sennla mon manman? Ki sennla mon bann frer?” Apre Labib i azoute: “E avek son lanmen, i ti montre son bann disip e i ti dir, ‘La mon manman ek mon bann frer!’” (Mat. 12:48, 49). Parmi lezot referans, dan Akt 12:17 ek 13:16, Labib i montre ki pour zapot Pyer ek Pol fer zes ti osi natirel pour zot.

Pa zis lavwa ki kapab transmet bann lide ek santiman me osi par mwayen bann zes ek lekspresyon lo figir. Si en orater pa fer sa de keksoz sa i kapab donn en lenpresyon ki i napa lentere. Me ler sa bann mwayen kominikasyon i byen ganny konbinen, sa i amelyor bokou lefikasite ou parol. Si ou fer bann zes apropriye ek lekspresyon lo figir menm ler ou koz lo telefonn, sa pou pli fasilman transmet lenportans ou mesaz osi byen ou santiman personnel konsernan sa ki ou pe dir. An rezilta, ki swa ou pe koz dan en fason enprovize oubyen pe lir, ki swa ou lodyans pe get ou oubyen pe get dan zot prop Labib, bann zes ek lekspresyon lo figir i annan valer.

Ou bann zes ek ou lekspresyon lo figir i devret natirel, pa konmsi ki ou’n aprann sa atraver en liv. Ou pa zanmen etidye konman pour riye oubyen konman pour montre lakoler. Bann zes osi i devret eksprim sa ki ou pe santi. Pli ou bann zes i natirel, i pli meyer.

Bann zes i tonm dan de kategori zeneral: bann zes ki dekrir e bann ki aksantye. Bann zes ki dekrir i eksprim aksyon oubyen montre dimansyon ek landrwa. Dan lekol, ler ou pe travay lo servi bann zes, pa kontant ou avek zis enn oubyen de zes. Esey fer zes dan en fason natirel toudilon ou diskour. Si ou pe ganny difikilte pour fer sa, ou kapab trouv li itil pour rod bann mo ki montre direksyon, distans, groser, landrwa, oubyen pozisyon an relasyon avek lezot. Sepandan, dan bokou ka, tou sa ki ou bezwen fer se konsantre antyerman lo ou diskour, pa trakase konsernan lenpresyon ki ou pe fer, me dir e fer keksoz parey ou fer dan lavi toulezour. Ler en dimoun i relaks, bann zes i vin natirelman.

Bann zes ki aksantye i eksprim santiman ek konviksyon. Zot fer resorti, anim e ranforsi bann lide. Bann zes ki aksantye i enportan. Me, fer atansyon! Bann zes ki aksantye i kapab fasilman vin bann manni. Si ou servi en menm kalite zes pour plizyer fwa, i kapab anmenn latansyon lo sa zes li menm plito ki amelyor ou diskour. Si ou sirveyan lekol i endike ki ou annan sa problenm, pour enpe letan esey fer zis bann zes ki dekrir. Apre plitar, konmans servi bann zes ki aksantye ankor.

Letan ou pe determin ki degre ki ou devret servi bann zes ki aksantye ek kalite zes ki apropriye, mazin santiman sa bann ki ou pe koz avek. Montre ledwa lodyans i kapab fer zot santi enkonfortab. Dan serten kiltir si en zonm i fer serten zes, tel parey i kouver son labous avek son lanmen pour montre ki i sirprann, sa i ganny vwar konman en latitid bann madanm. Dan serten landrwa dan lemonn, i pa ganny konsidere modes pour madanm fer zes libreman avek lanmen. Alor dan sa bann landrwa, bann ser i devret espesyalman servi byen bann lekspresyon lo figir. E bann zes egzazere devan en pti group i kapab ganny vwar konman komik preski partou dan lemonn.

Anmezir ki ou ganny leksperyans e vin pli alez pour koze, servi nenport zes ki aksantye pour eksprim ou profon santiman dan en fason natirel, demontre ou konviksyon ek senserite. Zot pou azout sinifikasyon avek ou parol.

Lekspresyon lo ou Figir. Plis ki okenn lezot laspe lekor, ou figir i souvan eksprim konman ou vreman santi. Ou lizye, laform ou labous, fason ki ou tenir ou latet zot tou zot zwe en rol. San dir en parol, ou figir i kapab transmet endiferans, repinyans, konfizyon, sirprann oubyen plezir. Ler tel lekspresyon lo figir i akonpanny bann parol, zot fer en lefe vizyel e emosyonnel. Nou Kreater in met en kantite misk dan ou figir—an tou plis ki 30. Preski lanmwatye sa bann misk i ganny servi ler ou sourir.

Ki swa ou lo lestrad oubyen pe partisip dan predikasyon, ou pe esey partaz avek dimoun en bon mesaz, enn ki kapab fer zot leker rezwir. En sourir amikal i konfirm sa. Lo lot kote, si lo ou figir napa lekspresyon, sa i kapab kree bann dout konsernan ou senserite.

Anplis, en sourir i dir lezot ki ou annan en bon santiman anver zot. Sa i sirtou enportan dan sa bann dernyen zour kot dimoun i souvan per bann etranze. Ou sourir i kapab ed dimoun santi zot alez e pli pare pour aksepte sa ki ou dir.