Sanmenm sa ki Bondye ti oule?

LIR en nenport zournal, get televizyon, oubyen ekout radyo. Ou pou tann zis krim, lager, teroris! Aprezan mazin en kou ou bann problenm. I kapab ou pe soufer akoz en maladi oubyen lanmor en dimoun ki ti ou pros avek. Petet ou santi parey Zob, en zonm drwat, ki ti dir i’n ‘ganny ase avek problenm.’—Zob 10:15.

Demann ou lekor:

Sanmenm sa ki Bondye ti oule pour mwan e pour lezot dimoun?
Kote mon kapab ganny led pour fer fas avek mon bann problenm?
Eski nou annan lespwar pour trouv lape en zour lo sa later?

Labib i donn nou bann larepons satisfezan pour sa bann kestyon.

LABIB I DIR KI BONDYE POU ANMENN SA BANN SANZMAN LO LATER.

“I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” —Revelasyon 21:4

“Sa letan sa enn ki bwate pou grenpe parey en serf.” —Izai 35:6

“Lizye bann aveg pou ouver.” —Izai 35:5

“Tou bann mor ki dan tonbo pou . . . sorti dan zot tonbo.”—Zan 5:28, 29

“Okenn zabitan pa pou dir: ‘Mon malad.’”—Izai 33:24

“Legren pou an abondans lo later.”—Psonm 72:16

Later in sanze dapre plan Bondye: Aze i vin zenn, bann malad ek aveg i ganny geri, bann mor i resisite, manze an abondans.

BENEFISYE AVEK SA KI LABIB I DIR

Pa krwar sa bann keksoz i zis en rev. Bondye in promet ki i pou fer zot vin en realite, e Labib i eksplike ki mannyer i pou fer sa.

De msye pe etidye Labib an servan liv Ki Labib i dir

Me Labib i ofer ou plis ki sa. I kapab fer ou viv en lavi ere depi konmela menm. Reflesir en pe lo ou bann traka ek problenm. Petet ou annan problenm larzan, problenm fanmiy, problenm lasante, oubyen petet lanmor in pran en dimoun ki ou ti pros avek. Labib i kapab ed ou fer fas avek ou problenm. I osi kapab soulaz ou parski i reponn bann kestyon parey:

Akoz nou soufer?
Ki mannyer nou kapab fer fas avek traka lavi?
Ki nou kapab fer pour nou lavi fanmiy vin pli gou?
Ki i arive avek nou ler nou mor?
Eski en zour nou pou revwar nou bann defen?
Kwa ki fer nou asire ki Bondye pou akonpli son promes alavenir?

Lefe ki ou pe lir sa liv, i montre ki ou ti a kontan konnen ki Labib i dir. Sa liv pou ed ou. I annan bann kestyon ki al avek paragraf. Bokou dimoun in servi sa metod kestyon ek repons pour diskit Labib avek bann Temwen Zeova. Nou swete ou osi ou pou vwar li enteresan. Fotespere Bondye i beni ou la ki ou pe al aprann sa ki Labib i vreman dir. I pou vreman enteresan!