Konbyen Temwen Zeova ou konnen ou? Petet serten i ou vwazen, koleg travay ouswa kanmarad lekol. Ouswa petet nou’n koz avek ou lo Labib. Lekel nou e akoz nou koz lo nou krwayans avek lezot dimoun?

Nou bann senp dimoun. Nou sorti dan diferan ras ek ran sosyal. Serten parmi nou ti dan en lot larelizyon avan sa e lezot pa ti ni menm krwar dan Bondye. Me, avan vin Temwen Zeova, nou tou nou’n pran letan pour etidye bann lansennyman Labib o profon. (Akt 17:11) Nou’n aksepte sa ki nou’n aprann e apre nou’n fer sa swa personnel pour ador Zeova, nou Bondye.

Nou letid Labib i benefisye nou. Parey nenport ki, nou bezwen fer fas avek bann problenm ek nou bann febles. Me, kan nou’n aplik bann prensip Labib dan nou lavi tou le zour, nou lavi in amelyore. (Psonm 128:1, 2) Sa i en rezon akoz nou kontan pour partaz bann bon keksoz ki nou’n aprann dan Labib.

Nou viv dapre bann prensip Bondye. Sa bann prensip ki ganny ansennyen i sorti dan Labib, i amelyor nou lavi, i fer nou annan respe pour lezot e i ed nou devlop bann kalite parey lonnekte ek labonte. Sa bann prensip i ed nou pour vin bann sitwayen travayan e an bonn sante. I ini bann fanmir e i ankouraz nou pour annan bann bon valer moral. Vi ki nou konvenki ki “Bondye pa fer preferans pour personn,” nou konsider kanmarad konman bann frer ek ser spirityel dan lemonn antye. Napa okenn baryer rasyal e politik parmi nou. Menm si nou bann senp dimoun, nou en pep inik.​—Akt 4:13; 10:34, 35.

• Dan ki sans Temwen Zeova i parey lezot dimoun?

• Ki prensip Temwen Zeova in aprann ler zot in etidye Labib?

Bokou dimoun i krwar ki Temwen Zeova i en nouvo larelizyon. Pourtan, plis ki 2,700-z-an pase, bann serviter sa vre Bondye ti ganny apele son bann “temwen.” (Izai 43:10-12) Ziska lannen 1931, dimoun ti konn nou konman Etidyan Labib. Akoz nou ti pran sa non Temwen Zeova?

Nou non i idantifye nou Bondye. Dapre bann vye kopi Labib, non Bondye setadir Zeova i aparet plis ki set mil fwa dan Labib. Dan plizyer tradiksyon Labib, sa non in ganny ranplase par bann tit parey Senyer ouswa Bondye. Pourtan, Zeova, sa sel vre Bondye ti revel son non avek Moiz ler i ti dir: “Sa i mon non pour touzour.” (Egzod 3:15) Dan sa fason, son non ti disteng li avek tou lezot fo bondye. Nou fyer pour port non sen Bondye.

Nou non i dekrir nou misyon. En kantite dimoun dan lepase, depi letan Abel ziska nou letan in demontre zot lafwa dan Zeova. Tou dilon listwar, Noe, Abraam, Sara, Moiz, David ek lezot ankor ti form parti sa “gro nyaz temwen.” (Ebre 11:4–12:1) Zis parey en dimoun i kapab donn en temwannyaz ankour pour defann en inosan, nou osi nou determinen pour fer konn laverite lo nou Bondye.

Nou pe imit Zezi. Labib i apel Zezi sa “temwen fidel e vre.” (Revelasyon 3:14) Zezi li menm ti dir ki i’n fer bann dimoun ‘konn non Bondye’ e i’n kontinyen “servi [konman] temwen pour laverite” lo Bondye. (Zan 17:6; 18:37) Alor, bann vre disip Zezi i devret port non Bondye e koz lo sa non avek lezot. Sanmenm sa ki Temwen Zeova i fer avek bokou devouman.

• Akoz bann Etidyan Labib ti pran sa non Temwen Zeova?

• Pour konbyen letan Zeova in annan bann temwen lo later?

• Lekel sa pli gran Temwen Zeova?

Labib ti predir ki apre lanmor Kris, bann fo ansenyan ti pou vin parmi bann premye Kretyen e ansenny bann mansonz olye laverite ki dan Labib. (Akt 20:29, 30) Avek letan, sanmenm sa ki ti arive. Sa bann fo ansenyan ti kontamin lansennyman Zezi avek bann fo krwayans e lanmenm ler fo larelizyon Kretyen ti konmanse. (2 Timote 4:3, 4) Ki mannyer nou kapab asire ki ozordi nou annan en bon konprenezon lo sa ki Labib i vreman dir?

Sa letan ti arive pour Zeova devwal laverite. Zeova ti predir ki pandan ‘letan lafen, sa vre konnesans ti pou annabondans.’ (Danyel 12:4) Lannen 1870, en pti group dimoun ki ti pe rod laverite ti remarke ki lansennyman bokou legliz pa ti sorti dan Labib. Alor, zot ti konmans fer resers pour konpran sa vre lansennyman ki sorti dan Labib e Zeova ti beni zot par fer zot konpran son Parol.

Bann zonm senser ti etidye Labib o profon. Sa bann Etidyan Labib devoue ti etidye Labib dan menm fason ki nou nou pe fer konmela. Zot ti fer bann resers e diskit lo la, size par size. Si zot ti trouv en verse Labib ki ti difisil pour konpran, zot ti rod lezot verse pour konpran li. Kan zot ti tonm lo en konklizyon ki ti annakor avek sa ki leres verse dan Labib i dir, zot ti ekrir sa ki zot ti’n dekouver. Par fer sa, zot ti redekouver laverite lo non Bondye ek son Rwayonm, son plan pour limanite ek later, kote bann mor i ete e lespwar rezireksyon. Sa resers ki zot ti fer ti liber zot avek plizyer fo krwayans ek pratik.​—Zan 8:31, 32.

Ver lannen 1879, bann Etidyan Labib ti realize ki i ti’n ariv ler pour anons sa bon nouvel dan lemonn antye. Alor, sanmenm sa lannen, zot ti konmans pibliy Latour Veyer pe anons Rwayonm Zeova an Angle, en magazin ki nou ankor pe pibliye ozordi. Konmela, nou pe anons sa bann laverite avek bann dimoun dan plis ki 240 pei e dan plis ki 750 langaz. Zanmen dan listwar, sa vre konnesans in vin sitan annabondans ki dan nou letan!

• Apre lanmor Kris, ki ti arive avek sa laverite ki dan Labib?

• Kwa ki’n ed nou redekouver laverite dan Parol Bondye?

Pour plizyer dizenn lannen, Temwen Zeova in servi, enprimen e distribye diferan tradiksyon Labib. Me plitar, nou ti vwar sa nesesite pour pibliy en nouvo tradiksyon Labib ki ti pou ed bann dimoun pour “ganny [en] konnesans laverite” ki egzakt akoz sa i lavolonte Bondye. (1 Timote 2:3, 4) Apartir 1950, nou ti progresivman pibliy en tradiksyon Labib an Angle modern ki apel New World Translation. Sa Labib in fidelman ganny tradwir dan en fason egzakt dan plis ki 120 langaz.

I en Labib ki fasil pour konpran. O firamezir letan i pase, bann langaz i sanze e sa i fer ki dan bokou tradiksyon Labib i kapab annan bann vye mo ki difisil pour konpran. Deplis, bann vye kopi Labib ki pli egzakt e pli pros avek bann orizinal in ganny dekouver e sa in ede pour nou pli byen konpran Ebre, Arameen ek Grek, bann langaz ki Labib ti ganny ekrir o konmansman.

En tradiksyon Labib ki fidel avek parol Bondye. Olye sanz sa ki Parol Bondye i dir, bann tradikter Labib i devret tradwir sa ki son orizinal i dir. Me, dan laplipar versyon Labib, non Bondye, Zeova pa’n ganny servi dan Lekritir Sen.

I en Labib ki onor son Loter. (2 Samyel 23:2) Parey sa legzanp lo sa portre anba lo paz, dan bann vye kopi Labib, non Bondye i aparet plis ki 7,000 fwa e bann tradikter New World Translation in remet non Bondye kot i ti aparet dan bann vye kopi Labib. (Psonm 83:18) Zot ti fer bann resers pour plizyer lannen pour pibliy sa Labib e i en plezir pour lir sa Labib akoz ou kapab konpran klerman bann panse Bondye. Ki swa ou annan New World Translation dan ou langaz oubyen non, nou ankouraz ou pour pran sa labitid pour lir Parol Zeova tou le zour.​—Zozye 1:8; Psonm 1:2, 3.

• Akoz nou ti deside ki en nouvo tradiksyon Labib ti neseser?

• Ki bon labitid en dimoun ki anvi konn lavolonte Bondye i devret annan tou le zour?