Bann responsab nou lorganizasyon pa ganny peye. O kontrer, parey ler kongregasyon Kretyen ti konmanse, bann sirveyan i ganny apwente pour “pran swen” kongregasyon Bondye. (Akt 20:28) Sa bann ansyen i bann zonm matir spirityelman ki responsab e pran swen avek kongregasyon. Zot “pa fer li kontre-ker me avek bonn volonte,” zot “pa fer li pour ganny larzan me avek devouman.” (1 Pyer 5:1-3) Ki zot fer pour nou dan kongregasyon?

Zot pran swen avek nou e zot vey lo nou. Bann ansyen i la pour gid e ede protez kongregasyon spirityelman. Zot konsyan ki se Bondye ki’n donn zot sa rol enportan, alor bann ansyen pa fer dominer avek pep Bondye me o kontrer, zot zwe zot rol pour nou byennet ek lazwa. (2 Korentyen 1:24) Zis parey en berze i pran swen avek sak mouton, bann ansyen i eseye pour konn sak manm kongregasyon.​—Proverb 27:23.

Zot ansenny nou konman pour fer lavolonte Bondye. Sak semenn, bann ansyen i prepar bann renyon kongregasyon pour batir nou lafwa. (Akt 15:32) Sa bann zonm i devoue e organiz predikasyon, zot pres ansanm avek nou e form nou dan tou laspe nou minister.

Zot ankouraz nou personnelman. Pour ankouraz nou personnelman, bann ansyen dan nou kongregasyon i kapab vizit nou kot lakour ouswa kot Lasal Rwayonm pour ofer led ek rekonfor ki sorti dan Labib.​—Zak 5:14, 15.

Apard zot responsabilite dan kongregasyon, bokou ansyen i annan en louvraz ek responsabilite familyal ki pran zot letan ek latansyon. Sa bann frer devoue i merit nou respe.​—1 Tesalonisyen 5:12, 13.

• Ki rol bann ansyen dan kongregasyon?

• Dan ki fason bann ansyen i demontre lentere personnel dan nou?

Labib i koz lo de group zonm Kretyen ki desarz bann responsabilite dan kongregasyon, e sa se bann “ansyen ek asistan ministeryel.” (Filipyen 1:1, NW) Normalman, i annan plizyer sa bann frer dan sak kongregasyon. Ki travay bann asistan ministeryel i fer ki benefisye nou?

Zot ed konsey ansyen. Bann asistan ministeryel i bann zonm ki matir spirityelman, diny konfyans e serye. Serten i zenn, lezot i aze. Zot okip serten responsabilite enportan ki ganny fer regilyerman dan kongregasyon, ki osi enkli bann travay fizik. Gras a zot led, bann ansyen i kapab pas plis letan pour ansenny e pran swen avek kongregasyon.

Zot ede avek serten travay dan kongregasyon. Serten asistan ministeryel i ganny demande pour ede akey bann ki vin renyon. Lezot i okip departman son, piblikasyon, kontabilite ek teritwar kot kongregasyon i prese. Zot osi ede pour mentenir Lasal Rwayonm. Bann ansyen i kapab demann zot pour ed bann aze. Nenport ki responsabilite ki bann asistan ministeryel i ganny donnen, zot fer li volonterman e lezot i respekte zot bokou pour sa.​—1 Timote 3:13.

Zot en bon legzanp konman bann zonm Kretyen. Bann asistan ministeryel i ganny rekomande akoz zot bann bon kalite spirityel. Kan zot fer zot prezantasyon dan kongregasyon, zot ranforsi nou lafwa. Ler zot touzour la dan predikasyon, zot ankouraz nou pour devlop plis devouman. Vi ki zot korpere avek lezot, sa i promot lazwa ek linite dan kongregasyon. (Efezyen 4:16) Avek letan, zot osi zot kapab kalifye pour vin en ansyen.

• Ki kalite dimoun bann asistan ministeryel i ete?

• Ki mannyer bann asistan ministeryel i ede pour ki kongregasyon i mars byen?

Lekritir Grek Kretyen i souvan mansyonn Barnabas ek zapot Pol. Sa bann zonm ti bann sirveyan ki ti vwayaze pour vizit bann kongregasyon dan premye syek. Akoz? Parski zot ti vreman enterese avek byennet zot bann frer ek ser spirityel. Pol ti dir ki i ti oule “retournen, pour vizit bann frer” pour vwar konman zot ete. I ti pare pour vwayaz plizyer santenn kilomet pour li al ankouraz zot. (Akt 15:36) Sanmenm sa ki bann sirveyan dan nou lepok i anvi fer.

Zot vizit nou pour ankouraz nou. Sak sirveyan rezyonal i vizit en rezyon, setadir, en group apepre 20 kongregasyon enn deryer lot e i pas en semenn avek sak kongregasyon de fwa par an. Leksperyans sa bann frer ek zot madanm, si zot marye, i kapab ankouraz nou en kantite. Zot aprann konn tou dimoun, ki swa zenn ouswa aze e zot kontan pour akonpanny nou dan predikasyon e dan bann letid Labib ki nou annan. Sa bann sirveyan ek bann ansyen dan kongregasyon i vizit bann frer ek ser pour fortifye zot e zot fer bann diskour ankourazan dan bann renyon ek lasanble.​—Akt 15:35.

Zot enterese avek tou dimoun. Bann sirveyan rezyonal i vreman enterese avek spirityalite bann manm kongregasyon. Zot zwenn avek bann ansyen ek asistan ministeryel pour get progre kongregasyon e donn zot bann konsey pour pli byen desarz zot responsabilite. Zot ed bann pionye pour reisi dan zot minister. Zot fer konnesans avek bann nouvo e gete ki mannyer zot pe progrese. Zot tou zot bann “kanmarad travay” ki pe servi nou. (2 Korentyen 8:23) Nou devret imit zot lafwa ek zot devosyon pour Bondye.​—Ebre 13:7.

• Akoz bann sirveyan rezyonal i vizit bann kongregasyon?

• Ki mannyer nou kapab benefisye avek zot vizit?

Ler en dezas natirel i frap en landrwa, Temwen Zeova i deswit organiz lasistans ek led sekour pour bann frer ek ser ki’n ganny afekte. Sa bann zefor i demontre lanmour senser ki zot annan pour kanmarad. (Zan 13:34, 35; 1 Zan 3:17, 18) Ki mannyer nou kapab ede?

Nou kapab donn larzan. Ler i ti annan en gran lafanmin Zide, bann Kretyen dan premye syek dan lavil Antyos ti anvoy larzan pour zot bann frer ek ser spirityel. (Akt 11:27-30) Pareyman, ler nou konnen ki nou bann frer ek ser dan serten parti lemonn pe rankontre difikilte, nou kapab anvoy larzan atraver nou kongregasyon pour ki bann ki dan bezwen i resevwar led materyel apropriye.​—2 Korentyen 8:13-15.

Nou ofer led sekour. Bann ansyen ki reste dan en landrwa kot en dezas in frape i esey zwenn tou bann manm kongregasyon pour vwar si zot sen e sof e si zot bezwen led. En komite sekour i kapab organiz distribisyon manze, delo prop, lenz, landrwa reste ek led medikal. Bokou Temwen ki annan abilite dan konstriksyon i volonter pour depans zot prop larzan ek letan pour partisip dan travay sekour, repar bann lakaz ek Lasal Rwayonm. Linite nou lorganizasyon e leksperyans ki nou’n gannyen par travay ansanm i ed nou pour kapab ed lezot ki dan bezwen vitman. Nou ed “nou bann frer dan lafwa,” me nou osi asiste lezot dimoun si i posib.​—Galat 6:10.

Nou ed lezot spirityelman e emosyonnelman. Bann viktim en dezas natirel i byen bezwen rekonfor. Dan bann letan koumsa, nou ganny lafors avek Zeova, sa “Bondye ki touzour donn konsolasyon.” (2 Korentyen 1:3, 4) Nou kontan pour koz lo bann promes Labib avek bann ki dan dezespwar e asir zot ki byento Rwayonm Bondye pou anmenn en lafen avek tou bann maler ki fer nou soufer.​—Revelasyon 21:4.

• Akoz Temwen Zeova i kapab reazir vitman ler i annan en dezas?

• Ki mannyer nou kapab rekonfort spirityelman bann viktim dezas?

Zis avan son lanmor, Zezi ti fer en konversasyon prive avek kat son bann disip, Pyer, Zak, Zan ek Andre. Letan Zezi ti pe koz lo siny son prezans pandan bann dernyen zour, i ti demann en kestyon byen enportan: “Lekel sa [“lesklav fidel e pridan,” NW] ki son met in plas ansarz tou lezot serviter pour donn zot zot manze kan i ler?” (Matye 24:[3, 45, NW]; Mark 13:3, 4) Zezi ti pe asir son bann disip ki konman zot “met,” i ti pou apwent serten dimoun ki ti pou donn son bann disip dan letan lafen nouritir spirityel regilyerman. Lekel sa lesklav dan nou letan?

I en pti group Kretyen swazir ki bann disip Zezi. Sa “lesklav” se li menm li Konsey Direkter Temwen Zeova. I pe donn nouritir spirityel bann adorater fidel Zeova. Nou depan lo sa lesklav fidel pour kontinyen donn nou nou “rasyon manze kan i ler.”​—Lik 12:42.

I responsab “lafanmir Bondye.” (1 Timote 3:15) Zezi ti donn sa lesklav sa gro responsabilite pour pran swen avek travay lorganizasyon Zeova lo later. Sa i enkli tou bann byen materyel lorganizasyon, diriz travay predikasyon ek lansennyman dan nou bann kongregasyon. Pour kapab donn nou sa ki nou bezwen kan nou bezwen li, lesklav fidel e pridan i donn nou sa nouritir spirityel atraver bann piblikasyon ki nou servi dan nou minister e atraver progranm ki ganny prezante dan nou bann renyon kongregasyon ek lasanble.

Sa lesklav i fidel dan sa sans ki i fidel avek bann laverite ki dan Labib ek son misyon pour pres sa bon nouvel. I pridan dan sa sans ki i saz dan lafason ki i pran swen avek lentere Kris lo later. (Akt 10:42) Zeova pe beni travay sa lesklav e sa i evidan ler ou get logmantasyon dan pep Zeova e labondans nouritir spirityel ki nou annan.​—Izai 60:22; 65:13.

• Zezi in apwent lekel pour nouri son bann disip spirityelman?

• Dan ki sans sa lesklav i fidel e pridan?

Dan premye syek, “bann zapot ek bann ansyen Zerizalenm” ti form en konsey direkter ki ti pran bann desizyon enportan pour tou bann Kretyen swazir sa letan. (Akt 15:2) Kan zot tou zot ti tonm dakor lo en desizyon, i ti akoz zot ti’n egzamin sa ki Labib i dir e les lespri sen Bondye diriz zot. (Akt 15:25) Konsey Direkter pe swiv menm legzanp ozordi.

Bondye i servi li pour akonplir son lavolonte. Bann frer swazir lo Konsey Direkter i annan en gran lentere dan Parol Bondye e zot eksperyanse lo konman pour rezourd bann sityasyon e tret bann problenm spirityel. Konsey Direkter i zwenn tou le semenn pour egzamin bezwen tou bann Kretyen dan lemonn. Parey dan premye syek, Konsey Direkter i donn bann lenstriksyon baze lo Labib atraver bann let, bann sirveyan ki vizit bann kongregasyon e dan lezot fason ankor. Sa i fer ki pep Bondye i ini dan zot krwayans e dan sa ki zot fer. (Akt 16:4, 5) Konsey Direkter i responsab preparasyon nouritir spirityel, i organiz travay predikasyon e i responsab pour apwent bann frer ki annan bann responsabilite dan lorganizasyon.

I swiv gidans lespri sen Bondye. Konsey Direkter i rod gidans Zeova, Souvren liniver ek Zezi, Sef kongregasyon. (1 Korentyen 11:3; Efezyen 5:23) Bann manm lo Konsey Direkter pa konsider zot konman sef pep Bondye. Parey lezot Kretyen swazir, “zot swiv Lanyo [Zezi] partou kot i ale.” (Revelasyon 14:4) Konsey Direkter i apresye ler nou priy pour zot.

• Lekel ki ti form parti konsey direkter dan premye syek?

• Ki mannyer Konsey Direkter i rod gidans Bondye?

Betel i en non Ebre ki vedir “Lakaz Bondye.” (Zenez 28:17, 19, not) Sa i en non apropriye pour bann batiman ki Temwen Zeova i servi dan lemonn antye pour diriz e organiz travay predikasyon. Konsey Direkter i desarz son responsabilite kot biro prensipal Temwen Zeova dan leta New York, Leta-z-ini e i siperviz aktivite bann biro brans dan plizyer lezot pei. Konman en group, bann ki travay kot sa bann batiman i ganny apele lafanmir Betel. Parey en fanmir, zot viv, travay, manze e etidye Labib ansanm dan linite.​—Psonm 133:1.

En landrwa vreman spesyal kot lafanmir Betel i sakrifye zot lekor. Dan sak Betel, i annan bann zonm ek fanm Kretyen ki pe donn zot letan pour fer lavolonte Bondye e travay a plen tan pour promot lentere Rwayonm. (Matye 6:33) Zot pa ganny peye, me zot ganny manze ek en landrwa reste ensi ki en pti alawenns pour bann depans personnel. Tou dimoun dan Betel i annan en travay, ki swa dan lofis, lakwizin oubyen lasal a manze. Serten i travay dan lenprimri, kot i fer liv, netwayaz, lave e dres lenz, mentenans ouswa lezot travay ankor.

En landrwa kot dimoun i travay dir pour siport predikasyon. Lobzektif tou bann Betel dan lemonn se pour ed plis dimoun posib pour konn laverite. Sa pti liv i en legzanp sa travay ki ganny fer dan Betel. Konsey Direkter ti siperviz travay pour ekrir sa pti liv. I ti ganny anvoye kot bann lekip tradiksyon dan lemonn atraver Enternet. I ti ganny enprimen dan bann lenprimri Betel e ganny anvoye dan plis ki 110,000 kongregasyon. Dan tou sa bann letap, lafanmir Betel i zwe en rol esansyel pour siport sa travay pli enportan ki annan, setadir pres sa bon nouvel.​—Mark 13:10.

• Lekel ki travay dan Betel e ki laranzman i annan pour zot kapab viv dan Betel?

• Ki travay enportan ki tou servis dan Betel i ede akonplir?

Lafanmir Betel i travay dan diferan departman ki okip travay predikasyon dan enn oubyen plizyer pei. Zot kapab pe travay dan bann lekip tradiksyon, enprim bann magazin, fer bann liv, travay dan stor piblikasyon, prodwi bann lanrezistreman odyo ek film, oubyen pran swen avek okenn lezot keksoz dan sa pei.

Komite biro brans i siperviz travay predikasyon. Konsey Direkter i donn responsabilite en komite trwa oubyen plis ansyen kalifye pour pran swen avek sak biro brans Temwen Zeova. Sa komite i enform Konsey Direkter konsernan bann travay ki pe ganny fer dan sak pei ki tonm anba zot responsabilite e si i annan okenn problenm ki leve. Sa bann rapor i ed Konsey Direkter pour deside ki size ki devret ganny egzaminen dan bann prosen piblikasyon e dan bann renyon ek lasanble. Bann reprezantan Konsey Direkter i ganny anvoye regilyerman pour vizit bann biro brans e donn gidans bann manm biro brans pour zot kapab byen desarz zot responsabilite. (Proverb 11:14) I annan en diskour spesyal ankourazan ki reprezantan biro prensipal i fer dan sa landrwa kot i’n ganny anvoye.

Biro brans i donn sipor bann kongregasyon. Bann frer responsab kot bann biro brans i donn laprouvasyon pour form bann nouvo kongregasyon. Sa bann frer i osi diriz aktivite bann pionye, misyonner ek sirveyan rezyonal ki tonm anba zot responsabilite. Zot organiz bann diferan lasanble, konstriksyon bann nouvo Lasal Rwayonm e fer sir ki bann kongregasyon i ganny lakantite piblikasyon ki zot bezwen. Tou sa ki ganny fer kot en biro brans i kontribye pour ki travay predikasyon i ganny fer dan en fason annord.​—1 Korentyen 14:33, 40.

• Ki mannyer bann Komite Biro Brans i ed Konsey Direkter?

• Ki responsabilite ki en biro brans i okipe?

Pour ki sa bon nouvel i ganny prese avek “tou nasyon, tribi, lalang ek pep,” nou pibliy bann liv ek magazin dan plis ki 750 langaz. (Revelasyon 14:6) Ki mannyer nou akonplir en tel travay? Nou kapab fer li avek led bann frer dan lemonn ki ekri sa bann lartik e en group tradikter devoue ki tradwir sa bann lartik. Zot tou zot Temwen Zeova.

Nou bann piblikasyon i ganny ekrir an Angle. Konsey Direkter i siperviz travay pour ekrir nou bann piblikasyon kot biro prensipal Temwen Zeova. I annan en departman ki kordin travay bann ki ekrir nou bann piblikasyon kot biro prensipal e dan serten biro brans. Lefet ki nou bann piblikasyon i ganny ekrir par bann dimoun sorti dan diferan kiltir, sa i fer ki bann size dan nou bann piblikasyon i enteres bann dimoun dan lemonn antye.

Nou piblikasyon an Angle i ganny anvoye kot bann tradikter. Apre ki bann lartik in ganny ekrir e aprouve dan langaz Angle, i ganny anvoye kot tou bann tim tradiksyon dan lemonn atraver Enternet, kot zot tradwir, verifye e lir zot tradiksyon. Zot fer tou pour servi bann “parol laverite ki egzakt” pour kapab tradwir sa menm lide ki teks orizinal pe fer resorti.​—Eklezyast 12:10.

Konpiter i ede fer sa travay pli vit. En konpiter pa pou kapab ranplas bann ki ekrir e tradwir. Me, ler zot servi bann diksyonner ek lezot zouti lengwistik ek resers lo konpiter, sa i fer zot akonplir zot travay pli vit. Temwen Zeova in met an plas en sistenm ki apel Multilanguage Electronic Publishing System (MEPS). Sa progranm lo konpiter i ede pour ki bann teks ek portre nou bann piblikasyon dan diferan langaz i ganny prepare pour zot ganny enprimen.

Akoz nou fer tou sa bann zefor, menm pour bann langaz kot pa bokou dimoun ki koz li? Parski i lavolonte Bondye ki “tou [sort] dimoun i ganny sove e ganny konnesans laverite.”​—1 Timote 2:3, 4.

• Ki travay ki ganny fer pour ekrir nou bann piblikasyon?

• Akoz nou tradwir nou bann piblikasyon dan sa kantite langaz?

Nou lorganizasyon i pibliy e distribye plizyer milyon Labib ek lezot piblikasyon sak lannen san fer peye. Nou konstri e mentenir bann Lasal Rwayonm ek biro brans. Nou pran swen avek plizyer milye Betelit ek misyonner e nou organiz bann led sekour ler bann dezas i frap en landrwa. Kekfwa ou demande: ‘Kote zot ganny larzan?’

Nou pa sarz okenn larzan, demann ladim ouswa pas laket. Menm si i demann bokou larzan pour organiz travay predikasyon, nou pa zanmen demann larzan. Plis ki san-t-an pase, dezyenm nimero Latour Veyer an Angle ti dir ki nou konnen Zeova pou siport nou e ki nou pa pou “zanmen mandyan ouswa fors dimoun pour siport nou” e nou pa’n zanmen fer li.​—Matye 10:8.

Nou bann aktivite i ganny siporte atraver bann kontribisyon volonter. Bokou dimoun i kontan nou travay edikasyonnel lo Labib e zot kontan pour kontribye. Bann Temwen zot menm zot kontan pour donn zot letan, lenerzi, larzan ek lezot resours ankor pour ki lavolonte Bondye i ganny fer lo later antye. (1 Kronik 29:9) I annan bann bwat kontribisyon dan Lasal Rwayonm e kot lasanble i ganny fer pour ki bann ki oule i kapab fer kontribisyon. An zeneral, bann dimoun ki pa sitan ris ki kontribye. I en pti pe parey sa vev pov ki ti met de pti sou dan bwat larzan dan tanp ki Zezi ti koz an byen lo la. (Lik 21:1-4) Alor, nenport ki i kapab regilyerman “met dekote” en pti larzan pour “donn dapre sa ki i’n deside.”​—1 Korentyen 16:2; 2 Korentyen 9:7.

Nou konvenki ki Zeova pou kontinyen motiv sa bann ki anvi servi bann keksoz valer ki zot annan pour siport sa travay predikasyon pour ki son lavolonte i ganny akonplir.​—Proverb 3:9.

• Kwa ki fer nou lorganizasyon diferan avek lezot larelizyon?

• Bann kontribisyon i ganny servi pour kwa?

Parey sa non Lasal Rwayonm i montre, sa landrwa i prensipalman ganny servi pour ansenny bann dimoun lo Rwayonm Bondye ki ti tenm minister Zezi lo later.​—Lik 8:1.

Lasal Rwayonm i sant vre ladorasyon dan kominote. Lasal Rwayonm i sant kot Temwen Zeova i organiz zot travay predikasyon dan en serten landrwa. (Matye 24:14) I annan diferan grander Lasal Rwayonm, me laplipar i annan en striktir tre senp kot plis ki en kongregasyon i rasanble. Tou dernyenman, nou’n konstri plizyer milye nouvo Lasal Rwayonm, (an mwayenn senk par zour) akoz i touzour annan logmantasyon dan lakantite proklanmater ek kongregasyon. Ki mannyer sa i posib?​—Matye 19:26.

Larzan pour konstri Lasal Rwayonm i sorti dan fon mondyal. Sa larzan i ganny anvoye kot biro brans pour ki i ganny servi pour konstri ouswa repar bann Lasal Rwayonm dan bann landrwa kot i annan bezwen.

Tou sort kalite volonter i vin ede dan konstriksyon. Dan plizyer pei, i annan bann Group Konstriksyon Lasal Rwayonm ki’n ganny etablir. Bann lekip konstriksyon ek volonter i kapab konstri lasal dan plizyer landrwa dan en pei e zot menm al dan bann landrwa byen lwen pour ed bann kongregasyon avek konstriksyon zot Lasal Rwayonm. Dan lezot pei, bann Temwen kalifye in ganny apwente pour sirvey proze konstriksyon ek reparasyon Lasal Rwayonm dan en serten rezyon. Menm si bokou ki eksperyanse dan konstriksyon sorti dan en serten rezyon i volonter pour travay lo sak proze konstriksyon, mendev i sorti prensipalman dan kongregasyon. Lespri sen Zeova e zefor bann volonter i fer tousala posib.​—Psonm 127:1; Kolosyen 3:23.

• Akoz nou apel landrwa kot nou ador Bondye Lasal Rwayonm?

• Ki mannyer nou fer pour konstri bann Lasal Rwayonm partou dan lemonn?

Tou Lasal Rwayonm Temwen Zeova i port non sen Bondye. Alor, nou santi ki i enportan pour gard sa batiman prop, annord e an bonn eta e ki sa i form parti nou ladorasyon. Tou dimoun i kapab partisipe.

Ou kapab volonterman partisip dan netwayaz apre renyon. Apre sak renyon, bann frer ek ser i kontan pour fer en pti netwayaz pour met annord Lasal Rwayonm. Tou le semenn, en netwayaz zeneral i ganny fer. En ansyen ouswa asistan ministeryel i organiz travay e souvan zot annan en lalis bann keksoz ki i annan pour fer. Depandan lo nesesite, bann volonter i balye, pas mop, pas sifon, netway vit, netway kabinen, laglas, zet salte, anmas fey e netway an deor Lasal. Omwen enn fwa par an i annan en gran netwayaz afon ki ganny fer. Ler nou fer nou zanfan partisip dan netwayaz, sa i en bon fason pour ed zot demontre respe pour landrwa ladorasyon.​—Eklezyast 5:1.

Donn lanmen pour repare ler i neseser. Sak lannen i annan en lenspeksyon ki ganny fer anndan e an deor Lasal Rwayonm. Baze lo sa lenspeksyon, bann pti reparasyon regilye i ganny fer pour ki lasal i reste dan en bon kondisyon e i ede pour ki napa tro gran depans apre. (2 Kronik 24:13; 34:10) En Lasal Rwayonm prop e an bonn eta i en landrwa ki glorifye Zeova. Ler nou partisip dan sa travay, nou montre ki kantite nou kontan e apresye Zeova e nou landrwa ladorasyon. (Psonm 122:1) I osi donn en bon temwannyaz pour bann dimoun dan kominote.​—2 Korentyen 6:3.

• Akoz nou pa devret negliz nou landrwa ladorasyon?

• Ki laranzman ki ganny fer pour kit Lasal Rwayonm prop?

Eski ou ti pou kontan fer resers pour ogmant ou konnesans lo Labib? Eski ou anvi konn plis lo en verse, en dimoun, en landrwa ouswa en keksoz ki ganny mansyonnen dan Labib? Oubyen eski petet ou’n mazinen si Parol Bondye i kapab ed ou avek en problenm personnel ki ou annan? Dan sa ka, akoz ou pa al fer resers dan bibliotek kongregasyon.

Ou kapab fer bann resers. Tre probab ou napa tou bann piblikasyon baze lo Labib ki Temwen Zeova in pibliye an Kreol, Angle oubyen Franse. Me kot bibliotek Lasal Rwayonm i annan tou bann piblikasyon pli resan. I osi kapab annan serten tradiksyon Labib, en bon diksyonner ek detrwa lezot liv referans. Avan e apre renyon, ou kapab fer bann resers dan bann liv ki annan dan bibliotek. Si i annan en konpiter, ou kapab servi Watchtower Library. Lo sa progranm, i annan bann piblikasyon depi plizyer lannen e i fasil pour fer resers lo sa progranm akoz ou kapab fer resers lo en size, en mo ouswa en verse Labib.

I itil pour bann zelev ki dan Renyon Nou minister ek lavi Kretyen. Ou kapab servi byen bibliotek Lasal Rwayonm pour prepar ou bann ekspoze. Sirveyan Renyon Nou minister ek lavi Kretyen ki responsab okip bibliotek. I responsab pour fer sir ki tou bann dernyen piblikasyon i la e ki i annord. Sirveyan Renyon Nou minister ek lavi Kretyen ouswa sa enn ki etidye Labib avek ou i kapab montre ou ki mannyer ou pou rod bann lenformasyon neseser. Me, okenn liv pa devret ganny pran kot Lasal Rwayonm pour anmenn kot ou. Byensir, nou anvi pran byen swen avek sa bann liv e pa ekrir ladan.

Labib i dir ki pour nou “trouv konnesans konsernan Bondye,” fodre absoliman nou pare pour rod li “konmsi [nou] pe rod bann trezor kasyet.” (Proverb 2:1-5) Bibliotek Lasal Rwayonm i kapab ed ou pour konmans aprann fer resers.

• Ki resers ou kapab fer dan bibliotek Lasal Rwayonm?

• Lekel ki kapab ed ou pli byen servi bibliotek?

Zezi Kri ti dir son bann disip: “Zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.” (Matye 5:16) Pour arive fer sa, nou pe byen servi bann teknolozi modern ensi ki Enternet. Nou sit Enternet ofisyel i lo jw.org. I annan bann lenformasyon konsernan nou krwayans ek aktivite bann Temwen Zeova. Ki kalite lenformasyon i annan lo sa sit?

Bann larepons baze lo Labib pour bann kestyon. Ou kapab trouv larepons bann kestyon pli enportan ki dimoun i demann zot lekor. Par egzanp, sa trak Eski soufrans pou fini en zour? e sa trak Eski bann mor i vreman kapab viv ankor? i disponib lo nou sit Enternet dan plis ki 600 langaz. Ou osi kapab trouv New World Translation dan plis ki 130 langaz e osi bann liv ki ede pour konpran mesaz Labib. Parmi i annan sa liv Ki Labib i vreman dir? e bann dernyen Latour Veyer ek Awake! Bokou parmi sa bann piblikasyon i kapab ganny lir lo sa sit menm ouswa i kapab ganny download dan bann format ki souvan ganny servi, tel parey MP3, PDF oubyen EPUB. Ou menm kapab enprim enn de paz pour montre en lot dimoun dan son prop langaz. I osi annan bann video ki disponib dan plizyer langaz siny. Ou menm kapab download bann dramatic Bible readings, Bible dramas ek bann zoli lanmizik pour ou prop plezir.

Bann lenformasyon egzakt lo Temwen Zeova. I osi annan bann dernyen nouvel ek pti video lo nou travay predikasyon mondyal, bann sityasyon ki enplik Temwen Zeova ensi ki nou travay imaniter. Ou kapab trouv lenformasyon konsernan bann lasanble ek kontak nou bann biro brans.

Atraver sa bann dispozisyon, lalimyer laverite pe eklere dan bann landrwa pli elwannyen lo later. Dimoun sorti dan diferan kontinan, enkli Antartik, pe benefisye. Nou priye ki parol Zeova “i kontinyen repann rapidman” lo later antye pour loue Bondye.​—2 Tesalonisyen 3:1.

• Ki mannyer jw.org pe ed plis dimoun pour aprann laverite?

• Ki resers ou ti a kontan fer lo nou sit Web?