Bokou dimoun in aret asiste bann servis relizye akoz zot pa ganny okenn gidans ouswa rekonfor spirityel. Me, akoz ou devret asiste bann renyon Kretyen ki Temwen Zeova i organize? Ki ou pou trouve laba?

Lazwa pour zwenn bann dimoun ki kontan e pran swen avek lezot. Dan premye syek, bann Kretyen ti ador Bondye ansanm, etidye Labib e ankouraz kanmarad dan kongregasyon. (Ebre 10:24, 25) I ti annan lanmour antre zot, e sa ti fer zot santi ki zot bann frer ek ser spirityel ti zot bann vre zanmi. (2 Tesalonisyen 1:3; 3 Zan 14) Nou fer parey konmela e nou resanti en gran lazwa.

Byenfe pour aprann konman pour aplik sa ki Labib i dir. Zis parey dan letan lontan, bann zonm, fanm ek zanfan i regilyerman zwenn ansanm. Bann ansenyan kalifye i montre nou konman pour met an pratik bann prensip Labib dan nou lavi tou le zour. (Deterononm 31:12; Neemya 8:8) Nou tou nou kapab partisip dan bann diskisyon lo Labib e sant kantik ansanm. Dan sa fason, nou kapab koz lo nou lespwar Kretyen.​—Ebre 10:23, NW.

Benediksyon akoz nou lafwa dan Bondye i ganny fortifye. Zapot Pol ti dir en kongregasyon dan son letan: “Mon annan en gran dezir war zot, . . . pour ki nou kapab ansanm benefisye lankourazman: mwan par zot lafwa e zot par mon lafwa.” (Romen 1:11, 12) Ler nou kontinyelman zwenn avek lezot dan bann renyon, sa i ranforsi nou lafwa ek nou determinasyon pour viv konman vre Kretyen.

Akoz ou pa aksepte sa lenvitasyon pour asiste prosen renyon e eksperyans sa bann keksoz pour ou menm? Ou pou ganny byen akeyir. Tou renyon i gratwit, napa laket ki ganny pase.

• Ki legzanp nou swiv pour organiz nou renyon dan kongregasyon?

• Ki byenfe nou gannyen kan nou asiste bann renyon?

Menm si nou bezwen pas dan bwa ouswa dan movetan, nou asiste nou bann renyon regilyerman. Menm si zot rankontre bann difikilte dan zot lavi ouswa zot fatige apre en lazournen travay, akoz Temwen Zeova i fer sa zefor pour asosye avek lezot Kretyen?

I pour nou prop dibyen. Ler i ti pe koz lo bann ki nou zwenn dan kongregasyon, Pol ti dir: “Annou rode konman pous kanmarad.” (Ebre 10:24) Sa lekspresyon “annou rode konman” i donn sa lide ki nou bezwen pran letan pour konn lezot. Savedir, parol zapot Pol pe ankouraz nou pour demontre lentere dan lezot. Ler nou aprann konn lezot fanmir Kretyen, nou kapab vwar ki mannyer zot in sirmont serten problenm ki petet nou osi nou pe rankontre e zot kapab ed nou reisi fer fas avek sa bann problenm.

I ed nou pour annan bann zanmi fidel. Dan nou bann renyon, nou pa zis zwenn ansanm avek bann dimoun ki nou konnen koumsa menm, me nou zwenn bann zanmi pros. Dan lezot moman, nou pas letan dan bann bon detant ansanm. Ki lefe pozitif sa i kapab annan? Nou aprann apresye kanmarad plis e nou lanmour pour zot i vin pli for. Ler nou bann frer ek ser dan kongregasyon i rankontre bann problenm, nou pare pour ed zot akoz nou lanmitye i solid. (Proverb 17:17) Ler nou asosye avek tou dimoun dan kongregasyon, nou montre ki nou pe donn “swen egal enn a lot.”​—1 Korentyen 12:25, 26.

Nou ankouraz ou pour vin zanmi avek sa bann ki fer lavolonte Bondye. Ou pou ganny bann zanmi koumsa parmi Temwen Zeova. Pa les nanryen anpes ou asosye avek nou.

• Akoz i byen pour nou asosye avek lezot kot Lasal Rwayonm?

• Kan ki ou ti pou kontan asiste renyon e konn bann frer ek ser dan kongregasyon?

Dan bann renyon Kretyen premye syek, bann Kretyen ti sante, priye, lir e koz lo Labib. I ti napa okenn seremoni ki ti ganny fer. (1 Korentyen 14:26) Preski menm keksoz i pase dan nou bann renyon.

Bann lansennyman i baze lo Labib e i pratik. Dan wikenn, sak kongregasyon i zwenn pour ekout en diskour 30 minit baze lo Labib ki montre konman ki Labib i ed nou dan nou lavi e osi dan sa letan ki nou pe viv. Nou tou nou ganny ankouraze pour swiv dan nou prop Labib. Apre sa diskour, i annan Letid “Latour Veyer” ki al pour enn erdtan kot bann manm kongregasyon i kapab partisip dan en diskisyon baze lo en lartik letid dan en nimero Latour Veyer. Sa diskisyon i ed nou pour aplik konsey Labib dan nou lavi. Sa menm lartik i ganny etidye dan sa plis ki 110,000 kongregasyon Temwen Zeova dan lemonn antye.

Nou ganny led pour ansenny pli byen. Nou osi zwenn en zour pandan lasemenn pour en renyon an trwa parti ki annan pour tit Nou minister ek lavi Kretyen, baze lo lenformasyon ki ganny trouve dan Nou minister ek lavi Kretyen—Kaye renyon. Premye parti sa renyon, Bann trezor dan Parol Bondye, i ed nou pour pli byen konpran en porsyon Labib ki kongregasyon in lir davans. Dan dezyenm parti, Prepar byen pour predikasyon, i annan bann demonstrasyon ki ed nou amelyor nou abilite pour lir e koze. (1 Timote 4:13) Trwazyenm parti, Viv konman en Kretyen, i diskit lo bann diferan fason ki nou kapab aplik bann prensip Labib dan nou lavi toulezour. Sa i enkli en diskisyon par kestyon ek larepons ki ed nou pli byen konpran Labib.

Kan ou asiste nou bann renyon, san okenn dout ou pou enpresyonnen par sa kantite lansennyman baze lo Labib ki ou pou gannyen.​—Izai 54:13.

• Ki ou ekspekte tande kot renyon Temwen Zeova?

• Ki prosen renyon ki ou ti pou kontan vin asiste?

Lo bann portre dan sa pti liv, eski ou’n remarke ki Temwen Zeova i sanz byen pour asiste zot bann renyon dan kongregasyon? Akoz nou resanz ek laparans i sitan enportan pour nou?

I demontre respe pour Bondye. I vre ki Bondye pa get nou zis par nou laparans. (1 Samyel 16:7) Me, ler nou zwenn pour ador li, nou senserman oule demontre respe pour li e pour lezot Kretyen dan kongregasyon. Si nou ti pou bezwen debout devan en ziz ankour, pa nou ti pou vey byen nou fason sanze pour demontre respe pour sa ziz! Pareyman, nou fason sanze pour renyon i montre ki nou annan respe pour Zeova, “sa Ziz lo later antye,” e pour sa landrwa kot nou ador li.​—Zenez 18:25.

I reflekte bann prensip ki nou swiv. Labib i ankouraz bann Kretyen pour abiy “dan en fason konvenab e senp.” (1 Timote 2:9, 10) Sanz dan en “fason konvenab” i vedir ki nou pa met bann lenz ki atir tro bokou latansyon lo nou, ki swa i tro ekstravagan, provokan ouswa i tro kole oubyen dekolte. Sanz dan en fason “senp,” i vedir ki nou met bann zoli lenz ki pa devergonde oubyen drol. Menm si sakenn i annan son preferans personnel, nou devret touzour gard sa prensip antet. Menm san ki nou koze, en zoli resanz apropriye i kapab fer “loner lansennyman lo Bondye, nou Sover” e “rann glwar Bondye.” (Tit 2:10; 1 Pyer 2:12) Nou fason sanze pour vin renyon pou annan en lefe lo lafason ki lezot i konsider nou ladorasyon pour Zeova.

Par kont, lafason ki ou sanze pa devret zanmen anpes ou asiste renyon. Pa fodre ki nou met lenz ser ouswa dernyen lanmod. Si i prezantab, prop e apropriye, sa i sifi.

• Akoz nou fason sanze pour ador Bondye i vreman enportan?

• Ki bann prensip ki kapab ed nou pour annan en bon laparans e sanz dan en fason apropriye?

Si ou pe etidye Labib avek en Temwen Zeova, tre probab ou pe esey prepar sa lenformasyon avan ki zot etidye li ansanm. Pli bon fason pour benefisye avek renyon kongregasyon se ler ou byen prepare davans. Nou pou ganny pli bon rezilta si nou’n pran labitid pour byen prepare.

Deside ki ler e kote ou pou etidye. Kan ki ou pli byen konsantre? Eski se granmaten avan ou al travay ouswa aswar ler zanfan in al dormi? Menm si ou pa kapab etidye pour bokou letan, deside konbyen letan ou pou etidye e pa les nanryen enteronp ou. Rod en landrwa trankil kot napa nanryen ki pou distrer ou, tenny radyo, televizyon ek telefonn. Priye avan etidye pou ed ou tir presyon lazournen pour ki ou konsantre lo Parol Bondye.​—Filipyen 4:6, 7.

Soulinyen e prepar ou pour partisipe. Premyerman ou bezwen annan en apersi lo sa size ki ou pe al etidye. Reflesir lo tit sa lartik ouswa sapit e ki mannyer bann soutit i relye avek sa tit. Get bann portre e egzamin bann kestyon revizyon akoz zot relye avek bann pwen prensipal. Apre, lir sak paragraf e rod larepons sa kestyon ki anba lo paz. Rod e lir bann verse dan ou Labib ki ganny mansyonnen e reflesir lo ki mannyer zot relye avek bann lenformasyon dan paragraf. (Akt 17:11) Ler ou kapab reponn sa kestyon, souliny sa detrwa mo ouswa bout fraz dan sa paragraf ki pou fer ou rapel larepons. Ler ou pe asiste renyon, ou kapab lev lanmen e fer en komanter bref dan ou prop mo.

Anmezir ou etidye diferan size sak semenn dan renyon, sa pou ogmant ou konnesans lo Bondye e i pou vin parey en “trezor.”​—Matye 13:51, 52.

• Ki labitid ou devret annan an rapor avek preparasyon renyon?

• Ki mannyer ou kapab prepare pour reponn dan renyon?

Dan letan lontan, Zeova ti oule ki sak fanmir i pas letan avek kanmarad pour fortifye e batir zot fanmir spirityelman. Ozordi osi i parey. (Deterononm 6:6, 7) Sanmenm rezon ki Temwen Zeova i met en serten letan dekote sak semenn pour ador Bondye an fanmir kot lakour, kot zot byen alez pour diskit lo bann keksoz spirityel ki aplikab pour zot fanmir. Menm si ou reste tousel, ou kapab byen servi sa moman pour pas sa letan avek Bondye ler ou pe etidye Labib personnelman lo en size ki ou’n swazir.

En letan pour vin pli pros avek Zeova. “Apros avek Bondye, e i ava apros avek zot.” (Zak 4:8) Nou pou konn Zeova pli byen ler nou aprann bann detay lo son personnalite ek aksyon atraver sa ki nou lir dan son Parol Labib. En bon fason pour konmans Ladorasyon Fanmir se par lir en porsyon Labib ansanm aotvwa, an swivan progranm lasemenn pour Renyon Nou minister ek lavi Kretyen. Sakenn i kapab lir en bout e apre dir sa ki i’n aprann dan sa lektir Labib.

En letan pour bann fanmir vin pros avek kanmarad. Bann msye ek madanm ensi ki bann paran ek zanfan pou devlop plis lanmour pour kanmarad kan zot etidye Labib ansanm konman en fanmir. Sa moman i devret enn ki gou, trankil e enn parmi bann pli bon moman dan lasemenn. Depandan lo laz zot zanfan, paran i kapab swazir bann topik pratik pour koz lo la, petet an servan bann lartik dan Latour Veyer ek Awake! ouswa lo nou sit Enternet jw.org. Ou kapab koz lo en problenm ki ou zanfan pe rankontre kot lekol e vwar konman pour rezourd li. Oubyen akoz zot pa get en progranm ki lo JW Broadcasting (tv.jw.org) ansanm e apre diskit lo la? Ou osi kapab aprann sant bann kantik ki pou ganny sante pandan renyon e prepar bann pti rafresisman pour zot servi ansanm konman en fanmir.

Sa moman spesyal ki zot pase tou le semenn konman en fanmir pou ed sak manm lafanmir pour trouv plezir pour etidye Parol Bondye e Bondye pou sirman beni zot zefor.​—Psonm 1:1-3.

• Akoz nou met letan dekote pour ador Bondye an fanmir?

• Ki mannyer paran i kapab fer sa moman gou pour lafanmir antye?

Akoz sa bann dimoun i dan lazwa? Parski zot pe asiste enn nou bann lasanble. Parey bann serviter Bondye dan lepase ki ti ganny demande pour rasanble trwa fwa par an, nou esper avek enpasyans pour zwenn ansanm dan bann pli gran group. (Deterononm 16:16) Tou le-z-an, nou annan trwa lasanble: de lasanble rezyonal en zour ek en lasanble rezyonal trwa zour. Ki byenfe nou gannyen avek sa bann rasanbleman?

I fer nou pli ini ansanm konman Kretyen. Zis parey bann Izraelit ti kontan loue Zeova “dan bann lasanble,” nou osi nou kontan pour ador li ansanm dan sa bann moman spesyal. (Psonm 26:12, not; 111:1) Sa bann rasanbleman i donn nou loportinite pour zwenn e asosye avek bann Temwen dan lezot kongregasyon oubyen menm avek bann ki sorti dan lezot pei. Pandan poz midi, nou manz ansanm dan sa landrwa kot lasanble pe ganny fer e sa i ede pour gard sa bon lantant antre nou konman zanmi pandan sa bann rasanbleman spirityel. (Akt 2:42) Dan sa bann gran lasanble, nou eksperyans pour nou menm sa lanmour ki ini nou bann frer ek ser dan lafwa dan lemonn antye.​—1 Pyer 2:17.

Lasanble i ed nou fer bann progre spirityel. Bann Izraelit ti osi benefisye ler zot ti “konpran” bann parol sorti dan Lekritir ki ti pe ganny eksplike. (Neemya 8:8, 12) Nou osi nou apresye bann lenstriksyon baze lo Labib ki nou gannyen kot nou bann lasanble. Sak progranm lasanble i baze lo en verse Labib. Atraver bann diferan diskour enteresan ek demonstrasyon, nou aprann konman pour fer lavolonte Bondye dan nou lavi. Nou ganny ankouraze kan nou tann leksperyans bann ki pe reisi fer fas avek bann defi ki zot eksperyanse konman Kretyen dan sa bann dernyen zour. Dan bann lasanble rezyonal trwa zour, bann resi Labib i ganny met an senn atraver bann pyes teat e nou kapab aprann bann leson pratik ladan. Dan sak lasanble, bann ki’n dedye zot lavi avek Bondye i ganny batize.

• Akoz bann lasanble i en moman zwaye?

• Ki byenfe ou kapab gannyen kan ou asiste lasanble?

Pa tro bokou letan avan son lanmor, Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Me ki mannyer sa travay mondyal ti pou ganny akonplir? I ti pou ganny fer par swiv legzanp ki Zezi in kite ler i ti lo later.​—Lik 8:1.

Nou esey zwenn bann dimoun kot zot lakour. Zezi ti ansenny son bann disip pour pres sa bon nouvel kaz an kaz. (Matye 10:11-13; Akt 5:42; 20:20) Sa bann evanzelizater dan premye syek ti ganny demande pour al pres dan bann landrwa spesifik. (Matye 10:5, 6; 2 Korentyen 10:13) Pareyman ozordi, nou predikasyon i byen organize e sak kongregasyon i ganny en serten landrwa spesifik kot zot prese. Sa i ed nou pour swiv lord Zezi pour “prese e anons” sa bon nouvel plennman.​—Akt 10:42.

Nou fer zefor pour koz avek tou dimoun nenport ki bor zot ete. Zezi ti osi kit sa legzanp akoz i ti pres avek bann dimoun dan bann landrwa piblik, parey o bor lakot ouswa kot pwi. (Mark 4:1; Zan 4:5-15) Nou osi nou fer konversasyon lo Labib avek bann dimoun kot nou kapab, ki swa lo semen, dan landrwa biznes, dan bann zarden piblik ouswa lo telefonn. Ler nou ganny en loportinite, nou osi rann temwannyaz avek nou vwazen, koleg travay, kanmarad lekol ek fanmir. Tou sa bann zefor i fer li posib pour ki plizyer milyon dimoun dan lemonn antye i tann ‘sa bon nouvel delivrans.’​—Psonm 96:2.

Eski ou mazin en dimoun ki ou ti a kontan koz avek lo sa bon nouvel konsernan Rwayonm Bondye? Eski ou ti a kontan eksplik li ki sa bon nouvel i vedir pour son lavenir? Pa bezwen gard sa mesaz zis pour ou. Desito ki ou kapab, koz avek lezot lo la.

• Ki ‘bon nouvel’ ki devret ganny anonse?

• Ki mannyer Temwen Zeova pe imit lafason ki Zezi ti prese?

Sa mo “pionye” ti souvan refer avek bann dimoun ki ti eksplor bann nouvo teritwar pour ki lezot i kontiny sa ki zot ti’n konmanse. Zezi ti parey en pionye akoz i ti ganny anvoye lo later pour konmans en travay ki sov lavi e donn loportinite bann imen pour ganny delivre. (Matye 20:28) Ozordi, son bann disip pe imit li akoz zot pas otan letan posib pour ‘fer disip.’ (Matye 28:19, 20) Serten in antreprann sa servis ki nou apel servis pionye.

En pionye i en dimoun ki partisip dan predikasyon a plen tan. Tou Temwen Zeova i proklanm sa bon nouvel. Me, serten in aranz zot progranm pour ki zot kapab vin pionye ordiner, setadir zot pas 70 erdtan tou le mwan pour prese. Pour fer sa, bokou i travay amitan olye a plen tan. Lezot in ganny swazir pour servi konman pionye spesyal dan bann landrwa kot i annan bezwen pour plis proklanmater e zot pas 130 erdtan ouswa plis par mwan pour prese. Bann pionye i satisfe avek zot lavi senp e zot annan konfyans ki Zeova pou donn zot sa ki zot bezwen dan lavi. (Matye 6:31-33; 1 Timote 6:6-8) Bann ki pa kapab fer pionye a plen tan, i kapab fer pionye asistan kan zot kapab, zot pas 30 ouswa 50 erdtan par mwan dan predikasyon.

En pionye i ganny motive par lanmour pour Bondye ek son prosen. Parey Zezi, nou remarke ki bokou dimoun ozordi i byen bezwen konn Bondye ek son plan. (Mark 6:34) Nou konn bann keksoz ki kapab ed zot la konmela e donn zot en lespwar pour lavenir. Lanmour pour son prosen i motiv en pionye pour volonterman dedye son letan ek lenerzi pour ed bann dimoun spirityelman. (Matye 22:39; 1 Tesalonisyen 2:8) Pour fini kont, lafwa sa pionye i ganny ranforsi, i vin pli pros avek Bondye e i ganny en kantite lazwa.​—Akt 20:35.

• Ki mannyer ou pou dekrir en pionye?

• Kwa ki motiv serten pour fer pionye a plen tan?

I fer en kantite letan depi ki formasyon teokratik i en laspe ki idantifye Temwen Zeova. I annan bann lekol spesyal an plas pour bann ki dedye tou zot letan pour pres lo Rwayonm Bondye pour ki zot kapab ‘ranpli zot devwar dan servis Bondye.’​—2 Timote 4:5.

Lekol Pionye. A lafen son premye lannen servis a plen tan, en pionye ordiner i ganny envite pour asiste en lekol sis zour ki kapab ganny fer dan en Lasal Rwayonm ki pros dan son rezyon. Bi sa lekol se pour ed sa pionye pour vin pli pros avek Zeova, pli efikas dan tou laspe predikasyon e kontinyen reste fidel dan son servis.

Lekol pour bann predikater Rwayonm. Sa lekol ki al pour de mwan in ganny fer pour form bann pionye eksperyanse ki pare pour kit zot lakour pour al servi dan bann teritwar kot i annan plis bezwen. Annefe, zot imit Zezi Kri sa pli gran Predikater ki’n deza viv lo later kan zot dir, “La mon la! Anvoy mwan.” (Izai 6:8; Zan 7:29) Vi ki zot pe kit zot lakour, alor zot bezwen adapte avek en lavi pli senp. Kiltir, klima ek manze i kapab totalman diferan avek sa ki zot ti abitye avek. I menm kapab neseser pour aprann en nouvo langaz. Sa lekol i ed bann frer ek ser selibater ek koup marye, ki aze ant 23 a 65 an pour devlop bann kalite spirityel ki zot pou bezwen dan zot servis e osi bann abilite ki pou permet zot ganny servi pli byen par Zeova ek son lorganizasyon.

Lekol Gilead. An Ebre “Gilead” i donn lide en “gran temwannyaz.” Depi ki Lekol Gilead ti konmanse an 1943, plis ki 8,000 etidyan ki’n termin zot formasyon dan sa lekol in ganny anvoye konman misyonner pour rann temwannyaz dan bann landrwa “pli lwen lo later” e avek bon rezilta. (Akt 13:47) Kan bann ki ti’n termin zot formasyon ti ariv Perou, i ti napa okenn kongregasyon dan sa pei. Konmela i annan plis ki 1,000. Kan nou bann misyonner ti konmans zot servis Zapon, i ti annan pa plis ki dis Temwen dan sa pei. Aprezan, i annan plis ki 200,000. Sa senk mwan formasyon dan Lekol Gilead i enkli en letid o profon Parol Bondye. Bann pionye spesyal oubyen misyonner, manm biro brans oubyen sirveyan rezyonal i ganny envite pour asiste sa lekol pour ganny formasyon entansif pour ede etablir e fer progrese sa travay ki pe ganny fer dan lemonn antye.

• Ki bi Lekol Pionye?

• Lekel ki kapab asiste Lekol pour bann predikater Rwayonm?