Lekel ki devret ansenny bann zanfan lo Bondye?
“En zelev i pa pli enportan ki son profeser, me sak zelev ki’n byen aprann i a vin parey son profeser.”—LIK 6:40.
SERTEN paran pa santi zot kalifye pour ansenny zot zanfan lo Bondye. Zot panse ki zot napa ase ledikasyon oubyen zot pa konn ase lo larelizyon pour vin bann bon ansenyan. Pour sa rezon, zot tant pour les sa responsabilite enportan dan lanmen bann manm zot fanmir oubyen bann ansenyan larelizyon.
Me an realite, lekel ki dan sa pli bon pozisyon pour ansenny zanfan bann prensip moral ek larelizyon? I enteresan pour konpar sa ki Labib i dir avek sa ki bann dernyen resers i dir lo sa size.
Ki rol en papa?
Sa ki Labib i dir: “Zot, bann papa, pa eksit lakoler zot zanfan, me okontrer, elve zot dan en ledikasyon ek lenstriksyon Senyer.”—Efezyen 6:4.
Sa ki bann spesyalis in dir: Ki byenfe bann papa i gannyen ler zot devlop bann konviksyon relizye ferm? Sa lartik Fathers’ Religious Involvement and Early Childhood Behavior, ki ti ganny pibliye an 2009 ti dir: “Bann ki enplike dan en group relizye i kapab vin bann pli bon papa. Zot ganny soutyen ek bon lenfliyans lezot e osi gidans ek lansennyman lo lafason pour viv zot lavi.”
Labib i met bokou lanfaz lo lenportans rol en papa pour elve e form son zanfan. (Proverb 4:1; Kolosyen 3:21; Ebre 12:9) Me, eski sa konsey i ankor aplikab ozordi. An 2009, Liniversite Florid Leta-z-ini ti pibliy en lartik lo lefe ki bann papa ti annan lo zot zanfan. Resers ti montre ki bann zanfan ki zot papa ti enplike dan zot ledikasyon ti pou pli souvan pran pitye pour lezot e santi zot annan valer. I ti annan plis sans ki garson i byen elve e ki fiy i annan en pli bon lasante mantal. Sirman, konsey Labib i ankor valab.
Akoz rol en manman i sitan enportan?
Sa ki Labib i dir: “Pa abandonn lalwa ou manman.”—Proverb 1:8.
Sa ki bann spesyalis in dir: An 2006, Handbook of Child Psychology ti dir: “An zeneral, bann manman i pas ant 65 a 80 poursan plis letan direkteman avek zot zanfan ki bann papa e sa i le ka dan bokou pei.” Vi ki sa manman i pas sa kantite letan avek son zanfan, son parol, aksyon ek latitid pou annan en gran lefe lo devlopman son zanfan.
Kan tou le de paran i travay ansanm pour ansenny zot zanfan laverite lo Bondye, zot pou donn zot omwen de kado presye. Premyerman, sa zanfan pou kapab devlop en lanmitye avek son Papa dan lesyel e sa pou benefisye li tou son lavi. Dezyenmman, sa zanfan pou aprann par legzanp ki mannyer en msye ek en madanm i devret korpere ansanm pour atenn bann lobzektif enportan. (Kolosyen 3:18-20) I vre ki lezot i kapab ed sa papa ek sa manman, me i responsabilite sa papa ek sa manman pour ansenny zot zanfan lo Bondye e lo lafason ki Bondye i oule lafanmir i fonksyonnen.
Me, konman bann paran i devret ansenny zot zanfan? Ki metod ki pli efikas pour ansenny zanfan?