Laverite lo Armagedon

“Bann lespri demon . . . ki al kot bann lerwa lo later antye . . . ti rasanble bann lerwa dan en landrwa ki apel Armagedon dan langaz Ebre.” (Nou ki’n met an italik.)​—REVELASYON 16:14, 16.

ARMAGEDON i non en landrwa. Me, sa landrwa pa’n zanmen egziste.

Alor, ki vre sinifikasyon sa mo “Armagedon”? Akoz i souvan ganny asosye avek en levennman parey lager?

Rasanble dan en landrwa ki apel Armagedon

Armagedon i sorti dan Har–Magedon, en mo Ebre ki vedir “Montanny Megido” dan son sans literal. Sepandan, menm si i napa en montanny ki ganny apele par sa non, i annan en landrwa ki egziste ki apel Megido. I sitye dan en landrwa enportan, en krwaze semen nor was sa rezyon kot ansyen nasyon Izrael ti pe reste. Laplipar bann pli gro batay ti deroul pros avek sa landrwa. I pour sa rezon ki Megido ti vin en mo ki ganny asosye avek lager.a

Vre sinifikasyon Megido i annan pour fer avek rezon ki sa bann batay ti ganny fer, me pa avek sa bann batay li menm. Megido ti form parti Later Promiz ki Zeova ti donn avek nasyon Izrael. (Egzod 33:1; Zozye 12:7, 21) I ti promet sa pep ki i ti pou defann zot kont zot bann ataker e i ti gard son parol. (Deterononm 6:18, 19) Par egzanp, i ti Megido ki Zeova ti fer en mirak pour defann sa nasyon kont bann solda Yabin, Lerwa bann Kananeen ek sef son larme Sisera.​—Ziz 4:14-16.

Alor sa mo “Armagedon” i annan en sinifikasyon senbolik ki vreman enportan. I ganny asosye avek en lager ant de larme pwisan.

Sa profesi dan Revelasyon pe koz lo en letan ki tre pros dan lavenir kot Satan ek son bann demon pou ankouraz bann gouvernman imen pour rasanble zot lafors militer e an fezan sa, zot pe menas pep Bondye ek zot travay. Plizyer milyon dimoun pou mor akoz Bondye pou detrir tou sa bann ki atak son pep.​—Revelasyon 19:11-18.

Me akoz en Bondye ki ganny dekrir dan Labib konman en Bondye ki “annan mizerikord, i pa ankoler vitman e i annan en kantite labonte leker” pou touy sitan bokou dimoun? (Neemya 9:17) Pour nou kapab konpran fason azir Bondye, nou bezwen reponn trwa kestyon: (1) Lekel ki pou konmans sa lager? (2) Akoz Bondye pou entervenir? (3) Ki lefe dirab sa pou annan lo zabitan later?

1. LEKEL KI POU KONMANS SA LAGER?

Zeova pa pou partisip dan lager Armagedon akoz i en Bondye agresif. O kontrer, i pou defann bann bon dimoun kont zot bann ataker. “Bann lerwa lo later antye,” andotmo bann dirizan sa lemonn ki pou lans sa latak. Me akoz zot pou lans sa latak? Akoz Satan pou manipil bann gouvernman ek group militer pour atak bann ki ador Zeova.​—Revelasyon 16:13, 14; 19:17, 18.

Ozordi, i pa paret fer sans pour mazinen ki bann gouvernman pou esey atak oubyen menm met en lafen avek larelizyon sirtou la ki serten pei pe met bokou lanfaz lo liberte pour koze ek drwa pour pratik larelizyon. Pourtan, pandan 20 tyem syek, i ti annan serten larelizyon ki ti sibir bann latak sorti kot gouvernman e sa i ankor pe arive.b Me kantmenm sa, i annan de fakter ki fer an gran diferans ant bann latak dan lepase ek sa enn ki asosye avek Armagedon. Premyerman, i pou en latak global. Dezyenmman, Zeova pou azir lo en lesel bokou pli gran ki i’n deza fer oparavan. (Zeremi 25:32, 33) Labib i dekrir sa batay konman ‘konba gran zour Bondye Tou pwisan.’

2. AKOZ BONDYE POU ENTERVENIR?

Zeova i ansenny son bann adorater pour kontan lape ensi ki zot bann lennmi. (Mika 4:1-3; Matye 5:43, 44; 26:52) Alor zot pa pou pran okenn zarm pour defann zot lekor kan sa latak pou deklanse. Si Bondye pa fer nanryen pour sov son pep, zot pou ganny detrir konpletman. Sa pou gat non oubyen repitasyon Zeova. Si sa bann ataker ti reisi ekstermin Son pep, sa ti pou fer Zeova paret en Bondye ki napa lanmour, ki enzis oubyen ki napa okenn pouvwar. I pou enposib pour en tel keksoz arive!​—Psonm 37:28, 29.

Bondye pa anvi detrir okenn dimoun, alor i averti zot sa ki i pou fer. (2 Pyer 3:9) I’n fer ekrir dan Labib bann levennman ki ti arive pour rapel nou ki dan lepase i ti defann son pep kont latak zot bann lennmi. (2 Lerwa 19:35) Labib i osi averti nou ki kan Satan ek sa bann ki i servi konman maryonnet i atak pep Bondye, Zeova ankor enn fwa pou entervenir e rann zot gal pour gal. Anfet, depi byen lontan Parol Bondye ti predir ki Zeova pou detrir bann move dimoun. (Proverb 2:21, 22; 2 Tesalonisyen 1:6-9) Kan sa pou arive, sa bann ataker pou realize ki zot in rod lager avek sa Enn ki Tou Pwisan.​—Ezekyel 38:21-23.

3. KI LEFE DIRAB SA POU ANNAN?

Lager Armagedon pou sov lavi plizyer milyon dimoun. Anfet, zis apre sa lager i pou annan lape lo later.​—Revelasyon 21:3, 4.

Liv Revelasyon i koz lo “en gran lafoul” ki personn pa konn son sif, ki pou sirviv sa batay. (Revelasyon 7:9, 14) Anba gidans Bondye, sa bann dimoun pou refer later vin Paradi zis parey Bondye ti anvi depi o konmansman.

Eski nou konnen kan ki pep Bondye pou ganny atake?

[Not anba lo paz]

[Portre lo paz 6]

Zeova ti defann son pep dan letan lontan

[Portre lo paz 7]

Zeova pou defann son pep ankor enn fwa e sa i pou dan lager Armagedon