Aprann avek Parol Bondye

Akoz Bondye i annan en lorganizasyon?

Sa lartik i soulev bann kestyon ki petet ou’ n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Akoz Bondye ti organiz pep Izrael?

Bondye ti organiz desandans Abraam konman en nasyon e ti donn zot bann lalwa. I ti apel sa nasyon, Izrael e i ti donn zot sa responsabilite pour protez vre ladorasyon ensi ki son Parol Labib. (Psonm 147:19, 20) Sa i fer ki bann dimoun dan tou nasyon in benefisye.​—Lir Zenez 22:18.

Bondye ti swazir bann Izraelit pour ki zot vin son bann temwen. Ler zot ti obeir, zot ti benefisye avek bann lalwa Bondye. (Deterononm 4:6) Si nou etidye listwar bann Izraelit nou pou kapab konn plis lo sa vre Bondye.​—Lir Izai 43:10, 12.

2. Akoz bann vre Kretyen i organize?

Avek letan, pep Izrael ti perdi faver Bondye e Zeova ti ranplas sa nasyon par kongregasyon Kretyen. (Matye 21:43; 23:37, 38) Dan lepase, bann Izraelit ki ti temwen Bondye me denozour, se bann vre Kretyen ki pe servi Zeova konman son bann temwen.​—Lir Akt 15:14, 17.

Zezi ti organiz son bann disip pour rann temwannyaz lo Zeova e pour fer tou pep vin bann disip. (Matye 10:7, 11; 24:14; 28:19, 20) Sa travay pe ariv lo son pik. I fer premye fwa ki Zeova i rasanble plizyer milyon dimoun ki sorti dan tou nasyon pour vin ador li dan vre ladorasyon. (Revelasyon 7:9, 10) Bann vre Kretyen i osi organize konman en group afen ki zot kapab ankouraz e ed kanmarad. Dan lemonn antye, zot pe swiv menm progranm lenstriksyon baze lo Labib dan zot bann renyon.​—Lir Ebre 10:24, 25.

3. Ki mannyer Temwen Zeova ti konmanse dan nou letan?

Dan nou letan, lorganizasyon Temwen Zeova ti konmans an 1870. En pti group etidyan Labib ti ptitapti redekouver bann laverite Labib ki ti’n ganny oubliye. Zot ti okouran ki Zezi ti’n organiz kongregasyon Kretyen pour prese, alor zot ti angaz zot dan en kanpanny predikasyon mondyal lo Rwayonm Bondye. An 1931, sa pti group etidyan Labib ti ganny apele Temwen Zeova.​—Lir Akt 1:8; 2:1, 4; 5:42.

4. Ki mannyer Temwen Zeova i organize ozordi?

Dan premye syek, bann kongregasyon Kretyen dan plizyer pei ti ganny gide par en konsey direkter ki ti rekonnet Zezi konman Sef kongregasyon. (Akt 16:4, 5) Pareyman ozordi, Temwen Zeova i rekonnet Zezi konman zot Sef. (Matye 23:9, 10) Zot osi benefisye avek gidans bann ansyen eksperyanse lo Konsey Direkter ki donn zot bann lankourazman baze lo Labib e ki pe pran swen avek sa plis ki 100,000 kongregasyon. Dan sak sa bann kongregasyon i annan bann zonm kalifye ki pe servi konman ansyen oubyen sirveyan. Avek lanmour, sa bann zonm i pran swen avek kongregasyon Bondye.​—Lir 1 Pyer 5:2, 3.

Temwen Zeova i organize pour pres sa bon nouvel e pour fer disip. Pour zot kapab ed bann dimoun partou lo later, zot tradwir, enprim e distribye bann piblikasyon baze lo Labib dan plis ki 500 langaz. Parey bann zapot, zot osi zot pres portanport. (Akt 20:20) Zot ofer bann letid Labib avek bann dimoun ki vreman kontan laverite. Vi ki sa ki pli enportan pour pep Zeova se pour fer plezir Bondye e ed lezot, tou dimoun dan sa lorganizasyon i vreman ere.​—Lir Psonm 33:12; Akt 20:35.

Pour plis lenformasyon, vwar sapit 19 dan liv Ki labib i vreman dir?, pibliye par Temwen Zeova.