Aprann avek Parol Bondye

Akoz nou devret servi non Bondye?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Akoz Bondye in donn son lekor en non?

Sirman ou ti pou kontan pour ganny apele par ou non olye ki ganny apele “zonm,” “msye,” “fanm” oubyen “madanm.” Ou non i disteng ou avek en lot dimoun. Bondye i ganny apele par bann tit tel parey “Souvren Senyer,” “Bondye Tou pwisan” e “Gran Kreater.” (Zenez 15:2; 17:1; Eklezyast 12:1) Me i osi donn son lekor en non pour ki nou kapab annan en relasyon personnel avek li. An Kreol, non Bondye i Zeova.​—Lir Izai 42:8.

Kantmenm bokou tradikter Labib in ranplas non Bondye par bann term parey “Bondye” ek “Senyer,” son non i aparet preski 7,000 fwa dan bann ansyen maniskri Labib ki ti ganny ekrir dan langaz Ebre. I evidan alor ki Bondye i anvi nou konn son non.​—Lir Izai 12:4.

2. Akoz i enportan pour konn non Bondye?

Konn non Bondye pa vedir zis konnen ki mannyer pour pronons sa non, me i vedir annan en relasyon pros avek li. Sa non Zeova i vedir: “I fer arive.” Sa i asir nou ki Bondye pou vin nenport kwa ki neseser pour akonplir son plan. Alor, konn non Bondye i vedir krwar ki i pou akonplir tou son bann promes. (Psonm 9:10) Bann dimoun ki konn e servi non Bondye, zot lafwa i pous zot pour met konfyans dan li e met li premye dan zot lavi. Zeova pou protez zot.​—Lir Psonm 91:14.

3. Akoz Bondye i anvi dimoun i konn son non?

Bondye i anvi dimoun konn son non akoz sa i anmenn byenfe pour zot. I osi permet zot vin son zanmi e annan sa lespwar pour viv pour touzour. I pa drol alor ki Zeova i anvi ki nou fer dimoun konn son non.​—Lir Zan 17:2, 3; Romen 10:13, 14.

Zezi ti fer konnen non Bondye par ansenny dimoun konsernan Son lavolonte, Son bann lalwa e Son bann promes. Ozordi bann disip Zezi pe kontinyen fer sa travay pour fer dimoun dan tou nasyon konn non Bondye. Zot pe fer sa dan linite konman en ‘pep pour non Bondye.’​—Lir Akt 15:14; Zan 17:6.

4. Ki mannyer Bondye pou glorifye son non?

Zeova i oule glorifye son non akoz son non in ganny sali. Par egzanp, serten dimoun i dir ki i pa’n kre nou e nou pa bezwen obeir li. Lezot i dir ki i pa enterese avek nou e i responsab pour tou nou bann soufrans. Bann dimoun ki dir sa pe sali non Bondye, me zot pa pou toultan kontinyen fer sa. Bondye pou detrir sa bann ki dezonor son non.​—Lir Psonm 83:17, 18.

Zeova pou glorifye son non kan son Rwayonm pou met en lafen avek dominasyon imen e anmenn lape ek sekirite pour limanite. (Danyel 2:44) Byento, tou dimoun pou bezwen konnen ki Zeova i sa vre Bondye.​—Lir Ezekyel 36:23; Matye 6:9.

Ki ou devret fer? Apros avek Bondye par etidye son Parol e asosye avek bann dimoun ki kontan li. Kan Zeova pou glorifye son non, i pa pou oubliy son bann serviter fidel.​—Malaki 3:16.

Pour plis lenformasyon, vwar sapit 1 dan liv Ki Labib i vreman dir? pibliye par Temwen Zeova.

[Portre lo paz 10]

Non Bondye dan en ansyen maniskri Ebre