Eski ou ti konnen?

Akoz en zonm Izraelit dan letan lontan ti bezwen pey en pri pour marye avek en fiy?

DAN letan Labib, sa nouvo marye ouswa son fanmir ti bezwen pey fanmir sa nouvel marye en pri, pour sa de dimoun kapab marye. Sa pri ti ganny peye ler tou le de fanmir ti’n dakor pour sa maryaz. I kapab ki sa pri ti enkli bann keksoz ki annan valer, bann zannimo ouswa larzan. Parfwa, sa nouvo marye ti pey sa pri par travay pour fanmir sa nouvel marye. Par egzanp, Zakob ti dakor pour travay pour papa Rasel pour set an, pour li kapab marye avek Rasel. (Zen. 29:17, 18, 20) Akoz bann nouvo marye ti bezwen pey sa pri?

En spesyalis Labib ki apel Carol Meyers i dir: “I kapab ki sa pri ti ganny peye parski fanmir sa nouvel marye ti pou nepli annan sa fiy pour travay pour zot. Sa ti enportan dan bann fanmir [ki ti annan bann laferm].” I kapab ki sa pri ti osi ganny peye pour ranforsi lanmitye ki ti annan ant sa de fanmir. Sa ti fer ki sa de fanmir ti kapab ed kanmarad dan bann letan difisil. Osi, sa pri ti montre ki sa fiy ti’n fiyanse e ki i ti pou kit lakour son papa. Son papa ti pou nepli pran swen e protez li parski sa fiy ti pou al reste avek son msye e son msye ki ti pou pran swen avek li e protez li.

Me sa pa ti vedir ki sa fiy ti en lobze ki ti kapab ganny aste oubyen vann. Sa liv Ancient Israel​—Its Life and Institutions i dir: “Vi ki sa nouvo marye ti oblize pey sa sonm larzan ouswa son ekivalan avek fanmir sa fiy, sa i fer bann maryaz Izraelit paret konmsi sa msye ti pe aste sa fiy. Me i paret ki sa pri ti ganny donnen konman en konpansasyon e non pa pour aste sa fiy.”

Ozordi dan serten pei, dimoun i ankor swiv sa koutim pour pey en pri pour marye avek en fiy. Ler bann paran Kretyen i demann en frer ouswa son fanmir pour pey en pri pour marye avek zot fiy, zot “montre zot rezonnab avek tou dimoun” ler sa ki zot demande i rezonnab. (Fili. 4:5; 1 Kor. 10:32, 33) Ler zot fer sa, zot montre ki zot pa “kontan larzan” ouswa voras. (2 Tim. 3:2) Osi, si sa bann paran Kretyen i rezonnab, sa nouvo marye pa pou oblize anvoy maryaz pour pli tar ziska ki i’n ganny ase larzan pour pey paran sa fiy. Ouswa sa nouvo marye pa pou santi ki i bezwen aret fer pionye, pour li travay a plen tan pour ganny larzan pour pey sa gro sonm ki paran sa fiy in demande.

Dan serten pei, i annan lalwa konsernan ki kantite sa nouvo marye i bezwen peye pour marye avek sa fiy. Dan bann pei koumsa, bann paran Kretyen i obei sa bann lalwa. Akoz? Parski Parol Bondye i dir ki bann Kretyen i “devret soumet avek bann lotorite” e pour obei bann lalwa ki pa kont lalwa Bondye.​—Rom. 13:1; Akt 5:29.