Ki ou pe espere pour batize?

1. Ki serten bon rezon nou annan pour batize?

ESKI ou kontan Zeova, sa Enn ki’n donn ou tou bann bon keksoz ki ou annan e ki’n donn ou lavi? Eski ou anvi montre ki ou kontan li? Sa pli bon fason ki ou kapab fer sa i pour dedye ou lavi avek li e batize. Ler ou fer sa, ou pou form parti fanmir Zeova e ou Papa ek Zanmi pou gid ou e pran swen avek ou parski ou pou’n vin pour li. (Ps. 73:24; Iza. 43:1, 2) Osi, ler ou dedye ou lavi avek Bondye e ou batize, ou annan sa lespwar pour viv pour touzour.—1 Pyer 3:21.

2. Ki nou pou vwar dan sa lartik?

² Eski i annan en keksoz ki pe anpes ou batize? Si wi, ou pa tousel. Plizyer milyon dimoun in bezwen sanz zot fason fer ek zot fason panse pour zot kalifye pour batize. Aprezan zot pe servi Zeova dan lazwa e zot devoue dan zot servis. Ki ou kapab aprann avek serten dimoun ki ti batize dan premye syek? Nou pou vwar serten difikilte ki zot ti fer fas avek e sa ki nou kapab aprann avek zot legzanp.

BANN SAMARITEN TI BATIZE

3. Ki serten Samariten ti bezwen fer pour zot kapab batize?

³ Bann Samariten ti en group larelizyon dan letan Zezi. En kantite parmi zot ti reste otour lavil Sekenm e dan lavil Samari, ki ti nor avek Zide. Avan ki bann Samariten ti kapab batize, zot ti bezwen aksepte tou sa ki form parti Parol Bondye e aprann plis lo la. Bann Samariten ti krwar ki zis sa senk premye liv ki dan Labib, setadir Zenez ziska Deterononm e osi petet liv Zozye, ki ti’n ganny enspire par Bondye. Me kantmenm sa, bann Samariten ti krwar ki Mesi ti pou vini parski i ti annan sa promes ki Bondye ti’n fer ki dan Deterononm 18:18, 19. (Zan 4:25) Pour zot kapab batize, zot ti bezwen aksepte ki Zezi i sa Mesi ki ti’n ganny promet e sanmenm sa ki “en kantite Samariten” ti fer. (Zan 4:39) Vi ki en kantite parmi bann ki ti’n vin Kretyen ti bann Zwif, i kapab ki serten Samariten ti bezwen sanz zot latitid anver bann Zwif.—Lik 9:52-54.

4. Dapre Akt 8:5, 6, 14, ki mannyer serten Samariten ti reazir anver sa mesaz ki Filip ti pe anonse?

⁴ Kwa ki ti ed bann Samariten pour batize? Ler Filip sa predikater ti pres avek bann Samariten “konsernan Kris,” serten parmi zot ti “aksepte parol Bondye.” (Lir Akt 8:5, 6, 14.) Menm si Filip ti en Zwif, zot pa ti refize pour ekout li. Petet zot ti rapel bann verse dan Pantatek ki dir ki Bondye pa fer lapreferans. (Det. 10:17-19) Me zot ti “ekout byen sa ki Filip ti pe dir” konsernan Kris e zot ti aksepte bann levidans kler ki ti montre ki Filip ti annan lespri sen Bondye. Filip ti osi fer en kantite mirak par egzanp, i ti geri bann ki ti malad e i ti sas bann demon.—Akt 8:7.

5. Ki ou aprann avek legzanp bann Samariten?

⁵ Bann Samariten ti’n kapab les lefet ki Filip ti en Zwif oubyen lefet ki zot pa ti’n zanmen tann sa bann lansennyman oparavan, anpes zot fer progre. Me zot pa ti les sa arive. Apre ki zot ti’n konvenki ki Filip ti’n ansenny zot laverite, zot pa ti tarde pour batize. Labib i dir: “Ler Filip ti anons sa bon nouvel konsernan Rwayonm Bondye ek non Zezi Kri, en kantite zonm ek fanm ti krwar li e ganny batize.” (Akt 8:12) Me ou, eski ou konvenki ki Parol Bondye i laverite? Eski ou asire ki Temwen Zeova pa fer lapreferans e ki zot in aprann pour demontre vre lanmour setadir sa kalite lanmour ki Zezi ti dir son bann vre disip i devret annan? (Zan 13:35) Si ou asire, pa tarde pour batize. Ou kapab asire ki Zeova pou beni ou.

6. Ki ou aprann avek legzanp Ruben?

⁶ Ruben, ki reste Lalmanny ti grandi dan en fanmir Temwen Zeova. Me ler i ti ankor zenn, i pa ti asire si Bondye i egziste. Ki mannyer i ti sirmont son bann dout? Ler i ti realize ki i pa ti konn ase konsernan sa size, i ti deside pour rod plis lenformasyon. I ti dir: “Mon ti fer letid personnel pour mwan kapab konnen kwa ki vre e kwa ki pa vre. Mon ti bezwen etidye sa topik evolisyon plizyer fwa.” Ruben ti lir sa liv Is There a Creator Who Cares About You? Sa liv ti ed li en kantite. I ti dir dan li menm: “Waw. Zeova i egziste.” Ler Ruben ti vizit biro prensipal Temwen Zeova, i ti devlop plis lapresyasyon pour lorganizasyon Zeova ek sa linite ki i annan parmi nou nenport landrwa kot nou sorti dan lemonn. Apre ki i ti’n retourn Lalmanny, Ruben ti batize a laz 17 an. Si ou annan dout konsernan sa ki ou’n aprann, fer resers dan nou bann piblikasyon. Ler ou ganny “konnesans egzakt,” sa i kapab ed ou pour sirmont bann dout. (Efe. 4:13, 14) Osi, ler ou tann bann leksperyans konsernan sa lanmour ek linite ki i annan parmi pep Zeova dan lezot landrwa dan lemonn e ou vwar sa lanmour ek linite dan ou prop kongregasyon, sa pou fer ou devlop plis lapresyasyon pour nou bann frer ek ser partou dan lemonn.

SOL SORTI TARS TI BATIZE

7. Ki fason panse Sol ti annan ki i ti bezwen sanze?

⁷ Annou vwar legzanp Sol sorti Tars. I ti konn byen Lalwa Zwif e i ti pe fer progre dan larelizyon Zwif. (Gal. 1:13, 14; Fili. 3:5) Sa letan, en kantite Zwif ti krwar ki bann Kretyen ti bann aposta. Alor Sol ti persekit zot. I ti krwar ki i ti pe fer lavolonte Bondye me sa pa ti vre. (Akt 8:3; 9:1, 2; 26:9-11) Si Sol ti devlop lafwa dan Zezi, batize e vin en Kretyen, i ti pou bezwen pare pour ganny persekite li osi.

8. (a) Kwa ki ti ed Sol pour batize? (b) Dapre Akt 22:12-16, ki mannyer Ananyas ti ed Sol? (Vwar portre.)

⁸ Kwa ki ti ed Sol pour batize? Ler Zezi ti aparet avek Sol, Sol ti vin aveg. (Akt 9:3-9) Apre ki sa ti’n arive, Sol ti zennen pour trwa zour e i tre probab ki i ti medit lo sa ki ti’n arive avek li. Sa leksperyans ti fer Sol asire ki Zezi ti Mesi e ki son bann disip ti dan sa vre larelizyon. I bezwen ki Sol ti vreman sagren e regrete ki i ti’n fer touy Etyenn. (Akt 22:20) Apre sa trwa zour, en disip ki ti apel Ananyas ti vin kot Sol, i ti fer li vwar ankor e ankouraz li pour batize deswit. (Lir Akt 22:12-16.) Sol ti demontre limilite, i ti aksepte led e i ti batize.—Akt 9:17, 18.

9. Ki ou kapab aprann avek legzanp Sol?

⁹ Nou kapab aprann serten keksoz avek legzanp Sol. I ti’n kapab les lorgey oubyen lafreyer zonm anpes li batize. Me i pa ti les sa arive. Sol ti demontre limilite e i ti pare pour sanz son lavi pour li vin en disip Kris. (Akt 26:14, 19) I ti pare pour vin en Kretyen menm si i ti konnen ki i ti pou ganny persekite. (Akt 9:15, 16; 20:22, 23) Apre ki i ti’n batize, i ti kontinyen depan lo Zeova pour li kapab fer fas avek diferan kalite problenm. (2 Kor. 4:7-10) Ler ou batize konman en Temwen Zeova, ou lafwa i kapab ganny teste oubyen i kapab ki dimoun i opoz ou. Me ou pa pou tousel. Ou kapab asire ki Bondye ek Kris pou toultan donn ou sa led ki ou bezwen pour andire e pour reste fidel.—Fili. 4:13.

10. Ki ou aprann avek legzanp Anna?

¹⁰ Anna ti grandi dan en pei ki dan Les Lerop. Apre ki son manman ti’n batize, Anna ti konmans etidye Labib ler i ti annan 9 an. I ti kapab fer sa avek permisyon son papa. Me ler son bann fanmir ti aprann ki i ti pe etidye Labib avek Temwen Zeova, zot ti konmans opoz li. Son bann fanmir ti krwar ki i en laont pour en dimoun kit larelizyon ki son zanset ti ladan. Ler Anna ti annan 12 an, i ti demann son papa permisyon pour li batize. Son papa ti anvi konnen si sa ti son desizyon oubyen si en dimoun ti pe met presyon lo li pour batize. Anna ti reponn: “Mon kontan Zeova.” Alor son papa ti donn li permisyon pour li batize. Apre ki Anna ti’n batize, son fanmir ti kontinyen tret li dan en move fason. Enn son granpapa ti dir: “I ti pou pli byen si ou viv en lavi imoral e fimen olye vin en Temwen Zeova.” Ki mannyer Anna ti fer fas avek sa sityasyon? I dir: “Zeova ti ed mwan pour reste for e mon manman ek mon papa ti siport mwan en kantite.” Anna i annan en lalis kot in ekri bann moman spesifik kot Zeova in ed li. I get sa lalis tanzantan pour li pa oubliye ki mannyer Zeova in ed li. Si ou per ki ou pou ganny persekite, rapel ki Zeova pou ed ou osi.—Ebr. 13:6.

KORNEY TI BATIZE

11. Kwa ki ti’n kapab fer Korney ezite batize?

¹¹ Labib i osi koz lo legzanp Korney. I ti en “zofisye larme” ki ti ansarz apepre 100 solda dan larme Romen. (Akt 10:1) I kapab ki sa ti fer ki i ti annan en pozisyon enportan dan lakominote e dan larme. I ti “ed bokou dimoun pov.” (Akt 10:2) Zeova ti anvoy zapot Pyer pour anons sa bon nouvel avek Korney. Eski Korney ti ezite batize akoz i ti annan en pozisyon enportan dan lakominote?

12. Kwa ki ti ed Korney pour batize?

¹² Kwa ki ti ed Korney pour batize? Labib i dir ki “li e tou bann ki ti dan son lakour . . . ti annan en gran respe pour Bondye.” I ti osi sipliy Bondye toultan. (Akt 10:2) Ler Pyer ti anons sa bon nouvel avek Korney, Korney avek son fanmir ti devlop lafwa dan Kris e zot ti batize deswit. (Akt 10:47, 48) Nou kapab asire ki Korney ti pare pour fer nenport sanzman pour li kapab ador Zeova ansanm avek son fanmir.—Zoz. 24:15; Akt 10:24, 33.

13. Ki ou aprann avek legzanp Korney?

¹³ Parey Sol, Korney ti’n kapab les sa pozisyon enportan ki i ti annan anpes li vin en Kretyen. Me i pa ti les sa arive. Eski ou osi ou bezwen fer bann gran sanzman pour ou kapab batize? Si wi, Zeova pou ed ou. I pou beni ou si ou determinen pour aplik bann prensip Labib pour ou kapab servi li.

14. Ki ou aprann avek legzanp Tsuyoshi?

¹⁴ Tsuyoshi ki reste Zapon, ti bezwen fer en sanzman dan son travay pour li kapab kalifye pour batize. I ti asistan pour direkter en lekol ki ti vreman popiler kot bann dimoun i aprann pour fer laranzman fler. Ler sa direkter pa ti kapab al bann lanterman, souvandfwa Tsuyoshi ti al dan son plas e partisip dan bann rityel Boudis. Me ler Tsuyoshi ti aprann laverite konsernan lanmor, i ti konnen ki i pa ti pou kapab kontinyen partisip dan sa bann rityel si i ti anvi batize. I ti deside pour aret partisip dan sa bann rityel. (2 Kor. 6:15, 16) Tsuyoshi ti koz avek sa direkter konsernan sa ki i ti’n deside. Ki ti arive apre? Tsuyoshi ti kapab gard son travay san ki i bezwen partisip dan sa bann rityel. I ti batize apepre enn an apre ki i ti’n konmans etidye Labib.a Si ou bezwen fer sanzman dan ou travay pour ou kapab fer Bondye plezir, ou kapab asire ki Zeova pou donn ou ek ou fanmir sa ki zot bezwen.—Ps. 127:2; Mat. 6:33.

BANN KRETYEN DAN LAVIL KORENT TI BATIZE

15. Kwa ki ti’n kapab anpes bann Kretyen dan lavil Korent batize?

¹⁵ Bann dimoun ki ti reste dan lavil Korent ti kontan keksoz materyel e zot ti viv en lavi imoral. En kantite dimoun ki ti viv dan sa lavil ti fer bann keksoz ki pa fer Bondye plezir. I kler ki en lanvironnman koumsa ti pou fer li difisil pour bann dimoun konmans servi Zeova. Me ler zapot Pol ti vin dan sa lavil e anons sa bon nouvel konsernan Kris, “bokou Korentyen ki ti . . . tann sa bon nouvel ti konmans krwar e ganny batize.” (Akt 18:7-11) Apre sa, Zezi Kri ti aparet avek Pol dan en vizyon e dir: “Mon annan bokou dimoun dan sa lavil.” Alor Pol ti kontinyen anons sa bon nouvel dan sa lavil pour enn an edmi.

16. Kwa ki ti ed bann dimoun ki ti reste dan lavil Korent pour fer bann sanzman pour zot kapab batize? (2 Korentyen 10:4, 5)

¹⁶ Kwa ki ti ed bann Kretyen dan lavil Korent pour batize? (Lir 2 Korentyen 10:4, 5.) Parol Bondye ek son lespri sen ki pwisan ti ed zot pour fer bann gran sanzman. (Ebr. 4:12) Bann dimoun ki ti reste dan lavil Korent ki ti aksepte sa bon nouvel konsernan Kris ti kapab aret fer bann move keksoz parey bwar pour sou, vole e pratik omoseksyalite.—1 Kor. 6:9-11.b

17. Ki ou aprann avek legzanp bann Kretyen dan lavil Korent?

¹⁷ Serten dimoun ki ti reste dan lavil Korent ti annan bann move labitid ki ti’n byen anrasinen. Me zot pa ti krwar ki sa bann sanzman ti tro difisil pour zot fer pour zot kapab vin Kretyen. Zot ti bezwen fer zefor pour konmans mars lo sa semen etrwat ki anmenn ver lavi eternel. (Mat. 7:13, 14) Eski ou pe lalit avek en move labitid oubyen ou pe esey aret fer en move keksoz pour ou kalifye pour batize? Pa zanmen abandonnen! Sipliy Zeova pour donn ou son lespri sen pour ed ou lalit avek sa dezir pour fer sa ki mal.

18. Ki ou aprann avek legzanp Monika?

¹⁸ Annou vwar legzanp Monika ki reste dan pei Lazorzi. Pour li kapab batize, i ti bezwen fer bokou zefor pour aret dir bann parol sal e pour aret ekout e get bann divertisman ki pa apropriye. I dir: “Ler mon ti adolesan, mon ti priy Zeova pour ganny sa lafors ki mon ti bezwen. Zeova ti konnen ki mon ti anvi fer sa ki byen e i ti toultan ed mwan e gid mwan.” Monika ti batize ler i ti annan 16 an. Eski i annan serten keksoz ki ou bezwen aret fer pour ou kapab servi Zeova dan sa fason ki fer Zeova plezir? Kontinyen demann li pour donn ou sa lafors ki ou bezwen pour fer bann sanzman. Zeova i zenere e i pou donn nou son lespri sen.—Zan 3:34.

OU LAFWA I KAPAB ED OU SIRMONT BANN GRO LOBSTAK

19. Kwa ki kapab ed ou pour sirmont bann gro lobstak? (Vwar portre.)

¹⁹ Ou kapab asire ki Zeova i kontan ou e i anvi ki ou form parti son fanmir. Sa pa sanze malgre nenport lobstak ki kapab fer li difisil pour ou batize. Zezi ti dir serten son bann disip: “Si zot annan lafwa groser en lagrenn moutard, zot pou dir sa montanny, ‘Sorti la al laba’ e i pou ale e napa nanryen ki pou enposib pour zot.” (Mat. 17:20) Bann ki ti tann Zezi dir sa, ti’n bann disip Zezi pour zis detrwa lannen, alor zot ti ankor bezwen devlop plis lafwa. Me Zezi ti asir zot ki si zot annan ase lafwa, Zeova ti pou ed zot sirmont bann gro lobstak ki parey montanny. Zeova pou ed ou osi.

20. Ki mannyer legzanp bann Kretyen dan premye syek ek legzanp bann Kretyen dan nou letan ki’n ganny mansyonnen dan sa lartik in motiv ou?

²⁰ Si ou vwar ki i annan bann lobstak ki pe anpes ou batize, azir deswit e tir sa bann lobstak. Legzanp bann Kretyen dan premye syek ek bann Kretyen dan nou letan i kapab rekonfort ou e donn ou sa lafors ki ou bezwen. Zot legzanp i kapab osi ankouraz ou e motiv ou pour dedye ou lavi avek Zeova e batize. Sa i sa pli bon desizyon ki ou kapab fer!