Menm si mon ti vreman timid, mon ti vin en misyonner

Mon ti ne an 1951 dan lavil Vyenn, Lotris, dan en fanmir Katolik. Mon ti timid me mon ti krwar dan Bondye e mon ti kontan priye. Ler mon ti annan ne-v-an, mon papa ti konmans etidye Labib avek Temwen Zeova e pa bokou letan apre sa, mon manman ti konmans etidye li osi.

Pa bokou letan apre, nou ti zwenn kongregasyon Döbling ki ti dan lavil Vyenn. Nou ti fer en kantite keksoz ansanm konman en fanmir. Nou ti lir e etidye Labib, al renyon e servi konman volonter dan bann lasanble. Depi ptipti, mon papa ti ed mwan pour kontan Zeova en kantite. I ti toultan priye ki mwan ek mon ser, nou vin pionye. Me pa sa ki mwan mon ti anvi.

MON TI KONMANS SERVIS A PLEN TAN

Mon ti batize an 1965 ler mon ti annan 14 an. Me mon ti vwar li difisil pour koz avek dimoun ki mon pa ti konnen dan predikasyon. Mon ti osi santi ki lezot zenn i pli meyer ki mwan e mon ti vreman anvi ki zot aksepte mwan. Alor pa bokou letan apre mon batenm, mon ti konmans frekant bann zenn ki pa ti servi Zeova. Menm si mon ti kontan pas letan avek zot, mon konsyans ti fatig mwan parski mon ti pe pas en kantite letan avek bann dimoun ki pa servi Zeova. Me mon ti napa sa lafors pour aret frekant zot. Kwa ki ti ed mwan?

Pandan sa menm letan, en fiy 16 an ki ti apel Dorothée ti vin en proklanmater dan nou kongregasyon. I ti vreman devoue dan predikasyon e sa ti enpresyonn mwan. Mon ti en pti pe pli vye ki li me mon pa ti al predikasyon regilyerman. Mon ti mazinen: “Mon paran i Temwen Zeova me Dorothée i tousel dan laverite. I reste avek son manman ki malad me kantmenm sa i toultan dan predikasyon.” Son legzanp ti motiv mwan pour fer plis pour Zeova. Pa bokou letan apre, nou de Dorothée, nou ti konmans fer pionye ansanm. O konmansman, nou ti fer pionye asistan e apre sa pionye ordiner. Vi ki Dorothée ti kontan predikasyon en kantite, mwan osi mon ti konmans kontan predikasyon. I ti ed mwan pour konmans mon premye letid Labib. Avek letan, i ti vin pli fasil pour mwan koz avek bann dimoun kot zot lakour, lo semen e dan lezot landrwa.

Dan mon premye lannen konman pionye ordiner, en frer Otrisyen ki apel Heinz ti zwenn nou kongregasyon. Heinz ti’n aprann laverite ler i ti Kanada pe vizit son frer ki ti en Temwen Zeova. I ti ganny apwente konman pionye spesyal dan nou kongregasyon. Mon ti dakor avek li me i ti anvi vin en misyonner e mwan mon pa ti anvi fer sa. Alor, o konmansman mon pa ti montre li ki mon dakor avek li. Me pli tar, nou ti konmans pwente, nou ti marye e apre nou ti konmans fer pionye ansanm Lotris.

NOU TI ANNAN SA LOBZEKTIF POUR SERVI KONMAN MISYONNER

Tanzantan Heinz ti dir mwan ki i anvi vin en misyonner. Menm si i pa ti zanmen met presyon lo mwan pour vin en misyonner, i ti ed mwan pour reflesir lo la par demann bann kestyon parey: “Vi ki nou napa zanfan, pa nou kapab fer plis dan servis Zeova?” Vi ki mon ti vreman timid, mon ti per pour vin en misyonner. Menm si mon ti en pionye, mon ti krwar ki i ti tro difisil pour mwan vin en misyonner. Me Heinz ti kontinyen koz lo sa lobzektif. I ti osi ankouraz mwan pour pa konsantre lo mon lekor me pour mazin lo ki mannyer mon kapab ed lezot. Son konsey ti ed mwan en kantite.

Ptitapti mon ti devlop sa dezir pour vin en misyonner, alor nou ti ranpli nou laplikasyon pour al Gilead. Me serviter biro brans sa letan ti sizere ki mon amelyor mon Angle avan. Mon ti fer sa ki i ti dir mwan. Me apre trwa-z-an, nou ti sirprann pour ganny demande pour al servi dan en kongregasyon ki koz langaz Yougoslavyenn ki sitye Salzburg, Lotris. Pour sa prosenn set-an, nou ti pres dan sa teritwar. Mon msye ti vin sirveyan rezyonal e pour enn an, nou ti vizit bann kongregasyon ki koz langaz Laserbi ek Lakroasi. Menm si i ti difisil pour koz sa de langaz, nou ti annan plizyer letid Labib.

An 1979, nou ti ganny demande pour al “vakans” Laboulgari. Laba, sa travay predikasyon ti’n ganny enterdi. Alor, nou pa ti fer predikasyon ditou. Me nou ti anmenn bann piblikasyon an sekre pour sa senk ser ki ti reste Sofya, kapital Laboulgari. Mon ti vreman per me Zeova ti ed mwan. Mon ti vwar ki sa senk ser ti vreman kouraze e vreman zwaye menm si zot ti kapab ganny met dan prizon. Zot legzanp ti donn mwan sa kouraz pour fer nenport kwa ki lorganizasyon Zeova i demann mwan pour fer.

Apre en pe letan, nou ti fer laplikasyon ankor pour al Lekol Gilead e safwasi nou ti ganny aksepte. Nou ti krwar nou ti pou asiste sa lekol Leta-z-ini Lanmerik an Angle. Me an Novanm 1981, Gilead Extension School ti konmans ganny fer kot biro brans Wiesbaden, Lalmanny. Alor nou ti kapab asiste sa laklas dan langaz Alman, ki ti pli fasil pour mwan konpran. Me kote nou ti pou ganny anvoye?

NOU TI SERVI DAN EN LANDRWA KOT TI’N ANNAN LAGER

Nou ti ganny anvoye pour al servi Kenya. Me biro brans Kenya ti demann nou si nou ti pou kontan al servi Yougannda, ki ti en pei o bor Kenya. Plis ki di-z-an oparavan, Zeneral Idi Amin ti fer en koudeta e tir gouvernman Yougannda lo pouvwar. Pandan ki Zeneral Idi Amin ti pe dirize, i ti fer touy plizyer milye dimoun e plizyer milyon dimoun ti soufer. Me an 1979, bann ki ti opoz Idi Amin ti tir li lo pouvwar. Mon ti en pe per pour al reste dan en pei koumsa. Me Lekol Gilead ti’n ed nou pour annan konfyans dan Zeova. Alor nou ti dir wi.

Lavi Yougannda ti vreman difisil. Heinz ti dekrir lafason ki keksoz ti ete dan 2010 Yearbook. Gouvernman pa ti kapab donn dimoun delo, elektrisite ek lezot keksoz neseser. Telefonn pa ti marse. Dimoun ti fiziye kanmarad e vol keksoz, sirtou pandan lannwit. Alor ler aswar ti fer, tou dimoun ti reste dan zot lakour e zot ti swete, menm priye ki personn pa vin vol zot oubyen touy zot. Menm si i ti annan tou sa bann problenm, bann frer ek ser ti pe kontinyen servi Zeova dan lazwa.

Nou de Heinz, nou ti ariv Kampala, kapital Yougannda an 1982. Pandan sa premye senk mwan, nou ti reste dan lakour Sam ek Christina Waiswa, ansanm avek zot senk zanfan ek kat manm fanmir. Frer ek Ser Waiswa ek zot fanmir ti souvandfwa pran zis en repa par zour. Kantmenm sa, zot ti toultan pare pour partaz sa ptigin ki zot ti annan avek nou. Pandan sa letan ki nou ti pe reste avek lafanmir Waiswa, nou de Heinz, nou ti aprann en kantite leson pratik ki ti ed nou dan nou lavi misyonner. Par egzanp, nou ti aprann pour benny avek en ptigin delo e apre servi sa delo pour flas kabinen. An 1983, nou ti al reste dan en landrwa Kampala kot i ti pli an sekirite.

Nou ti vreman kontan fer predikasyon. En mwan, nou ti donn plis ki 4,000 piblikasyon. Me sa ki ti fer nou pli kontan i pour vwar lafason ki dimoun ti reakte ler zot ti tann laverite. Zot ti annan respe pour Bondye e zot ti anvi koz lo Labib. Normalman nou de Heinz, nou ti annan 10 a 15 letid Labib sakenn e nou ti aprann en kantite avek nou bann etidyan. Par egzanp, menm si zot ti bezwen marse pour vin renyon tou le semenn, zot pa ti zanmen konplent e zot ti toultan an souriyan.

An 1985 ek 1986, i ti annan de lager Yougannda. Souvandfwa, nou ti vwar bann zanfan avek bann gro fizi. Zot ti solda e zot ti blok semen pour kontrol dimoun ki ti pe pase lo semen. Pandan sa bann lannen, nou ti demann Zeova pour donn nou lasazes pour evit bann danze dan predikasyon e pour nou pa per. Zeova ti reponn nou lapriyer. Souvandfwa, dek ki nou ti zwenn en dimoun ki ti anvi konn Zeova, nou ti oubliye ki nou ti per.

Nou ti osi kontan pour pres avek bann etranze. Par egzanp, nou ti zwenn en koup ki apel Murat ek Dilbar Ibatullin ki sorti Tatarstan (Central Russia) e nou ti fer letid avek zot. Murat ti en dokter. Zot tou le de zot in batize e zot ankor pe servi Zeova fidelman. Pli tar, mon ti zwenn en madanm ki apel Tatjana Vileyska, ki ti sorti Ikrenn, ki ti pe mazin pour swiside. Apre ki Tatjana ti batize, i ti retourn Ikrenn e pli tar i ti ede pour tradwir nou bann piblikasyon dan langaz Ikrenyen.a

EN NOUVO SERVIS

An 1991, ler nou de Heinz, nou ti’n al vakans Lotris, biro brans Lotris ti kontakte nou pour dir nou ki nou pe al ganny en nouvo servis. Nou ti pou al Laboulgari. Apre ki bann kominis ti nepli kontrol Les Lerop, Temwen Zeova ti kapab fer sa travay predikasyon Laboulgari. Parey mon ti’n dir oparavan, ler sa travay predikasyon ti enterdi, nou de Heinz, nou ti anmenn bann piblikasyon an sekre dan sa pei. Me aprezan, nou ti’n ganny anvoye dan sa pei pour fer predikasyon.

Bann frer ti dir nou pa retourn Yougannda me al direk Laboulgari. Alor nou pa ti al Yougannda pour anmas nou bann keksoz oubyen dir orevwar nou bann zanmi. Nou ti al Betel Lalmanny, pran en loto e al Laboulgari. Nou ti ganny mete dan en pti group ki ti sitye Sofya, ki ti annan apepre 20 proklanmater.

Ler nou ti al Laboulgari, nou ti fer fas avek bann nouvo difikilte. Premyerman, nou pa ti konn sa langaz. Dezyenmman, i ti annan zis de piblikasyon ki ti disponib dan langaz Laboulgari. Sa ti liv The Truth That Leads to Eternal Life ek liv Mon liv zistwar Labib. Trwazyenmman, i ti difisil pour nou konmans bann letid Labib. Malgre sa bann difikilte, nou pti group ti vreman devoue dan predikasyon. Legliz Ortodoks Laboulgari ti remark sa e la kot problenm ti konmanse.

An 1994, gouvernman ti nepli rekonnet Temwen Zeova konman en larelizyon e en kantite dimoun Laboulgari ti krwar ki nou ti en larelizyon danzere. Serten frer ti ganny met dan kaso. Dimoun ti dir en kantite mansonz lo nou dan medya. Zot ti dir ki Temwen Zeova i touy zot bann zanfan e ki zot osi konvenk lezot Temwen Zeova pour komet swisid. Sa ti fer li difisil pour fer predikasyon. Souvandfwa, nou ti zwenn dimoun ki ti agresiv ki ti kriy avek nou, telefonn gard e anvoy keksoz avek nou. Nou pa ti kapab anmenn bann piblikasyon dan sa pei e i ti difisil pour lwe bann lasal pour fer renyon. Bann gard ti menm enteronp e aret enn nou bann lasanble. Nou de Heinz, nou pa ti abitye ganny trete avek laenn. Sa ti diferan avek lafason ki dimoun ti ete Yougannda parski dimoun Yougannda ti kontan pour etidye Labib. Kwa ki ti ed nou pour adapte avek sa nouvo servis?

Ler nou ti pas letan avek bann frer ek ser, sa ti ed nou pour reste zwaye. Zot ti kontan ki zot ti’n konn laverite e zot ti apresye sa led ki nou ti donn zot. Nou tou nou ti reste pros avek kanmarad e nou ti siport kanmarad. Sa bann leksperyans ti montre nou ki nou kapab zwaye dan nenport servis si nou kontinyen demontre lanmour anver lezot dan plas konsantre lo nou problenm.

Me avek letan, keksoz ti amelyore. An 1998, gouvernman ti rekonnet Temwen Zeova konman en larelizyon ankor e en kantite piblikasyon ti ganny pibliye dan langaz Laboulgari. Apre an 2004, en nouvo biro brans ti ganny dedye. Ozordi, i annan 57 kongregasyon avek 2,953 proklanmater. Sa dernyen lannen servis, i ti annan en total 6,475 dimoun ki ti asiste Memoryal. Dan lepase, i ti annan zis senk ser dan lavil Sofya. Ozordi, i annan nef kongregasyon. Nou’n vwar ki “sa enn ki pti [in] vin en milye.”—Iza. 60:22.

NOU TI FER FAS AVEK LEZOT PROBLENM

Mon’n annan en kantite problenm lasante. Plizyer fwa, dokter in vwar ki mon ti annan bann timer. En fwa, i ti menm annan enn dan mon laservel. Mon ti fer tretman radyasyon e mon ti al dan Lenn pour fer en loperasyon pour tir laplipar sa timer dan mon latet. Sa loperasyon ti dire pour 12 erdtan. Apre sa loperasyon, nou ti reste Betel Lenn pour en pe letan. Ler mon ti’n rekipere, nou ti retourn dan nou servis Laboulgari.

Pandan sa letan, Heinz ti devlop en maladi erediter ki apel Huntington’s disease. I ti difisil pour li marse, koze e kontrol son bann misk. Anmezir son lasante ti deteryore, i ti pli bezwen depan lo mwan. Parfwa mon ti santi mwan tro fatige e mon ti enkyet ki mon pa ti pou kapab pran swen avek li. Me en zenn frer ki ti apel Bobi ti regilyerman envit Heinz pour al predikasyon avek li. Bobi pa ti anbarase ler Heinz pa ti kapab koze e kontrol son lebra ek lipye. Bobi ti toultan la pour ede ler mon pa ti kapab ed Heinz. Menm si nou de Heinz, nou’n deside pour pa annan zanfan dan sa lemonn pour nou kapab fer plis pour Zeova, nou santi ki Zeova ti’n donn nou Bobi konman en garson.—Mark 10:29, 30.

Heinz ti osi ganny kanser. Malerezman, mon msye ti mor an 2015. Mon mank mon msye en kantite. I ti sa enn ki ti ed mwan pour pa tro enkyet e mon ti vwar li difisil pour abitye avek lefet ki i ti nepli la. Me mon mazin li en kantite e pour mwan, i konmsi i ankor vivan. (Lik 20:38) Pandan lazournen, mon souvandfwa rapel son bann parol ankourazan ek bann bon konsey ki i’n donn mwan. Mon vreman rekonesan ki nou’n kapab servi Zeova ansanm pandan tou sa lannen.

MON REKONESAN POUR LED KI ZEOVA IN DONN MWAN

Zeova in ed mwan pour andire pandan mon bann difikilte. I’n osi ed mwan pour vin en misyonner ki kontan dimoun menm si mon en dimoun timid. (2 Tim. 1:7) Gras a Zeova, mwan ek mon pti ser, nou’n vin bann serviter a plen tan. Ozordi, mon ser pe servi ansanm avek son msye e son msye i en sirveyan rezyonal dan bann kongregasyon Lerop ki koz langaz Laserbi. Zeova in reponn lapriyer ki mon Papa ti fer ler nou ti ankor zanfan.

Ler mon etidye Labib, mon santi mwan anpe. Dan bann moman difisil, mon’n aprann pour priy avek “plis lentansite ankor,” zis parey Zezi ti fer. (Lik 22:44) En fason ki mon lapriyer i ganny reponn i atraver lanmour ek labonte ki mon bann zanmi dan kongregasyon Nadezhda, Sofya i donn mwan. Zot envit mwan pour pas letan avek zot e souvandfwa, zot dir mwan ki zot kontan mwan. Tousala i fer mwan zwaye.

Souvandfwa mon medit lo rezireksyon. Dan mon lespri, mon vwar mon paran devan nou lakaz e zot zoli parey zot ti ete ler zot ti marye. Mon vwar mon ser pe kwi manze. Mon vwar Heinz pe debout o bor son seval. Ler mon imazin sa bann keksoz, sa i ed mwan pour pa mazin bann keksoz negatif, pour andire e i fer mwan vreman rekonesan anver Zeova.

Ler mon mazin bann bon keksoz ki Zeova in donn mwan e bann bon keksoz ki i pou donn mwan dan lavenir, sa i fer mwan dakor avek sa ki David ti dir dan Psonm 27:13, 14: “Kot mon ti pou ete si mon ti napa lafwa ki mon pou vwar labonte Zeova ler mon ankor vivan? Annan lespwar dan Zeova. Pran kouraz e reste for. Wi, annan lespwar dan Zeova.”