Kestyon lekter

Kan ki sa travay predikasyon ki pe ganny fer dan nou letan pou terminen?

Zezi ti dir: “Sa bon nouvel lo Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.” (Mat. 24:14) Sa mo Grek ki’n ganny tradwir “lafen” dan sa verse e dan verse 6 ek 13, i teʹlos e i pe refer avek lafen sa lemonn Satan pandan Armagedon. (Rev. 16:14, 16) Sa i vedir ki nou pou kontinyen anons sa bon nouvel ziska zis avan Armagedon. Sa i en azisteman dan nou konprenezon.

Oparavan nou ti krwar ki nou ti pou aret anons sa bon nouvel ler gran ladetres i konmanse letan Gran Babilonn i ganny detrir. (Rev. 17:3, 5, 15, 16) Nou ti krwar ki sa ti pou met en lafen avek “sa lannen ki Zeova pou demontre son labonte.” (Iza. 61:2) Nou ti osi krwar ki bann ki pou pas atraver gran ladetres ti pou’n montre ki zot fidel avek Zeova depi avan gran ladetres. Nou ti konpar zot avek bann Zwif ki ti sirviv destriksyon Zerizalenm lannen 607 avan Kris. Sa bann Zwif ti’n ganny marke depi pli boner pour zot sirviv sa destriksyon parski zot ti ador Zeova e ay bann move keksoz. (Ezek. 5:11; 9:4) Me sa konparezon pa an armoni avek sa ki Zezi ti dir dan Matye 24:14, ki montre ki dimoun i kapab annan sa loportinite pour aksepte sa bon nouvel ziska zis avan lafen i arive dan lager Armagedon.

Sa azisteman dan lafason ki nou konpran Matye 24:14 i osi aziste lafason ki nou konpran Revelasyon 16:21 kot i koz lo sa mesaz ki parey en gro lagrel. Apre ki nou’n egzamin sa de verse plis, nou’n vwar ki sa de verse i relye avek kanmarad. Ki mannyer sa? Nou’n konpran sa dan lafason ki Labib i dekrir ki mannyer dimoun i reazir anver sa mesaz Rwayonm. Zapot Pol ti dir ki pour “sa bann ki pe ganny sove” sa mesaz i en bon nouvel setadir i annan “en loder lavi.” Me pour bann lennmi Bondye, sa i en move nouvel setadir i annan “en loder lanmor.” (2 Kor. 2:15, 16) Zot ay sa mesaz Rwayonm parski sa mesaz i montre ki sa lemonn i move, ki i pe ganny dirize par Satan e ki byento i pou ganny detrir.—Zan 7:7; 1 Zan 2:17; 5:19.

Remarke ki sa tanpet lagrel ki ganny mansyonnen dan Revelasyon 16:21 pou “sitan gran.” Sa i kapab vedir ki pandan gran ladetres, sa travay predikasyon pou vin pli entans e sa pou fer ki plis dimoun pou konn non Zeova. (Ezek. 39:7) Eski i posib ki sa letan, setadir apre ki Gran Babilonn in ganny detrir, serten dimoun pou ganny atire par sa mesaz zis parey zot ti pou ganny atire par en bon loder? Sa i kapab arive. Petet zot pou rapel oubyen aprann ki pour plizyer lannen Temwen Zeova in anonse ki fo larelizyon pou ganny detrir.

Sa i parey sa ki ti arive Lezip apre sa Dis Fleo. Apre ki Zeova ti’n “anmenn zizman lo tou bann bondye Lezip,” “en kantite etranze” ti zwenn ansanm avek son pep. (Egz. 12:12, 37, 38) I kapab ki sa bann etranze ti swazir pour al avek pep Zeova ler zot ti vwar ki tou sa ki Moiz ti’n dir konsernan sa Dis Fleo, ti’n vin vre.

Tou dimoun ki swazir pour pran kote Zeova apre destriksyon Gran Babilonn, pou annan sa loportinite pour siport bann frer Kris ki ankor lo later. (Mat. 25:34-36, 40) Me ler bann Kretyen swazir ki ankor lo later i al dan lesyel zis avan Armagedon, zot pou nepli annan sa loportinite pou ganny zize konman mouton.

Sa azisteman dan nou konprenezon i montre ki Zeova i kontan nou en kantite e i pran pitye. Wi, i “pa oule ki personn i ganny detrir, me i oule ki zot tou zot arive repantir.”—2 Pyer 3:9.