Plàn en maryaz ki onor Zeova

1-2. Ki mannyer Zeova i konsider sa zour ki en koup pe al marye?

ESKI ou’n fiyanse e ou pe al marye? Si wi, felisitasyon! I tre probab ki ou vreman bizi pe plàn ou maryaz. Zeova i anvi ki ou ere zour ou maryaza e ki ou annan en zoli lavenir ansanm avek ou konzwen.—Prov. 5:18; Sal. 3:11.

² Zeova i merite ki ou onor li zour ou maryaz. Akoz nou kapab dir sa e ki mannyer ou kapab fer li? Menm si sa lartik i pour bann koup ki pe prepare pour zot maryaz, bann prensip ki pou ganny diskite i kapab ed nou tou pour onor Zeova si nou ganny envite en maryaz oubyen si nou ganny demande pour donn nou pwennvi konsernan bann laranzman ki pe ganny fer.

AKOZ OU DEVRET ONOR ZEOVA ZOUR OU MARYAZ?

3. Ki en koup Kretyen i devret pran kont ler zot pe plàn zot maryaz e akoz?

³ Bann koup Kretyen ki pe plàn zot maryaz i devret swiv bann prensip ki Zeova in met dan son Parol. Akoz? Parski Zeova i sa Enn ki’n etablir sa laranzman maryaz. I ti marye Adan ek Ev ki ti sa premye koup imen. (Zen. 1:28; 2:24) Alor pwennvi Bondye i devret sa keksoz pli enportan pour bann ki pe plàn en maryaz.

4. Ki rezon bann koup i annan pour onor Zeova zour zot maryaz?

⁴ Ou annan en rezon enportan akoz ou devret pran kont pwennvi Zeova ler ou pe plàn ou maryaz. Sa i akoz Zeova i ou Papa ki dan lesyel e ou pli bon Zanmi. (Ebr. 12:9) San dout, ou anvi kontinyen reste pros avek Zeova. Ou pa pou zanmen anvi en keksoz i arive sa zour oubyen okenn lezot zour ki pou bles santiman ou Zanmi. (Ps. 25:14) Ler ou mazin tou sa ki Zeova in fer e pou fer pour ou, pa ou dakor ki i merite ki ou onor li zour ou maryaz!—Ps. 116:12.

KI MANNYER OU KAPAB ONOR ZEOVA?

5. Ki mannyer Labib i kapab ed bann koup pour plàn zot maryaz?

⁵ Labib pa donn en lalis lareg konsernan ki mannyer en seremoni oubyen resepsyon maryaz i devret ete. Alor en koup i kapab plàn zot maryaz dapre zot sirkonstans, koutim e sa ki zot kontan. Bann vre Kretyen i osi obeir bann lalwa gouvernman. (Mat. 22:21) Nenport desizyon ki en koup i fer konsernan zot maryaz, si zot maryaz i ganny organize dapre bann prensip Labib, sa pou onor Zeova e fer li zwaye. Alor, ki bann prensip ki ou devret pran kont?

6. Akoz i enportan pour en koup obeir lalwa gouvernman konsernan maryaz?

⁶ Obeir bann lalwa gouvernman. (Rom. 13:1, 2) Dan laplipar pei, i annan serten keksoz ki lalwa i dir en koup i bezwen fer avan zot marye. Sa koup i devret rode ki lalwa zot pei i demann zot pour fer. Si ou annan okenn kestyon konsernan ki mannyer pour fer sa, pa ezite pour demann bann ansyen.b

7. Ki kalite lokazyon en maryaz i devret ete e ki mannyer ou kapab fer sa?

⁷ Fer sir ki sa lokazyon i respektab. (1 Kor. 10:31, 32) Fer zefor pour ki sa lokazyon i reflekte fri lespri sen Bondye olye lespri sa lemonn. (Gal. 5:19-26) Anliny avek sa prensip konsernan lotorite, sa nouvo marye i annan sa responsabilite pour fer sir ki sa maryaz i en levennman ere e respektab. Kwa ki kapab ed li fer sa? En diskour maryaz ki baze lo Labib ki ganny fer avek lanmour ek respe, i ed bann ki tann sa diskour pour apresye sa laranzman maryaz ki Bondye in met an plas. Sa diskour pou fer tou bann ki la rapel ki sa i en lokazyon serye. I pour sa rezon ki laplipar koup i swazir pour fer sa seremoni maryaz dan en Lasal Rwayonm si i posib. Si ou anvi servi en Lasal Rwayonm, ou devret ekri en let pour konsey ansyen byen davans pour demann permisyon.

8. Ki ou kapab fer pour gard ou resepsyon maryaz respektab? (Romen 13:13)

⁸ Lir Romen 13:13. Si ou swazir pour fer en resepsyon maryaz, ki ou kapab fer pour anpes sa lokazyon reflekte lespri sa lemonn? Sa mo Grek ki’n ganny tradwir “bann parti san kontrol” ti refer avek bann parti kot dimoun ti bwar tro bokou e lanmizik ti ganny zwe ziska tar dan lannwit. (Vwar not letid “wild parties” dan Romen 13:13 dan nwtsty-E.) Si ou swazir pour servi lalkol sa zour, pran bann mezir pour fer sir ki personn pa bwar tro bokou.c Si i annan lanmizik, gard li en volim ki bann dimoun i kapab koz avek kanmarad. Tyek byen bann sanson ki ganny zwe e osi bann parol ki ganny dir dan sa bann sanson pour ki personn pa soke.

9. Ki en koup i devret gard antet konsernan bann keksoz ki ganny dir oubyen lezot prezantasyon ki ganny fer dan zot resepsyon maryaz?

⁹ Eski dan ou resepsyon pou annan bann pti video, bann dimoun ki pou fer bann pti komanter ouswa bann lezot prezantasyon? Sa i kapab fer sa zour pli spesyal. Par kont, fer sir ki sa ki pe ganny prezante pou ankouraz lezot. (Fili. 4:8) Demann ou lekor: ‘Eski i pou demontre respe anver lezot? Eski i pou demontre respe pour sa laranzman maryaz?’ Pli enportan ankor, demann ou lekor: ‘Eski i pou onor Zeova?’ Menm si i normal pour dir bann keksoz ki fer riye, evite fer bann keksoz ki pa apropriye. Par egzanp, evite fer keksoz ki fer dimoun mazin sèks. (Efe. 5:3) Fer sir ki bann manm fanmir ek zanmi ki pou dir en keksoz i konpran kwa ki ou anvi zot koz lo la e zot respekte ou desizyon.

10. Akoz en koup i devret modes ler zot pe plàn zot maryaz? (1 Zan 2:15-17)

¹⁰ Pa bezwen atir tro bokou latansyon lo zot lekor. (Lir 1 Zan 2:15-17.) Zeova i kontan ler son bann serviter i rod fason pour onor li dan plas atir latansyon lo zot lekor. Alor bann Kretyen ki modes pou evite depans tro bokou larzan e pour “demonstre.” Ki byenfe ou pou gannyen si ou gard ou maryaz senp? Petet i pou parey pour en frer ki apel Mike, ki reste Lanorvez. I dir: “Nou pa ti andet nou lekor e sa ti fer ki nou ti kapab kontinyen fer pionye. Nou maryaz ti senp me i ti zoli e nou annan bann bon souvenir.” En ser ki apel Tabitha e ki reste Lenn, i dir: “Nou ti evit en kantite traka. Ler nou ti gard nou maryaz senp, i ti napa bokou keksoz pour nou plàn e pour nou pa tonm dakor lo la.”

11. Ki mannyer en nouvo ek nouvel marye i montre ki zot modes dan zot fason sanze ek laparans? (Vwar portre.)

¹¹ Eski ou’n deside ki ou pou mete sa zour? San dout, ou anvi zoli sa zour. Menm dan letan Labib, en nouvo ek nouvel marye ti port byen latansyon lo sa lenz ki zot ti mete sa zour. (Iza. 61:10) I vre ki sa ki ou mete zour ou maryaz i kapab en pe diferan avek sa ki ou mete lezot lokazyon. Me kantmenm sa, ou bezwen sanz dan en fason modes. (1 Tim. 2:9) Pa bezwen les lenz oubyen okenn lezot keksoz materyel vin sa keksoz pli enportan zour ou maryaz.—1 Pyer 3:3, 4.

12. Akoz en koup ki pe al marye i bezwen fer sir ki zot rezet okenn koutim ki pa an armoni avek bann prensip Labib, menm si sa koutim i popiler dan sa landrwa kot zot reste?

¹² Rezet bann koutim ki pa an armoni avek bann prensip Labib. (Rev. 18:4) Souvandfwa dan bann maryaz ozordi, i annan bann pratik ki relye avek fo larelizyon, bann pratik demonyak ek siperstisyon. Zeova i averti nou pour reste lwen avek bann keksoz koumsa ki enpir. (2 Kor. 6:14-17) Si dan sa landrwa kot ou reste, i annan serten koutim oubyen tradisyon ki en pe drol, fer resers pour konnen kote zot sorti e pour rod bann prensip Labib ki kapab ed ou, avan ou fer en desizyon konsernan kwa ki ou pou enkli dan ou maryaz.

13. Ki mannyer en koup i kapab annan menm pwennvi avek Zeova konsernan ganny kado?

¹³ Eski i normal dan sa landrwa kot ou reste pour bann envite donn sa koup ki pe al marye en kado? Sa kalite kado ki en envite i donnen i depan lo sa ki son mwayen i permet. Byensir, bann Kretyen i ganny ankouraze pour donnen e sa i fer zot zwaye. (Prov. 11:25; Akt 20:35) Me nou pa anvi fer nou bann envite santi ki zot oblize donn nou en kado oubyen fer zot santi ki nou pa pou apresye en kado ki pa ser. Nou swiv legzanp Zeova e fer zefor pour annan menm pwennvi avek li konsernan kado e nou les lezot donn dapre zot mwayen e avek zot leker.—2 Kor. 9:7.

EVIT E SIRMONT BANN PROBLENM

14. Ki problenm serten koup i fer fas avek?

¹⁴ Anmezir ki ou pe plàn en maryaz ki onor Zeova, i kapab ki ou rankontre serten problenm. Par egzanp, ou kapab vwar li difisil pour plàn en maryaz ki senp. Charlie, ki reste Solomon Islands, i dir: “I ti vreman difisil pour deside lekel ki nou pou envite pour nou resepsyon maryaz. Nou annan en kantite zanmi e dan nou kiltir, tou dimoun i ekspekte ganny envite.” Tabitha, ki’n ganny mansyonnen pli boner, i dir: “Kot mon reste, i normal pour annan bann gran resepsyon maryaz. I ti pran en pe letan pour nou paran aksepte nou desizyon pour envit zis apepre 100 dimoun.” Sarah, ki reste Lenn, i dir: “Pour serten dimoun, zot ran sosyal i vreman enportan. Mon bann kouzen ek kouzin ti fer bann gran gran maryaz. Alor mon ti santi mwan anba presyon pour fer mon maryaz pli gran ankor.” Kwa ki kapab ed ou pour sirmont sa bann kalite problenm ek lezot ankor?

15. Akoz i enportan pour priy konsernan nou bann plan maryaz?

¹⁵ Priy konsernan ou bann plan maryaz. Ou kapab dir Zeova dan lapriyer konsernan bann problenm ki ou pe rankontre anmezir ou pe plàn ou maryaz e konsernan lafason ki ou pe santi. (Fili. 4:6, 7 ek not letid “in everything” dan nwtsty-E.) Demann li pour ed ou pour fer bann bon desizyon, pour reste kalm ler ou enkyet e pour demontre kouraz ler i neseser. (1 Pyer 5:7) Anmezir ou vwar lafason ki Zeova i ed ou, sa pou fer ou annan plis konfyans dan li. Tabitha, ki’n ganny mansyonnen pli boner, i dir: “Mwan ek mon fiyanse, nou ti per ki nou pa ti pou tonm dakor avek kanmarad e avek nou fanmir lo serten keksoz. Alor sak fwa nou ti diskit konsernan nou bann plan maryaz, nou ti priye avan. Nou ti vreman santi led Zeova e nou ti annan en bon lantant avek kanmarad e avek nou fanmir.”

16-17. Akoz i bon pour annan en bon kominikasyon ler ou pe plàn en maryaz?

¹⁶ Koz dan en fason kler e avek respe. (Prov. 15:22) Konman en koup, zot pou bezwen fer en kantite desizyon konsernan zot maryaz. Sa i enkli pour swazir en dat, fer en bidze, lalis dimoun pour envite ek lezot keksoz ankor. Avan ou fer en desizyon, revwar bann opsyon ansanm e diskit lo bann prensip Labib ki aplikab e osi bann konsey ki zot gannyen avek bann Kretyen matir. Ler ou pe dir sa ki ou ti ava kontan, ou bezwen rezonnab, fer li avek labonte e pare pour adapte. Si bann manm fanmir pros, tel parey ou paran, i demann ou pour fer en keksoz ki rezonnab, esey fer sa ki zot demande. Sa i en lokazyon spesyal pour zot osi. Si ou pa kapab fer sa ki zot pe demande, eksplik zot akoz, dan en fason zantiy e avek lanmour. (Kol. 4:6) Fer ou fanmir konpran ki ou lobzektif prensipal i pour fer sa lokazyon en moman zwaye ki onor Zeova.

¹⁷ I kapab difisil pour eksplik ou paran ou bann desizyon, sirtou si zot pa dan laverite. Me ou kapab fer li. En frer ki apel Santhosh ki reste Lenn, i dir: “Nou fanmir ti anvi ki nou enkli plizyer rityel Endou. I ti pran en kantite letan pour mwan ek mon fiyanse eksplik zot nou desizyon. Nou ti fer serten azisteman kot nou ti kapab, tan ki sa pa ti al kont prensip Zeova. Par egzanp, nou ti sanz bann pla dan resepsyon maryaz pour met bann pla ki zot ti anvi e nou ti deside pour pa fer okenn sante oubyen danse parski zot pa ti abitye avek sa bann keksoz.”

18. Kwa ki pou ed ou pour fer sir ki tou keksoz i deroul byen zour ou maryaz? (1 Korentyen 14:40) (Vwar portre.)

¹⁸ Planifye byen. Si ou plàn byen, i tre probab ki ou pa pou santi ou tro strese zour ou maryaz. (Lir 1 Korentyen 14:40.) Wayne, ki reste Taywann, i dir: “Detrwa zour avan nou maryaz, nou ti fer en pti miting avek bann ki ti’n volonter pour ede avek sa levennman. Nou ti diskit lo nou bann laranzman e praktis serten bout dan nou maryaz, pour fer sir ki tou keksoz i deroul byen.” Demontre respe pour ou bann envite e fer ou mye pour ki tou keksoz i deroul aler.

19. Kwa ki kapab ed ou pour fer sir ki ou resepsyon maryaz i al dapre ou plan?

¹⁹ Si ou mazin davans sa ki kapab arive sa zour, ou pou kapab evit en kantite problenm. (Prov. 22:3) Par egzanp, si ou reste dan en landrwa kot dimoun i abitye vin en maryaz menm si zot pa’n ganny envite, reflesir davans ki mannyer ou kapab anpes sa arive. Fer sir ki ou bann fanmir ki pa Temwen Zeova i konnen ki zot kapab ekspekte e eksplik zot ou pwennvi lo serten koutim maryaz. Ou kapab montre zot sa lartik “What Happens at a Wedding of Jehovah’s Witnesses?” ki lo jw.org an Angle. Pour ed ou gard tou keksoz anba kontrol dan ou resepsyon maryaz, demann en frer matir pour “ansarz resepsyon.” (Zan 2:8) Si ou eksplik li klerman ou bann plan pour ou maryaz, i pou kapab ed ou pour fer sir ki sa lokazyon i onor Zeova e al dapre plan.

20. Ki en koup i devret gard antet konsernan zot maryaz?

²⁰ Petet ou kapab santi ou anba presyon ler ou mazin tou sa ki ou bezwen fer ler ou pe plàn ou maryaz. Me gard antet ki ou maryaz i zis en zour. I konmansman zot lavi ansanm konman bann serviter Zeova. Fer ou mye pour gard ou maryaz senp e respektab. Annan konfyans dan Zeova. Avek son led, ou pou kapab organiz en maryaz ki ler ou pou mazin sa zour, ou pou annan bann bon souvenir san okenn regre.—Ps. 37:3, 4.