Sábado 27 septiembre
Daizezebara kãgara dayirã sode diasi, jaure zarea dayirãʼa diadadeba (Rom. 5:5 TNM).
Daizeze Bedʼeaba naʉ̃ bedʼeata jarabʉ: «Dayirã sode diasi [weasi]». Libro abaʉba bedʼea «weai» ʉ̃rʉ naʉ̃ta jarabʉ: Jeowaba ʉ̃ta wãira mejãcha kãgabʉ baera, jarabʉ Daizeze kãgara bania do zakedeba zebʉ kĩrãkʼabʉta. Ʉ̃ta wãirabara kʼawuapanʉ ãyira Daizezebara kãgata (Jud. 1). Juanba jara ũrĩbisi iyi sãwũã sentibʉta naʉ̃ta bʉside: «Akʉidua kʼãrẽaba kãgata Daizezeba dayirãta, maʉ̃ kʼarea dayirãra trʉ̃gapanʉ Daizeze warrara» (1 Juan 3:1). ¿Bari ʉ̃ta wãirabʉrʉ ũdubibʉka Jeowabara iyi kãgara? Mawũã ẽ, Jeowabara iyi kãgara ũdubibʉ dayirã jõmaʉ̃ʼabida.¿Jeowabara kʼãrẽneba ũdubisi dayirã kãgabʉta? Iyi warrata zokʼasi dayirã ẽdrʉbita, maʉ̃ra jipade yibiabasi (Juan 3:16; Rom. 5:8). w24.01 28 parr. 9, 10
Domingo 28 septiembre
Mʉ̃a kʼareba widibʉrʉdera, mʉ̃ nejʉrarãra jẽda wãñi. Mʉ̃a naʉ̃ ʉ̃rʉ soiduba ĩjãbʉ: Daizezera mʉ̃are bʉa (Sal. 56:9).
Naʉ̃ bersikuloraba ũdubibʉ David perabaside kʼãrẽba kʼarebasita. Iyi bebʉ bebʉde baside krĩchasi Jeowaba iyi sãwũã kʼarebaita. Davidba kʼawuabasi iyi kʼareba nesidabʉrʉde Jeowaba kʼarebaita, iya maʉ̃ ʉ̃rʉ ĩjãsi Jeowaba jarasi baera Israel nokʼo bʼaita (1 Sam. 16:1, 13). Davidba soiduba ĩjãbasi Jeowaba jaradara jõma aripe berabarita. ¿Kʼãrẽta omarẽãbʉ bʉara Jeowaba bʉbari? Dayirãbara jʉ̃ã ẽ Jeowaba dayirãba bedʼea zroma erbʉta jõma ara omarẽãra. Mamina kĩrãbera bʉa bedʼea zroma atia ũdubʉra aranʉbai ẽjũã kĩrãwãreã zebʉrʉde Jeowaba jõbita (Is. 25:7-9). Dayirã parãnara zarea barabʉ dayirã piradrʉbita, kayabʉ bebita, sopʉabʉde so zarea diaita akʉza dayirã pẽwãbʉ jõbita (1 Juan 4:4). w24.01 6 parr. 12, 13.
Lunes 29 septiembre
Sobiabʉ yi ẽbẽra iyi nemitia kĩrãduabʉdadera (Sal. 32:1).
Krĩchadadrʉ kʼãrẽa dayirã bebʉra Jeowaʼa diasita akʉza buru kʼoesidata. Mawũã osida Jeoware bakĩrãpanasi baera. Kĩrãbera bʉa ĩjãbasita naʉ̃ra wãrĩnuta, Jeowara bʉa ũdukʼawuasita akʉza akʉbasita Jeowara bʉ Zeze kĩrãkʼa. Maʉ̃ba bʉa jarasi iyaʼa wawia ũdubita akʉza kãga bʼaita. Bʉa ĩjãbʉra warisi akʉza nãã nemitia obadara idubʉsi, mawũã Jeowaba jʉrabʉta oẽ basi awuarabʉrʉ ojʉ̃drʉsi iya kãgabʉta, mawũẽra mejãcha sobiabasi kʼawuaside Jeowaba bʉa nemitia odata jipa kĩrãduasi baera (Sal. 32: 2). Krĩchasi ãba yi jʉrebarieda wãita akʉza Jeowa ʉ̃rʉ kʼawuadata awuru ẽbẽrarã jaradiaita, atiara bʉ bebʉra Jeowaʼa diasi baera akʉza buru kʼoesi baera, wã o ewari jõmaʉ̃nẽ babibʉ ode akʉza Daizeze odeba ãĩ wãita krĩchabʉ ẽ (Mat. 7:13, 14). Zarea baidua, iduaribiraidua nekʼãrẽ baduba awuara babita akʉza ewari jõmaʉ̃nẽ krĩchaidua Jeowata kãgaita akʉza iya jarabʉta oita. w23.07 17 parr. 14; 19 parr. 19