Juanba naʉ̃ bedʼeata jarakabasi: «Aranʉbai zeyi mʉ̃ audre zareabarachuta». Jesús 30 poagabaside Galileadeba wãsi Jordán doeda. Mamara Juanba buru kʼoebinʉmasi ẽbẽrarãta. Jesúsbara kãgabasi Juanba iyita buru kʼoebimarẽã, mamina Juanba jarasi: «Mʉ̃a bʉra buru kʼoebibe ẽ, bʉabʉrʉ mʉ̃ta buru kʼoebibara». Jesúsba panʉsi: «Jeowabara kãgabʉ bʉa mʉ̃ta buru kʼoebimarẽã». Mawũã ãyira Jordán doeda kʉpanepe Juanba Jesúsʼra doeda joa edasi, mawũã buru kʼoebisi.

Jesús doedaʉba ʉ̃tʉ zeda tẽã Jeowaʼa yiwidʼisi. Mawũã yiwidʼibʉrʉ daucha bajãra ewa totosi akʉza Daizeze jaure zareara zesi pusira kĩrãkʼa. Maʉ̃ne Jeowata bedʼeasi: «Bʉtrʉ mʉ̃ warra mʉ̃a kãga. Mʉ̃a bʉtrʉ bia akʉbʉrʉa».

Mawũã Jeowa jaure zareara Jesús ʉ̃rʉ zesi, maʉ̃neba iyira Dayirã ẽdrʉbibari basi mawũã ẽ bʉrʉ Kristo. Idibʉrʉ Jesúsba ojʉ̃drʉseabasi Jeowaba omarẽã zokʼadata naʉ̃ drʉade.

Buru kʼoeda tẽã, Jesúsʼra wãsi drʉa ibʉawabʉeda, mama 40 ewaribayeda basi. Iyi mamaʉ̃ba jẽda zebʉrʉde Juanta akʉ jʉ̃ẽsi. Juanba ũdusi Jesús iyima uruta, maʉ̃ne Juanba jarasi: «Naʉ̃ obeja zakera Daizezedea, naʉ̃ba ãĩ bʉeyi ẽbẽrarã nekayiruata». Juanba maʉ̃ta jarasi ẽbẽrarã bia jara ũrĩbita Jesúsʼra Dayirã ẽdrʉbibarita. ¿Kʼawuabʉka kʼãrẽta berabarisita Jesús drʉa ibʉawabʉeda baside? Ababema kapitulode akʉdayi.

Jesús buru kʼoeda tẽã Daizeze jaure zareaba edesi iyira drʉa ibʉawabʉma. Iyara kʼãrẽsida ko ẽ basi 40 ewaribayeda, maʉ̃ba iyira mejãcha jarrabasi. Maʉ̃ne Diaruta zesi Jesús sewaita. Diaruba jarasi: «Bʉta wãrĩnu Daizeze warrabʉrʉ jarara naʉ̃ra mõgarara pan bamarẽã». Mamina Jesúsba jarasi: «Daizeze Bedʼeade bʉtabʉa, ẽbẽrarãra bari yiko awaʉba abʉ ẽã, awuarabʉrʉ Jeowaba jarabʉdeba zokʼaipanʉ».

Diarubara akʉza Jesúsʼra sewakĩrãbasi, maʉ̃ kʼarea jarasi: «Bʉta wãrĩnu Daizeze warrabʉrʉ templo ʉ̃tʉba u wãra, mawũã ora Daizezebara bʉ kʼarebaita zokʼa bʉeyi iyi angelerata». Jesúsba akʉza jarasi Daizeze Bedʼeadeba: «Mamina bʉtabʉa, nekʼãrẽ orãra Jeowaba bʉ kʼarebai kʼawuaita».

Akʉza Diaruba ũdubisi Jesúsʼa, naʉ̃ drʉade nokʼobʉrata jõma akʉza nekʼãrẽ biabʉta, maʉ̃ne Diaruba jarasi: «Bʉta mʉ̃a yiwidʼima aba yiwidʼira, mʉ̃a bʉaʼa naʉ̃ drʉadebʉ nokʼorata diayi». Jesúsba jarasi: «¡Diaru ãĩ wãra! Daizeze Bedʼeade bʉtabʉa, Daizezeʼa abaʉʼabʉrʉ yiwidʼibara».

Mawũã Diarura ãĩ wãsi. Daizeze angelerata ze kʼãrãpe Jesúsʼa yikota diasida. Maʉ̃ berabarida tẽã Jesúsbara Daizeze Nokʼo ʉ̃rʉ jaradia jʉ̃drʉsi. Maʉ̃ta omarẽã zokʼasibasi Jeowabara Jesúsba naʉ̃ drʉade. Ẽbẽrarãbara kãgadebasi Jesúsba jaradiabʉra, maʉ̃ba Jesús wãbʉrʉma kʼaidu wãpanasi.