Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2025 Watch Tower Bible and Tract Society of Pennsylvania
2-8 MARZOBAYEDA
BEDʼEA BIA DAIZEZE BEDʼEADE ŨDUDATA ISAÍAS 41, 42
«Perarãra»
Jeowaba bʉaʼa so zarea diabʉ
13 Jeowaba bedʼea biata diasi judiora jarasi ãyi ẽdrʉbita. Mamina kʼawuabasi maʉ̃ ewari zebʉrʉdera ãyitara mejãcha zareabaibasita. Jeowaba yi jaramabasi zeita nokʼota Babilonia audupanʉta ãyi juwa edre baebita akʉza Babiloniasida (Is. 41:2-5). Mawũẽra, ¿judiorãra perabaibarabasika maʉ̃ kʼareara? Mawũã ẽ. Naʉ̃ berabari nãã Jeowaba yi jaramabasi baera. Naʉ̃ta jarasi: «Perarãra mʉ̃ra bʉmebʉ baera. Krĩcha orãra mʉ̃ra bʉ Daizeze baera» (akʉra Isaías 41:10-13). ¿Kʼãrẽa Jeowabara jarasi iyira ãyi Daizezeta? Jeowabara bari kãga ẽ basi ãyira iyaʼabʉrʉ yiwidʼidamarẽã, awuarabʉrʉ kãgabasi kĩrãbedamarẽã iyira ewari jõmaʉ̃nẽ ãyi kʼawa bʼaita akʉza kʼarebaita (Sal. 118:6).
Jeowaba bʉaʼa so zarea diabʉ
14 Adewara Jeowabara kʼãrẽta osi judiora kʼarebaita perada ẽ marẽã. Ãyaʼa kĩrãbebisi iyira mejãcha zarea barabʉta akʉza nekʼãrẽ mejãcha kʼawuabʉta. Ʉ̃ta akʉ jarasi bajãta, ũdubita chĩdaurabʉra iya parãsita, adewara maʉ̃ra trʉ̃ra aba abaka kʼawuabʉta (Is. 40:25-28). Naʉ̃ba jarakĩrãbʉ Daizeze Jeowabara kʼawuabʉta ẽbẽrarã iyi ode bʉ trʉ̃ aba abaka. Jeowaba zarea erbʉbʉrʉ chĩdaura parãita, naʉ̃ba ũdubibʉ dayirãʼa zarea erbʉta iyi pʉwʉrʉ kʼarebaita. Mawũẽra judiorãra neẽbasi kʼãrẽa pera bʼaira.
Dayirãra doba panʉ ẽ
19 Jeowabara mejãcha kãga iyaʼa kãga ũdubipanʉrãra, iyara biʼia akʉbʉ. Maʉ̃raba bedʼea zroma ũdubʉrʉdera doba amae ẽ. Jeowara zeze kĩrãkʼabʉ. Zeze abaʉba yi wũãwũã kãga ũdubibʉ kĩrãkʼa akʉza iya nesidabʉde kʼarebabʉ kĩrãkʼa Jeowabida abarika akʉbʉ iyi ode kʼẽrẽpapanʉrãra. Iyara jaradiabʉ kʼãrẽta oibarata, diabʉ ãya nesidabʉta, bia akʉbʉ akʉza so zarea diabʉ. Dayirãbida Jeowade kĩrãkʼa oseapanʉ. Awururaba bedʼea zroma erbʉta ũdubʉrʉde kʼarebaseapanʉ. Dayirãba kʼãrẽ bedʼea zroma erbʉ krĩcha ẽã kʼawuapanʉ Jeowabara dayirãra doba amae ẽãta, Isaías 41:10ba jarabʉ kĩrãkʼa, nama jarabʉ: «Perarãra, mʉ̃ra bʉmebʉ baera».
Jʉrʉda nekʼãrẽ biʼiabʉta Daizezedebemata
Bʉa bedʼea zroma ũdubʉrʉdera Jeowaba kʼarebayi
11 Jeowaba sãwũã kʼarebaita. Iyara jarabʉ iyira dayirã kʼawa bʼaita mawũã kʼarebaita (akʉra Salmo 94:18). Abarika ẽbẽra jĩrʉ pobʉrʉde bia wãita kʼareba nesidabʉ kĩrãkʼa, dayirãbida kʼarebata nesida Jeowa ode kʼẽrẽpa takeraita. Maʉ̃ta berabaribʉrʉdera Jeowabara naʉ̃ta oita jarabʉ: «Mʉ̃ra Jeowa, bʉ Zeze, mʉ̃ara jidabʉ bʉ juwarata, mʉ̃ yi jarabʉra perarãra mʉ̃a kʼarebayi» (Is. 41:13). Davidba ũdusi Jeowaba iyi sãwũã kʼarebasita, iyi nejʉraraba iyi pẽwãsidade iya naʉ̃ta jarasi Jeowa ʉ̃rʉ: «Bʉ juwaraba kʼarebabʉ mʉ̃ra» (Sal. 18:35). ¿Mamina Jeowaba sãwũã kʼarebasi iyira?
12 Jeowaba dayirãra kʼarebabʉ awururaneba, bari jaraita David sopʉabasidera iyi neũdukʼawua Jonatánba akʉ jʉ̃ẽsi, iyaʼa so zarea diaita akʉza bedʼea biata jara ũrĩbita (1 Sam. 23:16, 17). Abarika osi Jeowaba Elíasʼʉ̃me, Eliseota zokʼa bʉesi Elíasta kʼarebamarẽã (1 Rey. 19:16, 21; 2 Rey. 2:2). Idi ewade Jeowaba zokʼabʉ dayirã mebẽrãta, mebẽrã kongregasionebemata akʉza zõrãrãta dayirã kʼarebaita. Mamina dayirã sopʉabʉdera edaʉde doba bakĩrãbʉ, yãrãʉ̃me bedʼea ẽ baita. Mawũã berabaribʉrʉdera, ¿kʼãrẽta oseapanʉ Jeowaba dayirãta kʼarebamarẽã?
9-15 MARZOBAYEDA
BEDʼEA BIA DAIZEZE BEDʼEADE ŨDUDATA ISAÍAS 43, 44
Naʉ̃ propesia bʉdapeada 200 poaga berabarida tẽãbʉrʉ aripe berabarisi
Daizeze Bedʼeara zesi Daizezedeba
13 Daizeze Bedʼeade ʉ̃rabʉrʉ zei jarabʉra aripe berabarisi. Bari jaraita, propeta Isaíasbara jarasi, pʉwʉrʉ Babiloniara makenanaita, adewara jara ũrĩbisi sãwũã eda wãnaita (Isaías 13:19). Babilonia audura doba pʉrra oʉ̃basi akʉza ãyi eda wãbari puertara yi zromabasi. Adewara Isaíasbara jarasi Babilonia dora errʉita, puerta zromara ewa jira bʼaita. Adewara jarasi gorogorora zedara yõna ẽã eda wãita. Akʉza Isaíasbara jarasi yi mawũã oi ẽbẽrarã Ciro bʼaita (akʉra Isaías 44:27–45:2; akʉra nota 4ta).
14 Isaíasba naʉ̃ bedʼea jarada 200 poaga berabarida tẽã, gorogorora Babilonia makenaira ibarisi. ¿Kʼaiba zokʼabasiba maʉ̃ gorogorora Persiadebemara? Ciroba. Isaíasba ʉ̃rabʉrʉ zei jaradara jõma aripe berabarinʉmasi.
15 Babilonia makenai diamasira, ãyira mejãcha bʉzridabarabasi. Krĩchapanasi baera doba audu pʉrra oʉ̃bʉba, semento arare bʉba, mia kʼaiba neida oda ẽãta. Mamina Ciro iyi gorogororabawaraʉba do erraʉbisida, do eda erraʉbʉrʉde gorogororãra do kĩrãʉbarisida. Mamina, ¿sãwũã berabarisi Babilonia sementoba audu pʉrrabadara? Isaíasba jarada kĩrãkʼa puerta zromara ewa jirabasi. Mawũã gorogororãra yõ ẽã eda wãsida.
Ciroba poaga aba Babilonia zokʼabʉrʉde jarasi: «Jeowabara mʉ̃aʼa jarasi Jerusalén templota jẽda ara omarẽã, maʉ̃ kʼarea judiora mama wãkĩrãbʉra wãseapanʉ». Jerusalén ãrĩnapeada 70 poaga berabarida tẽã, mejãchaʉta jẽda wãsida Jerusalénʼena, mawũã aripe berabarisi Jeowaba jarabaridara. Cirobara jẽda diabari jʉ̃ẽsi Nabucodonosorba jõma nekʼãrẽ Jeowa templodeba ededapeadara. ¿Bʉara kʼawuasika sãwũã Jeowabara iyi pʉwʉrʉta kʼarebasita Cirodeba?
Jʉrʉda nekʼãrẽ biʼiabʉta Daizezedebemata
Lepanʉraba widipanʉta
Yi ũmera propesia Ciro ʉ̃rʉ bedʼeabʉta iyi. Iyara judiorãra ẽdrʉbisi Babilonianeba akʉza jarasi Jeowa templosida ara odamarẽã (Is. 44:26–45:4). Nokʼo Ciro Persiadebemabara aripe berabaribisi maʉ̃ propesiara (Esd. 1:1-4). Mamina, Cirora Daizeze ode ba ẽ basi. Mawũãsidu Jeowaba iyita zokʼasi mawũã maʉ̃ propesia aripe berabaribita. Mamina Jeowabara Cirora ajuerzade iyaʼa yiwidʼibi ẽ basi (Prov. 21:1).
16-22 MARZOBAYEDA
BEDʼEA BIA DAIZEZE BEDʼEADE ŨDUDATA ISAÍAS 45-47
«Mʉ̃ra Daizeze, mʉ̃ kĩrãkʼara neẽ»
w20.06-S 5 parr. 14
Jeowaba iyi trʉ̃ra neneẽã babibʉ
14 Diarubara obe ẽ Jeowaba kãgabʉta oẽ marẽã. Daizeze Bedʼeabara jarabʉ Jeowa kĩrãkʼara neẽãta. Ẽbẽrarãta Diarua are wãsida baera Jeowara mejãcha sopʉabisida (Sal. 78:40). Mawũãsidu Jeowara buru bia baera, jʉ̃ã kʼawuabʉ baera akʉza kʼawuabʉ baera kʼãrẽta oibarata, maʉ̃ba kʼawuabʉ iya kʼãrẽta oibarata. Jeowabara ũdubibʉ kʼãrẽaba zarea barabʉta iyira akʉza kãgata ũdubibʉ. Jeowara nekʼãrẽ obʉ iyi trʉ̃ neneẽã bamarẽã (1 Juan 4:8).
Bʉa nekʼãrẽ ʉ̃rʉ bia kʼawua ẽ mina aduʼabara
15 Dayirãba kʼawua ẽ mina nrʉemane kʼãrẽta sãwũã berabarita kʼawuapanʉ Jeowaba dayirãʼa jarabʉta ewari jõmaʉ̃nẽ babita, nama egorode bʼaita mawũã ẽ bʉrʉ ʉ̃tʉ bʼaita. Kʼawuapanʉ Jeowara sewa nebʉrʉ oẽãta iya jarabʉra wãrĩnu aripe obʉta (Tito 1:2). Jeowabʉrʉ jaraseabʉ naʉ̃ta: «Mʉ̃a naena jarabʉ, tẽãne kʼãrẽ zeita, naena jarabʉ wabida kʼãrẽ berabarida ẽãta». Jeowaba jaradara aripe berabari wã akʉza jõma aripe berabariyi (Is. 46:10). Dayirãba kʼawuapanʉ Jeowaba dayirã kãgabʉra mia kʼaiba oẽ baita maʉ̃ idubʉmarẽãra (Rom. 8:35-39). Akʉza kʼawuapanʉ Jeowabara dayirã buru biata akʉza so zarea diaita bedʼea zroma berabarinʉmʉnera maʉ̃ awuantaita. Adewara kʼawuapanʉ Jeowabara wãrĩnu kʼarebaita dayirãra akʉza nebia diaita (Jer. 17:7, 8).
Karta dayirãʼa zarea diabʉta naʉ̃ ewari jõñiena
13 Maʉ̃ ewari zeyedara kristianorabara ũdubidaibarabasi ãyara nekʼãrẽ bia mejãcha kãga ẽãta, bari jaradaita, aukʼara kãgada ẽ baibarabasi platata (akʉra Hebreos 13:5). Naʉ̃ra kristianoranebema ʉ̃kʉrʉra nãã mejãcha zʉbʉriasida jarrababa adewara ʉ̃kʉrʉta nekʼãrẽ mejãcha neẽbasi (Heb. 10:32-34). Adewara ãyidebema ʉ̃kʉrʉra mejãcha traja jʉ̃drʉsibaibara mawũã plata mejãcha ũduita nekʼãrẽ bia erbaita. Mamina zʉbʉria zroma zebʉrʉdera ãyira platabara kʼareba ẽ baibasi (Sant. 5:3). Maʉ̃ba kristianora plata mejãcha jʉrʉdaraitara audre zarebasi ãyi de amaeita akʉza ãya nekʼãrẽ bia erbʉsida amaeita.
14 Dayirãba ĩjãpanʉbʉrʉ naʉ̃ ewarira wãrĩnu jõita mawũãra krĩchada ẽ bayi plata mejãcha jʉrʉita akʉza nekʼãrẽ bia erpanaita, zʉbʉria zroma zebʉrʉdera platara mia kʼãrẽsida bale ẽ bayi. Daizeze Bedʼeabara jarabʉ ẽbẽrarãbara orota, platata ode balbʉeita, maʉ̃bara ãyi bebʉra kʼareba ẽ bai bera (Ezeq. 7:19). Dayirãbara krĩchada ẽ baibara mejãcha plata erbaita awuarabʉrʉ jʉrʉdaibara trajo dayi mebẽrãba nesidabʉ diabʉta akʉza dayi bia babibʉta. Maʉ̃ awuara maʉ̃ trajoba audre obibʉta Jeowadeta. Mawũã opanʉbʉrʉ naʉ̃ba kʼarebayi dayirã mejãcha debe oẽ baita. Adewara dayirãba nekʼãrẽ biata erbʉ ẽ bʉrʉ ewari adua ẽ bayi jʉrʉita maʉ̃ sãwũã bia erbaita. Adewara dayirãra jʉra kʼawuapanaibara dayirãba nekʼãrẽ biata erbʉbʉrʉ maʉ̃trʉ jʉ̃zaba akʉnʉma ẽ baita (Mat. 6:19, 24). Naʉ̃ ewari jõbodoarera dayirãbara bia krĩcha kʼãrãpe jidaibara nekʼãrẽ bia erpanʉta audre bia akʉita, mawũã ẽ bʉrʉ Jeowa ʉ̃rʉ audre ĩjãita.
Jʉrʉda nekʼãrẽ biʼiabʉta Daizezedebemata
Lepanʉraba widipanʉta
Jeowabara iya kãgabʉta aripe berabaribibʉ. ¿Naʉ̃ba sãwũã kʼarebaseabʉ dayirãba biʼia kʼawuaita Jeowaba sãwũã kʼawuabʉta ʉ̃ra zeide kʼãrẽ berabarita? Isaías 46:10ba jara ũrĩbibʉ: «Mʉ̃a naena jarabʉ, tẽãne kʼãrẽ zeita, naena jarabʉ wabida kʼãrẽ berabarida ẽãta. Mʉ̃a jarabʉ: ‹Mʉ̃a jidadara oyi akʉza mʉ̃a kãgabʉra jõma oyi›».
Jeowaba nekʼãrẽ ʉ̃ra zeide kʼãrẽ berabarira kʼawuabʉ iyira zarea barabʉ baera maʉ̃ aripe berabaribita. Edaʉde daya pelikula akʉbʉrʉdera, maʉ̃ne kʼãrẽ berabari kʼawuaita akʉbʉ yi jõbodoarebʉta, mamina Jeowaba nekʼãrẽ ʉ̃ra zeide kʼãrẽ berabari kʼawuaira mawũã oẽ, iya maʉ̃ oira nesida ẽ. Awuarabʉrʉ Jeowabara krĩchabʉ kʼãrẽ ewaride berabaribita nekʼãrẽ iya kãgabʉta, mõbe maʉ̃ ewari zebʉrʉde aripe berabaribibʉ (Éx. 9:5, 6; Mat. 24:36; Hech. 17:31).
Maʉ̃ kʼarea, Daizeze Bedʼeaba zokʼabʉ naʉ̃ra bedʼeata «kʼawuabʉ», «yi oma» akʉza «oita krĩchabʉ». Mawũã ũdubita Jeowaba kʼãrẽta obʉta nekʼãrẽ ʉ̃ra zei ʉ̃rʉ (2 Rey. 19:25; Is. 46:11). Naʉ̃ra bedʼea zokʼabʉba ũdubikĩrãbʉ yumakẽrã kʉgʉrʉ parãbarita (Jer. 18:4). Abarika yumakẽrã kʉgʉrʉ parãbariba egorobata kʉgʉrʉ babibʉ kĩrãkʼa, Jeowaba nekʼãrẽ obʉ mawũã iya oita krĩchabʉ aripe berabarimarẽã (Efes. 1:11).
23-29 MARZOBAYEDA
BEDʼEA BIA DAIZEZE BEDʼEADE ŨDUDATA ISAÍAS 48, 49
Jeowaba jarabʉta ũrĩpanʉbʉrʉ bia wãñi
Jeowaba jarabʉta ũrĩra arigʉ yibia. Akʉra Isaías 48:17, 18, mõbe naʉ̃ta panʉidua:
● ¿Bʉara wãrĩnu ĩjãbʉka Daizezebara dayirãra bia wãmarẽã kãgabʉta? ¿Kʼãrẽa?
● ¿Sãwũã kʼareba zebʉrʉ Daizeze Bedʼea akʉbʉba akʉza Jeowa ʉ̃rʉ kʼawuabʉba?
¿Jeowabara sãwũã edadamarẽãbʉ kongregasionebemaraba ẽbẽra nemitia odara?
JEOWABA iduaribibʉ dayirã aba abakaʉba kʼawua jidamarẽã kʼãrẽta oita, wãrĩnubaira dayirãbara ewariza krĩchaibara kʼãrẽta oita jidaita. Dayirãitara audre yibiabayi jidaita dayirã bebʉ Jeowa diaita akʉza iyi pʉwʉrʉdebema bʼaita. Jeowabara kãgabʉ ẽbẽrarã jõmaʉ̃ba maʉ̃ta oita jidamarẽã. Iyara ẽbẽrarã jõma mejãcha kãgabʉ baera akʉza nebiata kãgabʉ baera ẽbẽrarãita. Adewara Jeowabara kãgabʉ ẽbẽrarã iyi neũdukʼawua bia bamarẽã akʉza ewari jõmaʉ̃nẽ panamarẽã (Deut. 30:19, 20; Gál. 6:7, 8).
Jeowa pʉwʉrʉbara kãga jõma aripe oita
16 ¿Bʉra krĩcha obʉka krĩchabʉ baera ewari jõmaʉ̃nẽ aripe oẽãta Jeowaba zokʼabʉta? Krĩchara Jeowaba yiza zokʼadata Isaías 48:18de (akʉra). Jeowabara jarabʉ dayirãba aripe obʉra pusa imatʉbʉ kĩrãkʼa bʼaita. Krĩchara bʉta playade pusa maraza zaʉzaʉbari akʉ edaʉnʉmʉta, ¿maʉ̃ne krĩchaika maʉ̃ pusa zaʉzaʉbarira ewari abaʉde piki totoita? Mawũã ẽ, bʉa kʼawuabʉ baera maʉ̃ pusa maraza mawũã kiʉbʉta poaga bio bata.
17 Bʉa aripe obʉra pusa imatʉbʉ kĩrãkʼabayi, ¿sãwũã? Bʉa nekʼãrẽ jidai naweda krĩchara Jeowaba kʼãrẽta bʉa omarẽã kãgabʉta, mõbe maʉ̃ta ora. Bʉita Daizezeba zokʼabʉ oira zaremina, bʉ Zeze Jeowara bʉ kʼawabayi kʼarebaita, bʉta zarea bamarẽã akʉza teitea bamarẽã iya zokʼabʉ aripe oita (Is. 40:29-31).
Jʉrʉda nekʼãrẽ biʼiabʉta Daizezedebemata
Jeowade kĩrãkʼa kĩrãdua kʼawuabaibara
12 Ĩjãra Jeowa ʉ̃rʉ, bʉ sãwũã sentibʉ ʉ̃rʉ krĩcharãra, maʉ̃ ʉ̃rʉ ĩjãrãra (akʉra Proverbios 3: 5, 6). Jeowabara ewari jõmaʉ̃nẽ kʼawuabʉ dayirãita kʼãrẽta audre yibiata (Is. 55:8, 9). Jeowaba dayirã nekʼãrẽ omarẽã jarabʉrʉdera iyara jara ẽ nekʼãrẽ dayirã sopʉabiseabʉta omarẽã, maʉ̃ba iya dayirã wuabemaraba aña obʉta kĩrãduamarẽã jarabʉbʉrʉ kʼawuapanʉ maʉ̃neba nebiata ũdudaita (Sal. 40:4; Is. 48:17, 18). Mamina dayirã sãwũã sentibʉ ʉ̃rʉ krĩchapanʉbʉrʉ akʉza maʉ̃ ʉ̃rʉ ĩjãpanʉbʉrʉ awuruba nekʼãrẽ aña odara kĩrãduabeda ẽ bayi (Prov. 14:12; Jer. 17:9). Naomiba jarabʉ: «Nawedara mʉ̃a krĩchabasi neẽbasita kʼarea kĩrãduaita mʉ̃ kimaba odara, iyara ẽbẽrarã ãkadabeta akʉbasi baera, mʉ̃ra mejãcha perabasi iya akʉza jẽda zʉbʉriabi kʼarea, mawũã ẽ bʉrʉ iya krĩchamarẽã iya mʉ̃ sãwũã odara mʉ̃itara pʉ ẽ basita. Mʉ̃a krĩchabasi Jeowaba mʉ̃ sãwũã sentibʉta kʼawuabʉ baera nesida ẽãta iya aña oda kĩrãduaira, mamina tẽã biʼia ũrĩsi Jeowaba mʉ̃ sãwũã sentibʉ kʼawuabʉba jarakĩrãkʉ ẽãta iyitara bigata mʉ̃a mʉ̃ kimaba sãwũã oda kĩrãdua ẽ baira. Jeowabara kʼawuabʉ mʉ̃ sãwũã sentibʉra mamina iya kãgabʉ mʉ̃a ewarita berabaribimarẽã mawũã mʉ̃ sopʉabʉ taʉita akʉza kĩrãduamarẽã mʉ̃ kimaba aña odata».
6-12 ABRILBAYEDA
BEDʼEA BIA DAIZEZE BEDʼEADE ŨDUDATA ISAÍAS 50, 51
Ũrĩnadrʉ Jesús bedʼeata, Jeowaba iyaʼa jaradiasi baera
kr-S 182 parr. 5
Jaradiabʉ mebẽrã sãwũã jaradiaibarata Daizezeba zokʼabʉ ʉ̃rʉ
5 Jeowabara Jesúsʼara biʼia jaradiasi Jesús nama uda zei nãã, maʉ̃ba Jesúsba nama uda zesidera yi zezeba jaradiada kĩrãkʼa jõma aripe osi. Isaías 50:4, 5de naʉ̃ta jarabʉ Jesús ʉ̃rʉ: «Mʉ̃ra iya ʉ̃rʉmabʉ diapedaza.Ʉ̃rʉmabʉ mʉ̃ kʉwʉrʉta, ũrĩmarẽã nekʼawuabariraba obʉ kĩrãkʼa». Yumakẽrã Daizeze Bedʼea ʉ̃rʉ mejãcha kʼawuabʉba naʉ̃ta jarasi naʉ̃ testo ʉ̃rʉ: «Jeowabara kolegioeda edesi Jesúsʼra, wũãwũã kolegio wãbari kĩrãkʼa, mõbe jaradiasi kʼãrẽta oibarata akʉza sãwũã jaradiaibarata ẽbẽrarã» (Juan 12:49). Jesús nama uda zesidera jõma aripe osi iyaʼa jaradiadapeada kĩrãkʼa, biʼia jaradiasi ẽbẽrarã akʉza iyi kʼaidupanʉrabida jaradiasi sãwũã biʼia jaradia kʼawuaita.
cf-S 133 parr. 13
«Mʉ̃a mʉ̃ Zezera kãgata»
13 Jesús ʉ̃tʉbasidera ũdubisi iyira kʼawuakĩrã kʼawuabʉta. Jeowaba jara ũrĩbisi Isaías 50:4-6 bayeda, kʼãrẽaba zʉbʉriaibasita Mesíasʼra, mawũãsidu Jesúsbara kʼawuakĩrã kʼawuasi. Akʉza Jesús nama uda zesidera iyira temploeda wãbasi akʉza sinagogaeda, mawũã ũdubisi iyara kʼawuakĩrã kʼawuabʉta (Lucas 4:16; 19:47). Dayirãta Jeowaʉ̃me kʼẽrẽpa bakĩrãpanʉbʉrʉ, ãba yi jʉrebarimae wãbʉta iduaribida ẽ baibara, mama Jeowaʼa yiwidʼipanʉ baera akʉza Jeowa ʉ̃rʉ audre kʼawuapanʉ baera.
Jʉrʉda nekʼãrẽ biʼiabʉta Daizezedebemata
¿Bʉra nekʼãrẽ oyawabʉka ẽjũã kĩrãwãreãnẽra?
Jeowaba jaraside ẽbẽrarã naʉ̃ drʉata biramarẽã akʉza trajamarẽã, Jeowaba ũdubikĩrãbasi wiña wiñane drʉata ẽjũã kĩrãwãreã bʼaita (Gén. 1:28). Ẽbẽrarã ewari jõmaʉ̃nẽ bakĩrãbʉbara ũrĩbara naʉ̃ leyta, mamina maʉ̃ oira ãyira neẽ sama ẽjũã kĩrãwãreãnẽ bʼaira, maʉ̃ jardin Edénta aduasi baera. Armagedón berabarida tẽã drʉara jaigʉa bʼai baera, nekʼãrẽ oibarata bayi mejãcha.
Maʉ̃ba kĩrãbebibʉ israelitara Babilonianeba jẽda wãside Jerusalénʼena, ãya trajo oda ʉ̃rʉ. Maʉ̃ pʉwʉrʉdera miõta ba ẽ basi 70 poagabayeda. Propeta Isaíasba jarasi Jeowa kʼarebadeba israelitarabara maʉ̃ra jẽda ara onʉmʉita, naʉ̃ propesiaba jarabʉ: «Drʉa ibʉawabʉde Edén kĩrãkʼa babiyi akʉza koribi kʼãrẽ neẽãbʉmaera Jeowa de udabʉ kĩrãkʼabayi» (Is. 51:3). Israelitarãra bia wãsi, abarika idi ewadebida Jeowa kʼarebaba ẽbẽrarã ẽjũã kĩrãwãreãnẽbʉbara ara odayi drʉata. Kʼãwũãena bʉa nekʼãrẽ mejãcha oseabʉ mawũã ũdubita nekʼãrẽ ʉ̃ra zeide maʉ̃ trajo okĩrãbʉta.
13-19 ABRILBAYEDA
BEDʼEA BIA DAIZEZE BEDʼEADE ŨDUDATA ISAÍAS 52, 53
Jesúsba mejãcha kãgabʉta ũdubisi
ip-2-S 205 parr. 25
Jesúsʼra yi zroma babisi Jeowabara
25 Jesúsʼra krĩcha oẽ basi iyi zʉbʉriai kʼarea, Isaíasba naʉ̃ta jarasi iyi ʉ̃rʉ: «Iyira zʉbʉria osida akʉza bia edada ẽ basi mamina iyara kʼãrẽ jara ẽ basi. Obeja kĩrãkʼa edesida nedʉwʉrʉra beabarima, obeja iyi kara ãĩ bʉepanʉena chupeabʉ kĩrãkʼa, iyira i ewa ẽ» (Isaías 53:7). Diamasi Jesúsba iyi bei nãã jaraseabasi angelera iyi kʼarebadamarẽã, mamina iya maʉ̃ra oẽbasi, propesiara iyi ʉ̃rʉ jarabʉta aripe berabarimarẽã (Mateo 26:53, 54; Juan 1:29). Pariseora iyi ʉ̃rʉ imitia bedʼeasidadera, Jesúsbara kʼãrẽ jara ẽ basi (Mateo 27:11-14). Jesúsbara kãgabasi Jeowabara iyi ʉ̃rʉ jaradara jõma aripe berabarimarẽã, maʉ̃ba beisi ẽbẽrarãta kayiruadeba ẽdrʉdamarẽã kayadeba akʉza beideba.
Jʉrʉda nekʼãrẽ biʼiabʉta Daizezedebemata
Bʉara kʼãrẽ nebiata ũdubʉ Jeowaba bʉ nemitia kĩrãduabʉdeba
(Akʉra Isaías 53:5). Daizeze Bedʼeaba jarabʉ dayirãra nemitia omia baera ẽbẽra abaʉba kaya kayirua erbʉ kĩrãkʼabʉta, maʉ̃ba dayirãba nemitia obʉrʉdera Jeowaʉ̃me neũdukʼawua bia badata aduabʉ. Mamina Jeowaba dayirã kayabadara bebibʉrʉ kĩrãkʼasi yi Warrata dayirãbari beimarẽã zokʼaside, iyara ẽdrʉbisi maʉ̃ kayiruadeba akʉza dayirãra jẽda iyi neũdukʼawua baseapanʉ (1 Ped. 2:24). Ẽbẽra aba kayabʉta bebʉrʉdera mejãcha sobiabʉ, dayirãsida abarika sobiapanʉ Jeowaʉ̃me neũdukʼawuabadata jẽda ara obʉrʉdera akʉza Jeowaba dayirã jẽda bia akʉbʉrʉde.
20-26 ABRILBAYEDA
BEDʼEA BIA DAIZEZE BEDʼEADE ŨDUDATA ISAÍAS 54, 55
¿Kʼãrẽta oyawabʉ bʉa, Jeowaba jaradiamarẽã?
w09-S 15/9 21 parr. 3
Jeowaba dayirã jaradiabʉra jipade yibia
3 Jeowabara jaradiakĩrã ẽbẽrarãra kayirua omiaramina. Iya Isaías 54:13de bʉ bedʼeata jarasi ʉ̃ta wãira: «Jõma bʉ wũãwũãrãra Jeowaba jaradiayi akʉza bʉ wũãwũãrãra biode neneẽãpanañi». Naʉ̃ bedʼeara ʉ̃ta wãira jarasimina, naʉ̃ra yibia ẽbẽrarã nama uda panʉraitabida (Juan 10:16). ¿Maʉ̃ra sãwũã kʼawuapanʉ? Propeta Isaíasba naʉ̃ta jarasi, ẽbẽrarã mejãchaʉta Daizezeʼa yiwidʼidaita akʉza jarasi maʉ̃raba jarapanʉta: «Wãdrʉ, Jeowa katumaena wãrĩzedadrʉ, Jacob Daizeze dema. Iya jaradiayi iyi ota akʉza dayirãra iyi ode wãbayi» (Isa. 2:1-3). Mawũã Jeowabara jaradiayi. Kʼãrẽaba yibia naʉ̃ra.
w18.11-S 4 parr. 6, 7
«Wãrĩnuta edara akʉza nẽdorãra»
6 (Akʉra Proverbios 23:23). Wãrĩnu ʉ̃rʉ kʼawuaira zarea odaibara, mawũã zarea opanʉbʉrʉ naʉ̃ba kʼarebayi daya kʼawuabʉta idubʉ ẽ baita maʉ̃ra, ¿sãwũã oseapanʉ? Atia kʼawuadaya maʉ̃ ʉ̃rʉ.
¿KʼÃRẼTA IDUBɄSIDA JEOWA Ʉ̃RɄ KʼAWUAITA?
7 Ewari. Ewarita erpanaibara Daizeze ʉ̃rʉ kʼawuaita, iyi bedʼea leita, ãba yi jʉrebari wãi nãã estudiaita, dayikʉza estudiaita akʉza ãba yi jʉrebarima wãita. Maʉ̃ oita daya okĩrãbʉta idubʉibara (akʉra Efesios 5:15, 16). Jõmaʉ̃ba daucha kʼawuapanʉ ẽ Jeowa ʉ̃rʉra, ʉ̃kʉrʉbara mesera kʼawuadogo, ʉ̃kʉrʉba kʼawuaira ewari bio edebʉ. Mamina mejãchabʉ daya Jeowa nebia ʉ̃rʉ kʼawuaira (Rom. 11:33). Dayirabara ẽjũã kĩrãwãreãnẽra ewari mejãcha erpanañi Jeowa ʉ̃rʉ kʼawuaita. Idi ewadebida maʉ̃ba yibia dayirãba ewari erpanaita Jeowa ʉ̃rʉ audre kʼawuaita.
be-S 14 parr. 3-5
«Mʉã jara bʼʉta kĩrãkuita ũrĩũdua»
Ãba yi jʉrebʉrʉdera nekʼãrẽ bioʉba biʼia ũrĩbi ẽãseabʉ. Bari jaraita mebẽrã ya wãnʉmeba, wũãwũãra bianʉmeba, kayaba, krĩcha obʉba. Maʉ̃nera, ¿kʼãrẽba kʼarebaseabʉ kĩrãkita ũrĩta? Naʉ̃raba kʼarebaseabʉ
Kĩrãkita akʉibara diskurso dianʉmʉba kʼãrẽ jarabʉta, iya testo jarabʉta kʼaidu akʉibara akʉza badu jẽda akʉnʉma ẽ baibara kʼãrẽ berabarinʉmʉta.
Bʉa krĩcha obʉ kʼarea bʉa kĩrãkita ũrĩ ẽ bʉrʉ, Jeowaʼa widira bʉaʼa kĩrãkita ũrĩbimarẽã widida ʉ̃rʉ (Sal. 94:19; Filip. 4:6, 7). Ãba yi jʉrebarieda wãira Jeowaba nebia diada baera, maʉ̃ba iyara kãgabʉ kĩrãkita ũrĩnamarẽã, maʉ̃ba dayita kʼarebadamarẽã (Mat. 7:7, 8; 1 Juan 5:14, 15).
Jʉrʉda nekʼãrẽ biʼiabʉta Daizezedebemata
«Mʉ̃ra ewari jõmaʉ̃nẽ bʉ kʼawabayi»
(Akʉra Isaías 54:17). Krĩchara naʉ̃ propesia ʉ̃rʉ: «Nekʼãrẽ kayirua parãmabʉbara neida oẽbayi». Naʉ̃ bedʼeara idi ewade aripe berabarinʉmʉ. Naʉ̃ bedʼeaba mejãcha kʼarebabʉ dayirãta idi ewade: «Jõma bʉ wũãwũãrãra Jeowaba jaradiayi akʉza bʉ wũãwũãrãra biode neneẽãpanañi. Jõma bʉa aripe obʉra ariya piki teitea erbayi [...], bʉra mia kʼãrẽ kʼarea pera ẽ bãyi akʉza mia kʼãrẽba so perabida ẽ bayi, maʉ̃ra bʉ kʼawa neẽbai baera» (Is. 54:13, 14). Mia Diaruba obe ẽ bayi Daizeze odepanʉraba Jeowa ʉ̃rʉ jaradiapanʉta idubʉdamarẽãra (2 Cor. 4:4). Daizeze odepanʉraba Jeowaba kãgabʉde yiwidʼibʉra ewari jõmaʉ̃nẽ mawũãbayi, nekʼãrẽ baduba oẽbayi ãya maʉ̃ta idubʉdamarẽã.
27 ABRILDEBA–3 MAYO EDA
BEDʼEA BIA DAIZEZE BEDʼEADE ŨDUDATA ISAÍAS 57, 56
Sobiapanʉ Jeowata dayirãʉ̃mebʉ baera
ip-2-S 269 parr. 14-16
Jeowaba zarea diabʉ yi wuabemarai ʉ̃tabʉta krĩchabʉ ẽãra
14 Jeowaba jarasi ẽbẽrarã Judádebemaba nekʼãrẽ oma erbʉbara, ãyira kʼareba ẽ baita, Jeowaba ãyi zʉbʉria obʉrʉdera (Isaías 57:12, 13a).
15 Jeowaba bedʼea jaradara aripe berabarisi poaga 607de, nokʼo Nabucodonosorba mãrĩside Jerusalén akʉza babʉeside templota. Akʉza ʉ̃kʉrʉ ẽbẽrarãta edesi Babiloniaena (2 Reyes 25:1-21).
16 Idi ewadebida religion zeri ẽãraba idolo erbʉbara kʼareba ẽ bayi Jeowaba makenabʉrʉ ewaridera (Isaías 2:19-22; 2 Tesalonicenses 1:6-10). Jeowabara jõma jõbiyi religion zeri ẽãra (Apocalipsis 17:3, 16, 17). Dayirãra mejãchade sobiapanʉ Jeowaba jarabʉta ũrĩpanʉ baera: «Ãĩ wãidua kaʉ̃nebara, mʉ̃ pʉwʉrʉra, maraba iyide kĩrãkʼa kayiruata okĩrã ẽ bʉrʉ oraidua akʉza iyi kĩrãkʼa zʉbʉria bakĩrã ẽ bʉrʉ» (Apocalipsis 18:4, 5).
w18.06-S 7 parr. 16
«Mʉ̃ Nokʼora naʉ̃ drʉadebema ẽã»
16 Daizeze Bedʼeaba jarabʉ, naʉ̃ drʉadera nekʼãrẽ mejãcha kayiruata berabarinʉmʉta, ẽbẽrarãra bedʼea abarika zeda ẽ akʉzade yõpanʉ, mamina Jeowa odebʉra awuarabʉ, ãba aduʼapanʉ (Is. 17:12; 57:20, 21; Apoc. 13:1). Jeowara mejãchade sobiabʉ iya ũdubʉ baera dayirãra wuabema ẽbẽrarãira jipade awuarabʉta (akʉra Sofonías 3:17).
Jʉrʉda nekʼãrẽ biʼiabʉta Daizezedebemata
w07-S 15/1 10 parr. 3
Bedʼea audre yibiata Isaíasdebemata (yi ũmenebemata)
56:6. ¿Kʼaira drʉa jãpeba zedarãra? Maʉ̃rãra ẽbẽrarã nama udapanaira ewari jõmaʉ̃nẽ (Juan 10:16). Maʉ̃rãra Jeowaʉ̃me bedʼea abarika zesi, maʉ̃ba jarakĩrãbʉ ãyira zarea opanʉta Jeowaba jarabʉta aripe oita akʉza aripe berabarimarẽã. Za nama ewari jõmaʉ̃nẽ udapanairaba akʉza ʉ̃ta wãirabida iyabaʉ kartaraneba Jeowa ʉ̃rʉ kʼawuapanʉ akʉza jaradiapanʉ ẽbẽrarã Jeowa ʉ̃rʉ.
w06-S 1/11 27 parr. 1
Ãba yi jʉrebarieda wãbʉrʉdera kʼẽrẽpa bʼaibara
JEOWABARA kãgabʉ ʉ̃ta wãirata akʉza nama udapanairata ãbaʉba iyaʼa yiwidʼidamarẽã, iyi templo espiritualde. (Isaías 56:7; Marcos 11:17). Maʉ̃ba Jeowaba kãgabʉ yiwidʼibʉdade biʼia yiwidʼidamarẽã, maʉ̃ kʼarea ãba yi jʉrebarieda wãbʉrʉde iyaʼa yiwidʼita akʉza iyi ʉ̃rʉ kʼawuaita, maʉ̃nera wawiata ũdubidaibara.