¿Chuqui yom mi lac mel chaʼan mi lac tsajcan Jesús?

9:62

Jiñi xtopʼ lum mach yom miʼ sujtel i qʼuel i pat chaʼan mach xotometelic miʼ topʼ majlel jiñi lum. Jiñi xñoptʼañonbʌla mach yom mi lac chaʼ cʼajtesan jiñi tsaʼ bʌ laj cʌyʌ ti pañimil (Fil. 3:13).

Cheʼ bʌ yʌquel lac ñusan wocol tajol mi lac chaʼ cʼajtesan chaʼan ñumen wen añonla cheʼ bʌ maxto laj cʌñʌyic Jehová. Cheʼ mi lac wen ñaʼtan, an i tajol mi lac ñumel ti pʼis come mi la cʌl chaʼan ñumen wen tsaʼ lac ñusa cheʼ bʌ maxto testigojoñicla i maʼañix mi la cʌcʼ ti ñuc chuqui ti wocol ti lac ñusa. Cheʼ tsiʼ meleyob jiñi israelob cheʼ bʌ tsaʼ loqʼuiyob ti Egipto (Núm. 11:5, 6). Cheʼ mi lac wen ñaʼtan bajcheʼ añonla ti wajali, miʼ mejlel i chaʼ pʌyonla tiʼ melol tsaʼ bʌ laj cʌyʌ. Jin chaʼan, ñumen wen cheʼ mi lac ñaʼtan jiñi bendición tajbil bʌ lac chaʼan ili ora yicʼot mach laj cʌy lac ñaʼtan muʼ bʌ caj lac taj tiʼ Yumʌntel Dios (2 Co. 4:16-18).