Tito

Aipe đaiye jaʉrõre Jesúre jʉ aipõevare

3 Ãrʉre đajacʉ mʉ ina Jesúre jʉ aipõevare jaʉrõre náre ne jʉ aiye ina jabovare aru cõjeipõevare máre. Ðajarãri yópe ina jabova ne đaicõjeiyepe. Aru napini corejarãri, mearo đarãjivʉ cainʉmʉa. 2 Ãmeina yávabejarãri apevʉi borore. Jarabevʉva cãrijimene đajarãri põevare. Aru dʉibareca meara põevape pueđajarãri caivʉ põevare cainʉmʉa.

3 Javede maja máre ãrʉmevʉ dápiabevʉ barejávʉ̃. Aru jʉ abevʉ barejávʉ̃ Jʉ̃menijicʉre. Pʉeno ãmeno nʉivʉ barejávʉ̃, ina bueivʉ yávaiyede jãve ãmene ne jʉjovaiye boje majare. Bʉojabedejavʉ̃ dajocaivʉ maje ãmeina đaiyʉede, cojʉquiyepe majare. Dápiare cuivʉ barejávʉ̃ ãmeina đaiyede cainʉmʉa. Aru jorojĩvʉ barejávʉ̃. Apevʉ ʉbedejaima majare. Aru majavacari ʉbedejavʉ̃ majevʉre máre. 4 Ʉbenita Jʉ̃menijicʉvacari, majare meađaipõecʉ, jã́đovaimi ʉ̃i baju meacʉre aru ʉcʉre põevare máre. 5 Que baru meađaibi majare. Ʉbenita meađabebi majare, maje mearo đarĩduiye boje. Quénora meađaibi majare ʉ̃i baju cõmaje ãroje jã́iye boje. Maje ãmeina teiyede jarʉvaibi, meađacʉyʉ majare. Que teni ñai Espíritu Santo apʉre đaibi majare, maje apʉrãjiyepe ayʉ apʉé mamaeque. 6 Jesucristo, majare meađaipõecʉ, cʉre đaibi ñai Espíritu Santore maje ũmei. Que baru Jʉ̃menijicʉ daroibi ñai Espíritu Santore maje ũmei, ʉ̃i cađatequiyepe ayʉ majare ʉrarõreca. 7 Que teni Jʉ̃menijicʉ meađaibi majare, ʉ̃i coavaiyede majare maje ãmeno đaiyede jarʉvarĩ. Ʉ̃i mearo đacaiye bojecʉbeda ʉ̃i me boje, “Boropatebevʉ mʉja ji jã́inoi”, arĩ coyʉibi majare. Que baru caride maja Jʉ̃menijicʉi máramu. Aru jãve cʉvarãjaramu jãravʉ cũiméjãravʉ baquinóre. Que baru napini coreivʉbu diede.

8 Jãvetamu die. Que baru ʉvʉ yʉ mi coyʉquiyede caiye iyede parʉrõreca, ina Jʉ̃menijicʉre jʉ aipõeva ne mearo đarãjiyepe ayʉ cainʉmʉa. Iye bueiye jãve métamu. Aru bojecʉetamu máre. Que baru caivʉ põeva majima aipe đaiye jaʉrõre náre, iye bueiye jãveque. 9 Ʉbenita jarabejacʉ ʉbenina apevʉque. Aru ãrʉre đabejacʉ põevare néñecuva mácavʉ ne ãmiá coapa. Coyʉbejacʉ náque, ina aivʉre, “Mʉ coreóvabevʉ aipe aiyʉrõre Jʉ̃menijicʉi đaicõjeiyede ʉ̃i coyʉiye báquede Moisés bácʉre”. Náque jarabejacʉ mʉ. Caiye iye bojecʉbevʉ aru cađatebevʉ máre. 10 Ácʉ põecʉ Jesúre jʉ ayʉ ʉ̃i maucʉvarĩduru apevʉ Jesúre jʉ aipõevare, dajocaicõjejacʉ ʉ̃́re ʉ̃i que đaiyede. Ʉ̃i dajocabedu, dajocaicõjejacʉ ʉ̃́re cojedeca, ʉ̃i đabequiyepe ayʉ diede. Aru ʉ̃i dajocabedu cãreja, ye yóvabejacʉ ʉ̃́re. 11 Ʉ̃i que đaiye boje, coreóvaivʉ mʉ ñai ʉ̃mʉ ãmecʉ bajure. Ʉ̃́vacari majide đaibi apevʉre, ʉ̃i ãmeina teiye dajocabe boje. Ʉ̃́recabe ñájicʉyʉ.

Pablo ʉ̃i đaicõjeino Titore

(Hch 18.24, 20.4; 1 Co 16.12; Ef 6.21-22; Col 4.7-8; 2 Ti 4.12)

12 Yʉ́capũravʉ cʉquijivʉ Nicópolis ãmicʉriĩmaroi ʉracorore. Que baru jaroquijivʉ mi yebai Ártemare o Tíquicore. Ñai ʉ̃mʉ ʉ̃i eaquiyede nore, meatejacʉ jã́cʉnʉcʉyʉ Nicópoli, yʉre copʉcʉyʉ noi. 13 Aru meatejacʉ cađatecʉyʉ ñai đaicõjeiyede bueipõecʉre ʉ̃i ãmiá Zenas aru Apolore máre. Jíjacʉ náre caiye náre jaʉéde, ne bʉojarãjiyepe ayʉ ne curãnʉiyede. Ye apejĩe jaʉbejađeni náre. 14 Aru caivʉ apevʉ ina Jesúre jʉ aipõeva quédeca buejarãri, na máre mearo đarãjivʉ aru cađatenajivʉ ina cõmaje ãrojarivʉre náre jaʉéde. Que teni mearo đarãjarama ne cʉede ijãravʉi.

Pablo ʉ̃i meaicõjeino Titojãre

15 Caivʉ ina Jesúre jʉ aipõeva yʉ́que cʉrivʉ meaicõjeđama mʉre. Meajarari caivʉ ñʉjevʉ, Jesúre jʉ aipõeva nócavʉ, ñʉjare ʉrivʉ. Aru Jʉ̃menijicʉ mearo đacajacʉrĩ caivʉ mʉjare bojecʉbeda ʉ̃i me boje. Quénoramu.