Santiago
Jã́mejara apevʉ põevare me apevʉ pʉeno
2 Mʉja, jívʉ, maje jabocʉ meacʉ baju Jesucristore jʉ aivʉ, jã́mejara apevʉ põevare me apevʉ pʉeno. 2 2:2-3 Ecoyʉ baru mʉje cójijiñami cũinácʉ ʉ̃mʉ cʉve cʉvacʉ, ãmuyo ađaitarabʉa úruque aru meacaje cuitótecajede máre doyʉ, aru ecoyʉ baru mʉje cójijiñami apecʉ ʉ̃mʉ máre, cʉve cʉvabecʉ, cõmaje ãrojacʉ, aru meamecaje javecacaje cuitótecajede doyʉ, ne ecoiyede, mʉja me jã́ri ñai cʉve cʉvacʉre aivʉ baru ʉ̃́re, “Dobajacʉ mʉ yo dobarõ mearore”, ʉbenita ãme jã́ri ñai cʉve cʉvabecʉre aivʉ baru ʉ̃́re, “Nújacʉ mʉ nore o dobajacʉ joborõi ji cʉboba yebai”, mʉje nópe đaru, meamejebu no. 3 — 4 Que đaivʉ baru, mʉjavacari pʉcaũmea cʉvʉ. Apevʉre jã́ivʉ baru me baju apevʉ pʉeno, beoivʉbu apevʉ bojecʉrivʉre mʉje jã́ru aru jarʉvaivʉbu apevʉ bojecʉbevʉre mʉje jã́ru. Que dápiaru, ãmenotamu.
5 Mʉja, jívʉ, ji ʉmara, jápiajarã. Javede Jʉ̃menijicʉ beorejaquemavʉ ina ijãravʉcavʉ cõmaje ãrojarivʉ cʉve cʉvabevʉre, ne jʉ arãjiyepe ayʉ ʉ̃́re cʉve cʉvarivʉpe bárãjivʉ ne Jʉ̃menijicʉi jaboteinocavʉ bae boje yópe ʉ̃i aiye báquepedeca. Jʉ̃menijicʉ “Mearo đacacʉyʉmu yʉ mʉjare”, arejaquemavʉ ina ʉrivʉre ʉ̃́re jãve. 6 Ʉbenita mʉjacapũravʉ cʉyoje đaivʉbu ina cʉve cʉvabevʉre. Ina cʉve cʉvarivʉrecabu ñájine đaivʉ mʉjare. Nárecabu jabʉboivʉ mʉjare jabova ne ãmeina teivʉre jẽniari jã́iñami. 7 Mʉjavacari “Jesucristo jinamu maja”, aivʉbu, mʉje jʉ aiye báque boje ʉ̃́re. Ʉbenita nárecabu ãmeina yávaivʉ Jesucristore, mʉje pueđaimʉre.
8 Jʉ̃menijicʉ toivaicõjenejaquemavʉ ʉ̃i yávaiyede ʉ̃i đaicõjeino mácarõ pʉeno parʉrõ cõjeinore, yópe arĩ: “Ʉjacʉ mícʉre yópe mi ʉepe mi baju”, arĩ toivaicõjenejaquemavʉ. Mʉja đaivʉ baru jãve yópe yo cõjeinope, mearo đaivʉbu mʉja. 9 Ʉbenita mʉja jã́ivʉ baru apevʉ põevare me apevʉ pʉeno, ye jecʉbevʉ caivʉre cũinátʉrʉra. Que teni ãmeno đaivʉbu mʉja, mʉje jʉ abe boje Jʉ̃menijicʉi đaicõjeiye báquede aru mʉje vainí tʉiye boje diede. 10 Põecʉ jʉ arĩ đaiyʉrĩduyʉ baru Jʉ̃menijicʉi đaicõjeiye matʉiyede, ʉbenita quéno cũinájino cõjeinore đabecʉ baru, boropateibi ʉ̃ Jʉ̃menijicʉi jã́inore ʉ̃i jʉ abeni, vainí tʉ́jʉroepe caiye diede. 11 Jʉ̃menijicʉvacari “Cʉbejarã apevʉque mʉjemarebʉcʉvare jarʉvarĩ”, arejaquemavʉ. Aru ʉ̃ máre “Boarĩ́ jarʉvabejarã põevare”, arejaquemavʉ. Que baru mʉja cʉbevʉ baru apevʉque mʉjemarebʉcʉvare jarʉvarĩ, ʉbenita boarĩ́ jarʉvaivʉ baru põevare, mʉjarecabu jʉ abeni, vainí tʉivʉ Jʉ̃menijicʉi đaicõjeiyede. 12 Mʉja coreóvaivʉbu Jʉ̃menijicʉ jã́ri coyʉcʉyʉre méne o ãmene mʉje đaiyede. Jã́cʉyʉme aipe ãrojaene diede, yópe ʉ̃i đaicõjeiye me, aru ye jaʉbe, aru bʉoimarare đabepe máre. Que baru me yávajarã aru me đajarã máre yópe Jʉ̃menijicʉi ʉrõpe. 13 Jʉ̃menijicʉ cõmaje ãroje jã́mecʉ ñájine đacʉyʉme ñai põecʉ cõmaje ãroje jã́mecʉre ʉ̃ jicʉre. Ʉbenita jidʉé jaʉbequiyebu ina cõmaje ãroje jã́ivʉre apevʉre Jʉ̃menijicʉi ñájiovaquijãravʉ baquinói põevare, ne ãmeina teiye boje.
Põeva ne đaiye me bojecʉrõ ne yávaiye pʉeno
(Ro 4.3)
14 Mʉja, jívʉ, jápiajarã. Ñai põecʉ coyʉyʉ “Jʉ aivʉ yʉ Jesucristore”, ʉbenita mearore đabecʉvacari, ʉbenina coyʉrĩduibi ʉ̃ jʉ ayʉre. Ye baju ãmevʉ no jʉ aino jãve ãmeno. Põecʉ ʉ̃i jʉ aino nópe painoque meađaimʉ macʉyʉ́ bʉojabebi. 15 2:15-16 Cũinácʉ mʉjacacʉ o cũináco mʉjacaco cʉvabedu cuitótecajede aru ãiyede máre, aru náre “Me nʉjara mʉja. Cũmajara mʉja me aru me javatejarã máre” mʉje aru, ʉbenita mʉjavacari ye jíbedu náre ne doiyeva aru ne ãiyeva máre, meamejebu no. Ye baju ãmevʉ mʉje que đaiye. 16 — 17 Quédecabu ñai põecʉ ayʉ “Jʉ aivʉ yʉ Jesucristore”, ʉbenita mearore đabecʉva. Ñai jʉ ayʉ jãve ãmemi.
18 Aru apecʉ ʉ̃i aru: “Mʉ jʉ ayʉbu Jesucristore aru yʉ mearore đayʉbu”, yópe arĩ, coyʉjebu yʉ: “Jã́đovajacʉ yʉre mi jʉ aiyede Jesucristore mearore đaiye cʉvabecʉva. Aru yʉ́capũravʉ jã́đovaquijivʉ mʉre ji jʉ aiyede ʉ̃́re ji mearore đaiyeque”. Que ajebu yʉ. 19 Mʉ coreóvayʉbu Jʉ̃menijicʉ cũinácʉra cʉcʉre. Mearotamu no mi coreóvaino. Abujuva máre coreóvađama Jʉ̃menijicʉ cũinácʉra cʉcʉre. Aru ʉ̃́re jidʉrivʉ bidiyama na. Ʉbenita ne coreóvaiyede ʉ̃́re cađatebevʉ náre.
20 Mʉ, ãrʉmecʉ, jã́đovaquijivʉ mʉre põecʉ ʉ̃i jʉ aiyede mearore đabecʉva jʉ aiye jãve ãmene aru cađatebede ʉ̃́re. 21 Jʉ̃menijicʉ jã́rejaquemavʉ majeñecu mácʉre, Abraham mácʉre, boropatebecʉpe, ʉ̃i bʉoiye báquede mamacʉre, Isaac bácʉre, ʉ̃i boarĩ́, juarĩ jícaquiyepe ayʉ ʉ̃́re Jʉ̃menijicʉre, yópe Jʉ̃menijicʉi đaicõjeino mácarõpedeca ʉ̃́re. 22 Que teni coreóvayʉbu mʉ Abraham mácʉi jã́đovaiye báquede ʉ̃i jʉ aiye báque Jʉ̃menijicʉre jãvene ʉ̃i đaiye báqueque. Aru ʉ̃i đaiye báqueque jã́đovarejaquemavʉ ʉ̃i jʉ aiye báque ye jaʉbede. 23 Que teni vaidéjaquemavʉ yópe Jʉ̃menijicʉi aiye báquepedeca. Abraham mácʉrã Jʉ̃menijicʉ toivaicõjenejaquemavʉ ʉ̃i yávaiyede, yópe arĩ: “Abraham jʉ arejaquemavʉ Jʉ̃menijicʉ ‘Yópe đacʉyʉmu’, ʉ̃i aiye báquede ʉ̃́re. Que baru Jʉ̃menijicʉ coyʉrejaquemavʉ ʉ̃́re, ‘Boropatebecʉbu mʉ ji jã́inore’ ”, arĩ toivaicõjenejaquemavʉ. Aru Abraham mácʉ, “Jʉ̃menijicʉi yóvaimʉme”, ne aimʉ marejaquémavʉ.
24 Que baru coreóvaivʉbu mʉja Jʉ̃menijicʉ coyʉyʉre, “Boropatebevʉ mʉja ji jã́inore”, ina põeva mearore đaivʉre. Ʉbenita põecʉ quénora coyʉyʉ baru “Jʉ aivʉ yʉ Jʉ̃menijicʉre”, jaʉvʉ ʉ̃́re Jʉ̃menijicʉi jã́inova. 25 Quédecabe ico nomió máco, õi baju bojeđađo ʉ̃mʉvare ãmenore đađo báco náque, õi ãmiá Rahab. Jʉ̃menijicʉ jã́rejaquemavʉ õ mácore boropatebecope õi đaiye báqueque. Õ máco copʉ etarejaquemavʉ ina Josué bácʉi jaroimara mácavʉre. Aru cađatedejaquemavʉ na mácavʉre máre, ne dupini nʉrajiyepe ađo õi jã́đovaiye báquede na mácavʉre apema, ne dupini nʉima mácarõre. 26 Que baru yópe põecʉ ũme cʉbecʉ, yaiyʉ́ bácʉpe, nopedeca ñai põecʉ mearo đabecʉ jʉ ayʉ Jʉ̃menijicʉre jãve ãmemi. Cađatebebi ʉ̃. Aru ʉ̃i jʉ aiye bojecʉbevʉ.