Dulemar neg maddusulid sobde

BIRGAMAR yeer nasa. Noé masmala buggidar mimmigan niggusmala, geb we mimmigan dungusgua na mimmigan niggusmarmoga. Degsoggu, sanar gussuli dule buggib Nabbaneggi anbaggunoniggi.

Aaun, dule wargwen gudigusadi nuga Nemrod, Noé wagwa yargan dagsiggidi. We dina dule isganana, ibmar durgan magdae, geb iblodabali, anba deyobbiragwa dulemar imagdabali. Nemrod reyga na imasbali, dulemar idugega. Babdummad nued Nemrod dagsasuli.

Aaun, dulemar unnila gaya soggwenna sunmagmalana. Nemrod abegena bela buraggwa anbagguedi, edi wemar dummadga nabir guega. ¿Be wisi aaga, ibu imasa? Emarga sogsa neggwebur simaloye, geb neg maddusulid sobmaloye. We sobarnaidgi be daggena, nabba ginnid sobnanaid.

Babdummad Jehová nued we neg maddusulid dagsasuli. E dina abegena dulemala neg baidbaid siggi namaladi, bela negdirbimaggar dulemar gudiguega. Auggine emardi sogsa: ‘¡Sobmarsi! Neggwebur soggwen anmar sie geb neg maddusulid anmar sobbalo e duggu nibnegse owarmaggega. ¡Geb anmar nug dunguoed!’ We dulemar unnila e nug dunguedgi binsasmala, Babdummad nug odummoged gindi binsassurmala.

Aaga, Babdummad imasa dulemala mer bar we neg maddusulid sobed. ¿Be wisi igi imasa? Uggiagwale imasa dulemar gaya aggaraggar sunmagge gued, bar gaya soggwenbi sunmassurmala, degsoggu, na agguiddogusmarsunna. Aaga, e neggwebur onuggulenoniggi, Babel, Babilonia dibe; we obare “Oeleged”.

Emisgi dulemar Babel neggweburgi gudimaladi, ber nadmarsunna. Na emarbi sunmagmaladi buraggwa buraggwa neg soggwensig nadmala.