Dule emar dobsulidi

WE DULE sunmaggwissidga dulemar oallided be dagge. ¿Be wisi we dule, doawa? We dule nuga Jeremías, we dule nugniggadi, Babdummad gaya berbegedi.

Rey Josías neggweburgi nudsumar ogoamasad sorba, issesaar gusadgi Jehová, Jeremíasga soge, An gaya berbegedgi be arbaoe. Deginigwale, Jeremías anba dogdar nussuggwa gue na iddoged, Babdummad gaya berbegedgi arbaedga guega. Auggine, Jehová ega soge, Ani an be bendaggoed.

Jeremías Israel dorganga soge, ibmar isgana imagged indagmarye. Emarga soge: ‘Bamalad neggweburmar e babdummagandi, babdummad sunsogedsurmalad’. Auggine, buggidar Israel dorgan bur nudsumar na babdummadga imagdii sabimala, degine, Jehová dina, Babdummad sunsoged guedi, adi ese gorbisurmalad. Jeremías soggargua we dulemarga, e isgudimalad ulale Babdummad sega dummad odurdaglemaloye, dulemar unnila ega alledbimalad.

Birgamar namai gusa. Josías burgwenoniggi, geb sorba nii warbaagi e massi Joaquim nugadi, reyga megnoniggi. Jeremíasdi anba neggweburga sogdii: ‘Bemar daed na ogwasurmalale, Jerusalén obelolegoye’. Sacerdotemala Jeremías gae soggarmala, geb oimagdemala: ‘Jeremías oburgwed abelege; anmar neggweburgi issaggwa sunmagdii’.

¿Ibu Jeremías imaggo be binsae? ¡Edi dobed sadde! Bela dulemarga soge: ‘Jehová an barmiali bemarga we ibmar sogega. Bemar ibmar isgana imagged indagsulile, Jehová, Jerusalén obelogoed. Auggine, be wisigarmar: Bemar an oburgwismalale, dule ibmar isgana imagdisulid be oburgwemaloed’.

Dummaganga gudimalad imasmala mer Jeremías oburgwemaladi, auggi Israel dorgandi ibmar isgana imagged indassurmala. Sorba Nabucodonosor noniggi, Babilonia e rey, geb Jerusalén neggweburbo uluali. Degiidgi, Israel dorgan Nabucodonosor e maiganga gunonimala. Miliba Israel dorgan selesmala Babilonia neggweburse. ¡Igi iddolle be binsae, dulemar be dagdisulidi be sesmalale, be neg dagdisulidse!