Igi Be Nabir Babigar Sunsoged Amisale

Anmar Babdummad ai gala gubiele, biddi e igar sunsogedye Babdummad soge aa bali anmar naguer gebe. Jesús sogsa “Babse nabbiragwadgi gormaladi”, Bab sega “nabbiragwadgi” gormaloye (Juan 4:23, 24, NM). Unnila igar soggwenna nigga Bab sega gorlegegala (Efesios 4:4-6). Babigar sunsoged dulemar semai sadegu gudigued sega. Noar babigar odurdagmaladdina obeloleged sega dulemar semai (Mateo 7:13, 14).

Anmar daggele igi damala babigar sunsogedba namaladi, anmar nabir wisgusaled biddidi babigar sunsogedi. Jehová dule nued soggua, ega nabbiragwadgi arbadimaladi, dule nuegan gala gumarmogar gebe. Igi narasdummad nued, durba nuegan sanmagge, debayobi babigar sunsogedi dule nuegan gala, dulemar imagge (Mateo 7:15-20).

Jehová aimala, Biblia dodoaggwa dagsurmala. Emala wismala Biblia Babdummad gadi. Aa gala Biblia e idued gala imagmala, ega igar onuguegala, geb Babdummad siggi nabbi e odurdaggegala (2 Timoteo 3:16). Anba alamagdimarbali e ibmar sunmagdimaladbali dae gala.

Jehová aimala mudsubmudsub na sabgumala. Jesús na oyosa dulemar sabe, Babdummad gine emar odurdagdii gusgua, geb dulemar nudagdii gusbargua. Babigar sunsogedba namaladi anba dule bamalad sabmarmoga. Jesús yobi, dule wilegan isdar dagsurmarmoga anba e dulesurmaladdibe, wagmardibe isdar dagsurmarbalid. Jesús e sordamala na mudsubmudsub sabgudii gumaloe. Jesús sogsa, wegine dulemar magdagge guoye, doamala e sordamala (Juan 13:35).

Babdummad e nuga Jehová; e aimala we nuga odungumala. Dule wargwen be nugbali be sega gorbisulile ¿nue be ai sunnad gala gusale? Suli, geg gue. Be ai niggale, be ai sega e nugbali be ese goled, geb anba nued be ai gine dule baigangala be sunmagbalid. Aa gala Babdummad ai gala dule gubiele, Babdummad E nuga ebuger gebed. Geb aa gine dule baigangala sunmagbalidi. Jehová abege anmar we imaggedi (Mateo 6:9; Romanos 10:13, 14).

Jesús yobi, Babdummad aimala dule baigan odurdagmala Babdummad Reino gine. Babdummad Reino, gobierno nibneg ginedi, we Nabbaneg neg yeerdagleged gala imaggoedi. Babdummad e aimala sunmagmala dule bamaladgala, Babdummad Reino ibmar nuegan imaggoed gine (Mateo 24:14).

Jehová gine sunmagmaladi Babdummad aiga guega alamagnanai. Dodoaggwa Biblia dagsurmala geb na mudsubmudsub sabgumarbali. Babdummad nug ebumala geb e nug odummomarbali, anba Babdummad Reino gine dule bamalad odurdagmarbali. Emi ibagi Nabbaneg gine Jehovági sunmagmaladbii unni babigar sunsogedbali nanadimalad.