Angelmala, niamala, sergana, wemala burgwismalad burbasurmalad
Gaggansulid angelmar burbar gudidiid, niamar burbar gudidimarmogad. Igi be binsae, ¿dulemar burgwisale Bab negse naddamardibe, sulirdi niamarga gusdamardibe?
Suli; degisuli. Dule burgwisale serganga gussurdaed, Bab negse nassurdabalid, niaga binyissurdabalid. ¿Igi anmar we ibmar wisi? Ar Bibliagi degi soglenaid. Bibliagi ibmar soglenaidi gaggansur nanaed, uggine Bab Dummad sogedba narmaglesbalid. Bab Dummad nugad, Jehova. Jehova dulemar imasadid, degsoggua nue wisid dule burgwisale nue igi gusdae (Salmo 83:18; 2 Timoteo 3:16).
Adan, uggub imaggaled; burgwisgu uggubga gusbalid
Bibliagi soglenaid “Jehova nabba susgu, a nabbagi dule sobsa[ye]”, we dule onuggulesad, Adan (Génesis 2:7). Edengi Adan ogwissisad, aagi neg yeer daglegenad. Adan, Jehova ega igar mesisadba igar imasana burgosulinad, anba emi ibagi nabbaneggi dula gudiinad. Adan nue Bab igar wisi Bab igargi yolenonigua, Bab Dummad ega sognonisunnad: “Ar be nabbasoggu, be burgwisale, nabbaga gannar be binyoed” (Génesis 3:19).
¿Ibiga Jehova degi ega sogsa? Be binsagwelena, Adan imagleged iduale, ¿Adan bia gudiina? Agnesig gudisulinad. Obinyileged iduale burbar gudisurbalinad. Ibmarsulinad, saddenad. Aagala Jehova, Adanga sogsagua ‘nabbaga gannar be binyoye’, burgoed ega obarisad. Adan, angelga gussulid, niaga gussulid, serganga gussulid, burbar gudi gussurbalid. Adan burgwisgua bar bunnossulid, bar ibmarga gussulid. Degsoggu, dule burgwisale sorba bar ibmarga gussurdaed.
Sorba dulemar burgwemamai gudmaladdina, ¿deyob gusdamarmosunde? Bibliagi soglenaid dule burgwisale igi gusdae.
“Bela [dulemar geb ibmar durganse baggar] nabba urba megmaloed. Bela nabbagi danimalad, bela gannar nabbaga binyemarbaloed” (Eclesiastés 3:20).
“Dule burgwismaladdina bar ibmar abemaisurmalad, ar bar iddomaisurmalad” (Eclesiastés 9:5).
“E sabguedi, e sae iddogedi, [...] burgwisadgi, bergusiid” (Eclesiastés 9:6).
“Ar be burgwisardi bar arbaosulid, ibmar wisguleged igar surbalid, degi, binsaed niggagued igar surbalid” (Eclesiastés 9:10).
“Dulemar bergunoniggile, gannar nabbaga binnidmaloed. Bela na ibmar imaggo sogsamalad, a ibagi berguus ega naoed” (Salmo 146:4).
Dule dula gudiirbi nabir we ibmarmar imagged
¿Geger be iddoge weyob Bibliagi ibmar soglenaid? Geger be iddosundibe we ibmargi be binsaena: Be nue wisid babgan negya sedidaed. Degsoggu, bab burgwisale sorba mimmigan wileddaed. Inbaggwa e omedibe, e mimmigandibe sorba mani sadde guardamalad mas baggega. Sunna dule wargwen, dule burgwisad isdar dagdaenadi, sorba dule burgwisad ome sabsur imadoed, burgwisad mimmigan sabsur imadodibe. Weyob ibmar gudele, be binsaena, ‘dule burgwisadi burbar gudisundibe, ¿ibiga geg bar na mimmiganga ibmar amisunna? ¿Ibiga geg bar na e ome bendagbarsunna?’. Ar Bibliagi ibmar soglenaidi gaggansulid. Ar we dule burbar gudisulid, serganga gussurbalid; ar geg bar ibmar imagged (Salmo 115:17).
Burgwismaladi geg uggumesdimalad bendagmalad, geg sabsur imagledimalad bendagmarbalid
¿Soglesunde burgwismaladi bar bibbisaar durgudagosurmarye? Suli, anba durgudamaloed. Sorba anmar we igargi sunmaggoed. Auggine, burgwismalad bibbisaar wissur mamaid ibu be imagdii. Be dagdisurmalad, be iddosurmarbalid, geg bebo sunmagmarbalid. Degsoggu dule burgwisale ibiga be dobguoe. Geg be bendagmalad, geg begi agbinmarbalid (Eclesiastés 9:4; Isaías 26:14).