Nia Gangued Bali Ibmar Imaglegedi Nued Suli

Nia abege anmala imaggedi ibmar e gangued bali imaglegedi. Buggidar dulemala ibmar galagwensuli imagmala e sergan burgwismalad gala o burbar gudimaladgardibe mer e oaggalomalagala. We ibmar imagmala burbarmalad dobed bali. We dulemala olargan ounaaledi yodamala, saggwa gine duba o ibmar ounaaledi nasigdamala geb duggar gine ibmar ounaarmaladi nasigdamarbali. “Ina” gobmarbali o ina gine obdamarbali, binsaed bali we ina gangued nigye. Abar dulemala e neg yagine ibmar unaaled sedidamala, geb digsadamarbali, we ina e bendaggoye binsaed bali. Bamaladdina “ina” ounaaledi ebudamarbali e bendaggegala nabir mani amiegala, degine, escuela gine nueganbi nadabbi gue gala geb abirgin amiegardibe. Bela we ibmar imaglemaladi Babdummad dina nued dagsuli.

Nia sega anmar aggar gubisulile anmar Jehová e ai gala guer gebe. Babdummad Jehová geb e ángelmar bur yeer gangued nigmala Nia bali, geb Nia e ángel isganagan bali (Santiago 2:19; Apocalipsis 12:9). Jehová na nue e gangued ebubie e aimar bendaggegala, geb eba nue nai na oyodidiid bendaggegala (2 Crónicas 16:9).