Ary Haepawnynh Leihkhia Thyahaepaw Bakhia Nawhae

Pachiatuh sungsakunaw Pachia mangthua pite pawcce hoileinawhynh a ungsa?

HOILEI nawhynh Pachianynh a-ungsa ung. Laephivaw e ccungccaw riatae lei haenynh mihry thahthyhte hoileinawkha araehae. Thaethyanawlangze rawtuhkunaw, imuahaekya bungsawnaw, laephi ronaw, ccahkangnaw athuasah hae. Ccungccaw riataeleinynh maezu azu haekeiccuze tua kinsa amuehae. Nohpi pise seinaw arae haekeiccuze cciinaw kaeku apui. Arah anialue hae keiccuze thinphingcciinaw te accangccangpaw cciinawblyng amuehae. Tuh e ccungccaw haenynh hoileinaw hynh kharouh thangsary khyhhae. Hoileinaw keiccuze muepaw cciinaw keleroukhahnynh athangsaryhae. Atu haehawte ynrue haete zethangnynh “pawcce kae hynhte aciku”cite leihccohkuhae. Phungthlukbia 19:3 nynh ahohawte Pachiakha leihseisa hae.“ Ccungccawtuh angaekeiccuze langpi meza alungkhute Pachiakha saryaza aseisah.” Hoileinaw blynghynh Pachianynh ynthangsalangze hoileinaw raepaw phekaesungvae cite bua accohkuh ung cih hae.

Zahova Pachianynh hoileinaw a-ungsanawpaw asuilang ccangkheih tuh setan khungtaenaw liarukhylang nynhthua. Setannynh ccungccaw hynh tuh-ou langhaezetuh Pachiakya zyntyngkhopaw unglangkhyh aci. (Job 1:6-12, 2:1-10) Zahovanynh setanbyakha ametou mekhyhtou ciipaw ariaccaw cite ccyh apya. (Exodus 9:16) setan nynhma abyakha ame khonawlang atunin cia ccungccawhaevawsaw pyate Pachiakyate pung acciasasei vaehae. (Bia 12:12) Pawpawte cihkuhsalama Zawbah tuh azyn naw varyngatyng. Zisuma azynnaw varyngatyng, amepawkhrihccaw haema mihzyngnaw varyngatyng.—Job 27:5; 31:6; Matu 4:1-11;1 1Pite 1:6-7.

Ccungccawhaenynh laephiparadisekya zungzae unglang ciipawhynh kaezynry zema khahrouh athuakholeilangpaw uhccaw thuakhyhtou?

E tuanawtuh baebu kya e thuakhyh. Athuakhokhyhnawlangpaw langpituh ccungccawhaenynh akum hynhsepicia hoileinaw pei lamueboi vaehaekeiccu nynhthua. Zahovanynh laephikha raeza adinghaepaw ccungccaw biate thingkuruaku, ahysuepawmiakaw balyngkha do oihte laephikha apuithyalangte ccanglangtaevue alapya hae. E laephihynh rolang thuakhyh. (ccakianangbah 12 te 17 khado) bya ynkingpyakupaw Paradisekha thuakholangkhyh ciipawlae, atu e ngaethyalungronaw haehynh ngaesangkho leilangciate houhhouh athahvae. Paradise lang yntangvaecih.

Baebuccawtuh phung- paw huatawthuaza thyahawnawte lokuh- khyh cite saryanawte akhiahaepawkha aeningnynh pawtemou phising pyakholang hae?

E bakingnaw zyntuh zoikhyh “zyngnawtuh thaenawliate nynhthua” Pachiabya ccangkunawliate hawnawmuelangza zyngnaw akaethungcih.—Rom 10:17; Hebru 11:1.

Khurynghae Baebuthyahaepawnynh Baebu byate phunghaehynh ameccahccing nawpaw atyngsa hae. Sciencetist haetuanawte Baebuhynh phelokuh. Akawlang e byahaehynh sciencetist haenynh anymaw haeze langmawkum hynhsepite Baebukya alazeikuhtyvaepaw amepawbya nynhthua. Laephithyahawnaw houhhouh ynkaethungtuh laephihynh apyng adoutu ungkhyh accakaepaw kyanynh asaeku, pavawhae anueku nawhae kong balynghynh ynny vaehae.—Genesis 1; Isaiah 40:22; Job 26:7; Zerimiah 8:7.

Baebuccawtuh thyamuihsawte zeipawnynhthua ciipawtuh profekbya accingnawliate nykhothua. Laephi uktu accozahaekha athotakawnawte, a thangnawhaekonglang Deniaprofeknynh alahoty. Mesiah ynlangkulangpaw ccyhte ynchii langpawccyhmah ala hoty. (Denia 2:8; 9:24-27) accang paw profekbya “Nyathyaninccyh”accingcciamangpaw kongma ala hoty. (2Timote 3:1-5; Matu 24) E muihty hotypawbyahynh ccungccaw luhbohnynh phyakholeipaw nynhthua. (Isaiah 41:23) Hynhlaehouh accingnawkong nanyry ungze Zahova ccaecceihaenynh athohaepaw cca-uh Baebuhynh-Pachiabyatou, ccungccawbyatou [cca-uh] te napemyarya aeki paw raetu ungtou cihkuhpaw cca-uh kyakhedo.

Baebukong bakhia- nawhaekha phipyakho nawlanghae pawtemou ccangku lang?

Baebuhynh ccangkute tuaselang aho.Tuh hawte Pachiathyamuihsaw cciakhaenawmah ngiaku aho. (phungthlukbia 15:28; Luka 11:9-13) “Nang ning luhkhahkheihnynh hawnaw nary ohze Pachiakha ngiakuh oh amaw tuh ccungccaw haekha saryaleite leihpyahae keiccuze angiaze amuecih.” (Zeim 1:5) Baebuccangkuze ynbungtupaw cca-uhmah a-ung. Eccazawpia paw Bawilukheihkhah Filihnynh ahopyahawte aeningmah ynhopatupaw aho. (Zuitu 8:26-35) Zahovaccaeccei haenynh angaeryhae paw innkyakhe ameleite Baebuccaw leihccangpya hae. Tuhte cibualang awnawleite ngiatua.

Zahova ccaecceihaekha alunghuanynh rawse- haeza, mihmingte Baebu ccangkulang kaekhah pawcce ynkhe hae?

Zisuphunghopawkha rawsenaw alamuekeiccuze nangningma rawse naw naemue cih oh cite azuitu haekha ahopya hae. Ccungccaw abang a maw ccangpyanaw angaeryhae pawkha Beihnawrawsetu haenynh “nang ningmah aelingbuavae oh i, siapharang haete, farasi haekya kha e paw azyngpaw luhkheihsang ungzaw” cite thinkhy kute aci hae. (Zan 7:46- 48, 15:20) Ccaecceihaete Baebuccangku leilang tuanaw aepyatu pawhynh akonglang anyhlohleipaw (or) thinlung hoilei haepaw nynhthua. Ccaecceihaete Baebu naccangkuhza Baebu nythyanaw nakaethungtou nakaethungkhyhtou dokutua.—Matu 7:17-20.

Ccaecceihaenynh Bei- hnaw phehoivaehaepaw kalangkhe pawcce leihpae bua hae?

Hynhte ciipawhynh Zisu dosuinkute aciibua haepawnynhthua. Zuda ccungccaw haeklangkhe amawnynh leihccianua hae. Zuda ccungccaw a lunghuatuh mihmaw beihnaw manghoihae salazema alunghuatuh Pachia byakha avua hae. (Matu 15:1-9) Minphun miakawhynh khrihccaw acihkuhpaw beihnaw thuasa, khrihccawleipaw thuasa, Beihnaw ccangkhakheihtuh solei ahoicih. Ccungccaw haenynh Pachiabyate alokuhdadipaw zynnawkha aziphecilang varyngkyng ahocih. Ccaeccei haenynh hynhte a ciibuakhonaw langhae, bunglang azuaku haepawhynh innpaw asungsahhae ciinawpaw langsanawpaw nynhthua.

Kaemaw beihnaw rounynh ame cite ccaecceihae nynh zynghaetou?

Abeihnaw saw atuapawmiakaw hunghungzema tuh e tuh amepaw cite tualang accang. Tuhte athuakhyhze tuh epawtuh tuh ebeihnaw kya pawcce a-ungbua.? Khrihccaw haekha hynhte athuiheihae. “Tynremia kawkha dokhiatuala ahoipaw uhccawkha zungzaekyngoh.” (1 Tesalon 5:21) Azyngnawkha Baebute lokuhtou lokuhkhyhtou cite ado khiacih. Pawcce cize amepawzyngnawtuh ccangkheihrounynh a-ung. Efesa 4:5 nynh “Bawipaw ccangkheih, zyngnaw ccangkheih, tuipi ingnaw ccangkheih”cite atyngsa. Langpi patae, Beihnawpatae, ungte abalyngte khungnaw klangnynh yncciakhaehae cite zyngnawtuh Zisu anaw mazi ccahkhyh. Amawnynh hynhte aci“Hingnawlang aphahpaw langpite thua- kawtuh myarya abykeiccuze atepaw ccungccaw azyahae”. Tuh e langpikha kaemuihvae cite Zahova ccaeccei haenynh azynghae. Tuhte athuakhyh langze Beihnaw ccangpawkhanynh accungkuh cih hae.—Matu 7:14.

Kaemawrounynh khungnaw muecih haepaw kaethua cite zynghaetou?

Thuakhyh. Kum hynhsepilya lahinghaepaw Zahova ccaecceithualei haepaw riataelei ccungccaw haekhamah ynthothui cih haeza, hingnaw kaw ynmuebuacih hae. Atu e ahinghaepawhynh vawsawrunawpipi athuamaw phungdingkya athadyngkho haepawmah khungnaw amuecih hae. Tuhpia ze Zisu nynh aeningkha luhkheihte luhkheih byapiakulang ccangkhyh aci. Aeningtuh avawlang ekhanynh salae leih adothya oh. Zahovatuh lungthing nynh ado merarih ccaete ccaelang muihkhoza thawcciinawte nynh bya a pia. Zisukha bapianaw kaw apya. Aening ryalaw thuakhyh.—Matu 7:1-15; 24:21; 25:31.

Zahova ccaecceihae pungkunawkya thualangze ahluphua pawte mou anunghae?

Ahlu pyanawte asekuhte zuitu Pawluhnynh hynhte aci- “ccungccaw miakawnynh mihmawlungthote pyahaesah, thindaete thualeite, kapya khyh ze hoilangkhyh citemah thualeite, lungthinccahccingte apyapaw ke lerounynh Pachianynh ary.” (2Korin 9:7) Zahova ccaecceihaetu penaw pungkunaw innkyathuasa, civoi tuanaw innkya thuasa phuakhoi ungkhyh. Ahlurypaw a-ungze, alangnawkya ahlu sangnaw thingkuataraw anunghae. Hohzeih nynh asang ciipaw hunghungnynhmahnyhkhyh hae. Abangtuh minghaelaeze alunghua asangkhohae, abangccungccawtuh kharouh asangkho leipawmah a-ung. Zerusalem beihnawinnkya Ahlukua kya asanghaepawkong lungthinccahccingte asangpawkong accaesah. Apyakhozeihte pyate pyarynaw lungthinkhahnynh azici. Tuhzeih dua apya ciipawkha abapi thuakhyh.—Luka 21:1-4.

Kaemah Zahova ccae- cceilukheih kathuabua- langze mihminghawte kaesoh Phungkahobua cihtou?

Lukhahkheihnynh Zisukhrih uknaw bya ynkingpaw laephi Paradise kong anytalya pawkha mingccangpaw hopyabua rynawlungthin ahoihae. Nangzemah nahoi mamingcih. Tuh e tuh thungpang hoipaw nynhthua.—Zuitu 5:42-42.

Hynhte ciipawhynh Zisukhrih azuitu nynhkathua azicinawzia langsah pawnynhthua. Baebuccawnynh Zisukha “Zyntyngza amepaw ccaeccei” cite ako. Laephivaw la-unglyakhe “Vawlang penaw anaevae” cite phung alaho. Tuh hawte holang azuitu haekha asaw hae. (Bia 3:14; Matu 4:17; 10:7). Nyalangvaetuh azuitu haekha hynhte kaw apyahae- Nangningnynh cceih ohla minphuntakyhkha zuitulang bebe tangsahte thuihei ohla. Tuhkoute bua ahopawtuh ccyh ynthangmawkhe“minphun miakawbalyngkha ccaeccei athuanawlanghae [Pachia] penawkong thehoi pawbyakha [laephi] khyhzaw vawkawblyng ho ynthuacih.”—Matu 24:14; 28: 19-20.

E thehoipawbya honawziahynh aphunphun a-ung. Vaeccaw bangrui haekya byahokunawkyakhema hokho athua. Abangtuh ccawte zeihaeza akykuhae, abangtuh telifungte ahoku hae. Abangtuh angaerycih cite alo sahaepawkalangkhe cca-uhkha saataih te aky hae. Thehoipaw byahynh lukheihsang athaeleipaw ungnangsah cite ccaeccei haenynh innkheihte innkheih thehoipaw byakha aho hae.

Baebuccawnynh lungthote hynhte ynko: “Thyamuihsawte zudyliaccah-nungnynh rangoh aci hae. Athaepawnynhma rangoh cihbua haesah. Tuihawpawnynh yncceihsahla arypaw ccungccawnynh alakawte hingnawtui kha lawkuhsa”. (Bia 22:17) Laephi Paradisekya hythuanaw kong mingccangpaw thaesabua pawhynh amawlungte holangpaw ryalaw nynh thua. Ee thehoipawhynh myaryahorynaw lungthinte holangpawnynh thua.

Zahova ccaecceihae mihzyngnawkha nakhiarypaw a-ungmaming ung cih. Akonghangkhakheih nakhiarypawmah a-ungkho. Bakhianaw haekha phipya hopya kaery. Ee ccah-uhtarawtuh abang asungkeleathua keiccuze napenapang e ccaecceihaekha beihkhiahae cite nangkha kaehy. Apung kunaw haeinnkyazema thuasa, naeinnlang ynpaebua lyahaemah thuasa, nakhiakho hae. Athuakhyhlangze akawlang e Zahova ccaeccei hae zungkalang ccawzeitemah nakhiakho.