Baebu Phung Hynh Thahnenaw Ung Tou?

1. Aening hynh pawcce hopyaku aho oh?

Raetu hynh aening laeze patae ahaw hua. Sungsahkunaw hoypaw Paw lukheih athua keiccuze aening hynh pe myarya ynki. Pachia leite mihmawte mihmaw thahdang kho haesah cite ynrae khyh. (Jeremiah 10:23) Tukeiccuze imua lukheih khah nung te paw nynh hopya aho hawte aening mah Pachia nynh ynho pya aho oh. (Isaiah 48:17, 18) Baebu phung hynh aening ccangpya nawlang Pachia kyate yhthuapaw lasung nynh thua.​—2 Timote 3:16 kha ria tua.

Pachia phung hynh atu ccyh kyaze ahoyhua paw langpi zui kho nawlang ynho pya apiaze, malang zungzae hingnaw mue kho nawlang paw ryamou lawlang cipaw khamah ynho pya. Pachia tuh ynraetu paw athua keiccuze ynho pya paw abya hynh lungtua lungpawte zuilang a ccang.​—Sam 19:7, 11; Byaphy 4:11 haekha ria tua.

2. Baebu phung cipaw hynh pawkhamou a ho?

Baebu phung tuh baccahccing thonaw aleihpaw nynh thua. Thuasalama, abang hanglang tuh hynhte nacih hahhe cih cite ahopaw kawbya mah a ung. (Deuteronomi 22:8) Baebu phung ccangkheih tuh e hynh pawtemou aseku cipaw thaethya kho nawlang hoyrahrih te tua a ho. (Phungtangbya 2:10-12) Thaethya nawlangze ccungccaw hingnaw hynh Pachia kyate ynthuapaw lasung ccangkheih nynh thua cite Baebu nynh a ci. E phung tuh ryalawnaw kya, inn kya, khycce ccianaw kya, amaw hanglang te milae hanglang kyacia, thungkhawku tynawlang ynho pahtu paw nynh thua.​—Locceihtu 17:28 kha ria tua.

3. Azici paw Baebu phung ccangning tuh pawhaemou?

Azici paw Baebu phung ccangning kong Zisu nynh aho. Cungccaw nynh apuithe naw ohpaw abahpi eenaw tuh Pachia kha nylangza, sungsah lang, zyntyn te amaw varyng beih lang cipaw hynh phung ccangkheih naw nynh thua. Bapae kunaw arae vae oh takyhze e phung hynh tuabia lang a ccang. (Phungtangbya 3:6) E phung hawte azui kho paw ccungccaw tuh Pachia te vaeccawkunaw mueza, ame paw lungtuanaw amue apiaze malang zungzae hingnaw cia amue cih.​—Matthai 22:36-38 kha ria tua.

Ccangningnaw Baebu phung tuh ccungccaw miakawte bebe ccawku kho naw ynho pya. (1 Korin 13:4-7) Ccangningnaw Baebu phung zuilang zetuh Pachia nynh ccungccaw avaeccawnaw hae hawte dosuing kupaw nynh thua.​—Matthai 7:12; 22:39-40 kha ria tua.

4. Baebu phung hynh thahnenaw ung tou?

Baebu phung nynh lukheih te lukheih sungsahku te lungnging paw innbyng lang thua kho nawlang ynccang pya. (Kolosa 3:12-14) Phung ccangkheih tuh innbyng hynh phiaku leite chii makhia ungkheih lang ynci pya.​—Genesis 2:24 kha ria tua.

Baebu phung zuituh uccaw vaenia azawnawte lungdaenaw ynmue sah. Dingrahrih te unglang zuakuh acipaw Baebu bya angaepaw ryalatu pawkhah ryalaw nawtupaw nynh myarya a ry. (Phungtangbya 10:4, 26; Hebru 13:18) Ahoy ohpaw thyhte ngaengang khaeku lang, sisua laeze Pachia te vaeccawku kha aphu tesah hua lang Baebu nynh ynccang pya.​—Matthai 6:24, 25, 33; 1 Timote 6:8-10 haekha ria tua.

Baebu phung hawte zuipaw tuh ngedangnaw mah a ung. (Phungtangbya 14:30, 22:24, 25) Tousenaw langze, arah kha eihlue lang neihnang a cipaw a kawbya kha zuilangze ccinaw te ciku seinaw mah muelei lang. (Phungtangbya 23:20) Baebu thyhte, arah tuh ccahpyh taraw nia kho a thua. (Sam 104:15; 1 Korin 6:10) Tuanaw roihnaw, ryalaw mesei khyhnaw lang Baebu nynh yn bung. (Sam 119:97-100) Thuasalama khrihccaw ame paw nynh tuh amaw hanglang kyalya thua leite, Pachia phu e sanaw lang Baebu phung hae kha a zui.​—Matthai 5:14-16 kha ria tua.