A Rawthung Paw Paul Atuh Paw

Zuitu Paul ahingnaw akhung paw ngawphue lukheih a la ung. Tuh e ngawphue paw tuh Paul atuhpaw nynh thua. Amin tuh ny lang ung khyh. Amaw tuh myarya araw thung. Amaw kong khah na nyh ry oh tou?—

Paul tuh Zisu kong aho keiccuze Zerusalem kya thawng a ccah. Abang nynh Paul kha ala hua hae. Tuh e hae nynh: ‘Paul khah bapianaw zung kalang ccia khae lang zah rawbawi paw kha ho pya lang. Te langpi kya buh lang zah Paul kha chia lang’ cite aphe hae!

Paul atuhpaw nynh aphe hae paw kha phe la ny. Tetuh pawmou aci cipaw na nyh oh tou? Thawng lungkhu a ungpaw Paul kha a ho pya. Paul nynh rawbawi paw kha laho pah a ci. Rawbawi paw kalang holang pawtuh zoi ngaw tou, zoi ngaw khyh tou?— Zoi ngaw khyh, rawbawi paw tuh rawkaw hae kha a uh tuh paw ale hua paw athua keiccu. Thuasalamah Paul atuhpaw nynh rawthung te rawbawi paw kha a ho pya.

Tetuh rawbawi paw nynh paw cilangmou accang cipaw a ny vae. Paul kha athung khaw lang hae paw rawkaw hae 500 kha ako hae! Te Paul kha Sisaria khua lang khuazimaw a ccia sah khae hae. Paul kha langpi kya theihkho hae tou?— Theih kho khyh hae, Ccungccah hoilei hae paw nynh Paul kha pawpaw mah cih kho khyh hae! Phelang ci hae paw mih enaw phe roh vae.

E kong kyate paw hawnaw mou law ku langpaw a ung?— Imua hae nang ning mah Paul atuh paw hawte nae rawthung sah. Abapituh Zahova Pachia kong honaw kya rawthung aho. Zahova Pachia kong ccungccaw hae kha rawthungte na ho pahkho cih oh tou?— Na ho oh ze tuh ming ccang paw hae mih hingnaw khung paw te nynh a lo ku.