Ccangkunaw ccang 7

Sawsang te Pachia klang nae ku naw

Merahrih sawsang lang pawcce azici? (1)

Hung klang mou sang lang zah pawte mou ngia lang? (2, 3)

Saw sang lang ccang naw akonga lang hae tuh paw mou? (4)

Paw ccyh mou saw sang lang? (5, 6)

Saw sang miakaw Pachia nynh yn thae pah tou? (7)

1. Sawsang ci paw tuh zakaw sang sah kute bya ho cipaw nynh thua. Pachia klang merahrih saw sang aho. Myarya na sung sah paw na vae ccaw luh kheih hawte na sahngang kho cih. Zahova tuh myarya le sae Ah huhang kou ung sah lahmah asaw sang naw phe yn thae pya rei. Pachia klang merahrih saw na sang tou?—Sam 65:2; 1 Tesalon 5:17.

2. Saw sang tuh Pachia beih ccang kheih nynh thua. Tuh thua kei ​ccu ​ze ​Zahova Pachia klang rou nynh saw sang lang accang. Zisu lae vaw ung lya mah apaw Pachia klang saw zung zae asang. Ming ccang paw klang saw mahzisang boi khyh. Tuh hawte ae ning mah ci bua lang a ccang. (Matu 4:10, 6:9) Saw asang ta kyh ohte Zisu minte ngia lang. Tuh e nynh Zisu rya law sawtua phu te sah naw thua zah, yn saw naw me kha ka zyn ci paw lang sah naw nynh thua.—Zan 14:6; 1 Zan 2:1, 2.

3. Saw a sang vae oh ze alung khu e alungthin ccah ccing te sang lang a ccang. Saw sang naw ccah uh kyae riate sang lang ccang khyh. (Matu 6:7, 8) Paw paw ccyh kya thua sah, paw paw kyate mah thua sah, paw paw ungtu zia temah thua sah, rua rua sang kho a thua. (1 Samuel 1:12, 13) Pachia nynh amaw pyng hang lang ngia ku ry ze dae ka king naw sang kha kheih kya te ngia lang ze kou ahoi cih.—Marka 1:35.

4. Paw paw hae mou ngia kho thua cih? Pachia sahgang kute athahne cih paw paw paw ze mah. (Filipi 4:6, 7) Ka heih alaw ku lang oh paw Pachia aminte a e naw kong hang lang saw sang lang a ccang cite yna lang sah pya. Apyng saw ry naw thua sah, sei naw ngae thya kunaw e lang thua sah, tou naw e lang thua sah, ngia kho athua. (Matu 6:9-13) A saw sang naw apyng hoi naw elang ke le sang lang ccang khyh. Pachic ry naw te alo kuh paw ke le ngia lang accang.—1 Zan 5:14.

5. Pachia lunglang (or) athe hoi sah lang alungthin yn tho ku takyh te paw paw ccyh mah ngiakho athua. (1 Seeria naw 29:10-13) Na tung vaw piat ccahna aungze syntaw naw na mueze saw sang kuh. (Sam 55:22; 120:1) Na aedyn kya saw sang kuh. (Matu 14:19) Zahova nynh saw zungzae yn sang oh yn ci.—Efesa 6:18.

6. Sei naw le paw arae sei vae oh ze saw sang ku aho hua. Zahova athaw ccinaw te asei naw yn ngae thya kho naw lang ngiaku lang accang. A sei naw kha phy ku lang zah vae lei vae leih asei khyh naw lang oh mah ngia ku lang accang.—Sam 86:5; Phungthlukbia 28:13.

7. Ading paw saw sang naw rou nynh Zahova nynh athae pya. Na saw sang naw Pachia nynh ae thae pya kho naw lang akaw lang e bya haw te zui khonaw thaw te zua hu aho cih. (Phungthlukbia 15:29; 28:9) Zakaw sang sah ku te saw sang lang. (Luka 18:9-14) Na ngia paw e lang naw ta kyh te zua ku myarya aho. Tuh te ze nynh zynnaw na hoi naw pawte thang ccang ccah ccing ci paw anyh kuh cih.—Hebru 11:6.