Laephi Pyngpi Yn Uh Vae Cih Paw Pachia Penaw

Paw Penaw kong mou ho lang paw na lo sah oh?— Pachia Penaw kong nynh thua. Tuh e Penaw nynh Laephi pyngpi Paradis lang yn tang sa vae cih. Tuh e Penaw kong houh na nyh ry oh tou?—

Rang takyh kya siapharang luhkheih cci a ung. Siapharang nynh a rang kya a ung hae paw ccungccaw miakaw kha a uh hae. Athualangze Pachia Penaw kya a uh cihpaw Siapharang tuh a hungmou?— Zisu khrih nynh thua. Amaw tuh vawlang nynh a ung. Aromaw vawlang te Laephi pyngpi kya e ccungccaw hae kha yn uh vae cih! Laephi pyngpi Zisu nynh yn uh vae ze yn hoihua vae cih tou?—

Laephi pyngpi tuh Paradis lang yn tang vae cih. Tetuh ah lung myarya paw vae cih! Ziaku naw, rawtuku naw mah ung vae lang khyh. Ccungccaw hae balyng sungsahku te unglang vae. Cciinaw, chiinaw ung vae lang khyh. Mimih amoh paw mah yn aw vae cih. Mihnaw rua paw naw yn thae vae cih hae. Langpi cceih kho leihae paw mah thoh kute yn zue vae cih hae. Aepaw niapaw mah phe yn lung vae cih. Lorangsaw hae mah teikuh vae lang khyh hae. Aening mah yn tei vae lang khyh hae. Zuekheih lang vae. Achih hae paw mah bua yn thothui cih hae. Rebeka, Rahab, David te Eliza hae hawte e ccah-uh kya e hae mah bua yn tho thui cih hae! Yn thothui vaehae ze na tung kuh ry khyh oh tou?—

Zehova Pachia nynh nangning kha ae sungsah oh zah nae lungmah ae paw sa ry oh. Imua hae Zahova kong houh ccangkuh oh lah Pachia bya kha zungzae na ngae cih oh ii. Tuhte na ci oh zetuh myarya a puithyapaw laephi thawpaw kya chii vae leite zungzae ung lang vae! Na ung rycih oh tou?—