CCANGKUNAW 29
Ah Chii Vae Oh Ze Pawlangmou Ah Tang Oh?
Na sungsapaw lukhakheit a chiipaw na tung boi tou? Na ngaethya ccyh kya: ‘Chii vae ze pawlangmou ah tang oh? Ah sungsah hae paw te bua tungkuh kho lang ung tou?’ cite na tua kho. E ccangkunaw te malang ccangkunaw kya Baebu kya-e thawzung yn hoisapaw aphi hae kha hokuh lang.
1. Ah chii vae oh ze pawlangmou ah tang oh?
Zisu nynh chiinaw kha iipaw te nynh atouse. A ihpaw lukheit tuh a pepang kya a cyihkuh hae paw kha nyh khyh. Chiinaw tuh iipaw te pawtemou a lokuh? Ccungccaw lukheit a chih kou tetuh paw ccinaw, paw riathaenaw mah tung vae khyh. Innbyng, vaeccaw hae ryte a sawkuh keiccuze ka makhaete ka langme cipaw tuanaw mah hoi vae khyh. “A chih hae paw nynh tuh pawpaw mah nyh vae khyh hae” cite Baebu nynh a ho.—Phunghotu 9:5 kha ria.
2. Chiinaw kong byaccing nynaw kyate pawtemou thanenaw ah mue oh?
Ccungccaw patae nynh chiinaw kha rih hae zah—mih chii hae kha mah a ri hae! Thuasalama chiinaw kong Baebu hopaw nynh soihbianaw ae pya kho. Zisu nynh hynhte a ci “Byaccing nynh nanning kha ae luesah cih oh.” (Johan 8:32) Ccungccaw lukheit tuh a chih koute a muihsaw tuh pou a hing ung cite Beihnaw abang nynh a ccangpya hae. Baebu nynh tuh tuhte yn ccangpya khyh. Ccungccaw tuh a chih koute paw riathaenaw mah tung vae khyh. A chihpaw nynh tuh pawpaw mah a ny khyh keiccuze aening kha vawsawnaw yn pya kho khyh. Tuhkeiccuze mih chii hae hanglang sithoi lang, beih lang, sawsang pya lang hoo khyh.
A chih hae paw te bya hokuh kho a thua cite ccungccaw abang nynh a ho hae. Thuasalama tuh-e tuh thua kho lang khyh. Atumaw ah ccangkuhpaw hawte a chihpaw nynh tuh “pawpaw mah nyh vae khyh.” Ka sungsapaw a chih hae pawte kae ccuepekuh cite a tua hae paw tuh thangccing lang zetuh a chih hae paw langte a ungsakuh hae paw muihsaw hoylei hae paw te a ccuepekuh hae paw nynh thua. Tuhkeiccuze chiinaw kong byaccing nynaw nynh aening kha muihsaw hoylei hae paw raw kyate yn thungkhaw. Zahova nynh muihsaw hoylei hae paw te ccuepekupaw tuh ri lang ung cipaw a ny keiccuze a chih hae paw te ccuepekuh khyh nawlang raeringnaw yn pya.—Deuteronomy 18:10-12 kha ria.
HOUH CCANGKUH LANG HOUH MUIH LANG
Chiinaw kong Baebu hopaw te mih chii hae kha de a tah leipaw sungsakunaw hoipaw Pachia tungvaw na zynnaw a tyngkhonaw kong kha houh ccangkuh.
3. Mih chii hae kong byaccing kha ny lang ccangkuh
Laephi pyngpi e ccungccaw hae kya ah chii vae oh ze pawlangmou ah tang oh cipaw te asekute zynnaw aphuinphuin a hoi hae. Thuasalama, tuh-e zynnaw miakaw tuh amepaw thua khyh.
Na ungnaw pepang kya mih chii hae te asekute pawtemou a zyn hae?
Baebu ccangpyanaw ny nawlang, VIDEO kha pia.
Phunghotu 3:20 kha ria tuhkoute e bakhianaw hae kha hokuh oh:
E Baebu ccaw liate, ccungccaw tuh a chii vae ze pawlangmou a tang vae?
Ccungccaw a chih koute a hing syapaw a ung tou?
Zisu a vaeccapaw, Lazaruh a chiinaw kong kha Baebu nynh a langsah. Johan 11:11-14 kha ria lah Lazaruh kong Zisu nynh pawmou a ho cipaw kha syntaw tua. Tuhkoute e bakhianaw hae kha hokuh oh:
Zisu nynh chiinaw kha pawte mou a touse?
E tousenaw nynh mih chii hae kong pawmou yn nysah?
Chiinaw kong Baebu ccaesanaw te asekute nang pawtemou na ung?
4. Mih chii hae kong byaccing nynaw nynh thanenaw yn hoisah
Mih chii hae kong byaccing nynaw nynh mih chii hae rinaw kyate yn luesah. Phunghotu 9:10 kha ria tuhkoute e bakhianaw kha hokuh oh:
Mih chii hae nynh vawsawnaw yn pya kho hae tou?
Baebu byaccing hynh kae nyh vae tetuh mih chii hae kha sithoi lang, beih lang cihkuhpaw hae kha kae zyn vae khyh. Isaiah 8:19 te Byaphy 4:11 kha ria tuhkoute e bakhianaw kha hokuh oh:
Zahova nynh mih chii beihpaw, mih chii bya khiapaw kha pawtemou a tua?
Mih chii hae kong byaccing ny keiccuze Zahova nynh a ry leipaw phunglang hae kyate a luekuh
5. Mih chii kong byaccing nynaw nynh soihbianaw yn muesah
Ccungccaw patae nynh hoyleinaw cyi langze chii koute detahnaw mue lang cite ccangpyakunaw a mue hae. Thuasalama ahoy leipaw ccungccaw a thua zemah a chih kou tetuh paw riathaenaw mah tung vae khyh cipaw nynaw nynh—soihbianaw yn muesah. Rom 6:7 kha ria tuhkoute e bakhianaw kha hokuh oh:
E Baebu ccaw liate, ccungccaw a chih kou tetuh seinaw kyate a lue vae paw thua zah ahoy leipaw a cyihpaw ccungccaw lukheit a chii vae ze detahnaw a mue cih cite na tua tou?
Zahova kong houh ny langze mih chii hae kha mazi detah lang khyh hae cipaw houh ny lang. Deuteronomy 32:4 te 1 Johan 4:8 kha ria tuhkoute e bakhianaw hae kha hokuh oh:
E Baebu ccaw kya-e ziazae hae a hoipaw Pachia nynh mih chii hae kha detah cih hae tou?
Mih chii hae kong byaccing nynaw nynh lung ngaengannaw ae muesah tou? Pawkeiccumou?
CCUNGCCAW ABANG NYNH HO HAE PAW: “Chii koute pawlangmou tang lang cipaw kha ka tua zah ka rih.”
Thawzung yn hoisapaw paw Baebu ccaw mou na ho kho?
ADYNGNAWTE
Ccungccaw lukheit a chii vae ze pawpaw mah nyh vae khyh. Paw riathaenaw mah tung vae khyh zah a hingpaw ccungccaw hae kha vawsawnaw mah pya kho khyh.
Bua Liathuinaw
Ah chii vae oh ze pawlangmou ah tang oh?
Mih chii kong byaccing nynaw nynh pawtemou thanenaw yn hoisah?
Mih chii kong byaccing nynaw nynh pawtemou yn soihbia?
HOUH CCUNGCHIH
“Muihsaw” kong Baebu ccaesanaw kha ria tua.
“Ccungccaw Kya A Chih Kho Leipaw Muihsaw A Ung Tou?” (Website ccaw)
Pachia nynh mih hoylei hae paw kha hell kya vawrihvawsaw te a nung hae tou cipaw kha leihla tua.
Mih chii hae kha ri lang a ccang tou?
Mih chii hae kong byaccing kha a ny keiccuze lung ngaengannaw a muepaw lukheit kong ria tua.
“Zynngan Ung Zah A Ccaepaw Baebu Aphi Kha Ka Ry” (Rawvianaw, February 1, 2015)