CCANGKUNAW 38
Hingnaw Lasung Kha Phutesah
Aening tuh ah hing oh keiccuze hingnaw kha ah hoysah kho oh. Ruunaw hae tung zemah hingnaw kya hoysah lang hae paw a ung maming. Hingnaw lasung kha phu ka tesah cipaw kha pawtemou ah langsah kho oh? Phutesah lang a ccangnaw abapi akong tuh pawmou?
1. Hingnaw kha pawcce phutesah lang a ccang?
Hingnaw tuh sungsakunaw hoipaw Ah Paaw Zahova kyate ah mue oh paw lasung thua keiccuze phutesah lang a ccang. Pachia nynh hingnaw miakaw kha a rae keiccuze amaw tuh “hiinnaw tuidy”—nynh a thua. (Sam 36:9) “Pachia tuh ccungccaw balyn kha hiinnaw, hy te atyn-are oun pyatu athua.” (Locceihtu 17:25, 28) Zahova nynh aening pou ah hing kho nawlang oh ahoo hae paw kha yn pya. Hingnaw kha hoysah kho lang temah yn paccyn pya.—Locceihtu 14:17 kha ria.
2. Zahova nynh yn pyapaw hingnaw kha phu ka tesah cipaw pawtemou langsah kho lang?
Na nung vue lungkhu na ung lya mawte nang kha Zahova nynh pe ae ki. Baebu lungkhu e Zahova a beihpaw laku lukheit a thuapaw David nynh hynhte a ci: “Accing loh leipaw ka pyn kha phe na muih.” (Sam 139:16) Zahova nynh na hingnaw kha myarya a phutesah. (Matthai 10:29-31 kha ria.) Ccungccaw chiapaw tuhkhyhze mawtemaw chiakupaw nynh Pachia thinlung kha a ccisah.a (Exodus 20:13) Ahoo leite hingnaw vuakupaw, minccang paw hingnaw sawtua khyh paw nynh mah Pachia thinlung kha a ccisah. Maw te minccang paw hae hingnaw kha sawtuapaw tuh hingnaw lasung kha phu ka tesah cipaw ah langsah oh paw nynh thua.
HOUH CCANGKUH LANG HOUH MUIH LANG
Hingnaw lasung kha phu ka tesah cipaw langsakhonaw zia abang kha tuatua.
3. Na ngedangnaw kha peki kuh
Pynpyakuh hae paw Khrihccaw hae tuh Zahova ryalaw lang mih hingnaw balyn te a pyakuh hae. Mih pyn kha sithoinaw lang a pyakuh hae paw te nynh a lokuh. Rom 12:1, 2 kha ria tuhkoute e bakhianaw hae kha hokuh oh:
Na ngedangnaw kha pawnynhmou pe ae kisah kuh?
Na ngedangnaw pekikhonaw zia abang tuh paw hae mou?
4. Maw te minccang paw hae khynnaw hanglang raering kuh
Baebu nynh hingnaw hanglang rilang ungpaw cyisanaw hae kha sihae kuh lang thaw yn pya. Khyn nawlang pawhaemou cyi kho lang cipaw ny nawlang, VIDEO kha pia.
Phungtangbya 22:3 kha ria tuhkoute akaw lang-e hae kya khyn nawlang cyikhonaw kong kha hokuh oh . . .
inn kya.
ryalaw kya.
zuenaw kya.
mawtaw tuhkhyhze cycle mung te ccikuh bua lya.
5. A pui loh leipaw imua hingnaw kha phutesah
Zahova nynh a pui lo leipaw imua a hingnaw te a lethungnaw kha a nyhry cite David nynh byavei langte la zei. Sam 139:13-17 kha ria tuhkoute e bakhianaw kha hokuh oh:
Zahova muihnaw kya ccungccaw lukheit hingnaw tuh a poi lya tetou a tho tuhkhyhze a pui tetou a tho?
Zahova nynh langmaw Isarel hae kha a nung te a pui lo leipaw ccaw kha thungkhaw nawlang kawbya la pya hae. Exodus 21:22, 23 kha ria tuhkoute e bakhianaw hae kha hokuh oh:
Zahova nynh a pui lo leipaw imua chii saseipaw kha pawtemou a muih?
Ruasasua cyi ze so Zahova tuh pawtemou ung cih citemou na tua?b
Zahova muihnaw kha na nyh zah pawtemou na ung?
Hingnaw kha phu a tesahpaw nopinung nynh mah imua rokupaw tuh kamaw nynh ka cyikhopaw cite a tua kho. Isaiah 41:10 kha ria tuhkoute e bakhianaw hae kha hokuh oh:
Nopi lukheit nynh imua rohkuh lang nangsenaw a tung ze a hung kha mou bungnaw ngia lang a ccang? Pawccemou?
CCUNGCCAW ABANG NYNH HO HAE PAW: “Imua rohkuh maming lang ahoo ccyh a ung kho.”
Zahova nynh a nung te a pui lo leipaw imua hingnaw kha phu a tesah cipaw pawnynhmou ae zynsah?
ADYNGNAWTE
Hingnaw tuh Zahova nynh yn pyapaw lasung nynh thua. Maw te minccang paw hae hingnaw kha sungsah lang, sawtua lang te thungkhaw lang Baebu nynh yn ccangpya.
Bua Liathuinaw
Zahova hanglang ccungccaw hingnaw tuh pawcce a phute?
Ruasasua te ccungccaw chiapaw kha Zahova nynh pawtemou a tua?
Hingnaw lasung kha pawcce a phu na tesah?
HOUH CCUNGCHIH
Hingnaw lasung yn pyapaw Zahova tungvaw lungtuanaw kha pawtemou ah langsah kho oh?
Imua a rohkuh boi nung kha Zahova nynh a ngaethya tou?
“Imua Rokunaw Te Asekuhte Baebu Nynh Pawmou A Ho?” (Website ccaw)
Hoysanaw pokuh vae ze hingnaw te asekuhpaw Pachia muihnaw kha pawcce tuabia lang a ccang.
“‘Rilang Ungpaw Zuenaw’—Hae Kha Zue Lang A Ccang Tou?” (Thaekuh!, October 8, 2000)
Chiakurynaw thinlung yn ung ze Baebu nynh pawtemou yn bung kho.
“Mawtemaw Chiakurynaw Thinlung—Yn Ung Ccyh Kya Baebu Nynh Yn Bung Kho Tou?” (Website ccaw)
a Zahova nynh thinlung a koi hae paw kha myarya peki hae. (Sam 34:18) Mawtemaw chiakuh lang cia mih thinlung ccih hae paw kha thaepah thya hae zah a bung ry hae. Pachia bungnaw nynh chiakurynaw thinlung kha yn taesah kho cipaw kha e ccangkunaw kya-e Houh Ccungchih phianaw lungkhu e “Mawtemaw Chiakurynaw Thinlung—Yn Ung Ccyh Kya Baebu Nynh Yn Bung Kho Tou?” cihkuhpaw ccaw kha ria.
b Imua a rohkuh boi hae paw nynh seinaw kae hoi cihte myarya lungria thae lang hoo khyh—Zahova nynh a ngaethya kho hae. Tuh-e kong houh ny lang e ccangkunaw kya-e Houh Ccungchih phianaw lungkhu e “Imua Rokunaw Te Asekuhte Baebu Nynh Pawmou A Ho?” cihkuhpaw ccaw kha ria.