Ccaw Hae Ccangpyanaw Zia

Inbyng raetu Zahova Pachia nynh ccaw hae do-oih lang nungpaw hae kha taevue a pya hae. (Kolosa 3:20) Na ccaw hae kha Zahova Pachia a sungsah thyanaw lang hae te piccang rya hoyte a ny kuthyanaw lang hae ccangpya lang hae paw nynh thua. (2 Timote 1:5; 3:15) Tuhkoute na ccaw hae mih thinlung kya pawmou a ung cipaw ny lang mah na zuaku aho. Na baho zia te na cyisahnaw zia kha ccaw hae hanglang myarya azici. Masaty Zahova Pachia bya kha nae thinlung kya hoyte na ccykeku ty oh ze tuh nae ccaw hae kha hoyte na ccang pah kho cih oh.—Sam 40:8.

1 NAE CCAW HAE NYNH NAE MAWTE BYA AHOKURY NAWLANG HAE RAE

BAEBU HOPAW: “Naw ngaelang nae khyrang sah lah, bya holang nae khysung sah”a ci. (James 1:19) Ccaw hae kha maethya leite mih thinlung kya-e bya ry thathyh a ho ry nawlang hae na rae ry mah ming cih. Ccaw hae mih thinlung kya-e bya aho ry hae ze hoyte ngaepya na ry hae cipaw ny sah hae a ho. Nae maw toulou nynh Imua hae kha bya a ho ngang nawlang hae nah ung pya oh ze thang nynh a ho ry cih hae. (James 3:18) Re hih re hae te bya ho na mang ze, seinaw ccungpya na mang zetuh imua hae nynh mih thinlung kya-e bya ho ngang vae lang khyh hae. Ccaw hae tungvaw lungsaenaw hoi, hohciate nynh kae sungsah oh cipaw atu te atu ho pah hae.—Matthai 3:17; 1 Korin 8:1.

NA CI LANGPAW:

• Imua hae nynh bya ae hopya ry oh ze ngaepah oh

• Piahccahnaa atung hae ccyh kya lya bya ho kheih paw thualeite zungzaete ho kheih oh

2 A HORYNAW HAE A SUILANG KHA NY LANG ZUA KUH

BAEBU HOPAW: ‘Akong ccangkheih kha hoyte anyhthya paw tuh hoynaw amue cih.’ (Phungtangbya 16:20) Vae khakheih tuh imua hae mih thinlung kha merarih te nythya lang na zua ku a ho. Pawccecize imua hae tuh ccangkhahkheih kong kha accosahthya hae thuakhyhze tuaty leite a ho thya hae. ‘Akong alang kha hoyte a nyh leite bya apiapaw ccungccaw tuh, maethyanaw amue cih’ a ci.—Phungtangbya 19:11.

NA CI LANGPAW:

• Ccaw hae nynh a ho haepaw miakaw palou thinria te liaru paw, a hokou maw haeze vaeleih ho thing khyh nawlang bya pae kuh

• Mihminghaw kathua lya kha pawtemou ka thinlung a ci paw hae khahmou ka hanglang azi ka ci sah hua cipaw tuathui tua

3 CCAW HAE MAHLANG LUNGLOKUNAW LANGSAH OH

BAEBU HOPAW: ‘Ccaw hae ccianaw langpi kha ccangpah hae.’ (Phungtangbya 1:8) Ccaw hae do-oih lang nungpaw hae kha Zahova Pachia nynh taevue a pya hae. Tuhkeiccuze nungpaw hae nae ccaw hae kha sawtuate kaw a ngae thyanaw lang hae ccang pah oh. (Efesa 6:1-3) Nungpaw hae “lungkheih thinkheih” te “lungloku” leite na ung oh zetuh ccaw hae nynh ae nuinse cih oh. (1 Korin 1:10) Tuhkeiccuze nae lung alo ku khyhnaw ung ze nae ccaw hae ny sah nang oh. Tezethang nynh ccaw hae nynh saw ae tua thya cih oh

NA CI LANGPAW:

• Ccaw hae kha pawte nynh thuihei ccangpya langhae cipaw nungpaw hae nae lung lokuh tou sah

• Ccaw hae pawte nynh thuihei lang hae cipaw nae lung alo ku khyhze na innbyng lungrynaw kha muihpyathya lang zua kuh oh

4 A CCYH KHYA KUH

BAEBU HOPAW: ‘Ccaw hae ccianaw langpi kha ccangpah hae.’ (Phungtangbya 22:6) Ccaw hae tuh mihmaw te mihmaw hawlang khyh hae. Hoyte a ccyh khyaku te na ccangpya hae aho cih. Hoyte thuihei hae mah a ho cih. (Sam 127:4; Phungtangbya 29:17) Thuihei cipaw tuh detahpaw thua khyh, zuilang paw kha pawkeiccu nynh kae hopya oh cipaw ccaw hae a thaethyanaw langhae hopya paw nynh thua. (Phunhtangbya 28:7) Tuhkoute, Zahova Pachia bya kha phu ate sahthyanaw lang hae te Baebu hopya paw kha a thaethya nawlang hae mah ccang pah hae. (Sam 1:2) Tezethang nynh imua hae ahoypaw te athahpaw phiathyanaw thinlung kha yn hoicih hae.—Hebru 5:14.

NA CI LANGPAW:

• Pachia tuh doliaku lang paw cipaw a muihthya kho nawlang hae ccangpah hae

• Internet kyate bang ccungkupaw tuh hoyleinaw ozia nynh athua cipaw a muihthyanaw lang hae mah ccaw hae kha ccangpah hae. Nopi pise seinaw raw kha pawte nynh sibia lang cipaw a nythyanaw lang hae mah ho pah hae