Hoyleinaw Tung Vae Ze

Ahoy sah hae paw zuvaw, ahoy sah hae paw innbyng thua lang mang na zuakuh oh pite tualeipite hoyleinaw na tung oh zetuh nae lungpawnaw a zo kho. (Phunghotu 9:11) Ruunaw a tung vae oh ze phishing kho nawlang aho paw bungnaw kha Pachia nynh yn paccyng pya. Baebu tuanaw ynpyapaw hynh hoyte na zuilang oh zetuh na maw te na innbyng hae nynh aruu huapaw vawsawnaw hae kha heize na tae kho vae cih oh.

1 ZAHOVA PACHIA KHA DOLIA KUH

BAEBU HOPAW: “Aning tuh nanning hanlan a tua paw athua keiccuze, nae thinphangnaw balyn kha amaw tungvaw khaleih ah oh.” (1 Piter 5:7) Nanning na tung oh paw ruunaw kha Pachia keiccu thua khyh cipaw zungzae ningnang. (James 1:13) Pachia te ahoypaw sahngangkunaw na hoi zetuh ahoyhua ccepaw langpi te ae bung cih. (Isaiah 41:10) Pachia kalang ‘nae vawsawnaw balyng kha ho pah oh.’—Sam 62:8

Baebu kha nin takyh riate na leihla zetuh ngae-ngangnaw na mue cih. Tezetuh Zahova Pachia nynh “ruunaw aphuinphuin a tung” hae paw kha pawte nynh ngae-ngangnaw a pya hae cipaw nae nythya vae cih. (2 Korin 1:3, 4; Rom 15:4) “Na tua kho lei oh paw ngae-ngangnaw” kha kae pya cih oh cite bya yn king pya ku.—Filipi 4:6, 7, 13.

NA CI LANGPAW:

• Nae lungdaenaw lang, hoyte na tuathyanaw lang Zahova Pachia kalang khe sawsang kuh

• Na muihnaw hae kha khingkhia lah cyi khonaw langpi ahoyhua paw kha po kuh

2 NA MAW TE NA INNBYNG KHA PE KI

BAEBU HOPAW: ‘Raering kunaw hoipaw thinlung tuh hawnaw ccykupaw nynh a thua, hawnaw hoipaw nakarin tuh hawnaw bya nynh a ccung.’ (Phungtangbya 18:15) Akong alang kha ccahkhung kuh. Na innbyng hae luhkheih raveih pawmou ary abou hae cipaw nylang zua kuh. Bya hokuh kheih oh. Miming nynh aho hae paw kha mah ngae pah hae.—Phungtangbya 20:5.

Na sungsah paw lukhahkheih a chii vae ze soh? Na thinlung ccinaw holang na maethah nang sah. Zisu haehei “a mihphi a lua boi” cipaw ning nang. (Johan 11:35; Phunghotu 3:4) Phe byng lang iiku te haebang lang azici. (Phunghotu 4:6) Tuhte na ci zetuh na thinlung ccinaw kha a dae hua cih

NA CI LANGPAW:

• Ruunaw na tung ohmaw khe na innbyng hae te zungzae ccuepe kuh oh. Tezethang nynh ruunaw na tung oh ccyh kya khe miming nynhmah bya ae ho pah ngang ru cih oh

• Na tunghawte a tungboi vae hae paw ry te bya hokuh kheih oh

3 NA MUE PAW BUNGKUNAW KHA LEHKHANG

BAEBU HOPAW: ‘Vaeccaw nynh tuh atyng are asungsah, uno tuh ruunaw hanglang nynh a pui.’ (Phungtangbya 17:17) Na vaeccaw hae nynh ae bung ry hae zemah pawte nynh bunglang cipaw a ny khyh hae keiccu zemah a thua kho. Na ry naw ho pya lang hae rihsung nang. (Phungtangbya 12:25) Baebu hopya paw kha pawte nynh zuilang cipaw Baebu kong hoyte a thaethya vae hae paw kha khia kuh hae. Miming nynh ae bungnaw lia haete thanenaw na mue cih.—James 5:14.

Zahova Pachia kha dolia kuh lah Pachia bakinnaw a zyn hae pawte na mungku zetuh bungkunaw na mue cih. Ngae-ngangnaw na muenaw lang bungku aho hae paw kha bungbua hae. Zahova Pachia te a bakinnaw kha pawkeiccu nynh zyn aho cipaw miming kha ho pah bua hae. Bung a ho hae paw kha bungbua hae, mah khaete ungrynaw thinlung hoyleite nang ae sungsah hae paw te pe aeki hae paw khahte mung kuh hae.—Phungtangbya 18:1; 1 Korin 15:58.

NA CI LANGPAW:

• Na ccawku hua oh pawte bya ho kheih lah ae bungnaw kha lehkhang

• Na ho na bou paw kha merahrih te ho pah