1-3. Ccungccaw hae nynh a chih hae paw kong paw bakhianaw mou leih a khia hae, beihnaw patae nynh kha-e bakhianaw kha pawtemou aphi pya hae?

BAEBU nynh “chiinaw ung vae lang khyh” cite bya yn king. (Byaphy 21:4) Abalu 5 kya sawnawme liate zungzae hingnaw ah mue kho oh cipaw kha ah ccangku vae oh. Thuasalama chiinaw tuh pei ah tung ung oh. (Phunghotu 9:5) Tukeiccuze chii vae ze paw lang mou ah tang cih oh? cipaw bakhianaw yn lang kuh.

² Ah sungsah oh paw lukhakheih a chii vae ze kha-e bakhianaw aphi kha nylang azi myarya ci. Hynhte mah ah tua kho oh: ‘Paw kalang ve ma a ccia? Aening kha yn do-oih ung cih tou? Aening kha yn bung kho ung cih tou? Amaw te so bua tungku kho a ung ung cih tou?’

³ Beihnaw patae nynh kha-e bakhianaw hae kha a phuinphuin te a phi pya hae. Abang nynh hoynaw na rae ze vawlang na kae cih zah hoyleinaw na rae ze Hellmae kalang na ccah cih cite a ccangpya hae. Abang nynh chii vae ze a muihsaw kha a chihty hae paw mingnung mingpaaw hae te nynh a ung kheih vae hae cite leih a ccangpya hae. Abang nynh tuh chii vae ze bua a kithui ung hae, a ccang paw pyng hangkhakheih lang, tukhyhze saring awvaw lang nynh a tang hae cite mih tuasenaw te leih a ho hae.

4. Beihnaw a lunghua nynh a chih hae paw kong kha mih tuanaw te pawtemou a ccangpya hae?

⁴ Beihnaw patae nynh paleih panaw lang mih tuanaw te a phuinphuin te a ccangpya hae. Hynhte a phuinphuin lang te a ccangpya hae ze mah ccungccaw lukhakheih a chii vae ze pou a hing paw hangkhakheih a ung ung cite a zyn hae keiccu nynh thua. Tuh-e tuh amepaw thua tou?

CHII VAE ZE PAW KALANG MOU CCIA LANG?

5, 6. Chii vae ze paw lang mou ah tang vae oh?

⁵ Zahova nynh ccungccaw lukhakheih a chii vae ze a hingnaw phe thang vae cite yn ho pya. Chiinaw tuh hingnaw te a rawsekuh paw nynh thua. Tukeiccuze lukhakheih a chii vae ze, pawpaw tuanaw te syntawnaw mah hoi vae khyh zah sangkhakheih kya mah hing vae khyh.a Chii vae ze tuh muihnaw, thaenaw te tuanaw mah ung vae khyh.

⁶ Siapharang paw Solomon nynh hynhte a zei: “a chih vae paw tuh pawpaw sang mah nyh vae khyh.” Chii vae ze sungsakunaw, huakunaw, te ‘ryalaw thua sah, tuanaw thua sah, nynaw thua sah, hawnaw thua sah kharouh ung vae khyh.’ (Phunghotu 9:5, 6, 10 ria) Te Sam 146:4, Baebu nynh lukhakheih a chii vae ze, ‘a khokhang naw hae kha kharouh a roh vae’ a ci.

CHIINAW TE A SEKUHTE ZISU HO PAW

7. Chiinaw te a sekuhte Zisu nynh pawmou a ho?

⁷ Zisu a vaeccahpaw Lazaruh a chii lya kha, Zisu nynh a zuitu hae kha “ah bangpaw Lazaruh tuh marya a iitheih vae” a ci pya hae. Thuasalama Zisu nynh Lazaruh a iitheih ccaccing paw kha a ho ry paw thua khyh. Zisu a ho ry paw tuh “Lazaruh tuh a chih vae” cite a ho rynaw nynh thua. (Johan 11:11-14) Zisu nynh chiinaw kha iitheih paw te nynh a touse. Lazaruh kha vawlang a kae tukhyhze a chih vae hae paw mingnung mingpaaw hae te nynh a ung kheih hae cite mah ho khyh. Tukoute Lazaruh tuh hellmae kya ruunawvawsaw a tung, ccungccaw lang bua a kithui tukhyhze saring awvaw lang nynh a tang cite mah ho khyh. Chiinaw kya marya a la ihtheih. A ccangpaw Baebu kya ze mah chiinaw kha iitheih paw te nynh a touse. Baebu nynh Stiven a chia lya hae kha chiinaw kya “a ih vae” cite a ho. (Zuituhae 7:60) Zuitu Paul nynh mah Chiinaw kya “phe ih vae” hae paw Khrihccaw hae kong a la zei.—1 Korinhae 15:6.

8. Pachia nynh ccungccaw hae hynh a chih lang te yn la rae paw thua khyh cipaw pawtemou ah ny oh?

⁸ Pachia nynh Adam te Evua kha a chih lang hae te a la rae hae paw thua tou? Thua khyh! Zahova nynh a ccingpaw hingnaw te lungtua lungpaw te zungzae hing lang a la rae hae paw nynh thua. Zahova nynh ccungccaw a rae lya ze zungzae hingrynaw thinlung kha a la saang pya hae. (Phunghotu 3:11) Nungpaaw hae nynh mih ccaw hae kha taw lang zah chii sah a ry khyh hae hawte, Zahova nynh mah ry khyh. Zahova nynh zungzae hinglang te nynh yn la rae, a thualangze pawcce ah chii oh?

AENING PAWCCE AH CHII OH?

9. Zahova nynh kawbya a pya hae paw kha Adam te Evua hanglang pawcce ahoypaw a thua?

⁹ Edin khokhu kya Zahova nynh Adam kha, ‘Khokhu kya ung paw thingku kya-e thingthae miakaw kha na ae kho oh. Thuasalama athah ahoy nynaw thingku kya-e thingthae kha tuh na ae lang khyh oh, na ae oh ze na ae nin oh maw khe na chih cih oh,’ a ci pya hae. (Genesis 2:9, 16, 17) Zahova nynh ahoypaw te ahoy leipaw kong kha hoyrarih lang Adam te Evua kha a ho pya vae hae keiccuze a kawbya zuilang ru vae khyh. Zahova bya ngae te amaw kha sawtuanaw langsah lang a ccang hae. Mih hanglang ahoo abou paw marya a pya kou hae keiccuze mih lungtuanaw kha langsah lang a ccang.

10, 11. (a) Setan nynh Adam te Evua kha pawtemou a ling hae? (b) Adam te Evua mih seinaw kha pawcce ngaeethya kho naw langpi a ung khy?

¹⁰ Ngaethya lang ung paw tuh Adam te Evua nynh Zahova bya kha ngae leilang phe apoku sei hae. Setan nynh Evua kha “ Pachia nynh khokhu kya ung paw thingku kya-e thingthae hae kha na ae lang khyh oh ae ci ccahccing oh tou?” cite a khia. Evua nynh, ‘Khokhu kya ung paw thingku kya-e thingthae miakaw kha kae ae kho. Thuasalama khokhu a ngaelung kya ung paw thingku kya-e a thae te asekuhte Zahova nynh, “Na ae lang khyh oh, na ae oh ze na chih cih oh,” yn ci cite a khung.’—Genesis 3:1-3.

¹¹ Te Setan nynh, ‘Na chih lang khyh oh. Na ae nin oh mawte nae mih rae a aw cih zah Pachia hawte athah ahoy nae nyh bua vae cih oh,’ a ci pya. (Genesis 3:4-6) Setan a rynaw tuh athah ahoy kha maw te maw bya paeku kho a thua cite tuakuh hae sah ci a ry. Kaw ngae khyh ze mah nae hanglang hoynaw phang a ung cih cite a la ling hae. Setan nynh na chih lang khyh oh ci pah zah, Evua nynh thingthae kha a la ae, te a vawpaw kha mah a la pya bua. Zahova nynh na ae lang khyh oh a ci pya hae paw kha Adam te Evua mang a nyh hae pite a ae hae paw kha Pachia bya ngae leilang, ahoypaw Pachia kaw ei lang a pokunaw hae paw nynh thua. A ae hae keiccuze sungsahkunaw hoipaw vawlang ung paw Paaw kha a sawtua khyh hae cipaw a lang sah vae hae. Tukeiccuze miming kha ngaeethya nawlang paw a langpi ung vae khyh!

12. Adam te Evua nynh Zahova kaw a ngae khyh hae paw tuh pawcce thinlung cci lang a ung?

¹² Masaty e nung te paaw nynh mimaw Raetupaw kha saw a tua khyh hae paw tuh pawcihmou thinlung cci lang a ung! Zuakute na kua hae paw na ccahpaw te na ccahnung hae nynh na kaw ae lah ngae khyh lang hae ze nang so pawtemou na ung ci. Na thinlung a ccih cih kha zaw!

13. Zahova nynh Adam kha “laenoi lang na ki thui cih” a cipaw kha paw a ho rynaw mou?

¹³ Adam te Evua nynh kaw a ngae khyh hae keiccuze zungzae hinglang paw kha phe la shung vae hae. Zahova nynh Adam kha ‘Laenoipaw na thua keiccuze laenoi lang na ki thui cih’ a ci pya. (Genesis 3:19 ria.) A suilang tuh a raemaw lya e hawte laephi lang nynh bua a tang vae. (Genesis 2:7) Adam seinaw he a rae kou tetuh hohse hing vae leite a chih vae.

14. Aening pawcce ah chii oh?

¹⁴ Adam te Evua nynh Pachia kaw a la ngae hae ze tuh atunin cia a hing cih hae paw nynh thua. Thuasalama miming nynh Pachia kaw ngae leite seinaw a la rae hae keiccuze a chih vae hae. Seinaw tuh myarya rilang ung paw cciinaw te lo kuh zah masaty nungpaaw kya-e ro lang ah ccou vae oh. Pung ah sei vae oh keiccuze pung ah chih vae oh. (Romhae 5:12) Thuasalama tuh-e tuh ccungccaw hae hanglang Pachia eenaw thua khyh. Pachia nynh chiinaw hynh mazii ry khyh, Baebu nynh mah chiinaw kha “raw” cite nynh a ho.—1 Korinhae 15:26.

AMEPAW LUENAW

15. Chiinaw kong amepaw nynaw nynh pawtemou luenaw yn mue sah?

¹⁵ Chiinaw kong amete ny paw nynh ame leipaw ccangpyakunaw patae kyate yn lue sah. Baebu nynh a chih vae paw tuh ngaethya lungronaw hoi vae khyh yn ci pya. Michii hae kha bya ho pya kho ung khyh hawte miming nynh mah yn ho pah kho vae khyh hae. Ah bung kho vae khyh oh hawte miming nynh mah yn bung kho vae khyh hae. Ruunaw vawsawnaw mah yn pya kho vae khyh hae. Tukeiccuze rilang hae paw thua khyh. Thuasalama beihnaw patae nynh a chih hae paw tuh sangkhakheih kya pou hing ung hae zah Pastor hae kha phua pya lang hae ze miming kha bung paw nynh a thua cite a ccangpya hae. Thuasalama chiinaw te a sekuhpaw amepaw kong kha ah ny vae oh keiccuze hungnynhmah yn ling kho vae khyh hae.

16. Beihnaw patae nynh michii hae kong pawtemou a ccangpya hae?

¹⁶ Setan nynh aening lingnaw lang ame leipaw beihnaw kha mang zah a chih hae paw kha mih muihsaw pou a hing ung hae cite yn zyn sah. Tousenawze, beihnaw abang nynh a chii vae hae paw hynh mih muihsaw kha sangkhakheih kya pou a hing ung cite a ccangpya hae. Na beihnaw nynh tuhte ae ccang pah oh tou, tukhyhze a chih hae paw kong kha Baebu nynh a ho thyhhawte tou ae ccangpya oh? Setan nynh ccungccaw hae kha Zahova te sawkuh hae sah cite hyngbya kha pei a mang.

17. Zahova nynh mih chii hae kha hellmae kya nynh vawrihvawsaw te a ung sah hae cite pawcce a zyn hae?

¹⁷ Beihnaw patae nynh a ccangpya hae paw hynh rilang myarya ung. Tousenawze abang nynh ccungccah hoylei hae tuh a chii vae hae ze hellmae kya nynh vawrihvawsawte nynh zungzae a ung hae cite a ccangpya hae. Tuh-e ccangpyanaw tuh Zahova thethya sah paw nynh thua. Pachia nynh ccungccaw hae hynh vawsawnaw tung lang mazii ry khyh! (1 Johan 4:8 ria.) Ccungccaw lukheih nynh kaw ngae khyh cite imohpaw a kuih kha mae te a u paw na muih lang ze, nang pawtemou na ung cih? E ccungccahpaw hynh thawccinaw hoi khyh cite na tua kho. Amaw te mah na nyh kuh ry lang khyh. Setan nynh Zahova mah tuhawte a cih paw cite tua hae sah ci yn ry!

18. Mihchii hae hynh pawccemou rilang paw a thua vae khyh ae?

¹⁸ Beihnaw abang nynh ccungccaw hae a chii vae hae ze muihsaw lang nynh a tang hae a ci pya hae. Tukoute beihnaw patae nynh a chih hae paw tuh thungnaw hoipaw lang tukhyhze raw lang mah a tang kho hae keiccuze sawtua lang hae zah rilang hae cite a ccangpya hae. Ccungccaw patae nynh e ccangpyakunaw hynh a zyn hae. A chih hae paw kha a ri hae keiccuze Zahova beih leite mih chii hae kha a beih vae hae. A chih vae hae paw tuh pawpaw mah tua kho, roih kho, muih kho vae khyh hae keiccuze miming kha rilang paw thua vae khyh hae cipaw kha ningnang. Zahova tuh yn raetu nynh thua. Amepaw Pachia a thua keiccuze amaw rou nynh beih lang a ccang.—Byaphy 4:11.

19. Chiinaw kong ame lang ny paw nynh pawtemou yn bung?

¹⁹ Chiinaw kong ame te ah ny vae oh keiccuze ame leipaw ccangpyakunaw kyate ah lue vae oh. Zahova nynh malang she hingnaw bya yn kingpaw kha thaethya nawlang tuh-e amepaw bya nynh yn bung.

20. Malang e abalu kya pawkongmou ccangku lang?

²⁰ Akum hynhsepi lya, Pachia see paw Zawba nynh, ‘Ccungccaw hynh chii vae ze bua a hing thui kho ung cih tou?’ cite a la khia. (Job 14:14) A chih vae paw nynh bua a hing thui ung cih cipaw tuh a thua kho ccahccing cih tou? Baebu kya Pachia nynh yn hopya paw bya hae nynh ah lung yn tho sah. Kha-e kong kha malang e abalu kya khe bua ccangku lang.

1-3. Ah balyng te paw thawng kya mou pung ah ccaw oh, Zahova nynh pawtemou yn lue sah cih?

NA SEI keiccuze thawng na ccah cite na mihmaevaw kya ung sah ku tua. Lue kho nawlang ngaehoinaw mah kharouh ung vae khyh. Malang hanglang ngaehoinaw a ung khyh hawte pawpaw cyikhonaw mah ung vae khyh. Thuasalama ngaehoinaw ung vae khyh cite na tuaku lya khe thungnaw hoipaw lukheih nynh lue kho nawlang kae bung cih cite bya ae king pya ku! Nang pawtemou na ung cih?

² Aening balyng tuh chiinaw thawng kya pung ah ccah vae oh paw nynh thua. Pawpaw te ah zuaku oh ze mah luekhonaw ung khyh. Thuasalama Zahova tuh chiinaw kyate lue sah khonaw thungnaw ahoi. Amaw nynh hynhte bya yn king, ‘nyathyakou ro a thua cih paw raw tuh chiinaw nynh thua,’ a ci.—1 Korinhae 15:26.

³ Chiiraw ri keiccuze thinphang bungzounaw kyate luenaw ka mue vae cite na mihmaevaw kya ung sah ku tua! Thuasalama Zahova nynh chiinaw kyalya zo sah lang khyh. A chih hae paw miakaw kha bua yng tho sah thui cih hae. Tuh-e tuh na hanglang paw suilang mou a ung tuatua. Amaw nynh ‘chiinaw kyate bua yng thothui cih hae’ cite bya yn king. (Isaiah 26:19) Tuh-e tuh Baebu nynh thothuinaw cite a ci.

AH SUNGSAH OH PAW LUKHAKHEIH A CHII VAE ZE

4. (a) Ah innbyng lukhakheih tukhyhze ah sungsah paw ah bang lukhakheih a chii vae ze paw nynh mou ah lung yn dae sah kho? (b) Zisu a vaeccaw hae tuh hung hae mou?

⁴ Ah innbyng lukhakheih tukhyhze ah sungsah paw bang lukhakheih a chii vae ze ngaesang kho leilang ciate ah thinlung myarya a ccih kha zaw. Yn bung kho lang paw ung vae khyh cite ah ngae mah kou a thah cih. Kha-e paw kha bua hing thui sah cite pawpaw mah ah cyih kho khyh oh. Thuasalama Baebu nynh ngaengangnaw yn pya kho. (2 Korinhae 1:3, 4 ria.) Zahova te Zisu nynh ah sungsah oh paw lukhakheih a chih hae paw kha hohtuh temou a tho sah thui ry hae cipaw tousenaw ccangkheih dotua oh sih. Zisu laevaw ung lyaze Lazaruh te a u nung hae Maccah te Meri kalang pei a la pae bua. Tuh-e luthung hae tuh Zisu te a ccaw kuh hua hae paw nynh thua hae. Baebu nynh hynhte a ho: “Zisu nynh Maccah, a neitanung te Lazaruh kha a sungsah hae.” Ninkheih tuh Lazaruh kha a la chih.—Johan 11:3-5.

5, 6. (a) Lazaruh a innbyng hae te a vaeccaw hae mih ngae a thya lya kha Zisu so pawtemou a ung? (b) A chih paw tungvaw Zisu a ngae thyanaw nynh pawccemou lungdaenaw yn mue sah?

⁵ Zisu nynh Maccah te Meri kha lungdaenaw pyalang hae a la cceih. Zisu yng thua cipaw Maccah nynh he thae tuh, amaw te tungkulang a la cceih. Zisu he muih tuh a lung myarya a tua, thuasalama Maccah nynh, “Bawipaw, e kya nang na ung lang ze, ka rae paw a chih cih leipaw,” cite a ci. Tuhte a cize mah Zisu tuh nya phe a thya vae. Zisu nynh Maccah, Meri a raw hae paw kha a muih tuh a ngae eih thah zah arah bua. (Johan 11:21, 33, 35) Zisu nynh a ngae myarya thya hawte aening mah ah sungsah oh paw lukhakheih a chii lang ze a ngae myarya ah thah cih kha zaw?

⁶ Zisu Khrih a ngaethyanaw nynh chiinaw te a sekuhte aening kha lung yn dae sah. Zisu tuh a Paaw te myarya alokuh hae. (Johan 14:9) Zahova tuh a thungnaw te chiinaw kha zungzae a zo sah kho hawte Zisu nynh a romawze yn zo sah pah vae cih.

“LAZARUH YN TOI KUH!”

7, 8. Maccah nynh sawlungphe kha pawcce a nue sah ry khyh hae, thuasalama Zisu nynh pawtemou a cyi?

⁷ Zisu he la thua tuh Lazaruh a rua kha saw kya la uh hae zah lungphe te phe la khaw sung vae hae. Zisu nynh “lung kha nue oh” a ci pya hae. Thuasalama Maccah nynh nue sah ry khyh hae. Lazaruh tuh a chiinaw te “ninpali” a cih vae. (Johan 11:39) A raepaw Lazaruh kha Zisu nynh a tho sah thui ry cipaw Maccah nynh nyh khyh.

⁸ Zisu nynh Lazaruh kha, “Yn toi kuh” a ci! Maccah te Meri tuh mih ngae mih ang myarya a thua vae hae. “A chih paw ccungccapaw tuh yn pou zah a kuih te a ccu kha saw uh ccaw te phang vekuh.”(Johan 11:43, 44) Lazaruh tuh bua yng hing thui vae! Amaw tuh a innbyng hae ryte bua a ung kheih thui vae hae. Amaw kha phangphang pung hae zah a moi hae, bya a hoku kheih vae hae. Pawcihmou ngae-ang lang a ung! Zisu nynh Lazaruh kha bua a tho sah thui vae.

“IMOHNUNG TARAW, KAE HO PYA, ‘THO CCAH VAE!’”

9, 10. (a) Zisu kha ccungccaw hae tho sah thui kho nawlang thungnaw a pyatu tuh a hungmou? (b) A thothui hae paw kong hynh aening hanglang pawccemou aphute paw a thua?

⁹ Zisu nynh ccungccaw hae kha amaw thungnaw te tou a tho sah thui hae? Thua khyh. Zisu nynh Lazaruh a tho sah thui maw khe Zahova kalang sawsang zah Zahova nynh Lazaruh a tho sah thui kho nawlang thungnaw a pya. (Johan 11:41, 42 ria.) A thothui paw tuh Lazaruh kyalya thua khyh. Baebu nynh myarya a ccih paw kum 12 nung imohnung kong mah a ho. A paw Zairu nynh a ccanung dang sah khylang Zisu kalang bungnaw a ngia. Lukheih kyalya paw ccanung nynh thua. Zairu nynh Zisu bya a ho pya mangccia lya khe ccungccaw abang nynh yng thua hae zah, “Na ccanung kha phe chih vae! Pawcce Sazaepaw hynh vawsaw na pya ry ung?” cite a ho pya hae. Thuasalama Zisu nynh Zairu kha “Rih nang, zyn kyalya zyn, te na ccanung tuh a dang cih” a ci pya. Zisu tuh Zairu a inn kalang khe a cceih bua vae. Inn pe he a thua hae tuh Zisu nynh ccungccaw hae araw hae paw kha a muih a thae tuh Zisu nynh miming kha, ‘Rah nang oh, imohnung tuh chih khyh, a itheihpaw nynh thua’ cite a ci pya hae. Imohnung a nungpaw hae tuh Zisu a ho paw kha mih ngae mih ang phe thua. Zisu nynh Imohnung a nung te a paw kyalya ung sah hae zah tuhlae paw tuh a to lang marya a toi sah ku hae. Zisu nynh Imohnung a kuih kha kyng zah, “Imohnung taraw, kae ho pya, ‘Tho ccah vae!’” Imohnung tuh vaekheihmaw te tho zah langpi a ccia paw kha a nung te a paaw nynh he a muih hae tuh pawcihmou mih lung a paw cih cipaw kha na mihmaevaw kya ung sah ku tua! Zisu nynh mih ccanung tuh phe a tho sah thui vae. (Marka 5:22-24, 35-42; Luka 8:49-56) Kha-e nin tetuh imohnung taraw a muih takyh hae te Zisu liate Zahova thawccinaw kha pei a tuathui maming cih hae.a

¹⁰ Zisu nynh a la tho sah thui hae paw kha nyalang tuh bua a chih hae. Thuasalama kha-e hae kong rianaw liate aphu myarya te paw ngaehoinaw ah hoi kho oh. Zahova nynh ccungccaw hae kha tho sah thui ary hae hawte tho mah yng tho sah thui cih hae.

THOTHUINAW KONG KYATE HAWNAW LAW KUH

11. Phunghotu 9:5 kya-e nynh Lazaruh kong hynh ame cipaw pawtemou yn ny sah?

¹¹ Baebu nynh ‘a chih paw tuh pawpaw mah nyh vae khyh’ cite ccaeteccae lang yn ccangpya. Tuh-e tuh Lazaruh kong liate ame cipaw ah ny oh. (Phunghotu 9:5) Zisu nynh Lazaruh tuh a iitheih paw nynh thua a ci. (Johan 11:11) Lazaruh nynh saw kya a ung lya kha “pawpaw mah nyh khyh.”

12. Lazaruh a thothuinaw nynh thothuinaw solei a ung cipaw pawtemou yn ny sah?

¹² Zisu nynh Lazaruh a tho sah thui paw kha ccungccaw patae hae nynh a la muih hae. Zisu nynh ngae-angnaw lepaw pipi a la rae paw kha a raw hae nynh mah a la muih hae. Lazaruh bua a thothui paw nynh thothuinaw a ung ccahccing cipaw a lang sah. (Johan 11:47) Ccungccaw patae nynh Lazaruh a thothui paw a muihnaw hae liate Zisu tuh Pachia nynh yng sawpaw ccahccing nynh thua cipaw a zyn hae. Zisu a raw hae nynh tuh ry khyh hae, tukeiccuze Zisu te Lazaruh kha chia lang a paccyngku vae hae.—Johan 11:53; 12:9-11.

13. Zahova nynh a chih hae paw kha bua yng tho sah thui cih hae cipaw pawccemou ah zyn kho oh?

¹³ Zisu nynh ‘ka syntaw hae paw miakaw kha Saw kyate’ ka tho sah thui cih hae a ci. (Johan 5:28, NW) Asuilang tuh Zahova nynh a syntaw hae paw rou nynh yng thothui cih hae. Zahova nynh a tho sah thui rypaw tuh atyngre marya a syntaw kou. A syntaw kho ccahccing cih tou? A thua, vawlaepi kya riatae lei awsi hae a ung hae. Baebu kya Zahova nynh awsi hae kha mih balyng mih min te pung a ko hae a ci. (Isaiah 40:26 ria.) Awsi hae kha mih min te pung a syntaw kou lang hae a thua ze a chih hae paw miakaw mah zoi ba heih te thothui lang marya a syntaw kho cih hae. Tupiaze, Zahova tuh atyngre raetu nynh thua, tukeiccuze a thungnaw liate ccungccaw hae kha bua yng tho sah thui vae cih hae.

14, 15. Zawbah a bya nynh thothuinaw kong pawmou yn ny sah?

¹⁴ Zyn tyng paw Zawbah nynh thothuinaw a ung cite a zyn. Amaw nynh, ‘Ccungccaw hynh chii vae ze, bua a hing thui kho ung cih tou?’ cite a khia. Amaw nynh Zahova kha, ‘Yng ko lah, kae awi cih. Na kuih te na rae hae paw kya thawccinaw na hoi,’ cite a ci. A thua, Zawbah nynh Zahova tuh a chih hae paw kha malangze yng tho sah thui cih hae cipaw kha a la ny.—Job 14:13-15.

¹⁵ Thothui lang ngaehoinaw nynh nang kha pawtemou ae ung sah? Na ngae na ang a thua cih zah hynhte mah na tua kho, Ka innbyng, ka bang hungmou a chih paw ung, miming so yng thothui bua cih hae ve ma? Zahova nynh a chih hae paw kha bua tho sah thui a ry hae cipaw nynaw nynh aening kha lung yn dae sah. Baebu nynh a ho paw hynh a hung hae mou yng thothui cih hae zah pawkyatemou yng thothui cih hae cipaw kha do tua oh sih.

“AMAW ROI KHA YNG THAE HAE TUH YNG THOTHUI CIH HAE”

16. Yng thothui cih hae paw nynh laephivaw lang pawcihhawpaw hingnaw temou a hing vae cih hae?

¹⁶ Langmawlya, a la thothui hae paw kha e laevaw hing mih innbyng hae ryte bua la ung kheih hae. Malang she mah tuhawte nynh yng cyih kuh cih. Thuasalama tuh-e lae houh yng hoyhua vae cih. Pawccemou? Pawccecize yng thothui cih hae paw tuh zungzae a hing vae cih hae zah chii mah chih boi vae lang khyh hae. Atunin hawte laephi pyngpi kya hinglang zah khua sa lang vae. Rawtukunaw, ziaku buakunaw te cciihawnaw ung vae lang khyh.

17. A hung hae mou yng thothui cih hae?

¹⁷ A hung hae mou yng thothui cih hae? Zisu nynh, “saw kya a ung hae paw balyng nynh amaw roi kha oun thae cih hae zah, oun pou cih hae paw accyh tuh yng thua cih,” a ci. (Johan 5:28, 29, BI) Te Byaphy 20:13 nynh, “Te rili nynh a kya ung paw a chih hae paw kha a pou khae, te Chiinaw te Michii khua nynh mih kya ung paw a chih hae paw kha a pou khae hae,” cite a ci. A thua, riataelei ccungccaw hae tuh bua yng hing thui vae cih hae. Zuitu Paul nynh mah, “te adingpaw te ading leipaw paryh chiinaw kyate a thothui cih hae,” a ci. (Locceihtu‛ae 24:15 ria, BI) Tuh-e tuh paw suilangmou?

18. “Ading hae paw” tuh a hung hae mou, hung hae mou yng thothui cih hae?

¹⁸ “Ading hae paw” lungkhuze Zisu laevaw lang yng rungmaw la hing hae paw zyntyng paw Zahova see hae mah a pa bua hae. Tuh-e hae kya ze Noah, Abraham, Sarah, Mawsi, Ruth te Esther hae mah laephivaw hing lang yng thothui cih hae. Zahova kya zyntyng hae paw nopi pise hae kong kha Hebruhae alepaw 11 kya na ria kho. Aening she kyaze zyntyng te a chih hae paw so? Miming mah “a ding hae paw” a thua bua hae keiccuze yng thothui bua cih hae.

19. “Ading lei hae paw” tuh hung hae mou? Miming kha Zahova nynh pawmou a pya cih hae?

¹⁹ “Ading lei hae paw” tuh Zahova kong a nyh boi loh lei hae paw kha nynh a thua. A chii vae hae ze mah Zahova nynh miming kha ning khyh hae. Zahova nynh yng tho sah thui cih hae zah amaw kong ccangkunaw te a rya law kho naw kha a mue sah ung cih hae.

20. Pawccemou michii miakaw a thothui lang khyh hae?

²⁰ E hynh a chih hae paw miakaw yng thothui cih hae cinawpaw thua tou? Thua khyh. Zisu nynh abang tuh thothui vae lang khyh hae cite a ho. (Luka 12:5) Ccungccaw lukhakheih kha a thothui cih, thothui lang khyh cipaw a hung nynh mou bya a pae cih? Zahova tuh alehua paw bapiatu nynh thua. Thuasalama Zahova nynh Zisu kha “a chihpaw te a hingpaw bapiatu” lang kaw a pya. (Zuituhae 10:42) Hunghung ze mah ngaesikunaw thinlung a hoilei hae paw miakaw tuh thothui vae lang khyh hae.—Piachihpaw 19 kya do.

VAWLANG A THOTHUI CIH HAE PAW

21, 22. (a) Vawlang thothuinaw cipaw asuilang tuh pawmou? (b) Muihsaw pyng te masaty a thothui ty paw tuh a hungmou?

²¹ Baebu nynh ccungccaw abang tuh vawlangkhua a kae cih hae a ci. Vawlang kae lang a thothui cih hae paw tuh chisaw pyng te thothui lang khyh hae. Muihsaw pyng te nynh a thothui cih hae.

²² Zisu tuh muihsaw pyng te masaty a la thothui ty paw nynh thua. (Johan 3:13) Zisu tuh a chianaw hae te ninthungnaw khe Zahova nynh a tho sah thui vae. (Sam 16:10; Zuituhae 13:34, 35) Zisu tuh chisaw pyng te thothui khyh. Zuitu Piter nynh Zisu tuh “pyngsaw kya chia athua zemah muisaw liate hingsah athua” cite a ccae sah. (1 Piter 3:18) Zisu tuh myarya thungpaw muihsaw pyng te nynh a thothui. (1 Korinhae 15:3-6) Thuasalama Baebu nynh muihsaw pyng te a thothui paw tuh a mah khae kyalya thualang khyh a ci.

23, 24. Zisu nynh a hopaw “Tuuphu taraw” tuh hung hae mou, luhozeihmou a cih hae?

²³ Zisu nynh a chii maw khe zyntyng hae paw a zuitu hae kha, “Nangning hanglang ungnaw paccyng khylang ka lah cceih ci,” cite a ho pya hae. (Johan 14:2) Tuh-e tuh amaw ryte vawlang uhnaw kaw ahoi cih hae paw a zuitu hae a ho pya hae paw nynh thua. Hozeihmou a cih cih hae? Zisu nynh miming kha “tuuphu taraw” cite a ko hae. (Luka 12:32) Zuitu Zawhan nynh, “Tuinte ka doza Zion Mua [vawlangkhua] kya Tuutaraw a thadyngpaw ka muih; mih terui kya amin te a Paw min a zeikuhpaw ccungccaw 144,000 amaw ryte ah ung hae,” cite ccaeteccae lang a ho.—Byaphy 14:1.

²⁴ 144,000 Khrihccaw hae tuh hotuhmou a thothui cih hae? Baebu nynh Zisu vawlang uhnaw kaw a mue koute nynh a thothui cih hae a ci. (1 Korinhae 15:23) Zisu nynh vawlang tuh atu a uh vae, 144,000 hae mah a lunghua tuh thothui hae zah vawlang a kae vae hae. Miming tuh atunin ccyh kya hing hae sah lah ze ma a chih hae tuh vawlang palou a kae vae cih hae. Thuasalama cungccaw a lunghua tuh malang she laephivaw Paradais kya nynh yng thothui cih hae.

25. Malang a balu kya paw kong mou ccangku lang?

²⁵ Zahova nynh ccungccaw balyng hanglang chiinaw kha zungzae yn ro pya lang paw ccyh myarya a nae vae! (Isaiah 25:8 ria.) Thuasalama vawlang kae hae paw tuh pawmou a cyih cih hae? Baebu nynh Pachia accozah kya Zisu ryte uhnaw kaw ahoi cih hae cite yn ccae sah pya. Tuh-e accozah kong kha malang-e abalu kya bua ccangku lang.