• Pachia Peenaw Cipaw Tuh Pawmou?
    Lungpaw Te Zungzae Hing!—Baebu Ccangpyanaw Nysahnaw
    • Ccangkunaw 31. Zahova fuhang malang e vaawlang Siapharang Zisu Khrih.

      CCANGKUNAW 31

      Pachia Peenaw Cipaw Tuh Pawmou?

      Baebu kya-e abapipaw akong tuh Pachia Peenaw nynh thua. Zahova nynh laephi te asekuhpaw masaty eenaw kha Peenaw liate yn ccingsah cih. Peenaw cipaw tuh pawmou? Peenaw nynh a uh cciamang cipaw pawtemou ny kho lang? Peenaw nynh pawhaemou yn cyipya vae? Malang so pawhaemou yn cyipah cih? E bakhianaw hae kha e ccangkunaw te malang ccangkunaw ccangning nynh aphi yn pya cih.

      1. Pachia Peenaw cipaw tuh pawmou, Siapharang tuh a hungmou?

      Peenaw cipaw tuh Zahova Pachia nynh a thahdynsah paw accozah nynh thua. Siapharang Zisu Khrih nynh vaawlang kyate a uh cih. (Matthai 4:17; Johan 18:36) Baebu nynh Zisu te asekuhte hynhte a ci: “Aning nynh zungzae . . . a uk cih.” (Luka 1:32, 33) Pachia Peenaw Siapharang Zisu nynh laephi pyngpi kha yn uh vae cih.

      2. Zisu ryte a hunghaemou a uh kheih cih hae?

      Zisu nynh a makhae kyalya uh lang khyh. ‘Phin miakaw, bya miakaw, minphuin miakaw te ram miakaw kya-e ccungccaw hae nynh siapharan lang te laephi hynh a uk cih hae.’ (Byaphy 5:9, 10) Khrih te luhhohzeih mou a uh kheih cih hae? Zisu laephi vaw yn thua ccyh kyate zuitu lang yn tang hae paw ccang patae a ung hae. Thuasalama, minming lungkhu e 144,000 kyalya nynh vaawlang kae cih hae zah Zisu ryte a uh kheih cih hae. (Byaphy 14:1-4 kha ria.) Laephi vaw e ccangpaw Khrihccaw miakaw tuh Peenaw ccungccaw hae lang a thua vae cih hae.​—Sam 37:29.

      3. Pachia Peenaw tuh ccungcaw accozah lae pawtemou ahoyhua?

      Ccungccaw accozah uhtu hae nynh ahoypaw cyi lang a zuakuh hae zemah a cyi ry hae hawte cyikhonaw thungnaw hoi khyh hae. Mihmaw koute uhtu lang a tang hae paw nynh tuh mihmaw hoynaw elang kele tuakuh hae zah ccungccaw hae kha bung ry lang khyh hae. Thuasalama, Pachia Peenaw Uhtu Zisu kha tuh a hungnynhmah a uhnaw kha roh kho lang khyh hae. Pachia nynh “papin aroh kho leipaw peenaw ccangkheit kha a rae” vae. (Daniel 2:44) Zisu nynh laephi pyngpi kha a uh cih zah laesanaw hoi lang khyh. Sungsakunaw, ngaethyaungsakunaw te dingnaw a hoipaw Zisu nynh ccungccaw hae lukheit te lukheit a ccuepekuh thya nawlang hae a ccangpya cih hae.​—Isaiah 11:9 kha ria.

      HOUH CCANGKUH LANG HOUH MUIH LANG

      Pachia Peenaw tuh ccungccaw accohzah miakaw laeze pawcce ahoyhua cipaw tuatua.

      Vaawlang bawi haungnaw kyate laephi a uh cciamang paw Zisu Khrih. Amaw ryte uhkheihtu hae tuh a nuhlang a haung hae. Mihmaw nuhlang kya phaephae awpaw Zahova.

      4. Pachia Peenaw nynh laephi pyngpi a uh cih

      Zisu Khrih tuh ccungccaw uhtu miakaw hae laeze thungnaw a hoihua. Matthai 28:18 kha ria tuhkoute e bakhianaw kha hokuh oh:

      • Zisu kawhoinaw tuh ccungccaw uhtu hae laeze pawcce ahoyhua?

      Ccungccaw accohzah tuh vaeleih vaeleih rulaekuh thya zah uhtu lukheit cci nynh laephivaw e maw ungnaw kya kele nynh a uh kho hae. Pachia Peenaw so? Daniel 7:14 kha ria tuhkoute e bakhianaw hae kha hokuh oh:

      • Pachia Peenaw tuh “roh lang khyh” keiccuze pawtemou a thane?

      • Pachia Peenaw nynh laephi pyngpi a uh cih cipaw tuh pawcce ahoy?

      5. Ccungccaw uhnaw tuh roh a thua cih

      Pachia Peenaw nynh ccungccaw accohzah hae kha pawcce a roh cih? VIDEO kha pia, tuhkoute akaw lang-e bakhianaw kha hokuh oh.

      VIDEO: Pachia Peenaw Tuh Pawmou?​—Lawnawpaw (1:41)

      • Ccungccaw uhnaw keiccuze pawhaemou ah tung oh?

      Phunghotu 8:9 kha ria tuhkoute e bakhianaw hae kha hokuh oh:

      • Pachia Peenaw nynh ccungccaw accohzah hae kha ro lang accang cite na tua tou? Pawccemou?

      6. Pachia Peenaw kya yn thaepathya hae paw uhtu hae a ung

      Siapharang Zisu tuh ccungccaw lukheit lang a la hing boi keiccuze ‘aening thawzyanaw kya thaw a ccihthya.’ (Hebru 4:​15) Zahova nynh Zisu ryte a uh cih hae paw zyntyn hae paw pise te nupi 144,000 kha mah ‘phin miakaw, bya miakaw, minphuin miakaw te ram miakaw kyate’ a po hae.​—Byaphy 5:9.

      • Zisu te uhkheihtu hae tuh ccungccaw hae kha a thaepathya hae cipaw ny keiccuze na lung ngaengan tou? Pawccemou?

      A ccyh te ungtuzia a lokuh lei hae paw kyate po a thua hae paw pise te nopi hae.

      Zahova nynh Zisu ryte uh kheih lang ungtuzia a lokuh lei hae paw pise te nopi hae kha a po hae

      7. Pachia Peenaw kya ahoy huapaw upadi hae a ung

      Accohzah nynh a ccungccaw hae hanglang thanenaw ungpaw te a thungkhaw cih hae paw upadi hae kha a rae hae. Pachia Peenaw kya mah ccungccaw hae nynh a zui lang hae paw upadi hae a ung. 1 Korin 6:9-11 kha ria tuhkoute e bakhianaw hae kha hokuh oh:

      • Pachia kawbya upadi hae kha ccungccaw miakaw nynh zui langze laephi tuh pawtemou ung cih cite mou na tua?a

      • E upadi hae kha zui lang Zahova nynh ngianaw kaw a hoi cite na tua tou? Pawcce?

      • E upadi hae a zui lei hae paw mah a rulaeku kho hae cipaw pawtemou ny lang?​—Adihpaw 11 kha do tua.

      Ccungccaw lungnaw langpi tungkunaw kya mawtaw hae a thadynsah cciamang paw palih paw. Mih kong a lokuh lei hae paw ccungccaw hae nynh langpi kya a cceih hae.

      Accohzah nynh a ccungccaw hae hanglang thanenaw ungpaw te a thungkhaw cih hae paw upadi hae kha a rae hae. Pachia Peenaw kya mah ccungccaw hae nynh a zui lang hae paw ahoy huapaw upadi hae a ung

      CCUNGCCAW LUKHEIT NYNH KHIAPAW: “Pachia Peenaw cipaw tuh pawmou?”

      • Pawtemou na phi cih?

      ADYNGNAWTE

      Pachia Peenaw cipaw tuh laephi pyngpi balyn kha a uh cipaw a ung ccaccing paw vaawlang accohzah nynh thua.

      Bua Liathuinaw

      • Pachia Peenaw kya-e uhtu hae tuh a hunghaemou?

      • Pachia Peenaw tuh ccungccaw accohzah hae laeze pawtemou ahoyhua?

      • Zahova nynh Pachia Peenaw kya-e ccungccaw hae kyate pawmou a ngaehoi?

      Eenaw

      HOUH CCUNGCHIH

      Pachia Peenaw thadynsahnaw hmuin kong Zisu ccangpyanaw kha tuatua.

      “Pachia Peenaw Tuh Thinlung Kya A Ungpaw Tou?” (Website ccaw)

      Zahova Ccaeccei hae tuh ccungccaw uhnaw laeze Pachia Peenaw tungvaw pawcce zyn a tyn hae?

      Pachia Peenaw Hanglang Pyakuh (1:43)

      Zisu ryte uh kheih lang Zahova nynh a po hae paw 144,000 kong Baebu nynh a hopaw kha ria tua.

      “A Hunghaemou Vaawlang A Kae Cih Hae?” (Website ccaw)

      Laephivaw kya dingnaw ung lang Pachia kyalya nynh a cyih kho cipaw kha thong a ccahpaw nopinung nynh yn nynaw kong kha ria tua.

      “Dingleinaw Hanglang Aphi Ka La Muenaw Zia” (Thaekuh!, November 2011)

      a Pachia kawbya upadi abang kong Phianaw 3 kya hokuh lang.

  • Pachia Peenaw Nynh A Uh Vae!
    Lungpaw Te Zungzae Hing!—Baebu Ccangpyanaw Nysahnaw
    • Ccangkunaw 32. Hoitang ccynkute laephi a uhpaw vaawlang Siapharang Zisu Khrih.

      CCANGKUNAW 32

      Pachia Peenaw Nynh A Uh Vae!

      1914 kum kyate tho zah vaawlang kya Pachia Peenaw tuh a uh cciamang vae. Tuh-e tuh ccungccaw uhnaw a thang nawlang a thonaw mah a thua. Pawtemou ah ny oh? Baebu hotypaw bya laelang 1914 kum kyate tho zah laephi ungtuzia te ccungccaw hae ozia a rulaekunaw kha tuatua.

      1. Baebu nynh pawhaemou a hoty?

      Daniel Baebu ccaw nynh “kum sari” a thangnaw kya Pachia Peenaw uhnaw tho a thua cih cite a ci. (Daniel 4:16, 17) Kum shepi aro koute Zisu nynh “zenta hae ccyh” a cihkupaw tuh-e a ccyh thang la khyh a ci. (Luka 21:24) 1914 kya kumsari ccyh a thang cipaw kha ccangkuh lang.

      2. 1914 te tho zah laephi ungtuzia te ccungccaw hae ozia tuh pawtemou a ung?

      Zisu kha a zuitu hae nynh hynhte a khia hae: “Na thuanaw lanpaw te laephi she athangnaw lanpaw hynh muihsahnaw pawmou yn langkuh cih?” (Matthai 24:3) Zisu aphi kya, Pachia Peenaw Siapharang lang vaawlang kya uhnaw a tho koute a cyihkuh lang hae paw kong hotypaw bya hae a ung. Tuh-e hae lungkhu abang tuh rawtuhkunaw, ccakan ccinaw te innry suekunaw hae nynh a thua. (Matthai 24:7 kha ria.) “Nyathya nin” ccyh e ccungccaw hae ozia keiccuze hingnaw tuh ‘myarya a ruu’ cih cite mah Baebu nynh a hoty. (2 Timote 3:1-5) 1914 kyate tho zah e ungtuzia hae te e ozia hae kha muih lang a ung vae.

      3. Pachia Peenaw uhnaw ccyh kyate tho zah laephi ungtuzia hae tuh pawcce houh ahoy khyh?

      Zisu nynh Pachia Peenaw Siapharang lang a tang koute, vaawlang kya Setan te muihsaw hoylei hae paw kha raw a tuh hae. Rawtuhkunaw kya Setan tuh a sung. Baebu nynh “laephi kalan vua a thua, amaw ryte a vaawccungccaw hae tuh vua a thua hae” cite a ci. (Byaphy 12:9, 12) Setan tuh roh ka thua cih cipaw a nykuh keiccuze a thin myarya a ria. Amaw nynh lungria thaenaw hae te riathae vawsawnaw hae a ungsah. Tuhkeiccuze nynh laephi ungtuzia hae tuh ahoy khyh paw nynh a thua! Pachia Peenaw nynh e piahccahnaa miakaw hynh yng phishing vae cih.

      HOUH CCANGKUH LANG HOUH MUIH LANG

      1914 kya Pachia Peenaw uhnaw a thonaw kong nykhonaw te aening te asekunaw kong kha khinkhia tua.

      4. Baebu hotypaw nynh 1914 kha a langsah

      VIDEO kha pia.

      VIDEO: 1914 Kya Pachia Peenaw Uhnaw A Tho (5:02)

      Pachia nynh langmaw Babilon Siapharang Nebukhadnezzar kha malang yn cyihkuh cih hae paw kong maan a sasah. Maan te Daniel nynh a hopaw maan asuilang tuh Nebukhadnezzar uhnaw te Pachia Peenaw uhnaw temah asekuh.​—Daniel 4:17 kha ria.a

      Daniel 4:20-26 kha ria tuhkoute sahkhung kha do lah akaw lang-e bakhianaw hae kha phi tua:

      • (A) Nebukhadnezzar nynh a maan kya pawmou a muih?​—Adihpaw 20 te 21 kha do tua.

      • (B) Thingku tuh pawmou a cyihkuh cih?​—Adihpaw 23 kha do tua.

      • (C) “Kumsari ccyh” athangnaw kya pawmou a cyihkuh cih?​—Adihpaw 26 kha do tua.

      Thingku Maan Te Pachia Peenaw Asekunaw

      HOTYPAW BYA (Daniel 4:20-36)

      Uhnaw

      (A) A lepipaw thingku

      Myarya a hangpaw thingku.

      Uhnaw athang

      (B) “Thingku nge” koute “kumsari ccyh” a thang

      Sivaw te sohin a reihkupaw ccunglamuin.

      Uhnaw bua uhthui

      (C) “Peenaw bua na uh thui cih”

      Myarya a hangpaw thingku.

      Hotypaw bya masaty accingnaw . . .

      • (D) Thingku tuh a hungmou a ho ry?​—Adihpaw 22 kha do tua.

      • (E) A uhnaw pawtemou la thang?​—Daniel 4:29-33 kha ria.

      • (F) “Kumsari ccyh” a thangnaw kya Nebukhadnezzar tuh pawmou a cyihkuh?​—Daniel 4:34-36 kha ria.

      MASATY ACCINGNAW

      Uhnaw

      (D) Babilon Siapharang Nebukhadnezzar

      Tangsakute a thadyn cciamang paw Siapharang Nebukhadnezzar.

      Uhnaw athang

      (E) B.C.E  606 koute Nebukhadnezzar tuh ngae zah a uhnaw kumsari he thang

      Laephi kya bakhung zah ramsaw hawte lonua a ae cciamang paw Nebukhadnezzar.

      Uhnaw bua uhthui

      (F) Nebukhadnezzar bua hawthui zah bua a uhthui

      A kuih voining hang zah vaawlang dothung cciamang paw Siapharang Nebukhadnezzar.

      Hotypaw bya vaeningnaw accingnaw . . .

      • (G) Thingku tuh a hungmou a ho ry?​—1 Sherianaw 29:23 kha ria.

      • (H) Ccungccaw uhnaw pawtemou a la thang? Zisu laevaw ung lya siapharang uhnaw a thang cciamang ung cipaw pawtemou ah ny oh?​—Luka 21:24 kha ria.

      • (I) Paw ccyh te pawkyamou uhnaw tuh bua tho a thua?

      VAENINGNAW ACCINGNAW

      Uhnaw

      (G) Pachia uhnaw hangpaw Israel siapharang hae

      Bawi haungnaw kya a haung cciamang hae paw Israel siapharang phin hae. A aw hae paw nynh mih tungvaw kya a ah hae paw.

      Uhnaw athang

      (H) Jerusalem ro a thua, Israel siapharang hae kum 2,520 a thang

      B.C.E 607 kya mae a upaw langmaw Jerusalem khua. Tuhkoute kum 2,520 a ro.

      Uhnaw bua uhthui

      (I) Pachia Peenaw Siapharang lang vaawlang kya Zisu uhnaw a tho

      C.E 1914 kyate tho zah Zisu tuh vaawlang bawi haungnaw kyate laephi kha a uh vae. Amaw kyate phaephae a ah.

      Kumsari ccyh houh semou a ro?

      Baebu ccaw abang nynh ccangpaw Baebu ccaw hae kha thaethya nawlang yn bung. Tousenawze, Byaphy Baebu ccaw kya kumthungkhoi tuh nin 1,260 te a ngankuh a ci. (Byaphy 12:6, 14) Kumsari ccyh tuh nin 1,260 lehning, tuhkhyhze nin 2,520 te nynh a nganku. Ninkheit kha kumkheit cite mangpaw mah a ung. (Ezekiel 4:6) Tuhkei­ccuze Daniel Baebu kya-e kumsari tuh​—kum 2,520 te nynh a nganku.

      5. 1914 kum kyate laephi tuh a rulaekuh vae

      VIDEO kha pia.

      VIDEO: 1914 Kyate Laephi Tuh A Rulaekuh Vae (1:10)

      Zisu Siapharang lang a tang koute laephi ungtuzia hae a rulaekuh cih cite a hoty. Luka 21:9-11 kha ria tuhkoute e bakhianaw kha hokuh oh:

      • E Baebu kya-e pawhaemou muih lang, thae lang a ung?

      Zuitu Paul nynh nyathya nin kya muih langpaw ccungccaw hae ungtuzia kha a la ho. 2 Timote 3:1-5 kha ria tuhkoute e bakhianaw kha hokuh oh:

      • Atu she kya-e ccungccaw hae kya paw ozia hae mou na muih?

      Collage: Nyathya nin kya laephi ungtu zia hae te ccungccaw hae ozia hae kha a langsapaw muihsanaw hae. 1. State kya a kuih voining hangte a sia cciamang paw rawbawi paw. 2. Innry a suekuh koute a rohpaw inn hae. 3. Rawkaw vaawzou hae. 4. Mask bungkuhte a tolang a cceih hae paw ccungccaw hae. 5. Mih hoylei hae paw nynh a tuh kou hae te mae ka rae upaw New York khua e Tower inn ning. 6. Ruinaw ihsei a mangpaw pisepaw. 7. Avawpaw nynh a kuih lung zah azu kha a sianua. 8. Ruinaw ihsei hae te a rah aphuinphuin. 9. Fashion uccaw hae te sui nguin nawkuh hae zah selfie khung kuh hae paw nopi hae luning. 10. Lawsanaw kya ccungccaw hae a cciakhae hae paw disc jockey paw. 11. Asoikupaw nynh Molotov cocktail kha a vua.

      6. Pachia Peenaw a uh vae cipaw zynnaw kha langsah

      Matthai 24:3, 14 kha ria tuhkoute e bakhianaw hae kha hokuh oh:

      • Paw azicipaw ryalaw nynhmou Pachia Peenaw a uh vae cipaw kha a langsah?

      • E ryalaw kya pawtemou na pabua kho?

      Pachia Peenaw tuh a uh vae, aromawze laephi kha yn uh vae cih. Hebru 10:24, 25 kha ria tuhkoute e bakhianaw kha hokuh oh:

      • “Ninsaw tuh houhouh yn naekuh vae cipaw kha na muih oh” keiccuze pawmou cyi lang a ccang?

      Collage: 1. Zahova Ccaeccei hae pungkunaw kya a pungkuh bua paw Baebu a ccangkupaw lukheit. 2. Tuh-e Baebu a ccangkuh nung nynh a nyh kuh hae nung kha phung a ho pya.

      Minccang paw hae hanglang thanenaw ungpaw, khungnaw a pya kho hae paw kong hae kha na ny ze pawmou na cyih cih?

      CCUNGCCAW LUKHEIT NYNH KHIAPAW: “Zahova Ccaeccei hae nynh 1914 kong pawcce hynhcih balang a ho hae?”

      • Pawtemou na phi cih?

      ADYNGNAWTE

      Baebu hotypaw bya te laephi ungtuzia hae nynh Pachia Peenaw a uh vae cipaw yn nysah. Tuh-e kha ka zyn cipaw phunghonaw te pungkunaw liate ah langsah oh.

      Bua Liathuinaw

      • Daniel Baebu kya a hotypaw kumsari a thangnaw kya pawmou a la cyihkuh?

      • 1914 kya Pachia Peenaw uhnaw a tho vae cipaw pawcce leh na khang?

      • Pachia Peenaw a uh vae cipaw zynnaw kha pawtemou langsah kho lang?

      Eenaw

      HOUH CCUNGCHIH

      1914 kyate laephi a rulaekunaw kong ccungccaw phungpaw kong a thya hae paw te minccang paw hae nynh a ho hae paw kha tuatua.

      “Ziazae Ronaw A Lunghua Ccyh” (Thaekuh!, April 2007)

      Matthai 24:14 kya-e hotypaw bya nynh ccungccaw lukheit kha a rulaesakunaw kong kha ria tua.

      “Baseball Kha Pawpaw Laeze Ka Ryhua!” (Rawvianaw No. 3 2017)

      Daniel alepaw 4 kya-e hotypaw bya tuh Pachia Peenaw te asekuh cipaw pawtemou ah ho kho oh?

      “Pachia Peenaw Uhnaw Paw Ccyh Kyamou A Tho? (Phianaw 1)” (Rawvianaw, October 1, 2014)

      Daniel alepaw 4 kya-e “kumsari ccyh” tuh 1914 kya a thang cipaw pawtemou ah ny kho oh?

      “Pachia Peenaw Uhnaw Paw Ccyh Kyamou A Tho? (Phianaw 2)” (Rawvianaw, November 1, 2014)

      a E ccangkunaw e Houh Ccungchih cihkupaw kya-e nyathya ccaw ccangnin kha do tua.

  • Pachia Peenaw Nynh Pawmou Yn Cyipya Cih
    Lungpaw Te Zungzae Hing!—Baebu Ccangpyanaw Nysahnaw
    • Ccangkunaw 33. Laephi paradise kya a ung hae paw ccungccaw hae.

      CCANGKUNAW 33

      Pachia Peenaw Nynh Pawmou Yn Cyipya Cih

      Pachia Peenaw tuh a uh vae. Aromaw laephivaw kya alepaw rulaekunaw hae yn cyih vae cih. Pachia Peenaw uhnaw kya muelangpaw hythuanaw abang kong tuatua oh si.

      1. Pachia Peenaw nynh laephivaw kya daenaw te dingnaw pawtemou yn ungsah cih?

      Pachia Peenaw Siapharang Zisu nynh mih hoylei hae paw, accohzah hae kha Armageddon raw kya yn roh vae cih hae. (Byaphy 16:14, 16) Tuh-e ccyh kya, “sosoh kyakhe, ccungccaw hoylei hae paw tuh um vae lan khyh hae” a cihkupaw Baebu byaking tuh yn ccing vae cih. (Sam 37:10) Zisu nynh Peenaw liate laephi pyngpi kya daenaw te dingnaw yn ungsah vae cih.​—Isaiah 11:4 kha ria.

      2. Laephivaw Pachia rynaw yn ccing ccyh kya pawtecihpaw hingnaw mou mue lang?

      Pachia Peenaw uhkunaw kaw kya, “miding hae nynh ram kha rho lang a ccou cih hae zah, tuin kya zungzae a um cih hae.” (Sam 37:29) Ading hae paw, Zahova kha a sungsah hae paw te lukheit te lukheit a sungsah kuh hae paw kele a ungpaw laephi kha na mihmae kya ungsah kuh tua! A ccihpaw ung vae lang khyh zah ccungccaw miakaw tuh zungzae a hing vae cih hae.

      3. Mih hoylei hae paw a roh koute Pachia Peenaw nynh pawmou a cyih cih?

      Mih hoylei hae paw kha a roh koute, Zisu tuh Siapharang lang kum 1,000 a uh cih. Tuh-e ccyh lungkhu, Zisu te a uh kheih cih hae paw 144,000 hae nynh laephivaw e ccungccaw hae kha a sei lei hae paw, a ccing hae paw lang thua lang a bung cih hae. Kum thungkheit a thangte laephi tuh myarya puithyapaw Paradise lang a tang cih zah, ccungccaw miakaw tuh Zahova kawbya hae kha a ngae hae keiccuze mih lung myarya a paw vae cih. Zisu nynh Peenaw kha a Paaw Pachia, Zahova kalang bua a pya cih. Tuh-e ccyh kya Zahova “min thyaa tuh sawtua” a thua vae cih. (Matthai 6:9, 10) Zahova rou nynh a kaw a ngae hae paw ccungccaw hae kha myarya pekipaw uhtu hoypaw nynh thua cipaw kha a langsah vae cih. Tuhkoute Zahova nynh Setan, muihsaw hoylei hae paw te a uhnaw a rawsetu hae kha mah a roh vae cih hae. (Byaphy 20:7-10) Pachia Peenaw nynh yn cyipya cih paw e hythuanaw hae kha zungzae mue lang vae.

      HOUH CCANGKUH LANG HOUH MUIH LANG

      Pachia nynh malang te asekupaw Baebu byaking miakaw kha Peenaw liate a ccingsah cih cite pawcce zyn kho a thua cipaw kha tuatua.

      4. Pachia Peenaw nynh ccungccaw accozah hae kha a thangsah cih

      “Ccungccaw uhnaw nynh vawsawnaw hae a ungsah.” (Phunghotu 8:9, NW) Zahova nynh a Peenaw liate e dingleinaw kha yn thangsah vae cih.

      Daniel 2:44 te 2 Thesalon 1:6-8 kha ria tuhkoute e bakhianaw hae kha hokuh oh:

      • Zahova te accapaw Zisu nynh ccungccaw accozah hae te a thohkhangtu hae kha pawmou a cyih cih hae?

      • Na ccangkuh kou vae hawte Zahova te Zisu cyisanaw tuh ding zah ame cih cipaw pawtemou na zyn kho?

      Laephi paradise kha a uh cciamang paw vaawlang Siapharang Zisu.

      5. Zisu tuh ahoy huapaw Siapharang nynh thua

      Pachia Peenaw Siapharang Zisu nynh laephivaw e ccungccaw hae thanenaw hanglang patae a cyih cih. Zisu nynh ccungccaw hae bung rynaw thinlung a hoi cipaw te bungkhonaw thungnaw kha Pachia nynh a pya cipaw a langsanaw kong ny nawlang, VIDEO kha pia.

      VIDEO: Peenaw Nynh A Cyih Cih Hae Paw Kha Zisu Nynh A Langsah (1:13)

      Zisu laevaw ung lya, la cyi hae paw nynh Pachia Peenaw nynh a cyih cih hae paw kha a langsah. E hythuanaw hae lungkhu e pawkhamou na ry hua? E hythuanaw hae kong houh ny nawlang abekupaw Baebu ccaw hae kha ria.

      ZISU NYNH LAEVAW UNGLYA . . .

      ZISU NYNH VAAWLANG KYATE A CYIH CIH PAW . . .

      • khise tuileih hae kha a la uh.—Marka 4:36-41.

      • laephivaw e a ungpaw a rohpaw miakaw kha a hoysah vae cih.—Isaiah 35:1, 2.

      • ccungccaw a thung kha ngaeangnaw te la dang hae.—Matthai 14:17-21.

      • laephivaw kya ccakancci cipaw ungsah vae lang khyh.—Sam 72:16.

      • ngeccih hae kha la dangsah hae.—Luka 18:35-43.

      • ccungccaw miakaw accingpaw ngedangnaw mue lang a bung cih hae.—Isaiah 33:24.

      • mihchii kha bua la hingsah thui.—Luka 8:49-55.

      • mihchii hae kha bua a thosah thui cih hae zah chiinaw ungsah vae lang khyh.—Byaphy 21:3, 4.

      6. Pachia Peenaw nynh myarya hoypaw malang she a ungsah cih

      Peenaw nynh ccungccaw hae hanglang Zahova masaty a eenaw kha a ccingsah cih. Myarya puithyapaw laephi paradise kya zungzae a ung vae cih hae. Zahova nynh a eenaw accing nawlang a ccapaw Zisu kha mangte a cyinaw kong kha ny nawlang, VIDEO kha pia.

      VIDEO: Myarya Hoypaw Malang She Muihsanaw (4:38)

      Sam 145:16 kha ria tuhkoute e bakhianaw kha hokuh oh:

      • Zahova nynh “ahiinpaw ahysuepaw miakaw rynaw kha a ccingsahpya hae” cipaw na nyh zah pawtemou na ung?

      CCUNGCCAW ABANG NYNH HO HAE PAW: “Pyngkheih lang phishing kheih langze laephi piahccahnaa hae tuh ahoy kho.”

      • Pachia Peenaw nynh ccungccaw accohzah hae a cyi kho lei hae paw paw piahccahnaa hae mou a phishing cih?

      ADYNGNAWTE

      Peenaw nynh Pachia rynaw a ccingsah cih zah laephi pyngpi kha paradise lang a tangsah vae cih. Ccungccaw miakaw nynh Zahova kha zungzae a beih vae cih hae.

      Bua Liathuinaw

      • Pachia Peenaw nynh Zahova min a thyaa nawlang pawtemou a cyih cih?

      • Pachia Peenaw nynh Baebu byaking hae kha a ccingsah cih cipaw pawcce ah zyn kho oh?

      • Pachia Peenaw nynh a cyih cih hae paw lungkhu kya pawkhamou na ry hua?

      Eenaw

      HOUH CCUNGCHIH

      Armageddon tuh pawmou cipaw ria tua.

      “Armageddon Raw Cipaw Tuh Pawmou A Ho Ry?” (Website ccaw)

      Zisu nynh a uh cihpaw kum 1,000 laku te a thangnaw kya pawmou a cyihkuh cih cipaw ria tua.

      “Byapia Nin Kya Pawmou A Cyihkuh Cih?” (Rawvianaw, September 1, 2012)

      Peenaw nynh a cyih cihpaw hythuanaw hae kha innbyng te a muekuh cite na mihmae kya ungsah kuh tua.

      Paradise Kya Ka Ung Cite Na Mihmae Kya Ungsah Kuh Tua (1:50)

      Nainnganzei paw lukheit phishingnaw a muihnaw kong kha “Byakhianaw Patae Ka Hoi” cihkupaw ccaw kya ria tua.

      “Baebu Nynh Hingnaw Hae Kha A Rulaesah Kho” (Rawvianaw, January 1, 2012)