CCANGKUNAW 27
Zisu Chiinaw Nynh Aening Kha Pawtemou Yn Khung Kho?
Masaty ccungccaw Adam te Evua nynh Pachia kaw a ngae khyh hae keiccuze seinaw, riathae vawsawnaw te chiinaw hae ah tung oh.a Thuasalama ngaehoinaw ah hoi lei oh paw thua khyh. Zahova nynh a ccapaw Zisu Khrih kha laevaw lang sawte a chiisanaw liate seinaw te chiinaw kyate ah lue nawlang oh yn paccyn pya. Zisu chiinaw liate sawnawme yn pya cite Baebu nynh yn ccangpya. Sawnawme cipaw tuh lukhakheit luenaw hanglang pyapaw ame nynh thua. Zisu nynh a ccingpaw ccungccaw a hingnaw kha ame lang a la pya. (Matthai 20:28 kha ria.) Zisu tuh laephivaw lang zungzae a hing kho, thuasalama aening hanglang lungthote a hingnaw a pyakupaw nynh Adam te Evua keiccuze a sungkupaw miakaw kha bua a muekuh kho. Zisu te Zahova sungsakunaw a lenaw kong kha yn nysah. E ccangkunaw nynh Zisu chiinaw kha lungtua kho nawlang yn bung cih.
1. Atu ccyh kya Zisu chiinaw kyate pawtemou thanenaw mue kho lang?
Aening tuh mih sei hae ah thua oh keiccuze Zahova nynh a ry leipaw hae kha ah cyi oh. Thuasalama, seinaw hae hanglang ngaethyate Zisu Khrih liate Zahova kalang ngaethyakunaw ngiakuh lang, seinaw bua rae khyh nawlang zuakuh lang zetuh Pachia te ahoypaw vaeccawkunaw hoi kho lang. (1 Johan 2:1) Baebu nynh hynhte a ci: “Khri mah seinaw keiccu vaekheit te phe azaw lan a teing, aening kha Pachia kalan thuakhae khylan adingpaw tuh ading lei hae paw hanlan pynsaw kya chia athua.”—1 Peter 3:18.
2. Malang ccyh kya, Zisu chiinaw kyate pawtemou thanenaw mue kho lang?
Zahova nynh Zisu kha a ccingpaw ccungccaw a hingnaw pyakuh lang laephivaw lang a saw. “[Zisu] a zynpaw miakaw tuh chih vae lan khyh zah zungzae hiinnaw a hoi cih.” (Johan 3:16) Zisu chiinaw keiccuze Zahova nynh Adam nynh kaw a ngae khyh keiccuze a cyihkuhpaw ahoy leipaw miakaw kha yn roh vae cih. Zisu sawnawme sithoinaw kha aening nynh ah zyn oh zetuh laephi Paradise kya zungzae hingnaw mue kho lang!—Isaiah 65:21-23.
HOUH CCANGKUH LANG HOUH MUIH LANG
Zisu tuh pawcce a hingnaw a la pyakuh, aening pawtemou thanenaw mue lang cipaw kha tuatua.
3. Zisu chiinaw nynh seinaw te chiinaw kyate yn luesah
VIDEO kha pia, tuhkoute akaw lang-e bakhianaw kha hokuh oh.
Pachia kaw a ngae khyh keiccuze Adam nynh paw ccyhhoy mou a la sung?
Rom 5:12 kha ria tuhkoute e bakhianaw kha hokuh oh:
Adam seinaw nynh nang kha pawtemou ae tungsah?
Johan 3:16 kha ria tuhkoute e bakhianaw kha hokuh oh:
Zahova nynh a ccapaw kha laephivaw lang pawcce yn saw?
A ccingpaw Adam tuh Pachia kaw a ngae khyh keiccuze ccungccaw hae tuh sei hae zah a chih hae
A ccingpaw Zisu tuh Pachia kaw a ngae keiccuze ccungccaw hae tuh ccing hae zah zungzae hingnaw a mue kho hae
4. Zisu chiinaw keiccuze ccungccaw miakaw thanenaw a mue kho hae
VIDEO kha pia, tuhkoute akaw lang-e bakhianaw kha hokuh oh.
Ccungccaw lukheit chiinaw keiccuze ccungccaw miakaw pawtemou thanenaw a mue kho cih hae?
1 Timote 2:5, 6 kha ria tuhkoute e bakhianaw kha hokuh oh:
A ccingpaw Adam tuh seinaw la rae keiccuze ccungccaw miakaw tuh sei hae zah a chih hae. Zisu mah a ccingpaw nynh thua. Amaw nynh “a ngangkuh paw sawnawme” kha pawtemou la pya?
5. Sawnawme tuh Zahova nynh ae pyapaw lasung nynh thua
Zahova vaeccaw hae nynh sawnawme kha lukheit raveih nynh muepaw lasung cite nynh a tua hae. Tousenaw langze, Galati 2:20 kha ria tuhkoute e bakhianaw kha hokuh oh:
Zuitu Paul nynh sawnawme kha amaw hanglang Pachia lasung cite a tuanaw kha pawtemou a langsah?
Adam seinaw a rae lyakhe amaw te a ccaw miakaw tuh chii lang detahnaw a mue hae. Thuasalama Zahova nynh zungzae hingnaw na mue kho nawlang a Ccapaw kha saw zah a chiisah.
Akaw lang-e Baebu ccaw hae na ria lyakhe Zisu vawsawnaw a tung ccyh kya Zahova tuh pawtemou a ung cih cipaw kha na mihmae kya ungsah kuh tua. Johan 19:1-7, 16-18 kha ria tuhkoute e bakhianaw kha hokuh oh:
Zahova te Zisu nynh ae cyipya hae paw hanglang pawtemou na ung?
CCUNGCCAW LUKHEIT NYNH KHIAPAW: “Ccungccaw lukheit chiinaw nynh ccungccaw miakaw kha pawtemou a khung kho?”
Pawtemou na phi cih?
ADYNGNAWTE
Zisu a chiinaw keiccuze Zahova nynh ah seinaw hae kha yn ngaethya pah zah zungzae hingnaw khue ah mue kho oh.
Bua Liathuinaw
Zisu pawcce la chii?
A ccingpaw Zisu a hingnaw tuh pawliatemou a ngangkuh paw sawnawme a thua?
Zisu chiinaw keiccuze pawtemou thanenaw na mue kho?
HOUH CCUNGCHIH
A ccingpaw Zisu hingnaw kha pawcce sawnawme cite ko a thua cipaw kha ria tua.
“Zisu Sithoinaw Nynh Pawtemou ‘Ccungccaw Patae Hanglang Sawmawme’ A Thua?” (Website ccaw)
Khungnaw mue lang pawmou cyi lang cipaw kha ccung tua.
Alepaw seinaw hae kha Zahova nynh a ngaethya tou?
Ning kho leipaw thinlung ccinaw a hoipaw lukheit nynh Khrih sithoinaw kong a ny keiccuze thanenaw la mu
a Seinaw cipaw tuh ahoy leipaw cyisanaw kele thua leite puikhaepaw ahoy leipaw cyirynaw thinglung kha mah a ho ry.