CCANGKUNAW 19
Zahova Ccaeccei Hae Tuh Amepaw Khrihccaw Hae Tou?
Zahova Ccaeccei hae nynh kae ning tuh amepaw Khrihccaw hae nynh kae thua cipaw kha kae zyn. Pawccemou? Zahova Ccaeccei hae zynnaw tuh pawmou abapi lang nung hae, Zahova Ccaeccei hae cite pawcce a ko hae, lukheit te lukheit sungsakunaw kha pawtemou a langsah kuh hae cipaw kha tuatua.
1. Zahova Ccaeccei hae zynnaw tuh pawmou abapi lang nung hae?
Zisu nynh hynhte a ci: “[Pachia] bya tuh byaccing nynh thua.” (Johan 17:17) Zisu hawte, Zahova Ccaeccei hae tuh mih zynnaw kha Baebu ccaw kya zungzae abapi lang nung hae. Atu she kae phungpaw kong kha tuatua. Kum 1870 leikaw kya, Baebu siaimua phukheit nynh Baebu kha a hoyte a la dokhia hae. Mih zynnaw tuh church zynnaw te a lokuh khyh zemah Baebu kha abapi lang a nung hae. Minccang paw hae kha Baebu byaccing kong hae a hopya hae.a
2. Zahova Ccaeccei Hae cihkuhpaw min kha pawcce kae kokuh?
Zahova nynh amaw a beih hae paw kha amaw kong byaccing kha a ho hae keiccuze ka ccaeccei hae cite a ko hae. (Hebru 11:4–12:1) Tousenawze, langmaw a ccungccaw hae kha, Pachia nynh: “Nanning tuh ka ccaekia hae” cite a ci hae. (Isaiah 43:10 kha ria.) Zisu kha “A Lungzipaw Ccaekia” cite a ko. (Byaphy 1:5) Tuhkeiccuze, kum 1931 kya Zahova Ccaeccei cihkuhpaw min kha kae phukuh keiccuze myarya kae rykuh.
3. Zahova Ccaeccei hae tuh Zisu sungsakunaw kha pawtemou a dosuinkuh hae?
Zisu nynh a zuitu hae kha myarya sungsah hae zah a innbyng hae hawte nynh a tua hae. (Marka 3:35 kha ria.) Tuhhawte, Zahova Ccaeccei hae mah lungngin hae paw laephi pi innbyng nynh thua hae. Tuhkeiccuze lukheit te lukheit kha unopaw te unonung cite kae koku. (Filemon 1, 2) E kawbya mah kae zui: “Nae uno hae kha sungsah oh.” (1 Peter 2:17) Zahova Ccaeccei hae tuh aphuinphuinte sungsakunaw kha a langsah kuh hae. Laephi pyngpi e unopaw unonung hae vawsawnaw tung ccyh kya mah a bungkuh hae.
HOUH CCANGKUH LANG HOUH MUIH LANG
Zahova Ccaeccei hae phungpaw kong te amepaw Khrihccaw hae nynh kae thua cipaw a langsapaw kong kha houh ccangkuh tua.
Amepaw Khrihccaw hae zynnaw tuh Baebu kha abapi lang nung hae zah minccang paw hae kha zynnaw kong a hopya hae
4. Kae zynnaw tuh Baebu kha abapi lang kae nung
Zahova nynh Baebu byaccing kha houh yng thaethya cih hae cite a hoty. Daniel 12:4 kha ria tuhkoute e bakhianaw kha hokuh oh:
Pachia ccungccaw hae nynh Baebu kha akaw aleih a tuakhia hae ze pawmou yn “lungthung” cih?
E video liate, Charles Russell ryte Baebu siaimua phukheit tuh Baebu kha pawtemou la leihla hae. VIDEO kha pia, tuhkoute akaw lang-e bakhianaw kha hokuh oh.
E video kya, Charles Russell te a bang hae Baebu siaimua hae nynh Baebu kha pawtemou a leihla hae?
Na nyh tou?
Kae zynnaw abang hae kha kae rulae lyamah a ung. Pawcce? Khuanin houh yn tanghua zah khua houh yn awhua hawte Baebu kong byabyate houh thaethya nawlang Pachia nynh yn bung. (Phungtangbya 4:18 kha ria.) Tuhkeiccuze Baebu tuh a rulaekuh khyh zemah Baebu byaccing kha houh thaethya vae zetuh zynnaw hae kha kae rulae.
5. Kae min hawte nynh kae ung
Zahova Ccaeccei cihkuhpaw min kha pawcce kae phukuh? VIDEO kha pia, tuhkoute akaw lang-e bakhianaw kha hokuh oh.
Zahova Ccaeccei cipaw min tuh pawcce a ngaekuh?
Zahova nynh a ccaeccei hae lang ccungccaw hae kha pawcce a po hae? Pachia te asekute hynbya hae eih lung zah Zahova kele nynh amepaw Pachia nynh thua cipaw kha langsah langpaw a thua keiccu. Hynbya ccangning kong kha tuatua.
Zohtuh beihpaw kha Pachia nynh a ry cite beihnaw abang nynh a ccangpya hae. Levitikas 26:1 kha ria tuhkoute e bakhianaw hae kha hokuh oh:
Byaccing tuh pawmou? Zahova nynh zohtuh beihpaw kha pawtemou a tua?
Zisu tuh Pachia nynh a thua cite beihnaw cciakhaetu abang nynh a ccangpya hae. Johan 20:17 kha ria tuhkoute e bakhianaw hae kha hokuh oh:
Byaccing tuh pawmou? Pachia te Zisu tuh pyngkheitpaw tou?
Zahova nynh amaw te a ccahpaw kong byaccing kha ho lang a ccaeccei hae kha a saw hae cipaw na nyh tuh pawtemou na ung?
6. Lukheit te lukheit kae sungsakuh
Baebu kya Khrihccaw hae kha a lokuh leipaw ccungccaw pyn aranphei hae te nynh a touse. 1 Korin 12:25, 26 kha ria tuhkoute e bakhianaw hae kha hokuh oh:
Amepaw Khrihccaw hae tuh lukheit te lukheit vawsawnaw tung ccyh kya pawmou cyi lang a ccang?
Zahova Ccaeccei hae lukheit te lukheit pawtemou sungsakunaw a langsah hae cipaw na muih boi?
Sangkheit kya Zahova Ccaeccei hae vawsawnaw a tung hae ze laephi pyngpi e Zahova Ccaeccei hae nynh vaeleih a bung hae. Tousenaw ccangkheit do lang, VIDEO kha pia. Tuhkoute akaw lang-e bakhianaw kha hokuh oh.
Zahova Ccaeccei hae e khungnaw ryalaw nynh sungsakunaw kha pawtemou a langsah?
Amepaw Khrihccaw hae nynh vawsawnaw tung hae paw kha sungsakunaw a langsah hae
CCUNGCCAW ABANG HYNH HO HAE PAW: “Zahova Ccaeccei hae tuh beihnaw thawpaw ccangkheit nynh thua.”
Zahova nynh amaw a beih hae paw kha ccaeccei hae cite hohtuhkyatemou la ko hae?
ADYNGNAWTE
Zahova Ccaeccei hae tuh amepaw Khrihccaw hae nynh kae thua. Laephi pi innbyng ccangkheit nynh kae thua. Kae zynnaw tuh Baebu kha abapi lang kae nung zah Zahova kong byaccing kha kae ho.
Bua Liathuinaw
Zahova Ccaeccei cihkuhpaw min kha pawcce kae phukuh?
Lukheit te lukheit sungsakunaw kha pawtemou kae langsah?
Zahova Ccaeccei hae tuh amepaw Khrihccaw hae cite na tua tou?
HOUH CCUNGCHIH
Zahova Ccaeccei hae phungpaw kong houh ccangkuh.
Zahova Ccaeccei Hae—Zynnaw Cyisanaw, Phianaw 1: Mohnaw Kyate Luenaw (1:00:53)
Ame leipaw ccangpyanaw kha Zahova Ccaeccei hae nynh a langsanaw hae tousenaw ccangkheit kha do tua.
Zahova Ccaeccei hae kong bakhianaw hae kha aphi ccung.
“Zahova Ccaeccei Hae Te Asekute Akhiathya Hae Paw Bakhianaw Hae” (website ccahmae)
Stephen nynh minphuin ccangpaw hae kha hua hae zah a la dou hae. Zahova Ccaeccei hae kya pawkhamou muih zah a rulaekuh.
a Kaening e abapi ccaw thuapaw, Rawvianaw tuh kum 1879 kyate thozah Baebu byaccing kha pou kae tho.