Thehoypaw Kha Pawtemou Ho A Thua?

Zahova nynh amaw Peenaw liate ccungccaw piahccahnaa miakaw kha yn ropah vae cih. E thehoypaw tuh myarya hoypaw thuazah ccungccaw miakaw nynh thae lang ahoo. A zuitu hae nynh e kong kha ccungccaw miakaw kalang ho hae sah cite Zisu nynh a ry! (Matthai 28:19, 20) Zahova Ccaeccei hae nynh Zisu kawpyapaw ryalaw kha pawtemou a cyi hae?

1. Atu she kya Matthai 24:14 tuh pawtemou a ccing?

Zisu nynh hynhte a hoty: “E peenaw thehoypaw hynh laephi pynpi kya oun ho cih hae.” (Matthai 24:14) Zahova Ccaeccei hae nynh e azicipaw ryalaw kha lungtua lungpaw te a law hae. Laephi pyngpi kya e thehoypaw kha byaphuin 1,000 lae te kae ho! Hynhcih lepaw ryalaw hanglang thadyngsapaw buu te thawte zuakuhnaw ahoo. E ryalaw tuh Zahova bungnaw leite cyi kho lei lang.

2. Ccungccaw hae kalang phungho lang pawtemou kae zuakuh?

Ccungccaw hae ungnaw takyh kya phung kae ho. Shekheitnaw e khrihccaw hae hawte ‘innkheit te innkheit cciate’ kae ho. (Locceihtu 5:42) Phe lekuh lang phunghonaw liate kum takyh ccungccaw ccang patae kalang phung kae ho kho. Ccungccaw hae inn kya zungzae a ung khyh hae keiccuze ccungccaw zapi ungnaw hae kya mah kae ho. Zahova te amaw eenaw kong kha ccyhhoy ccungte minccang paw hae kha kae hopya hae.

3. Thehoypaw ho lang a hungkyamou taevue a hoi?

Amepaw Khrihccaw miakaw tuh minccang paw hae kalang thehoypaw ho lang taevue a hoi hae. Hingnaw te asekuh cipaw kae ny keiccuze abapi lang nungte taeningkho cia kae ho. (1 Timote 4:16 kha ria.) Baebu nynh: “Amee pya leite na mue oh zah, amee lawku leite la pya oh” cite a ci keiccuze e ryalaw elang phua kae lawkuh khyh. (Matthai 10:7, 8) Kae hopaw thehoypaw kha ccungccaw miakaw nynh ngae ry khyh hae. Thuasalama phunghonaw tuh kae beihnaw ryalaw ccangkheit thua zah tuh-e nynh Zahova lung mah a pawsah keiccuze pou kae ho.

HOUH CCANGKUH LANG HOUH MUIH LANG

4. Ccungccaw miakaw kalang phungho lang kae zuakuh

VIDEO: “Laephi A Dianaw Cia” Phunghonaw (7:33)

• Phungho lang Zahova Ccaeccei hae zuakuhnaw te asekute pawkhamou na ry?

Matthai 22:39 te Rom 10:13-15 kha ria tuhkoute e bakhianaw hae kha hokuh oh:

• Phunghonaw nynh ccungccaw hae kha kae sungsah hae cipaw pawtemou a langsah?

• Thehoypaw a ho hae paw kha Zahova nynh pawtemou a tua hae?​—Adihpaw 15 kha do tua.

5. Kaening tuh Pachia rya lahkheihtu hae nynh kae thua

Phunghonaw kha Zahova nynh lang yn hroi cipaw kha tungboipaw hae nynh a langsah. Tousenawze, New Zealand ram e unopaw Paul tuh ninthu koute innkheit te innkheit phunghonaw kya nopinung lukheit te a tungkuh hae. Tuh-e nung tuh lukhakheit beih yn sawpah cite Zahova Pachia min mang zah atuh awkhua khe saw la sangpaw nynh thua. Paul nynh “suimilan ccangthung koute a inn thuakaw malang ka thua vae” cite a ci.

1 Korin 3:9 kha ria tuhkoute e bakhianaw kha hokuh oh:

• New Zealand ram e tungboipaw liate phunghonaw kha Zahova nynh lang a hroi cipaw kha pawtemou ah ny oh?

Locceihtu 1:8 kha ria tuhkoute e bakhianaw kha hokuh oh:

• Phunghonaw ryalaw thangsah kho nawlang Zahova bungnaw pawcce ahoo?

Na nyh tou?

Naw takyh tuapaw a laku pungkunaw kya phungho lang yn bungpaw ccangpyakunaw kae mue. E pungkunaw kha na pungkuh boi ze e ccangpyakunaw kha pawtemou na tua?

6. Phungho lang Pachia kawpyanaw kha kae ngae

Shekheitnaw kya thehoypaw hopaw kha a kheetu hae la ung. Thuasalama Zisu zuitu hae nynh ‘thehoypaw honaw khue kha thungkhaw hae zah . . . upadi liate a tynnaw lang la cyi hae.’ (Filipi 1:7) Atu she Zahova Ccaeccei hae mah tuhte nynh a cyibua hae.a

VIDEO: Upadi Liate Thehoypaw Thungkhawnaw (2:28)

Locceihtu 5:27-42 kha ria tuhkoute e bakhianaw kha hokuh oh:

• Pawcce ungtaw leite pou ho lang?—Adihpaw 29, 38 te 39 kha do tua.

ADYNGNAWTE

Zisu nynh a zuitu hae kha minphuin miakaw kalang thehoypaw ho lang langhroinaw a pya hae. E ryalaw law kho nawlang Zahova nynh a ccungccaw hae kha a bung hae.

Bua Liathuinaw

• Laephi pyngpi kya thehoypaw kha pawtemou ho a thua?

• Phunghonaw nynh ccungccaw hae kha kae sungsah hae cipaw pawtemou a langsah?

• Phunghonaw nynh ah lung yn pawsah kho cite na tua tou? Pawcce?

HOUH CCUNGCHIH

Khua le hae paw kya Zahova Ccaeccei hae nynh pawtemou phungho hae cipaw kha do tua.

Paris Khua Ccungccaw Lungnaw Kya Zapi Malang Phunghonaw (5:11)

Vawsawnaw tung hae paw kha Zahova Ccaeccei hae nynh pawtemou a bung hae?

Vawsawnaw Tung Hae Paw Laku Muihsawlang Rynaw Ngaengannaw Muenaw (5:59)

Nopinung lukheit nynh phunghonaw nynh pawcce a lung a pawsah cipaw kong a hopaw kha ngae tua.

E Ryalaw Ka Pokuh Keiccuze Ka Lungpaw (6:29)

Thehoypaw honaw khue a muesahpaw byapia zung e byapaenaw hae kong kha ria tua.

“Peenaw Kong Hotu Hae Nynh A Tung Hae Paw Kong Kha Byapia Zung Kya A Ho Hae” (Pachia Peenaw A Uh Vae!, abalu 13)