CCANGKUNAW 20

Khrihccawbuu Thadyngsahnaw

Printed Edition

Zahova tuh ccyhmamyh ungpaw Pachia nynh thua. (1 Korin 14:33) Pachia minphuin khamah ccyhmamyhte a thadyngsah cih cite ngaehoi kho a thua. Khrihccawbuu kha pawtemou a thadyngsah? Khrihccawbuu ccyhmamyhte ung kho nawlang pawtemou bung kho lang oh?

1. Khrihccawbuu lu tuh a hungmou?

“Khri tuh khriccaawbuu lu athua.” (Efesa 5:23) Zisu nynh laephi pyngpi kya Zahova minphuin e cyisahnaw hae kha vaawlang kyate lang a hroi hae. Zisu nynh tuanaw hoihua hae paw piccan phukheit kha “a lungzipaw te a hawpaw see”—lang a khang hae. Minming kha Uhtu Buu cite mah ko a thua. (Matthai 24:45-47 kha ria.) She kheitnaw, Jerusalem kya ung hae paw zuitu hae te Khrihccaw piccan hae hawte Uhtu Buu hae mah laephi pyngpi e Khrihccawbuu hae kha lang a hroi hae. (Locceihtu 15:2) Thuasalama e unopaw hae tuh buupi cciakhaetu hae thua khyh hae. Zahova e langhroinaw mue lang Baebu ccaw kha ria hae zah Zisu cciakhaenaw kha a zui hae.

2. Khrihccaw piccan hae taevue tuh pawmou?

Khrihccaw piccan hae tuh tuanaw hoihua hae paw Khrihccaw pise hae thua hae zah Pachia minphuin kha Baebu kong ccangpah hae zah thawpyate a bung hae. Mih ryalaw hanglang lahkha ae hae paw thua khyh. ‘Pachia rynaw thyhte lungthote do-oih hae paw, anungsikuhpaw muenaw hanlan thua leite thawmuinte do-oih hae paw’ nynh thua hae. (1 Peter 5:1, 2) Buu ryalahtu hae cipaw tuh Khrihccaw piccan hae kha bungtu hae thua hae zah nyalang ccyh kya Khrihccaw piccan lang a tang kho hae paw nynh thua.

Uhtu Buu nynh Khrihccaw piccan abang kha khuaccungtu lang akhang hae. Khuaccungtu hae nynh Khrihccawbuu hae kalang khuaccung hae zah langhroinaw te thawzung a pya hae. Minming nynh Baebu ngianaw a ccing hae paw kha Khrihccaw piccan lang, buu ryalahtu lang a khang hae.—1 Timote 3:1-10, 12; Titu 1:5-9.

3. Zahova Ccaeccei lukheit raveih taevue tuh pawmou?

Khrihccawbuu kya ung hae paw miakaw nynh pungkunaw hae kya pungkubuanaw, taeningkhonaw ciate phunghonaw liate ‘Zahova min kha thehoysah hae.’—Sam 148:12, 13 kha ria.

HOUH CCANGKUH LANG HOUH MUIH LANG

Zisu tuh pawtecihpaw cciakhaetu mou, Khrihccaw piccan hae nynh Zisu kha pawtemou a dosuinkuh hae, Zisu kaw ngaete Khrihccaw piccan haete pawtemou ryalaw kheih kho lang cipaw kha ccangkuh.

4. Zisu tuh lungthaw yn saesahpaw cciakhaetu nynh thua

Zisu e myarya hoypaw hyynaw kha Matthai 11:28-30 kya ria tua tuhkoute e bakhianaw kha hokuh oh:

Cciakhaetu te asekute Zisu nynh pawtemou tua hae sah ci yn ry?

Zisu hingnaw zia kha Khrihccaw piccan hae nynh pawtemou a dosuinkuh hae? VIDEO kha pia.

VIDEO: Nepal Innrysuekuhnaw Khrihccaw Piccan Hae Bungnaw (4:56)

Khrihccaw piccan hae pawtemou ryalaw lang a ccang cipaw kha Baebu kya a langsah.

Isaiah 32:2 te 1 Peter 5:1-3 kha ria tuhkoute e bakhianaw hae kha hokuh oh:

Zisu hawte Khrihccaw piccan hae tuh minccang paw hae kha lungthaw saesah hae cipaw na nyh vae tetuh pawtemou na ung?
Zisu hingnaw zia kha Khrihccaw piccan hae nynh paw zia hae temou a dosuinkuh hae?

5. Khrihccaw piccan hae nynh mih hingnaw zia te a ccangpya hae

Zisu nynh Khrihccaw piccan hae kha mih taevue te asekute pawtemou a tuasah ry hae? VIDEO kha pia.

VIDEO: Khrihccaw Piccan Hae Cciakhae Oh! (7:39)

Zisu nynh Khrihccawbuu kya cciakhaetu hae hanglang dosuinkuh lang ahoypaw a nung. Matthai 23:8-12 kha ria tuhkoute e bakhianaw kha hokuh oh:

Khrihccaw piccan hae hanglang Baebu phunglang tuh pawmou? E phunglang kha beihnaw cciakhaetu hae nynh a zui hae cite na tua tou?

A. Collage: Amaw te a innbyng zynnaw tynkhonaw lang peki paw Khrihccaw piccan lukheit. 1. Baebu ccaw a leihla maw saw a sang. 2. Amaw nynh a zuu bungnaw te a ccanung taraw kha Baebu ccaw kong a ccangpya.

B. Sizung iinaw kya a huekuhpaw mih buu kya-e a dang lei paw unonung lukheit kalang a paebua cciamang hae paw Khrihccaw piccan te a zu.

Khrihccaw piccan hae nynh maw te innbyng zynnaw tyn kho nawlang a zuakuh hae
Khrihccaw piccan hae nynh abuu kya ungpaw miakaw kha peki hae
Khrihccaw piccan hae tuh merarihte phungho hae
Khrihccaw piccan hae tuh ccangpahtu nynh thua hae. Thyasanaw ryalaw te ccangpaw ryalaw kya mah a bung hae

6. Khrihccaw piccan hae te ryalaw kheih kho a thua

Khrihccaw piccan hae te ryalaw kheih lang a ccangnaw abapi konglang kha Baebu kya a langsah. Hebru 13:17 kha ria tuhkoute e bakhianaw hae kha hokuh oh:

Baebu ccaw nynh cciakhaetu hae kaw ngae te zui lang pawcce thaw yn pya? E te asekute pawtemou na tua?

Luka 16:10 kha ria tuhkoute e bakhianaw kha hokuh oh:

Adihpaw uccaw hae kya mah Khrihccaw piccan hae te ryalaw kheih lang pawcce azici?

CCUNGCCAW ABANG NYNH HO HAE PAW: “Beihnaw buu hoi hoo khyh.”

Khrihccawbuu ryte Pachia beihnaw tuh Pawtemou thanenaw ung cih cite na tua?

ADYNGNAWTE

Zisu tuh Khrihccawbuu lu nynh thua. Zisu zakaw e Khrihccaw piccan hae tuh lungthaw saesah te hingnaw ziate yn ccangpah hae keiccuze rya a la kheih oh.