CCANGKUNAW 57
Alepaw Seinaw Na Raesei Ze So?
Zahova Pachia kha myarya na sungsah zah Pachia a thinlung a ccisah hae paw kha sihaekuh lang na zuakuh zemah vaekhakheit tuh seinaw na raesei kho. Alepaw seinaw haehei na raesei kho. (1 Korin 6:9, 10) Tuh-e ccyh kya Zahova nynh ae sungsah maming ung; ngaethya lang ungty zah ae bung ry cipaw kha ningnang.
1. Zahova kya-e ngaethyanaw mue lang pawmou cyi lang?
Zahova kha a sungsah hae paw tuh alepaw seinaw a raesei vae hae ze mih ngae myarya a thah. Thuasalama: “Nae seinaw tuh sekakin lan se salamah, vuiraw hawte araw cih” cihkuhpaw Zahova byaking keiccuze lungngaengannaw a mue hae. (Isaiah 1:18) Thinlung ccaccingte ngaesikuh langze Zahova nynh yn ngaethya cih. Pawtemou ngaesikuh lang? Raeseipaw seinaw hanglang myarya ah ngae thah, seinaw rae vae leite Zahova kya-e ngaethyanaw mue lang ah ngia oh. Seinaw yn raesah seipaw ame leipaw tuanaw, ziazae hae kha rulaekuh te Zahova kya-e a thyapaw phunglang hawte unglang thaw mawte ah zuakuh oh.—Isaiah 55:6, 7 kha ria.
2. Seinaw ah raesei vae oh ze Khrihccaw piccang hae kyate Zahova nynh pawtemou yn bung?
Alepaw seinaw raesei vae ze “khrihccawbuu kya-e pastor hae kha ko” lang Zahova nynh yn hopya. (James 5:14, 15 kha ria.) E Khrihccaw piccang hae tuh Zahova te a tuu hae kha a sungsah hae paw nynh thua hae. Minming nynh Zahova te ccuepekunaw bua a hoythui kho nawlang aening kha yn bung kho hae.—Galati 6:1.
Alepaw seinaw ah raesei vae ze Khrihccaw piccang hae nynh pawtemou yn bung hae? Khrihccaw piccang luning tuhkhyhze luthung nynh Baebu ccaw kha abapi lang nungte yn thuiheih cih hae. Seinaw bua rae khyh nawlang zui lang ccangpaw tuanaw hae te thawzung ungpaw bya hae yn hopah cih hae. Muihsaw lang kya bua dangthui ccyh cia Khrihccaw ryalaw abang kya pabua khyh nawlang yn khee kho hae. Seinaw a raetupaw nynh a ngaesikuh khyhze buu kyate dee a thua cih, seinaw a raepaw e rilang ungpaw ziazae hae kyate Khrihccawbuu kha thungkhaw khy lang nynh thua.
HOUH CCANGKUH LANG HOUH MUIH LANG
Alepaw seinaw raesei vae ze Zahova nynh yn pyapaw bungnaw kha aphu tesah.
3. Seinaw phykunaw nynh muihsaw lang te bua yn dangsah
Aening nynh seinaw ah raesei oh takyh kya Zahova a thinlung ah ccisah oh keiccuze seinaw kha phykuh lang a ccang. Sam 32:1-5 kha ria tuhkoute e bakhianaw kha hokuh oh:
Seinaw kha phisikuh leite Zahova kalang pawcce phykuh lang?
Zahova kalang seinaw phykuh lae a piaze Khrihccaw piccang hae kalang bungnaw ngiakuh vae ze lungngaengannaw ah mue oh. VIDEO kha pia, tuhkoute akaw lang-e bakhianaw kha hokuh oh.
E video kya, Zahova kalang Canon yn ki nawlang Khrihccaw piccang hae nynh pawtemou a bung hae?
Khrihccaw piccang hae kya amete, a cyihkuh ccaccing paw kha ho lang ahoo; Minming tuh aening kha bung lang a ungty hae paw a thua keiccuze. James 5:16 kha ria tuhkoute e bakhianaw kha hokuh oh:
Amete ho lang ze Khrihccaw piccang hae nynh yn bung nawlang hae pawcce a zoi?
Na seinaw kha phykuh, Khrihccaw piccang kha amete hopah hae, Zahova kya-e sungsakunaw apapaw bungnaw kha lehkhan
4. Buu kyate deenaw nynh bungnaw a thuasakhonaw zia
Alepaw seinaw a raepaw nynh Zahova phunglang hae kha zui lang a ei zetuh Khrihccawbuu kya pou unglang zae khyh. Amaw tuh buu kyate dee a thua cih, amaw te mungkuh lei lang zah bya sangmah hokuh lei lang. 1 Korin 5:6, 11 te 2 Johan 9-11 kha ria tuhkoute e bakhianaw kha hokuh oh:
Ransi nynh vaepoi kha a thosah hawte a ngaesikuh leipaw seinaw a raepaw te mungkupaw nynh Khrihccawbuu kha pawtemou hoyleinaw a ungsah kho?
Buu kyate deekuhpaw tuh thinlung yn ccisah zemah amepaw muihnaw yn hoisah. Tuhkeiccuze buu kyate dee athua hae paw patae tuh nyalang Khrihccawbuu kalang bua yn kithui hae. (Sam 141:5) VIDEO kha pia, tuhkoute akaw lang-e bakhianaw kha hokuh oh.
E video kya buu kyate deenaw nynh Sonja kha pawtemou a bung?
Buu kyate deenaw nynh . . .
Zahova min kha pawtemou phu-esah?
Zahova tuh lungnenaw te sungsakunaw ahoi cipaw kha pawtemou a langsah?
5. Ah ngaesikuh oh ze Zahova nynh yn ngaethya
Ccungccaw lukheit a ngaesikuh ze Zahova tuh pawtemou a ung cipaw kha thaethya nawlang Zisu nynh tousenaw ccangkheit pyate a ccaesah. Luka 15:1-7 kha ria tuhkoute e bakhianaw kha hokuh oh:
E tousenaw nynh Zahova kong pawmou yn ccangpya?
Ezekiel 33:11 kha ria tuhkoute e bakhianaw kha hokuh oh:
Ngaesikunaw kya paw azicipaw akong mou apabua?
Tuu ringtu hawte Zahova nynh a tuu hae kha pe myarya a ki hae
CCUNGCCAW ABANG NYNH HO HAE PAW: “Ka seinaw kha Khrihccaw piccang kalang ka phykuh ze buu kyate yn dee hae ngaw rei.”
Tuhte a tuapaw kha pawtemou na hopah cih?
ADYNGNAWTE
Alepaw seinaw raesei zemah ngaethya ccaccing te seinaw pou rae vae khyh zetuh Zahova nynh yn ngaethya cih.
Bua Liathuinaw
Zahova kalang pawcce seinaw phykuh lang a ccang?
Ah seinaw ngaethyakunaw mue lang pawmou cyi lang?
Alepaw seinaw raesei vae ze pawcce Khrihccaw piccang hae kalang bungnaw ngiakuh lang a ccang?
HOUH CCUNGCHIH
Isaiah 1:18 kya a langsahpaw Zahova thawccinaw a muepaw lukheit kong kha do tua.
Buu kyate deenaw nynh a sekuh hae paw miakaw hanglang pawtemou thanenaw a ungsah kho?
“Buu Kyate Deenaw Tuh Pawcce Sungsakunaw Langsahpaw Athua” (Rawvianaw, May 15, 2015)
Buu kyate deenaw kong Witness a thua leipaw kha pawtemou hopya lang cipaw kha leihla.
“Zahova Ccaeccei Hae Nynh Ccungccaw Lukhakheit Kha Buu Kyate A Dee Hae Tou?” (Website ccaw)
Byaccing kyate a cceihsei paw lukheit Zahova kalang bua yn kinaw kong kha “Zahova Kalang Bua Ki Lang Ahoo Vae” cihkuhpaw ccaw kya ria tua.
“Baebu Nynh Hingnaw Hae Kha A Rulaesah Kho” (Rawvianaw, April 1, 2012)