CCANGKUNAW 39
Chi Te Asekuhte Pachia Muihnaw
Chi tuh myarya abapipaw nynh thua. Chi leite a hung mah ah hing kho lang khyh oh. Pachia tuh Raetu a thua keiccuze chi kha pawtemou mang lang a ccang cipaw honaw kaw a hoi. Pachia nynh chi te asekuhte pawmou a ho? Chi ae lang a zae tou tuhkhyhze ruinkuh lang a zae tou? E kong te asekuhte amepaw byapaenaw pawtemou na rae kho?
1. Chi kha Zahova nynh pawtemou a muih?
Zahova nynh Baebu she lya-e amaw a beih hae paw kha hynhte a ci hae: “Ahysuepaw miakaw hiinnaw tuh a chii nynh thua.” (Levitikas 17:14) Zahova muihnaw kya chi tuh hingnaw hangpaw nynh thua. Hingnaw tuh a hang, Pachia nynh yn pyapaw lasung nynh thua. Tuhkeiccuze chi mah a hang.
2. Pachia nynh chi te asekuhte pawmou a khee?
Zahova nynh Khrihccaw she maw-e a minphuin hae kha chi na ae lang khyh oh cite kawbya a pya hae. (Genesis 9:4 te Levitikas 17:10 kha ria.) ‘Chii kha . . . la sungkuh oh’ cite Khrihccaw hae kha uhtubuu langhroi ccyh kya e kawbya kha Pachia nynh bua a pya hae.—Locceihtu 15:28, 29 kha ria.
Chi sungkuh cipaw asuilang tuh pawmou? Arah sungkuh cite sibawipaw nynh ae cyi ze arah kha na neih lang khyh. Thuasalama arah papaw aepaw kha na ae cih tou tuhkhyhze arah kha na tharui kya na ruinkuh cih tou? Tuhte mazi na cyih lang khyh. Tuhhawte, Pachia nynh chi kha sungkuh cite yn kheepaw tuh chi kha nia lei lang tuhkhyhze chi a lualeipaw saw kha ae lei lang cipaw nynh a ho ry. Chi a papaw paw aepaw miakaw kha ae lang ccang khyh.
Chi kha sikukuhnaw kya mang ze so? Abang sikukuhnaw zia hae tuh Pachia kawbya te myarya a rawse kuh. Chi ruinkuhpaw tuhkhyhze abapi chi phuinpali a thuapaw—chi asepaw (red cells), chi arawpaw (white cells), chi atui tararaw (platelets), te chi accipaw (plasma) hae nynh thua. Sikukuhnaw zia abang tuh Pachia kawbya kha a nyhkuh langte rawsepaw thua lang khyh. Tousenawze, abapi chi phuinkheit kya-e apaekalia hae kha mangte sikukuhnaw a ung. Maw chi kha bua ruinkuh te sikukuhnaw mah a ung. Paw sikukunaw zia mou lehkhang lang cipaw kha mawtemaw nynh byapaekuh lang.a—Galati 6:5.
HOUH CCANGKUH LANG HOUH MUIH LANG
Chi apapaw sikukuhnaw te asekuhte byapaenaw raekhonaw kong kha ccangkuh tua.
3. Sikukuhnaw kya Zahova nynh a rypaw byapaenaw rae
Sikukuhnaw kya Zahova nynh a rypaw byapaenaw pawtemou rae kho lang? VIDEO kha pia, tuhkoute akaw lang-e azici hae paw akong hae kha hokuh oh.
Hawnaw mue lang sawsang.—James 1:5.
Baebu phunglang hae te asekuhnaw hae kong kha ccung.—Phungtangbya 13:16.
Na ungnaw kya paw sikukuhnaw hae mou a muekuh kho ung cipaw ccung.
Na hanglang paw sikukuhnaw zia mou mazi lehkhang lang ccang khyh cipaw ny nawlang zuakuh.
Athah ahoy phiathyanaw thinlung a thyaasah cihpaw byapaenaw kele rae.—Locceihtu 24:16.b
Athah ahoy phiathyanaw thinlung te asekuhpaw byapaenaw raenaw kya—Khrihccaw piccang, Baebu ae ccangpahtu paw te na zu tuhkhyhze na vawpaw nynh hae hei ho bua lang ccang khyh cipaw kha nyh.—Rom 14:12.
Na byapaenaw kha zeikuh.
4. Zahova Ccaeccei hae tuh ahoy huapaw sikukuhnaw kha a ccung hae
Chi te asekuhte Pachia kawbya kha zui lang zah ahoy huapaw chi a pa leipaw sikukuhnaw te kukuh kho a thua. VIDEO kha pia.
Titu 3:2 kha ria tuhkoute e bakhianaw kha hokuh oh:
Sibawi hae te bya hokuh vae ze pawcce sawtuanaw te nenaw kha langsah lang a ccang?
Lehkhang lei langpaw |
Khrihccaw hae nynh byapae langpaw |
|---|---|
A. Chi accipaw |
Chi accipaw kya-e apaekalia hae |
B. Chi arawpaw |
Chi arawpaw kya-e apaekalia hae |
C. Chi atui tararaw |
Chi atui tararaw kya-e apaekalia hae |
D. Chi asepaw |
Chi asepaw kya-e apaekalia hae |
5. Chi apaekalia hae a papaw sikukuhnaw hae
Chi kya—chi asepaw, chi arawpaw, chi atui tararaw, te chi accipaw cihkuhpaw abapi phuinpali a ung. E a phuin hae kya chi apaekalia hae a ung.c Chi apaekalia abang kha ccinaw dounaw hae kya, chikangnaw ihsei hae kya a mang hae.
Chi apaekalia hae te asekuhte Khrihccaw lukheit cci nynh Baebu te ccangpyapaw athah ahoy phiathyanaw thinlung te mawtemaw nynh byapaenaw rae lang. Chi apaekalia hae a papaw sikukuhnaw kha lehkhang lei lang cite byapaenaw a rae hae paw a ung hawte lehkhang lang athah ahoy phiathyanaw thinlung nynh kaw a ua hae paw mah a ung kho.
Byapaenaw na rae vae ze e bakhianaw kha tua:
Sibawi paw kha chi apaekalia a papaw sikukuhnaw kha pawcce leh ka khang, leh ka khang khyh cipaw pawtemou hopya kho lang?
CCUNGCCAW LUKHEIT NYNH KHIAPAW: “Chi ruinkupaw tuh pawmou sei?”
Nang pawtemou na phi cih?
ADYNGNAWTE
Zahova nynh chi kha ahangpaw lang te yn muihsah ry.
Bua Liathuinaw
Zahova nynh chi kha ahangpaw langte pawcce a muih?
Chi kha sungkuh cihkuhpaw kawbya tuh chi ruinkupaw te mah asekuh cipaw pawtemou ny kho lang?
Chi apapaw sikukuhnaw te asekuhte amepaw byapaenaw pawtemou na rae kho?
HOUH CCUNGCHIH
Maw chi kha bua mangpaw sikukuhnaw te asekuhte byapaenaw rya vae ze pawhaemou tuabia lang a ccang?
“Ccaw Ria Hae Paw Kyate Bakhianaw” (Rawvianaw, October 15, 2000)
Chi apaekalia hae kha lehkhang lang, lehkhang lei lang cipaw byapaenaw rae vae ze pawhaemou tuabia lang a ccang?
“Ccaw Ria Hae Paw Kyate Bakhianaw” (Rawvianaw, June 15, 2004)
Chi te asekuhte Zahova muihnaw tuh ame cipaw sibawi paw lukheit pawcce a thaethya?
“Chi Te Asekuhte Pachia Muihnaw Kha Leh Ka Khang Vae” (Thaekuh!, December 8, 2003)
Sizung Ccuepekunaw Committee kya a pa hae paw Khrihccaw piccang hae nynh unonung, unopaw hae kha a bungnaw hae kong ccangkuh tua.
a Ccangkunaw 35, “Ahoypaw Byapaenaw Raekhonaw Zia” Kha do tua.
b Akong 5, “Chi Apaekalia Hae A Papaw Sikukuhnaw Hae,” Ccaesanaw 3, “Chi A Papaw Sikukuhnaw Zia Hae”; te November 2006 Peenaw Ryalawnaw, ccahmae 3-6 kha do.
c Sibawi abang nynh chi phuinpali kha chi apaekalia lang a tua hae. Tuhkeiccuze, chi tuhkhyhze chi asepaw, chi arawpaw, chi atui tararaw te chi accipaw kha leh ka khang khyh cipaw na byapaenaw kha hopya lang ahoo kho.