ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

1 Maan Pɔdhö ˗mɛn ˈö ˗Zlan ˗yö ˗we ˗a ˗bha ˈö Yesu Klito ˗yö n ˗dhɛ kö ˈa kë ˗a ˗bha bɔmɛn do ˈka bhë, yaa kwa ꞊dhegblü Sɔsitɛnö, 2 yi ˈnën ˈyi ˈsëëdhɛ ˈö yö ˗a bɔ ˗Zlan ˗bha mɛn ˗nu ˈö ˗ya ˗dhii bho ka ˗bha, ˈö ˈka kë Yesu Klito* ˗bha gwëëˈˈ ˗nu ˈka, ˈö ˈka kë ˈˈslʋ̈ʋ̈slʋ̈, ˈö ˈka ˗zlanwokɔdhi ˈö Kolɛntö ˗a ˈgü, kaa mɛn ˈˈpɛpɛ ˈö ˈwo ˗dhɛ ꞊gban ˈgü, ˈö ˈwo wo ˗zo yö mɛn ꞊gban kwa Dëmɛn Yesu Klito ˈtɔ ˗dhɛ bhë, ka ˗dhɛ:

3 Kö kwa Dë ˗Zlan waa Dëmɛn Yesu Klito ˗wo ˗gasitɛ kë ka ˗dhɛ kö ˗wo zuʋ̈waannusü nu ka ˗dhɛ ˈpö bhë, ˈaa ˗yö kë!

4 A n ˗man ˗Zlan ˈˈnuɛ ˗bho ˗kplawo ˗a ˗bha ˗gasitɛ ˈö bɔ Yesu Klito* ˗ta ˈö˗ ˗kë ka ˗dhɛ bhë ˗a ˗wɔn ˈgü. 5 ˗A ˗gɛn ˗mü ꞊dhɛ kaa˗ ˗nu ka ˗kɔ ˗bha ˗kë ˈko ꞊kwɛɛ˗ ˗sü ˗wɔn ˈgü, pë ꞊gban ˈˈpɛpɛ ˗yö ka ˗gɔ. Ka ˗kɔ ˗ya ˗mɔn ˗a ˗wɔn blɛɛˈˈ ˗sü ˗bha ꞊dedewo, ˈö ka ˗bha ˈwɔndɔdhe ˗ya ˗dadhiʋ̈. 6 ˈYö sü ꞊dhɛ nɔɔn˗ ˗së ˈö ˗gban Klito ˗bha ˈö ˈka˗ man bhë, ˗ya ö ˗yɛɛ ˈsü ka ˈgü ꞊dedewo. 7 Yö ˈnën ˈö˗ ˗wɔn ˈgü ˈö mɛn ˈˈpɛpɛ ˈö ka ˈˈɲan ˈdhö kwa Dëmɛn Yesu Klito ˗bha ö ˗de ˗zɔn ˗yi ˗gɔ ꞊dedewo bhë, pë* ꞊gban ˈˈpɛpɛ ˈö ka ˗bhawɔn ˈdhö˗ ˗bha ˈö ka ˗gɔ. 8 ˗Yö ˗dho ka ˈgü kë ˈˈgbɩɩ˗ ˈö dho ˈö yö ˗a ˈka ˗a ˈˈdhiʋ̈todhɛ ˗bha, ˗yö kë ˈˈdhʋ̈ kö mɛn ˈbhaa ˈyaa ˗dho ˈwɔn ˈbhaa yö ka ˗bha kwa Dëmɛn Yesu Klito ˗bha yi ˈö bhë ˗a ˈka. 9 ˗Zlan ˈö ka ˗dhɛ kö kaa ˗a Gbö Yesu Klito ö kwa Dëmɛn ˈka, ˈka yö kë ka ˈkwëë˗ bhë, ˗Zlan ˈö to ö ˗wo ˗ta yö ˗mü.

10 ˈDhɛ ˈö ˈˈdhʋ̈, n ꞊dhegblü ˗nu, kwa Dëmɛn Yesu Klito ˈtɔ ˈgü, a ka ꞊faanmën kö ka ˗wo ˗yö kë do, kö ˗kankwëëdhe ˈyaa ˗dho kë ka ꞊zinŋgü. ˗Ka dɔ ˈˈgbɩɩ˗ ꞊ʒiaan kö ka ˗zotagüwɔn ˗nu waa ka ˗bha ˈwɔn yö ˗kɔ ˗nu ˗wo kë do ˈwɔn ꞊gban ˈgü. 11 N ꞊dhegblü ˗nu, ˗a pö ˈa˗ wo ˈˈdhʋ̈ bhë, ˗a ˈklɔɔ˗ ˗mü ꞊dhɛ Kloe ˗bha ˈkɔɔmɛn ˈbhaa ˗nu ˗wa ˗pö n ˗dhɛ ꞊dhɛ ˈkowogümandhe ˈyaa ka ꞊zinŋgü. 12 A˗ ˈˈpiʋ̈ ˈa˗ pö ꞊dhɛ mɛn ˈbhaa ˗nu ka˗ ˗pö: «A Pɔdhö ˗bha ˈka.» ˈÖ mɛn ˈbhaa ˗nu ˗wa pö: «A Apodhɔsö ˗bha ˈka.» ˈÖ mɛn ˈˈwɛɛ ˈbhaa ˗nu ˗wa pö: «Man ˗zë Sefasö ˈnën ˈa˗ ˗bha ˈka.» ˈÖ mɛn ˈbhaa ˗nu ˗wa pö ˈzü: «A Klito ˗bha ˈka.» 13 ˗A ˗ga ˈö ˈka˗ wo bhë, Klito ˗yö ˈˈpɛ ˗sü ˈka ö ˈgü ˗ee? Pɔdhö ˈnën ˈwo˗ dɔ ˈˈdhü ˗bha ka ˗wɔn ˈgü ˗ee? Ɛɛnˈˈ ˗wo ka ˗bɔ ˈˈyi ꞊bhaa Pɔdhö ˈtɔ ˈgü ˗ee? 14 A ˗Zlan ˈˈnuɛ ˗bho, ˈyö sü ꞊dhɛ ˗ya ˈˈkan Klipusö waa Gayusö ˗an ˗bha, mɛn ˈö ˈka bhë n ˈti mɛn ˈˈwɛɛ ˈbhaa bɔ ˈˈyi ꞊bhaa. 15 ˗A ˗wɔn ˈgü, mɛn ˈbhaa ˈyaa ꞊mɔɔn˗ ˗bha kö ˗ya pö ꞊dhɛ ka ˗bɔ ˈˈyi ꞊bhaa n ˈtɔ ˈgü. 16 ˈˈKɛɛ ˗ka dɔ, a Sefanasö waa ö ˗bha ˈkɔɔmɛn ˗nu ˗an ˗bɔ ˈˈyi ꞊bhaa ˈpö. ˗Ya ˈˈkan ˗an ˗bha, mɛn ˈbhaa ˈö n ˗zo dho ˗da ˗a ˈˈpiʋ̈ ꞊dhɛ a˗ ˗bɔ ˈˈyi ꞊bhaa ˈyaa ˈdhö. 17 ˗A ˗gɛn ˗mü ꞊dhɛ Klito ˈti n bɔ kö ˈa mɛn ˗nu bɔ ˈˈyi ꞊bhaa. ˗Yö n ˗bɔ kö ˈa nɔɔn˗ ˗së pö, ˈˈkɛɛ kö ˈmaan ˗dho ˗a pö ˈa ˈwɔn blɛɛˈˈ mɛnbhɩɩdhe ˗nu ˗bha ˈwɔndɔdhe ˈka,* kë ˈˈdhʋ̈ kö Klito ˗bha ga ˈö˗ wo ˈˈdhü ˗bha* bhë ˈyaa ˗dho kë ˈˈwlaawɔn ˈka.

18 Nɔɔn˗* ˈö ˗gban ˗ga ˗a ˗ta ˗dhü ˗bha bhë, ˗yö mɛn ˗nu ˈwo ˈgüshiʋ̈ ˗ʒian ˗ta ˗an ˈgü ˈˈwlaawɔn ˈka. ˈˈKɛɛ mɛn ˗nu ˈö ˈkwa dha ˗ni ˈgü, kwa ˗zë ˗yö kwa ˈgü ˗Zlan ˗bha ˈˈpiigbɩɩdhɛ ˈka. 19 ˗A ˗gɛn ˗mü ꞊dhɛ pë ˈö ˗bɛnzë ˗sü ˈka ˗ya ˗pö: «A ˗dho mɛn ˗nu ˈwo ꞊kpɔɔsü ˗an ˗bha ꞊kpɔɔdhɛ shiʋ̈ˈˈ, ˈö ˈa ˗kɔ mɛn ˗nu ˈwo ˈwɔn dɔ ˗an ˗bha ˈwɔndɔdhe ˈka.» 20 Mɛn ˈö ꞊kpɔɔsü ˗yö ˈˈmɛn? ˈTɔŋ˗ ˗gɔmɛn ˗yö ˈˈmɛn? Mɛn ˈö zɔɔdhemanmɛn ˈka ˈˈkpɔnŋ ꞊taa yö, ˗yö ˈˈmɛn? ꞊Kpɔɔdhɛ ˈö ˈˈkpɔnŋ ꞊taa yö, ˗Zlan yö ˈti˗ kë ˈˈblɔɔnwɔn ˈka ˗ee? 21 ˈˈKpɔnŋtaadhɛ ˗yö ö ˗zo ˗yö ö ˗de ˗bha ꞊kpɔɔdhɛ ˗dhɛ, ˈö˗ ˗kɔ yö ˈti ꞊mɔɔn˗ ˗bha kö ˗yö ˗Zlan dɔ. ˗A ˗wɔn ˈgü, ˗Zlan ˗bha ꞊kpɔɔdhɛ ˈgü, ˗yö ˗kë ˗a ˗dhɛ ˗së kö ˗yö bɔ nɔɔn˗ ˈö ˈkwa˗ pö ˗ni ˈgü, ˈö mɛn ˈbhaa ˗nu ˈgü ˈˈwlaawɔn ˈka bhë ˗a ˗ta ˗yö mɛn ˗nu ˈwo wo ˗zo yö ˗ni ˈgü ˗a ˗dhɛ ˗an dha.

22 ˗A ˗gɛn ˗mü ꞊dhɛ pë ˈö Zuifö ˗nu ˈdhö˗ ˈˈpiʋ̈ ˈyö ˗tɔ ˗dhidha ˗nu. ˈYö Glɛkö ˗nu ˗de ˈpö ˈwo ꞊kpɔɔdhɛ ˈˈpiʋ̈. 23 ˈˈKɛɛ kwa ˗zë, Klito dɔ ˈwo˗ wo ˈˈdhü ˗bha bhë ˈyö ˈkwa˗ ˗nɔɔn pö. ˗A ˗wɔn ˈgü, ˗yö Zuifö ˗nu ˗gɛn ˈˈdhiʋ̈ ˗zuö ˗wɔn ˈka, ˈö ˈˈsɛ ˈˈwɛɛ ˈgümɛn ˗nu ˈgü ˈˈwlaawɔn ˈka. 24 ˈˈKɛɛ mɛn ˗nu ˈö ˗Zlan ˗yö ö ˗kɔ ˗yɛ ˗an ˗bha, ˗wo ˗kë Zuifö ˗nu ɛɛnˈˈ Glɛkö ˗nu ˈka, ˗wo Klito ˗yö ꞊dhɛ ˗Zlan ˗bha ˈˈpiigbɩɩdhɛ waa˗ ˗bha ꞊kpɔɔdhɛ ˈdhö. 25 ˗A ˗gɛn ˗mü ꞊dhɛ ˗Zlan ˗bha pë ˈö mɛn ˗nu ˈgü ˈˈwlaapë ˈka bhë, ˗yö ꞊kpɔɔsü ˈö ˗ʒiö ˗a ˈka mɛnbhɩɩdhe ˗nu ˗ta. ˗Ya ˈgo mü ˈzü ˗Zlan ˗bha pë ˈö mɛn ˗nu ˈgü ˗bhaasü, ˗yö ˈˈgbɩɩ˗ ˈö ˗ʒiö ˗a ˈka mɛnbhɩɩdhe ˗nu ˗ta.

26 ˗A ˗gɛn ˗mü ꞊dhɛ n ꞊dhegblü ˗nu, ˈˈtʋ̈ŋ ˈö ˗Zlan ˗yö ö ˗kɔ ˗yɛ ˗a ˈka ka ˗bha bhë, kö pë ˈö mɛnbhɩɩdhe ˗nu ˗wa ˗dhɛ ꞊kpɔɔdhɛ bhë ˈyaa mɛn ꞊vadhɛ ka ˗gɔ, kö ˗wogbinŋdhɛ ˈyaa mɛn ꞊vadhɛ ka ˗gɔ, ɛɛnˈˈ mɛn ꞊vadhɛ ˈkaa kun ˈkɔdhi ꞊bhlëësü ˈgümɛn ˗nu ˈka. 27 ˈˈKɛɛ ˗Zlan ˗yö ö ˗kɔ ˗yɛ mɛn ˗nu ˈö ˈˈkpɔnŋtaamɛn ˗nu ˗wo ˗an sü ˈˈwlaamɛn ˗nu ˈka ˗an ˗bha kö ˈö ˈlëë˗ dɔ mɛn ꞊kpɔɔsü ˗nu ˗bha. ˗Yö ö ˗kɔ ˗yɛ ˈpö mɛn ˗bhaasü ˗nu ˈwo ˈˈkpɔnŋ ꞊taa ˗an ˗bha kö ˈö ˈlëë˗ dɔ mɛn ˈˈgbɩɩ˗ ˗nu ˗bha. 28 ˗Zlan ˗yö ö ˗kɔ ˗yɛ ˈpö pë ˗nu ˈö ˗an ꞊bhlëë ˈyaa ˈdhö, pë ˗nu ˈö mɛn ˗nu ˗wo ˗an sü ˈya˗ waa pë ˗nu ˈwo ˗an ˈgü ˗dhɛfuöödhɛ ˈka bhë ˗an ˗bha, kö pë ˗nu ˈwo ˈdhö ˈö ˗an kë ˗dhɛfuöödhɛ ˈka. 29 ˗Yö ˗kë ˈˈdhʋ̈ kö mɛn ˈbhaa ˈyaa ˗dho ö ˗de ˈsü ꞊va ˗Zlan ˈˈɲan ˈˈdhiʋ̈. 30 ˗A ˗gɛn ˗mü ꞊dhɛ yö ˈnën ˈö˗ ˈsaa˗ ˈgü ˈö kaa Yesu Klito* ˗nu ka ˗kɔ ˈdhö ö ˈkoo. Yesu ˈö ˈˈdhʋ̈, yö ˈnën ˗ya kë kwa ˗bha ꞊kpɔɔdhɛ ˈö go ˗Zlan ˈˈpiʋ̈, mɛn ˈö kwa ˗kë kpɛnŋdhö ˗Zlan ˈˈɲan ˈˈdhiʋ̈, ˈö kwa ˗kë ˈˈslʋ̈ʋ̈slʋ̈, ˈö kwa ˗gɔ ˗ta dhɔ kö ˈkwa ˈgo ˈˈgan ˈgü ˗a ˈka. 31 ˗Yö ˗kë ˈˈdhʋ̈ kö ˈwɔn ˗nu ˗wo kë ꞊dhɛ ˗kɔ ˈö ˗bɛnzë ˗sü ˈka ˗a ˗bha ˗a ˈdhö. ˗Yö ˗bɛnzë ˗sü ˈka ꞊dhɛ: «Mɛn ˈö ˗dho ö ˈtɔ ˈkun, ˗yö ö ˈtɔ ˈkun Zoova ˗wɔn ˈgü.»