Yesu ˗bha bɔmɛn ˗nu këwɔn ˗nu

8 Etiɛnö zë ˈwo˗ wo bhë ˗yö ˗kë Sɔdhö ˗dhɛ ˗së.

ˈÖ sü ˗dhɛkpaɔyi ˈö bhë ˗a ˗bha ˈyö ˈwo ˗ya ˈˈklʋʋbhɔdhe ˈkpii˗ wɔ ˗sü ˗bha ˗zlanwokɔdhi ˈö kun Zedhizadhɛmö bhë ˗a ˈgümɛn ˗nu ˗ta. ˗Ya ˈˈkan bɔmɛn ˗nu ˗bha, Yesu ˗bha gwëëˈˈ ˗nu ˈˈpɛpɛ ˈwo to, ˗wo ˗pɛn ˈö ˈwo dho Zude ˗sɛ ˗nu waa Samadhi ˗sɛ ˗nu ˈgü. 2 ˈˈKɛɛ ˗suʋ̈ ˗Zlan ˗gɔ ˗mɛn ˈbhaa ˗nu ˗wo Etiɛnö ˗sü ˈö ˈwo dho ˗a ˈka ˈwo˗ ˗wɛɛ bho, ˈö ˈwo˗ ˗gbʋ bɔ ꞊dedewo. 3 Sɔdhö ˗de ˈpö, ˗yö ˗ya pë ˈˈdhiʋ̈˗ ꞊gbɔɔnsü kë ˗sü ˗bha ˗zlanwokɔdhi ˈgümɛn ˗nu ˈka. ˗Yö ˗sɔ ˈkɔ ˗nu ˈgü do do ˈka, ˈö gɔɔn˗ ˗nu waa dhebɔ ˗nu kun ˈˈgbɩɩdhɛ ˈka ˈö yö ˗an ˈka ˈˈkpɛnŋ ˈö ˗an ˗da ˗kaso ˈgü.

4 ˈˈKɛɛ mɛn ˗nu ˈö ˈwo ˗pɛn bhë, ˗wo ˗kun nɔɔn˗ ˗së ˈö ˗gban ˗Zlan ˗Wo ˗bha ˗a pö ˗ni ˈgü ˗dhɛ ˈˈpɛpɛ ˈwo kun bɔ ˗ni ˈgü ˗a ˗bha bhë ˗a ˈgü ˈö ˈwo dho ˗a ˈka. 5 ˈDhɛ ˈö ˗kë ˈˈdhʋ̈, ˈyö Filipö ˗yö dho* Samadhi ˗pö* ˈgü ˈö ˗ya Klito ˗wɔn blɛɛˈˈ ˗sü ˗bha mɛn ˗nu ˈwo mü ˗an ˗dhɛ. 6 Mɛn kpö ꞊va ˈwo kun mü, ˈdhɛ ˈö pë ˈö Filipö kun ˗a pö ˗ni ˈgü ˈwo˗ man, ˈö ˗dhidha ˗nu ˈö kun ˗an kë ˗ni ˈgü ˈwo˗ yö, ˗an ꞊gban ˈˈpɛpɛ ˗wo wo ˈˈtʋ ˗to ˗a ˗bha ˗së ˈka. 7 ˗Zuu yaa ˗nu ˗wo ˗kun ˈgo ˗ni ˈgü mɛn ꞊va ꞊dede ˈgü ˈˈgbla ˗sü ˈka, ˈö mɛn ꞊va ꞊dede ˈö ˗an ˗dhɛ ˗ya ga ˗an ˗bha waa ꞊niɔɔnmɛn* ˗nu ˗an ˗dhɛ ˗yö bo. 8 ˗A ˗wɔn ˈgü, zuʋ̈niidadhe ꞊dede ˗yö ˗kë ˈˈkwipö ˈö bhë ˗a ˈgü.

9 Gɔndënën do ˈbhaa ˗yö ˗kë ˈˈkwipö ˈö bhë ˗a ˈgü ˈö ˈwo˗ ˗dhɛ Simɔn. ˗Yö ˗kun ˈˈginandë ˈö˗ këwɔn ˗nu ˈwɔn ˗yö kun Samadhi ˗mɛn ˗nu ˈkun ˗ni ˈgü ꞊dedewo ˗a ˈka. ˗Yö ˗kun ö ˗de ˈsü ˗ni ˈgü ꞊bhlëësü. 10 Mɛn ꞊gban ˈˈpɛpɛ, ˈö sü ˈnën ˈsɛɛn˗ ˗nu ˗bha ˈö yö ˗a ˈka mɛn ˈˈgblʋ̈gblʋ̈ ˗nu ˗bha, ˗wo ˗kun wo ˈˈtʋ ˈto ˗ni ˗a ˗wo ˗bha ꞊dedewo ˈö ˈwo˗ pö: «Gɔndënën ˈö yö ˗Zlan ˗bha ˈˈpiigbɩɩdhɛ ˈö ˈwo˗ ˗dhɛ ˗a ˈkpiisü bhë, yö ˗mü ˗a ˈka.» 11 Kë ˈö˗ wo ꞊dhɛ ˗yö ˗kë ˈˈginandë ˈka, ˈö ˗dhidha ˗wɔn ˗nu ˗kë ˗an ˈˈɲaan ˈö ˗wa ꞊gwëë ˗a ˈgü bhë, ˈyö ˈwo wo ˈˈtʋ ˈto ˗a ˗wo ˗bha. 12 ˈˈKɛɛ ˈdhɛ ˈö Filipö ˗yö nɔɔn˗ ˗së ˈö ˗gban ˗Zlan ˗bha ˗Gblüdëdhɛ waa Yesu Klito ˗an ˗bha ˗a pö, gɔɔn˗ ˗nu waa dhebɔ ˗nu ˗wo ˗we ˗a ˗bha, ˈö ˈwo ˗an bɔ ˈˈyi ꞊bhaa. 13 Simɔn ˗de ˈpö ˗yö ˗we ˗Zlan ˗wo ˗bha, ˈö ˈdhɛ ˈö bɔ ˈˈyi ꞊bhaa yö ˈti ˈˈwɩ ˗a ˗bha kö ˈö ˈgo Filipö ꞊kee˗. ˗Dhidha ˗nu waa ˈwɔn ˈˈmlünmlünsü ˗nu ˈwo kun kë ˗ni ˈgü, ˈö ˗a ˈˈɲan ˗yö ˗da ˗an ˈgü bhë, ˗a ˈwɔn ˗yö ˗a ˗kun.

14 ˈDhɛ ˈö bɔmɛn ˗nu ˈwo to Zedhizadhɛmö bhë, ˈwo˗ man ꞊dhɛ mɛn ˗nu ˗wa ˈˈwɩ ˗Zlan ˗wo ˗bha Samadhi ˗sɛ ˈgü, ˈyö ˈwo Piɛɛ waa Zan ˗an bɔ mü. 15 ˈDhɛ mɛn ˈwo bhë ˈwo ˗lo mü, ˈyö ˈwo ꞊bhɛɛ Yesu ˗bha gwëëˈˈ ˗dɛɛ ˗nu bhë ˗an ˗bha ˈka kö ˗wo ˗zuu ˈˈslʋ̈ʋ̈slʋ̈ ꞊slɔɔ. 16 ˗A ˗gɛn ˗mü ꞊dhɛ, ˈö kun ˈˈdhʋ̈ kö bɔ ˈnën ˈö ꞊waa˗ wo ˈˈyi ꞊bhaa Yesu ˈtɔ ˈgü. ˈˈKɛɛ kö ˗a mɛn ˈbhaa yö ˈti ˗zuu ˈˈslʋ̈ʋ̈slʋ̈ ꞊slɔɔ ꞊klöŋ. 17 ˈDhɛ ˈö ˗kë ˈˈdhʋ̈, ˈyö Piɛɛ waa Zan ˈwo wo ˗kɔ ˗ya ˗an ˗ta, ˈyö ˈwo ˗zuu ˈˈslʋ̈ʋ̈slʋ̈ ꞊slɔɔ.

18 ˈDhɛ ˈö Simɔn ˗ya yö ꞊dhɛ bɔmɛn ˗nu ˗wa wo ˗kɔ ˗ya mɛn ˗ta, ˗a ˗mɛn ˗yö ˗zuu ˈˈslʋ̈ʋ̈slʋ̈ ˗slɔɔ bhë, ˈyö ˈwëëga ˗zɔn ˗an ˈka 19 ˈö˗ pö: «ˈˈPiigbɩɩdhɛ bhë ˗kaa nu n ˗dhɛ ˈpö kö mɛn ˈˈoo ˗mɛn ˈa ˗dho n ˗kɔ ˗ya ˗a ˗ta ˗yö ˗zuu ˈˈslʋ̈ʋ̈slʋ̈ ꞊slɔɔ.» 20 ˈˈKɛɛ ˈyö Piɛɛ ˗ya pö ˗a ˗dhɛ: «Kaa ü ˗bha ˈwëëga ka ˈgü ˗yö shiʋ̈ˈˈ. Ü ˗bha ˈgü pë ˈö ˗Zlan ˗ya gbɔɔ mɛn ˗gɔ ˈˈwɛɛwɛ bhë, ü ꞊mɔɔn˗ ˗bha ˈü˗ ˈdhɔ ˈwëëga ˈka ˗ee? 21 Ü ˗bha pë gbɛ˗ ɛɛnˈˈ pë ˈbhaa ˈö ˗dho kë ü ꞊duaa ˈka ˈwɔn ˈö yö ˗a ˈgü ˈyaa ˈdhö. ˗A ˗gɛn ˗mü ꞊dhɛ ü zuʋ̈piʋ̈dhɛ ˈyaa ˈˈpuu ˗Zlan ˈˈɲan ˈˈdhiʋ̈. 22 ˈDhɛ ˈö ˈˈdhʋ̈, ˗bhö ü ꞊kwaa ü ˗bha ˈwɔn yaa ˈö bhë ˗a ˗zü ˈü bhɛɛˈˈ Zoova ˗dhɛ. ˗A ˈbhaa ˗ya kë ˈwɔn yaa ˈö ü zuʋ̈ˈˈ ˈˈpiʋ̈ bhë ˗yö ˗dho ˗a ˗bhawɔn ˈto, 23 ˈyö ˗tɔ ˈman ü ˗ga, a˗ ˗yö ꞊dhɛ mɛn zë pë ˈˈyi ˈˈgügüsü ˗mü ü ˈka, ˈö ˈü ˈwɔn yaa ˗gɔ ꞊dhuëŋdhɛ ˈgü.» 24 ˈDhɛ ˈö˗ pö ˈˈdhʋ̈, ˈyö Simɔn ˗ya pö ˗an ˗dhɛ: «˗Ka bhɛɛˈˈ* Zoova ˗dhɛ n ˗bha ˈka, kö ˈwɔn ˗nu ˈka ˗an pö bhë ˗a ˈˈwɛɛ ˈbhaa ˈyaa ˗dho n ˈˈdhiʋ̈ ꞊slɔɔ.»

25 ˈDhɛ ˈwo wo bo ˗zlanwopösü ˈka ˈˈsɛ ˈö bhë ˗a ˗dhɛ ꞊gban ˈgü, ˈö pë ˈö Zoova ˗ya pö ˈwo˗ ꞊blɛɛ, ˈyö ˈwo wo ꞊yɛɛ ˗kë Zedhizadhɛmö. ˈDhɛ ˈwo kun ˈdho ˗ni ˈgü, ˗wo nɔɔn˗ ˗së ˗pö Samadhi ˗pö ꞊vadhɛ ˈgü.

26 ˗A ˈˈtʋ̈ŋ ˈö bhë ˗a ˈgü, Zoova ˗bha ˈˈkiö ˗ya ˗pö Filipö ˗dhɛ: «˗Bhö luuˈˈ ˈü ˈdho ˈˈshiaŋ ꞊ʒiaan, ʒiaan ˈö go Zedhizadhɛmö ˈö dho Gaza bhë ˗a ˈka.» (˗A ʒiaan ˈö ˈˈdhʋ̈ ˈˈyɛta ˗ʒian ˗mü.) 27 ˈDhɛ ˈö ˗kë ˈˈdhʋ̈, ˈyö ꞊luu ˈö dho, ˈyö ˗kpan Etiopi mi do ˈö ˗duɛɛ ˈkpii˗ ˈdhö˗ ˗gɔ ˗a ˗bha. ˗A gɔndënën ˈö bhë, ˗yö ˗kun ꞊lamɛn do ˈö yökë Etiopi ˗mɛn ˗nu ˗bha ˗gblüdhe ˈö ˈwo˗ ˗dhɛ Kandasö ˗a ˈˈpiʋ̈ ˗a ˈka. Yö ˈnën ˈö kun ö ˗zo kë ˗ni ˈgü ˗a ˗bha ꞊nɔɔn ꞊gban ˈˈpɛpɛ ˈˈpiʋ̈. ˗Yö ˗dho ˗Zlan ˗dhɔkë Zedhizadhɛmö, 28 ˈyö kun ö ꞊yɛɛ kë ˗ni ˈgü. ˈˈDhügɔ ˈö ꞊soo ˗ya ˗gan bhë, ˗yö ˗kun ˗ya ˗sü ˈka ˗a do ˈgü, ˈö kun ˗Zlan ˗wodhiʋ̈lomɛn Izai ˗bha ˈsëëdhɛ ˗wo pö ˗ni ˈgü ö ˗wo ˗ta. 29 ˈDhɛ ˈö ˗kë ˈˈdhʋ̈, ˈyö ˗Zlan ˗yö bɔ ö ˗bha ˗zuu ˈˈslʋ̈ʋ̈slʋ̈ ˗ta ˈö˗ pö Filipö ˗dhɛ: «˗Bhö ˈdho ˈü yö ˈˈdhügɔnën ˈö bhë ˗a ˗bha, ˈü ˈto ˗a ˈˈsuee mü.» 30 ˈDhɛ ˈö Filipö ˗yö ˗bialö ˈö yö gɔnën ˈö bhë ˗a ˈˈsuee, ˈyö Etiopi mi bhë ˗a ˗wo man kö ˗yö ˗Zlan ˗wodhiʋ̈lomɛn Izai ˗bha ˈsëëdhɛ ˗wo pö ˗ni ˈgü ö ˗wo ˗ta. ˈYö˗ dhɛɛˈˈ kpɔ ˈö˗ pö: «Pë ˈü˗ ˗wo pö ˗ni ˈgü bhë ü˗ ˈgüman ˗së ˈka ˗ee?» 31 ˈYö˗ ˗yɔ bɔ ˈö˗ pö: «Mɛn ˈbhaa yö ˈti˗ ˈgü ˈˈpʋ n ˗dhɛ ˗a ˗dho ˗a ˈgüman ˗kɔ ˗kë ꞊dhɛ?» ˈYö˗ pö Filipö ˗dhɛ ˗yö ˗da ö ˈˈpiʋ̈ gɔnën ˈgü kö ˗yö ˈɲaannu. 32 ˗Zlan ˗Wo ˈˈpian ˈö kun ˗a ˗wo pö ˗ni ˈgü bhë, pë ˈö ˗bɛnzë ˗sü ˈka mü ˈyö ˗tɔ: «˗Wo ˗dho ˗a ˈka ˗a zë ˗dhɛ ˈgü ꞊dhɛ ˈˈbhlaa ˈdhö, ˈö yö ˈti ˈö ˈˈdhi bho ˈkwëë˗ kö ˗yö ˈˈwɩ ꞊dhɛ ˈˈbhlaanën ˈö ö kaakanmɛn ꞊kwɛɛ˗ ˈö ˈyaa ˈˈwɩ ˗a ˈdhö. 33 ˈˈTʋ̈ŋ ˈö ˈlëë˗ ˗yö kun dɔ ˗ni ˈgü ˗a ˗bha ˗a ˈka bhë, wo ˈti ˈˈwɩ ˗a ˗bha kö ˈwɔn ˈö kpɛnŋdhö ˗yö kë ˗a ˗dhɛ. ˈWɔn ˗nu ˈwo ˗gban mɛn ˈö˗ ꞊suugünën ˈka ˗a ˗bha, ˈde dho ˗an blɛɛˈˈ? ˗A ˗gɛn ˗mü ꞊dhɛ ˗wa ˗zë, ˈö˗ ˗bha ˗këdhösü ˈö ˈˈkpɔnŋ ꞊taa yö, ˗yö ɲën.»

34 ˈYö Etiopi mi ˈö bhë ˈö˗ pö Filipö ˗dhɛ: «˗Bhö dɔ ˈˈgbɩɩ˗ ˈü˗ ˈgü ˈˈpʋ n ˗dhɛ. ˈDe ˈö ˗Zlan ˗wodhiʋ̈lomɛn ˗ya ˗wɔn ꞊blɛɛ yö? ˗Yö ˗we yö ꞊dede ö ˈka ˗ee ɛɛnˈˈ ˗yö ˗we mɛn ˈˈwɛɛ ˈbhaa ˈka?» 35 ˈYö Filipö ˗yö ˈwɔn blɛɛˈˈ ˗sü sü, ˈö dɔ ˗Zlan ˗Wo ˈˈpian ˈö bhë ˗a ˗ta ˈö nɔɔn˗ ˗së ˈö ˗gban Yesu ˗bha ˗a pö ˗a ˗dhɛ. 36 ˈDhɛ ˈwo kun ˈdho ˗ni ˈgü ˈö ˈwo yö ˈˈyi ˗gblü do ˗bha, ˈyö gɔndënën bhë ˈö˗ pö Filipö ˗dhɛ: «˗Dhɛ ˗ga, ˈˈyi ˗ga ˈö ꞊nɛn, ˈmën ˈö˗ ˗wɔn ˗ya ˈto kö ˈa bɔ ˈˈyi ꞊bhaa?» 37 —— 38 ˈYö˗ pö ˗wo gɔ ˈö bhë ˗a ˈduaannu. ˈDhɛ ˈö ˗kë ˈˈdhʋ̈, ˈyö waa Filipö ˈwo ꞊yɔɔ ˈˈyi ꞊bhaa, ˈyö Filipö ˗ya bɔ ˈˈyi ꞊bhaa. 39 ˈDhɛ ˈwo go ˈˈyi ꞊bhaa, ˈyö Zoova ˗bha ˗zuu ˗yö go Filipö ˈka ˈzozodhö ˗dhɛ ˈö bhë ˗a ˈgü, ˈyö Etiopi mi yö ˈti ˗kpan ˗a ˗bha ˈzü. ˈDhɛ ˈö ˗kë ˈˈdhʋ̈, ˈyö Etiopi mi ˗yö dho ö ˗bha ˈˈta ˈka ˈˈdhiʋ̈ kö ˗a zuʋ̈ˈˈ ꞊nii ˗yö ˗da ˗ni ˈgü. 40 Filipö ˗zë, ˈö dho ˈˈkan ö ˗ta kö ˗yö Asüdɔdö. ˗Yö ˗bɔ ˈˈsɛ ˈö bhë ˗a ˗dhɛ ꞊gban ˈˈpɛpɛ ˈgü ˈö nɔɔn˗ ˗së pö ˗a ˈˈkwipö ꞊gban ˈgü ˈö dho ˈö yö ˗a ˈka Sezadhe.