Yesu ˗bha bɔmɛn ˗nu këwɔn ˗nu

26 ˈYö Aglipa ˗ya pö Pɔdhö ˗dhɛ: «ˈYa ˈwɔn blɛɛˈˈ ˗sü nu ü ˗dhɛ kö ˈwɔn ˈwo˗ ˗ya ü ˗bha bhë, ü ˗bha ˈö ü ˗gɔ ˈü˗ blɛɛˈˈ.» ˈDhɛ ˈö ˗kë ˈˈdhʋ̈, ˈyö Pɔdhö ˗yö ö ˗gbe ˈgü ˗pʋ kö ˈö˗ ˗zɔn ˗an ˗dhɛ ꞊dhɛ ˈö ˈdho˗ ˈwɔn blɛɛˈˈ. ˈYö˗ pö:

2 «˗Gblüdë Aglipa, ˗a kë ˗sü kö ˈwɔn ˈˈpɛpɛ ˈö Zuifö ˗nu ˗wa ˗ya n ˗bha bhë, mɛn ˈa ˗dho dɔ ˗a ˗kuu ˈˈdhiʋ̈ kö n ˗man ˈö n ˗gɔ ˈa˗ blɛɛˈˈ ꞊dɛɛ ˗yö kë ü ˈka bhë, ˗yö n zuʋ̈ˈˈ ꞊nii ˗da. 3 ˗A ˗gɛn ˗mü ꞊dhɛ ü Zuifö ˗nu ˗bha wɔkɔ ˗nu ꞊gban ˗dɔ ˈkpakpadhö, ˈö pë ˗nu ˈö ˗an ˗wo ˈyaa˗ ˈgü do ˈü ˗an ꞊gban dɔ ˈpö. ˈDhɛ ˈö ˈˈdhʋ̈, a˗ ˗dhɛ ü ˗gɔ kö ˈü ü zuʋ̈ˈˈ kë ˗saa ˈü ü ˈˈtʋ ˈto n ˗bha.

4 «ˈÖ sü n ˈnëndhɛ ˗bha, ˗tosɛta kë ˗kɔ ˈa˗ ˗kë ˗a ˈka n ˗man ˈˈsɛgümɛn ˗nu ˈˈpiʋ̈, ˈa˗ ˗kë ˗a ˈka ˈpö Zedhizadhɛmö, Zuifö ˗nu ꞊gban ˈˈpɛpɛ 5 ˈö ˈwo n dɔ ˈˈdhiʋ̈ ˗be ˗wa ˗dɔ ˗së ˈka. ˗Ya kë ꞊dhɛ ˗wo ˗we ˗a ˗bha ˗be, ˗wo ꞊mɔɔn˗ ˗bha ˈwo˗ ꞊gbɛkiödhɛ ˗kë ˈö ˈwo˗ ˗zɔn ꞊dhɛ a ˗kun Fadhiziɛn ˈka. Fadhiziɛn ˗nu ˈwo ˈˈdhʋ̈, ˈwɔn ˈö ˗gban yi ˗bha ˗Zlan ˗dhɔkë ˗sü ˈtɔŋ˗ ˗nu ˗bha, ˗a ˗wɔn ˗yö ˗an ˗gɔ ˈˈgbɩɩ˗ ˈö ˗ʒiö ˗a ˈka Zuifö ˈˈwɛɛ ˗nu ˈwo to ˗an ˗ta. 6 ˈˈKɛɛ kë ˈö˗ wo ꞊dhɛ pë ˈö ˗Zlan ˗ya ˈˈplünŋ bho yi ˈˈbhɛman ˗nu ˗dhɛ a n ˗zo ˗yö ˗a ˗dhɛ bhë, yö ˈnën ˈö˗ ˗wɔn ˈgü ˈö za ˈdhö dɔ ˗ni ˈgü n ˗bha ꞊dɛɛ yö. 7 ˈˈKɛɛ ˈsa kö pë ˈö ˗Zlan ˗ya ˈˈplünŋ bho ˈˈdhʋ̈ bhë, ˈˈkwɛngɔ ˗kɔŋ do ö ga ꞊plɛ (12) ˈwo yi ˗gɔ ˈˈsɛ ˈgü, ˗an ˈˈɲan ˗yö ˗kun ˗a ˗yökodhiʋ̈ ˗sü ˗gɔ, ˈö˗ ˗wɔn ˈgü ˈwo ˗Zlan ˗bha yö ˗kë wo ꞊faan ꞊gban ˈka ˈɲënŋ˗ ˈgü waa gbeŋ. ˗Gblüdë, n ˗man ˗zo ˗yö ˈwɔn ˈö ˈˈdhʋ̈ ˗a ˗dhɛ ˗sü ˈnën ˈö˗ ˗wɔn ˈgü ˈö Zuifö ˗nu ˈdhö za ˗ya ˗ni ˈgü n ˗bha bhë.

8 «ˈMën ˗kë ˈö ka kpö ˈgü, ˈö ˗kë mɛn ˈbhaa ˗nu ˈgü ꞊dhɛ ˗Zlan ˗bha mɛn ˗bho ga ˈgü ˗sü ˈö bhë ˗zo ˗yö ˗a ˗dhɛ ˗wɔn ˈyaa ˗mü? 9 Man ˗zë ˗yö ˗kun ga ˗sü ˈka n ˈgü ˈˈdhiʋ̈ ˗be ꞊dhɛ n dua ˗mü kö ˈa pë ꞊gban ˈˈpɛpɛ kë kö ˈa ˗gban Yesu ˈö go Nazadhɛtö bhë ˗a ˗gɔ.* 10 Pë ꞊dede ˈa˗ ˗kë Zedhizadhɛmö ˈyö bhë. A mɛn ˈˈslʋ̈ʋ̈slʋ̈ ˗nu bhë ˗an ꞊vadhɛ ˗kun ˈa ˗an ˗da ˗kaso ˈgü, ˈyö sü ꞊dhɛ ˈˈsaabhomɛn ˗nu ˗gɔmɛn ˗nu ˗wo wo ˗wo ˗bho n ˗ta kö ˈa˗ kë ˈˈdhʋ̈. ꞊Waa ˗an zë za ˈka kö ˈwo ˗an zë, a ˗we ˗an zë ˗wɔn ˗bha ˈö yi ˗wo ˗yö ˗kë ˗a ˈgü do. 11 A ˗an ˈˈklʋʋ ˗bhɔ ˈa bɔ ˗a ˈka ˗ʒiaanwo ˗yakwëë ˗kë ˗a ˈgü ˗kɔ ꞊gban ˈˈpɛpɛ ˈgü, ˈa ˈˈgbɩɩdhɛ ˗wɔ ˗an ˗ta kö ˗wo ˈˈkan wo ˗bha ˗zoyödhe ˗bha. ˈDhɛ ˈö ˗kë ꞊dhɛ ˈwɔn ˗yö ˗kun ˗shiö ˗sü ˈka n ˗dhɛ ˗an ˗bha ꞊dedewo bhë, a ˗an ˈˈklʋʋ ˗bhɔ ˈa dho ˈa ˗da ˗a ˈka ˈˈkwipö ˈˈwɛɛ ˗nu ˈwo to ˗an ˈgü.

12 «ˈDhɛ yi do ˈka ˈö ˈˈsaabhomɛn ˗nu ˗gɔmɛn ˗nu ˗wo ˗wogbinŋdhɛ nu n ˗dhɛ ˈwo n bɔ Damasö kö ˈa˗ kë ˈˈdhʋ̈ ˈmü, a ˗kun ˈdho ˗ni ˈgü. 13 ˈDhɛ ˈkwa dɔ ˈɲaan˗ ˗bha ˗ya mɛn ˗gɔ ꞊zinŋgü ˈˈtʋ̈ŋ ˈka, ˗Gblüdë, ˈyö ˈa ˗kpan ˈˈshiʋ̈ ˈbhü do ˈö go dhaŋ˗ ˈgü ˈö ˗ʒiö ˈɲaan˗ ˈbhü ˗ta ˗a ˗bha kö ˗ya ꞊klënŋ yaa mɛn ˗nu ˈwo kun n ꞊kee˗ bhë yi ˗zü. 14 ˈDhɛ mɛn ꞊gban ˈˈpɛpɛ ˈyi ˗puö ˈˈshia˗, ˈyö ˈa ˗wo do ˈbhaa man kö ˗ya pö ˗ni ˈgü n ˗dhɛ Eblö ˗wo ˈgü: ‹Sɔdhö, Sɔdhö, ˈmën ˗kë ˈü n ˈˈklʋʋ bhɔ? Ü pë ˈˈdhiʋ̈˗ kë ˗ni ˈgü ü ˗de ˈka ˗gban n ˗gɔ ˗sü ˈka.›* 15 ˈYö ˈa˗ dhɛɛˈˈ kpɔ ˈa˗ pö: ‹N Dëmɛn, de ˗mü ü ˈka?› ˈYö Dëmɛn ˗ya pö: ‹Maan Yesu ˗mɛn ˈü n ˈˈklʋʋ bhɔ ˗ni ˈgü bhë man ˗mü. 16 ˗Bhö luuˈˈ ˈü dɔ ü ˗gɛn ˗ta. ˈPë ˗kë ˈa n ˗de ˗zɔn ü ˗dhɛ ˈyö ˗tɔ kö ˈa n ˗kɔ ˈˈyɛ ü ˗bha kö ˈü kë n ˗man yökëmɛn ˈka, kö ˈwɔn ˗nu ˈü ˗an yö waa ˈwɔn ˗nu ˈa ˗dho ˗an ˗zɔn ü ˗dhɛ ˈö ˗gban n ˗bha ˈü ˗an ꞊gbɛkiödhɛ kë. 17 A ˗dho ü dha ˈˈsɛ ˈö yö ˗a ˈgümɛn ˗nu waa ˈˈsɛ ˈˈwɛɛ ˈgümɛn ˗nu ˈa ü bɔ ˗ni ˈgü ˗an ˈˈpiʋ̈ bhë ˗an ˗gɔ. 18 A ü ˗bɔ ˗an ˈˈpiʋ̈ kö ˈü ˗an ˈˈɲan ˈˈpʋ, kö ˈü ˗an bho ˗dhɛtiidhɛ ˗bha ˈü nu ˗an ˈka ˗dhɛpuudhɛ ˈgü, kö ˗wo ˈgo Sɔtraan ˗kɔ ꞊löö ˗wo nu ˗Zlan ˗kɔ ꞊löö, ˗yö kë ˈˈdhʋ̈ kö ˗an ˗bha ˈwɔn yaa ˗nu ˗bhawɔn ˗yö ˈto, kö ˈkɛnŋpë ˈö mɛn ˗nu ˈö ˗wa kë ˈˈslʋ̈ʋ̈slʋ̈ ˗zo ˗yö n ˗dhɛ ˗sü ˗wɔn ˈgü ˗an ˗bha ˈka bhë ˗wa ꞊slɔɔ.›

19 «ˈDhɛ ˈö ˗kë ˈˈdhʋ̈, ˗gblüdë Aglipa, pë ˈö Yesu ˗ya pö n ˗dhɛ kö n ˈˈɲan ˈgü ˗ya ˗da bhë, a˗ ˗kë. 20 A˗ zü ˗dɔ Damasö, ˈa dho ˈa˗ ˗kë Zedhizadhɛmö ˗dhɛ waa Zude ˗sɛ ꞊gban ˈˈpɛpɛ ˗an ˈgü, ˈyö ˈa dho ˈa˗ ˗kë ˈpö ˈˈsɛ ˈˈwɛɛ ˗nu ˈgü. Nɔɔn˗ ˈa kun ˗a pö ˗ni ˈgü ˗an ˗dhɛ ˈyö ˗tɔ, ˗an dua ˗mü kö ˗wo ˈgo wo ˗bha ꞊sɔŋ yaa ˈgü ˗wo wo wë slëëˈˈ ˗Zlan ˈˈpiʋ̈ ˈwɔn ˗nu ˈwo˗ ˗zɔn ꞊dhɛ ˗wa ˈgo wo ˗bha ꞊sɔŋ yaa ˈgü ˗an kë ˗sü ˈka. 21 Pë ˈö˗ ˗wɔn ˈgü ˈö Zuifö ˗nu ˗wo n kun ˗Zlan ˗dhɔkë ˗a ˈgü ˗kɔ ˈgü ˈö ˈwo kun ˗a ˈˈpiʋ̈ kö ˈwo n zë, ˈyö bhë. 22 ˈˈKɛɛ ˈdhɛ ˈö ˗kë ꞊dhɛ ˗Zlan ˗yö ˗nu n ˗dhɛ, a ꞊kun ꞊gbɛkiödhɛ kë ꞊dɛɛ mɛn ˗nu ˈö ˗an ꞊bhlëë ˈyaa ꞊va waa mɛn ꞊bhlëësü ˗nu ˈˈɲan ˈˈdhiʋ̈. Pë ˈbhaa ˈkö ˈa ˗dho ˗a pö kö yö ˈti kë ˗a ˈdhɛ ˈö Moizö waa ˗Zlan ˗wodhiʋ̈lomɛn ˗nu ˈwo˗ to ˈˈdhiʋ̈ ˈwo˗ pö ꞊dhɛ ˗yö ˗dho kë ˗a ˈka, ˈyaa ˈdhö. ˗Wa ˗pö ꞊dhɛ 23 Klito dua ˗mü ˗yö saanˈˈ ˈsü kö ˗yö ga. ˈˈKɛɛ ˈdhɛ ˈö ˗kë ꞊dhɛ yö ˈnën ˈö ˗tɔ mɛn ˗blɛɛsü ˈö ˗dho ˈgo ga ˈgü, ˗yö ˗dho ˗dhɛpuudhɛ ˗nɔɔn pö ˈˈsɛ ˈö yö ˗a ˈgümɛn ˗nu waa ˈˈsɛ ˈˈwɛɛ ˈgümɛn ˗nu ˗an ˗dhɛ.»

24 ˈDhɛ ˈö Pɔdhö ˗yö kun ˈwɔn ˗nu ˈwo bhë ˗an blɛɛˈˈ ˗ni ˈgü ˈˈdhʋ̈ ö ˗de ˗ta ˗za dɔ ˗sü ˈka, ˈyö Fɛtusö ˗yö ˗gbla ˈö˗ pö: «Pɔdhö, slaaˈˈ ˗yö ˗da ˗ni ˈgü ü ˈgü! ꞊Klaŋ ˈü˗ ˗kë ˈgbɛ bhë, ˗yö ü kë ˗ni ˈgü slaamɛn ˈka!» 25 ˈYö Pɔdhö ˗ya pö ˗a ˗dhɛ: «Mɛn ꞊bhlëësü Fɛtusö, slaaˈˈ yö ˈti ˗da n ˈgü. ˈWɔn ˈa˗ blɛɛˈˈ ˗ni ˈgü bhë, ˈwɔn ꞊dede ˗mü, ˈˈwlaa˗ ˗wɔn ˈyaa ˗mü. 26 A˗ ˈwɔn ˗dɔ ˈkpakpadhö ꞊dhɛ ˗gblüdë ˈa ˈwɔn blɛɛˈˈ ˗ni ˈgü ˗a ˗dhɛ n ˈflëëgü bhë, ˗yö ˈwɔn ˗nu ˈwo bhë ˗an ꞊gban ˗dɔ. ˗Yö ga ˗sü ˈka n ˈgü ꞊dhɛ ˗a ˈˈwɛɛ ˈbhaa ˈyaa ˗bin ˗sü ˈka ˗a ˗gɔ, ˈyö sü ꞊dhɛ ˈwɔn ˗nu ˈwo bhë wo ˈti kë ˗bindhe ˈgü. 27 ˗Gblüdë Aglipa, ü ü ˗zo ˗yö pë ˈö ˗Zlan ˗wodhiʋ̈lomɛn ˗nu ˗wa pö ˗a ˗dhɛ ˗ee? A˗ ˈwɔn ˗dɔ ꞊dhɛ ü ü ˗zo ˗yö ˗a ˗dhɛ.» 28 ˈYö Aglipa ˗ya pö Pɔdhö ˗dhɛ: «˗A ˗wɔn ˗ya ˈto ˈˈtɩtɩ kö ˈü n zuʋ̈ˈˈ ˈsü kö ˈa kë kletiɛn ˈka.» 29 ˈYö Pɔdhö ˗ya pö: «˗Yö ˗kë ꞊dɛɛ ɛɛnˈˈ yi ˈˈwɛɛ ˈka, pë ˈa˗ ˈˈpiʋ̈, ˈö ˈa ꞊bhɛɛ ˗Zlan ˗dhɛ ˗a ˗wɔn ˈgü ˈyö ˗tɔ, ˈyaa ˗dho kë bhi dosɛnŋ ü ˈka, ˈˈkɛɛ kö mɛn ˈˈpɛpɛ ˈö ˈwo wo ˈˈtʋ ˈto ˗ni ˈgü n ˗wo ˗bha ꞊dɛɛ yö, kaa˗ ˗nu ˈka kë ꞊dhɛ n ˈdhö, ˈˈkɛɛ kö ˈka ˗dho kë ꞊yɔɔ˗ ˈgü ˈpö ꞊dhɛ n ˈdhö.»

30 ˈDhɛ ˈö ˗kë ˈˈdhʋ̈, ˈyö ˗gblüdë ˗yö ꞊luu, ˈyö ˈˈsɛkɔɔnmɛn ˈdhöö, Bedhenisö ˈdhöö, waa mɛn ˈˈpɛpɛ ˈwo kun ˗ya ˗sü ˈka ˗an ˈˈpiʋ̈ bhë ˈwo ꞊luu ˈpö. 31 ˈDhɛ ˈwo kun ˈdho ˗ni ˈgü, ˈyö ˈwo˗ pö wo ˈko ˗nu ˗dhɛ: «Gɔndënën ˈö yö, pë ˈö ˗dho kë ˗a zë ˗gɛn ɛɛnˈˈ ˗a ˗da ˗kaso ˈgü ˗gɛn ˈka ˈyaa ˈdhö.» 32 ˈYö Aglipa ˗ya pö Fɛtusö ˗dhɛ: «˗Ya kë ꞊dhɛ gɔndënën ˈö yö, yö ˈti˗ pö ˗be ö ˗dho ˈdho Sezaa ˗kuu ˈˈdhiʋ̈, ˗yö ˗dho ˈgo ˗kaso ˈgü.»