Yesu ˗bha bɔmɛn ˗nu këwɔn ˗nu
10 Gɔndënën do ˈbhaa ˗yö ˗kun Sezadhe ˈö ˈwo˗ ˗dhɛ Kɔɔnɛi. ˗Yö ˗kun ˈˈsɔdha ˗gɔmɛn* do ˈka ˈˈsɔdha kpö ˈwo˗ ˗dhɛ Itali ˈˈsɔdha* ˗nu bhë ˗a ˈgü. 2 ˗Yö ˗kun ˗Zlan ˗dhɔkëmɛn ˈka. Waa ö ˗bha ˈkɔdhigümɛn ˗nu ˈˈpɛpɛ ˗wo ˗kun ˗suʋ̈ ˗Zlan ˗gɔ ˗mɛn ˗nu ˈka. ˗Yö ˗kun gbɔɔdhe ꞊va ꞊dede kë ˗ni ˈgü ˈˈfleemɛn ˗nu ˗gɔ, ˈö kun bhɛɛˈˈ* ˗ni ˈgü ˗Zlan ˗dhɛ ˗kplawo. 3 ˈDhɛ ˈö ˈkwa dɔ ˈˈlɛlɛ ˗kɔŋ do ˈö ga ˈˈsoodhu* ꞊tɛɛ˗ ˗bha ˈˈdooka, ˈyö˗ ˈˈɲan ˈgü ˗yö ˗da, ˈö ˗kpan ˗Zlan ˗bha ˈˈkiö do ˗bha ˈkpakpadhö kö ˗ya nu ˗a ˗gɔ ˈkɔɔ. ˈYö˗ ˈˈkiö ˗ya pö ˗a ˗dhɛ: «Kɔɔnɛi!» 4 ˈDhɛ ˈö˗ ˗pö ˈˈdhʋ̈, ˈyö Kɔɔnɛi ˗ya ˗ga ˈö ˈˈsuʋ̈ ˗yö ˗da ˗a ˈgü, ˈö˗ dhɛɛˈˈ kpɔ ˈö˗ pö: «ˈKwa˗ man ˈmü n Dëmɛn?» ˈYö˗ ˗yɔ bɔ ˗a ˗gɔ ˈö˗ pö: «Ü ˗bha bhɛɛwo ˗nu waa gbɔɔdhe ˗nu ˈü ˗an ˗kë ˈˈfleemɛn ˗nu ˗dhɛ bhë, ˗wa nu ˗wa ˗lo ˗Zlan ˈˈɲan ˈˈdhiʋ̈ dhaŋ˗ ˈgü, ˗an ꞊gban ˗wa zuʋ̈ˈˈ ˈˈpiʋ̈. 5 ˈDhɛ ˈö ˈˈdhʋ̈, ˗bhö mɛn bɔ Ʒope kö gɔndënën do ˈö ˈmü ˈö ˈwo˗ ˗dhɛ Simɔn, ˈö˗ ˈtɔ ˗ya ˗a ˗ta ˗yö ˗kë Piɛɛ ˈka bhë, ˗wa pö ˗a ˗dhɛ ˗yö nu. 6 ˗A gɔndënën ˈö bhë ˗yö ˗dhɛŋ ˗bhɔ wü kwi ˗yökëmɛn do ˈwo˗ ˗dhɛ Simɔn, ˈö˗ ˗bha ˈkɔ ˈdhö ꞊weeyi ˈˈsuee ˗a ˗gɔ ˈkɔɔ.» 7 ˈDhɛ ˈö ˈˈkiö ˈö kun ˈwɔn blɛɛˈˈ ˗ni ˈgü ˗a ˗dhɛ bhë ˈö ˗ʒiö, ˈyö Kɔɔnɛi ˗yö to mü ˈö ö ˗bha yökëmɛn ˗nu ꞊plɛ waa ˈˈsɔdha ˗nu ˈwo kun ˗a ˗kɔ ꞊löö bhë ˗a mɛn do ˈö ˗Zlan ˗dhɔkëmɛn ˈka ˗an ˗dhɛ, 8 ˈö ˈwɔn ˈˈpɛpɛ ˈö ˗kë bhë ˗a ꞊blɛɛ ˗an ˗dhɛ, ˈö go mü ˈö ˗an bɔ Ʒope.
9 ˈDhɛ ˈö˗ ˗ta ˗dhɛ ˗yö ꞊kpɔɔ kö ˗wo ˈdho ˗ni ˈgü, kö ˗wa ꞊ɲɔɔn Ʒope ˗dhɛ ˗bha, kö ˈkwa dɔ ˈɲaan˗ ˗bha ˗ya mɛn ˗gɔ ꞊zinŋgü ˈˈlɛlɛ* ꞊tɛɛ˗ ˗bha, ˈyö Piɛɛ ˗yö ˗da ˈkɔ ˗ta* ˈˈdhuŋ kö ˈö bhɛɛˈˈ. 10 ˈˈKɛɛ ˈyö din˗ ˗yö ˗ya ˗a kë ˗sü ˗bha ꞊dedewo, ˈö ˗bhöpë ˗bhö ˗dhɔ ˗ya kun. ˈDhɛ ˈwo kun ˗bhöpë ˗kpa ˗ni ˈgü ˗a ˗dhɛ, ˈyö˗ ˈˈɲan ˈgü ˗yö ˗da, 11 ˈyö ˗kpan dhaŋ˗ ˗bha kö ˗a ˈˈdhi ˗ya ˈˈpʋ, kö pë ˈbhaa ˈö bhɔ yɩɩga sɔ ˈˈgbɛɛ do ˗bha ꞊waa˗ ˈkun ˗a ˈˈtʋ ˗yiishiö ˈka ˗wa yɔɔˈˈ ˗ni ˈgü ˈˈsɛ ˗ta. 12 ˗A sɔ ˈö ˈˈdhʋ̈ ˗a ˈgü, ꞊kwlaatawü ˗nu, ˗ta ˈgwü ˗ta ˗wü ˗nu waa ˗mannën ꞊suu ˈˈpɛpɛ ˈwo ˈˈkpɔnŋ ꞊taa ˗wo ˗kun ˗a ˈgü. 13 ˈYö ˗wo do ˈbhaa ˗yö ˗we ˈö˗ pö Piɛɛ ˗dhɛ: «Piɛɛ, ˗bhö luuˈˈ, ˗an zë ˈü ˗an ˗bhö!» 14 ˈˈKɛɛ ˈyö Piɛɛ ˗ya pö: «˗Abin ꞊maan n Dëmɛn, pë ˗nu ˈö ˈtɔŋ˗ ˗ya pö ˗wo ˗dhiisü ɛɛnˈˈ ˈwaa ˈˈslʋ̈ʋ̈slʋ̈ bhë, n ˈti ˗an ˗bhö do toŋtoŋdhö.» 15 ˈYö ˗wo ˈö bhë ˈö ˗we ꞊plɛ ˗naan wo ˈö˗ pö ˗a ˗dhɛ: «Pë ˈö ˗Zlan ꞊yaa˗ kë ˈˈslʋ̈ʋ̈slʋ̈, ˈbhaa ˗dho ˗a pö ˈü˗ ˗dhɛ ˈzü pë ˗dhiisü.» 16 ˈDhɛ ˈö ˗wo ˈö bhë ˈö ˗we ˗yaaga ˗naan wo, ˈyö to mü ˈö sɔ ˈˈpɛn ˈö bhë ˈwo˗ sü ˈwo dho ˗a ˈka dhaŋ˗ ˈgü.
17 ˈDhɛ ˈö Piɛɛ ˗yö kun ö ˗de dhɛɛˈˈ kpɔ ˗ni ˈgü pë ˈö˗ yö bhë ˗a ˗gɛn ˈka, kö mɛn ˗nu ˈö Kɔɔnɛi ˗yö ˗an bɔ bhë, ˗wa mɛn ˗nu dhɛɛˈˈ ˈkpɔ Simɔn ˗bha ˈˈkwɛnŋdhɛ ˈka, ˗wa ˗lo ˈˈkwɛnŋdhö ˗wo dɔ ˗sü ˈka ˈˈkpan ˈˈdhiʋ̈. 18 ˈYö ˈwo ˈkɔdë ˗dhɛ ˈwo˗ dhɛɛˈˈ kpɔ kö ˗ya kë ꞊dhɛ Simɔn ˈö ˈwo˗ ˗dhɛ Piɛɛ bhë, ˗yö ˗dhɛŋ ˗bhɔ ˗a ˗gɔ ˈkɔɔ ˗ya pö wo ˗dhɛ. 19 Piɛɛ ˗yö ˗to ö ˗zota ˗sü ˗bha pë ˈö˗ yö bhë ˗a ˈgü, ˈyö ˗Zlan ˗bha ˗zuu ˗ya pö ˗a ˗dhɛ: «˗Dhɛ ˗ga! Gɔɔn˗ ˗nu ˗yaaga ˗wo ü mɛɛnˈˈ ˗ni ˈgü. 20 ˈDhɛ ˈö ˈˈdhʋ̈, ˗bhö luuˈˈ ˈü yɔɔˈˈ kö kaa˗ ˗nu ˈka ˈdho, ü zuʋ̈ˈˈ ˈyaa ˗dho ˈto ˈzlöö, ˗a ˗gɛn ˗mü ꞊dhɛ man ˈnën ˈa ˗an bɔ.» 21 ˈYö Piɛɛ ˗yö ꞊yɔɔ ˈö dho mɛn ˗nu ˈwo bhë ˗an ˈˈpiʋ̈ ˈö˗ pö ˗an ˗dhɛ: «Man ˈö ˈka n mɛɛnˈˈ ˗ni bhë, man ˈnën ˈa yö. ˈKwa˗ man mü?» 22 ˈYö ˈwo˗ pö ˗a ˗dhɛ: «Kɔɔnɛi ˈö ˗kë ˈˈsɔdha ˗gɔmɛn ˈö kpɛnŋdhö, ˈö ˗suʋ̈ ˗Zlan ˗gɔ, ˈö ˈwo˗ ˗wɔn ˗së ꞊blɛɛ Zuifö ˗nu ˗bha ˈˈsɛ ꞊gban ˈˈpɛpɛ ˈgü bhë, yö ˈnën ˈö ˗Zlan ˗bha ˈˈkiö do ˗ya pö ˗a ˗dhɛ ˗yö mɛn bɔ ü ˈˈpiʋ̈ kö ˈü nu ˗a ˗gɔ ˈkɔɔ, kö ˗wo ˈö ü ˗gɔ ˈü˗ blɛɛˈˈ kö ˗ya man.» 23 ˈDhɛ ˈö ˗kë ˈˈdhʋ̈, ˈyö˗ pö ˗an ˗dhɛ ˗wo ˗da ˈkɔɔ, ˈyö ö ˗kɔ ˗ya ˗an ˗dhɛŋ ˗gɔ.
ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ꞊luu ˈö waa˗ ˗nu ˈwo dho. ˗A ꞊dhegblüzë ˗nu ˈwo Ʒope ˗a mɛn ˈbhaa ˗nu ˗wo ˗ʒiö ˗an ˈˈpiʋ̈ ˈö waa˗ ˗nu ˈwo dho. 24 ˗A ˗dhɛkpaɔyi ˈö dɔ ˗a ˈˈpiʋ̈ ˈyö ˈwo ˗lo Sezadhe. Kɔɔnɛi ˗yö ˗kun ö ˈˈɲan ˈto ˗ni ˈgü ˗an ˗gɔ, kö ˗ya ö ˗bha ˈkɔɔmɛn ˗nu waa ö ˈˈtɔŋdë ˈˈgbɩɩ˗ ˗nu ˗an ˗dhɛ wo ˈkwëëdhö. 25 ˈDhɛ ˈö Piɛɛ ˗yö ˗da ˈkɔɔ, ˈyö Kɔɔnɛi ˗yö dho ˗a ˗gɔ ʒiaan˗, ˈö yö ö kpɔn ˈgü ˗a ˈˈdhiʋ̈ ˈö ꞊dhɔŋ˗ ˗da ˗a ˗dhɛ. 26 ˈˈKɛɛ ˈyö Piɛɛ ˗yö ö ˗kɔ ˗da ˗a ˈgü ˈö˗ ꞊luu ˈö˗ pö ˗a ˗dhɛ: «˗Bhö luuˈˈ, mɛnbhɩɩdhe ˗mü n ˈka ˈpö ꞊dhɛ ü ˈdhö.» 27 ˗Yö ˗to ˈwɔn blɛɛˈˈ ˗sü ˗bha Kɔɔnɛi ˈˈpiʋ̈ ˈö ˈwo ˗da ˗a ˈka ˈkɔɔ, ˈyö ˗kpan mɛn ꞊va ꞊dede ˗bha wo ˈkwëëdhö mü. 28 ˈYö˗ pö ˗an ˗dhɛ: «Ka ꞊dede ka˗ ˈwɔn ˗dɔ ˈkpakpadhö ꞊dhɛ ˗a ˗dhɛ ˈyaa˗ ˗bha toŋtoŋdhö kö Zuifö mi waa mɛn ˈö ˈˈsɛ ˈˈwɛɛ ˈgümɛn ˈka ˗wo kë wo ˈkwëëdhö ˗dhɛ do ˈgü, ɛɛnˈˈ kö ˗yö ꞊ɲɔɔn ˗a ˈka ꞊klöö˗ ˗ʒiaanwo. ˈˈKɛɛ ˗Zlan ꞊yaa˗ ˗zɔn n ˗dhɛ ꞊dhɛ n dua ˈyaa ˗mü kö ˈa mɛn ˈbhaa ˗dhɛ mɛn ˗dhiisü ɛɛnˈˈ mɛn ˈö ˈyaa ˈˈslʋ̈ʋ̈slʋ̈. 29 Yö ˈnën ˈö˗ ˗wɔn ˈgü, ˈdhɛ ˈka mɛn bɔ n ˗dhɛ, n ˈti˗ ˗da za ˈgü ˈa nu. ˈDhɛ ˈö ˈˈdhʋ̈ ˈman nu, ˈwɔn ˈö ˈka n ˗dhɛ ˗a ˈka, ˗kaa pö kö ˈa˗ man.»
30 ˈDhɛ ˈö˗ pö ˈˈdhʋ̈, ˈyö Kɔɔnɛi ˗ya pö: «˗A ˗dhɛkpaɔyi ˗ya kë ˗yiishiö ꞊dɛɛ, kö ˈkwa dɔ ˈˈtʋ̈ŋ ꞊dede ˈö yö ˗a ˈka, ˈˈlɛlɛ ˗kɔŋ do ö ga ˈˈsoodhu ꞊tɛɛ˗ ˗bha, ˈa kun bhɛɛˈˈ ˗ni ˈgü n ˗gɔ ˈkɔɔ. ˈDhɛ ˈa kun bhɛɛˈˈ ˗ni ˈgü, ˈyö to mü ˈö gɔndënën do ˈö˗ ˗bha sɔ ˈbhü ˗yö kun bhɔ ˗ni ˈgü ˈö ˗wo n ˈwëëdhö. 31 ˈYö˗ pö n ˗dhɛ: ‹Kɔɔnɛi, ˗Zlan ˗ya ü ˗bha bhɛɛwo man, ü ˗bha gbɔɔdhe ˗nu ˈü ˗an ˗kë ˈˈfleemɛn ˗nu ˗dhɛ bhë, ˗an ꞊gban ˗wa zuʋ̈ˈˈ ˈˈpiʋ̈. 32 ˈDhɛ ˈö ˈˈdhʋ̈, ˗bhö mɛn bɔ Ʒope kö gɔndënën do ˈö ˈmü ˈö ˈwo˗ ˗dhɛ Simɔn, ˈö˗ ˈtɔ ˗ya ˗a ˗ta ˗yö ˗kë Piɛɛ ˈka bhë, ˗wa pö ˗a ˗dhɛ ˗yö nu. ˗A gɔndënën ˈö bhë ˗yö ˗dhɛŋ ˗bhɔ wü kwi ˗yökëmɛn ˈö ˈwo˗ ˗dhɛ Simɔn, ˈö˗ ˗bha ˈkɔ ˈdhö ꞊weeyi ˈˈsuee bhë ˗a ˗gɔ ˈkɔɔ.› 33 Yö ˈnën ˈö˗ ˗wɔn ˈgü ˈa mɛn bɔ ü ˗dhɛ ˈzozodhö bhë. Ü˗ ˗kë ˗së ˈpö ˈü nu ˈyö. ˈDhɛ ˈö ˈˈdhʋ̈, mɛn ꞊gban ˈya nu ˗Zlan ˈˈɲan ˈˈdhiʋ̈ kö ˗wo ˈö Zoova ˗ya dɔ ü ˈˈdhi bhë ˈü˗ pö kö ˈyi˗ man.»
34 ˈDhɛ ˈö ˗kë ˈˈdhʋ̈, ˈyö Piɛɛ ˗yö ˈwɔn blɛɛˈˈ ˗sü sü ˈö˗ pö: «ˈMan˗ ˈgüman ˈzlee ˈkpakpadhö ꞊dhɛ ˗Zlan ˈyaa mɛn ˗nu ˗zë ˈgü kë. 35 Mɛn ˈˈoo ˗mɛn ˈö go ˈˈsɛ ꞊suu ˈˈoo ˗su ˈgü ˈö ˗suʋ̈ ˗a ˗gɔ, ˈö ˈwɔn ˈö kpɛnŋdhö ˗a ˗kë, ˗a ˗mɛn ˗ya ˗dhɛ ˗së. 36 ˗Yö nɔɔn˗ ˗bɔ Izraɛdhö ˈnën ˗nu ˗dhɛ. Nɔɔn˗ ˈö ˈˈdhʋ̈ ˗yö ˗kun nɔɔn˗ ˗së ˈö ˗gban ˗dhikodhɛ ˈö bɔ Yesu Klito ˗ta ˗a ˗bha bhë ˗a ˈka. Yesu ˈö bhë, yö ˈnën ˈö mɛn ꞊gban ˈˈpɛpɛ Dëmɛn ˈka. 37 ˈWɔn ˈö mɛn ˗nu kun ˗a blɛɛˈˈ ˗ni ˈgü Zude ˗sɛ ꞊gban ˈˈpɛpɛ ˈgü, ˈˈkɛɛ ˈö˗ zü ˗yö dɔ Galile ˗sɛ ˈgü kö Zan ˗ya ö bo ˈwɔn ˈö ˗gban ˗bɔyibhaasü ˗bha ˗a blɛɛˈˈ ˗sü ˈka bhë, ka ꞊dede ka˗ ˗dɔ. 38 ˗Yö ˗gban ˗kɔ ˈö ˗Zlan ˗yö ö ˗kɔ ˗yɛ ˗a ˈka Yesu ˈö go Nazadhɛtö bhë ˗a ˗bha ö ˗bha ˗zuu ˈˈslʋ̈ʋ̈slʋ̈ ˈka, ˈö ˈˈpiigbɩɩdhɛ nu ˗a ˗dhɛ, waa ˗kɔ ˈö Yesu ˗yö bɔ ˗a ˈka ˈˈsɛ ˈgü ˈö ˈwɔn ˗së ˗kë mɛn ˗nu ˗dhɛ, ˈö mɛn ˈˈpɛpɛ ˈö Dügɔmɛn kun ˗an ˈˈklʋʋbhɔ ˗ni ˈgü ˗an ˗dhɛ bo ˗a ˈka bhë ˗a ˗bha. ˗Yö ˈwɔn ˗nu ˈwo bhë ˗an ˗kë ˈˈdhʋ̈, ˈyö sü ꞊dhɛ ˗Zlan ˗yö ˗kun ˗a ˈˈpiʋ̈. 39 ˈWɔn ˈˈpɛpɛ ˈö ˗an ˗kë Zuifö ˗nu ˗bha ˈˈsɛ waa Zedhizadhɛmö ˗dhɛ ˗an ˈgü bhë, yi ˈˈɲan ˗yö ˗da ˗an ˈgü. ˈˈKɛɛ ˗wa ˗dɔ ˈˈdhü ˗bha, ˈö ˈwo˗ zë. 40 ˗Dhɛkpaɔyi ˗yaaga ˗naan ˈka, ˗Zlan ˗ya ˗bho ga ˈgü, ˈö˗ ˗kë ˈö mɛnbhɩɩdhe ˗nu ˗wo ˗kpan ˗a ˗bha. 41 ˈˈKɛɛ mɛn ꞊gban ˈˈpɛpɛ wo ˈti ˗kpan ˗a ˗bha. Mɛn ˗nu ˈö ˗Zlan ˗ya to ˈˈdhiʋ̈ ˈö ö ˗kɔ ˗yɛ yi ˗bha, ˈö yaa˗ ˗nu ˈyi pë ˗bhö, ˈö ˈyi müpë ˗nu mü yi ˈkwëë˗ kö ˗ya ˈgo ga ˈgü bhë, yi ˈnën ˈyi ˗kpan ˗a ˗bha. 42 ˗Ya ˈgo mü ˈzü, ˗ya ˗pö yi ˗dhɛ ˈyi ˗zlanwopö mɛn ˗nu ˗dhɛ kö ˈyi˗ ˗zɔn ꞊dhɛ yö ˈnën ˈö ˗Zlan ˗yö ö ˗kɔ ˗yɛ ö ˗bha kö ˈö za dɔ mɛn ˗nu ˈwo ˈˈbhɩɩ˗ waa mɛn ˗nu ˈö ˗wa ga ˗an ˗bha. 43 ˈWɔn ˈö ˗gban ˗a ˗bha, ˗Zlan ˗wodhiʋ̈lomɛn ˗nu ˈˈpɛpɛ ˗wa ˗to ˈˈdhiʋ̈ ˈö ˈwo˗ ꞊blɛɛ, ˈö ˈwo˗ pö ꞊dhɛ mɛn ˈˈoo ˗mɛn ˈö ˗dho ö ˗zo yö ˗a ˗dhɛ, ˗a ˗mɛn ˗bha ˈwɔn yaa ˗nu ˗bhawɔn ˗dho ˈto ˗a ˈtɔ ˈgü.»
44 Piɛɛ ˗yö ˗to ˈwɔn ˗nu ˈwo bhë ˗an blɛɛˈˈ ˗sü ˗bha ˈö ˗zuu ˈˈslʋ̈ʋ̈slʋ̈ ˗yö ꞊yɔɔ mɛn ˈˈpɛpɛ ˈwo kun wo ˈˈtʋ ˈto ˗ni ˈgü bhë ˗an ˗ta. 45 Yesu ˗bha gwëëˈˈ ˗nu ˈö ˗wa ˈgo ˈˈbɔnŋ, ˈö waa Piɛɛ ˗nu ˈwo nu bhë, ˈdhɛ ˈwo˗ yö ꞊dhɛ ˗Zlan ˗ya ö ˗bha ˗zuu ˈˈslʋ̈ʋ̈slʋ̈ gbɔɔdhe kë ˈˈwɛɛwɛ mɛn ˗nu ˈwo ˈˈsɛ ˈˈwɛɛ ˈgümɛn ˗nu ˈka ˗an ˗dhɛ, ˗a ˈwɔn ˗yö ˗an ˗kun ꞊dedewo. 46 ˈYö sü ꞊dhɛ mɛn ˗nu ˈwo bhë, ˗wo ˗kun ˈwɔn blɛɛˈˈ ˗ni ˈgü ˗wo ˈˈwɛɛ ˗nu ˈgü, ˈö ˈwo kun ˗Zlan ˈtɔ bhɔ ˗ni ˈgü. ˈDhɛ ˈö ˗kë ˈˈdhʋ̈, ˈyö Piɛɛ ˗ya pö: 47 «ˈDhɛ ˈö ˗kë ꞊dhɛ mɛn ˗nu ˈwo yö ˗zuu ˈˈslʋ̈ʋ̈slʋ̈ ˗ya yɔɔˈˈ ˗an ˗ta ˈpö ꞊dhɛ kwa ˈdhö bhë, mɛn ˈbhaa ꞊mɔɔn˗ ˗bha ˈö˗ pö ˈwaa ˗dho bɔ ˈˈyi ꞊bhaa ˗ee?» 48 ˈYö˗ pö ˗wo ˗an bɔ ˈˈyi ꞊bhaa Yesu Klito ˈtɔ ˈgü. ˈDhɛ ˈö ö bo ˗kë ˈˈdhʋ̈ ˗sü ˈka, ˈyö ˈwo˗ pö ˗a ˗dhɛ ˗yö ˗dhɛkpaɔyi ˈnën ˈbhaa kë wo ˈˈpiʋ̈ mü.