Yesu ˗bha bɔmɛn ˗nu këwɔn ˗nu

14 Ikoniɔmö mü, Pɔdhö waa Baanabasö ˗wo ˗dho ˈwo ˗da Zuifö ˗nu ˗bha ˗yakwëë ˗kë ˗a ˈgü ˗kɔ ˈgü. ˗Kɔ ˈwo ˈwɔn ꞊blɛɛ ˗a ˈka mü, ˗ya ˗kë ˈö Zuifö ˗nu waa Glɛkö ˗nu ꞊va ꞊dede ˗wo ˗we ˗Zlan ˗wo ˗bha. 2 ˈˈKɛɛ Zuifö ˗nu ˈdhɛ wo ˈti ˈˈwɩ ˗Zlan ˗wo ˗bha bhë, ˗wo ˈˈsɛgümɛn ˗nu ˗blü kö ˗wo ˗gban kwa ꞊dhegblü ˗nu ˗gɔ, ˈö ˈwo˗ ˈˈslö ꞊mɛɛn kö ˗an ˗san ˗yö ˗da ˗an ˈgü. 3 Pɔdhö waa Baanabasö ˗wo ˗gwëë Ikoniɔmö mü, ˈö ˈwo ˈwɔn ꞊blɛɛ mɛn ˗nu ˗dhɛ ˗zogbandhe ˈka ꞊faan ˈö Zoova ˗ya nu ˗an ˗dhɛ bhë ˗a ˈsaa˗ ˈgü. ˗A ˈˈtʋ̈ŋ ˈö bhë ˗a ˈgü, ˗yö ˗bɔ ˗an ˗ta ˈö ˗dhidha waa ˈwɔn ˈˈmlünmlünsü ˗nu ˗kë, ˈö˗ ˗zɔn ꞊dhɛ ˈö ˗bha ˗gasitɛ ˈö ˈwo˗ ˗wɔn blɛɛˈˈ ˗ni ˈgü bhë, ˈwɔn ꞊dede ˗mü. 4 ˈDhɛ ˈö ˗kë ˈˈdhʋ̈, ˈyö ˗kankwëëdhe ˗yö ˗da ˈpömɛn ˗nu ꞊zinŋgü. ˗A mɛn ˈbhaa ˗nu ˗wo ˗bɔ Zuifö ˗nu ˈka, ˈyö˗ ˈmɛn ˈwo to ˈwo bɔ bɔmɛn ˗nu ˈka. 5 ˈˈSɛgümɛn ˗nu, Zuifö ˗nu waa wo ˗gɔmɛn ˗nu ˗wo ˗kun ˗a ˈˈslö mɛɛnˈˈ ˗ni ˈgü kö ˈwo ˈlëë˗ dɔ ˗an ˗bha, ˈwo ˗an ˗zuö ˗gwö ˈka. 6 ˈDhɛ ˈö Pɔdhö waa Baanabasö ˈwo˗ ˈwɔn dɔ ˈˈdhʋ̈, ˈyö ˈwo ꞊duëë ˈö ˈwo dho Likaoni ˗sɛ ˈgü, ˈˈkwipö ˗nu ˈwo ˗an ˗dhɛ Dhitrö, Dɛɛbe waa ˗dhɛ ˗nu ˈwo˗ ˗züzü ˗an ˈgü. 7 ˗Dhɛ ˗nu ˈwo bhë ˗an ˈgü, ˗wo ˗dho nɔɔn˗ ˗së pö ˗sü ˈka ˈˈdhiʋ̈ ˗kplawo.

8 Dhitrö ˗pö ˈgü, gɔndënën do ˈbhaa ˗yö ˗kë ˈɲaannu ˗sü ˈka, ˈö˗ ˗gɛn ˗nu kun ꞊niɔɔnsü ˈka. ˗Yö ˗bhɔ kö ˗yö ꞊niɔɔnsü ˈka, ˈö yö ˈti ˈˈta ˈsü do toŋtoŋdhö. 9 ˈDhɛ ˈö Pɔdhö kun ˈwɔn blɛɛˈˈ ˗ni ˈgü, gɔndënën ˈö bhë ˗yö ˗kun ö ˈˈtʋ ˈto ˗ni ˈgü ˗a ˗wo ˗bha. ˈDhɛ Pɔdhö ˗ya ˗ga ˗pinŋdhö ˈö˗ yö ꞊dhɛ ˗zoyödhe ˗ya ˗gɔ, ˗a ˗dhɛ ꞊mɔɔn˗ ˗bha ˗yö bo, 10 ˈyö ö ˗wo ˈˈdhiʋ̈ ꞊luu ˈö˗ pö ˗a ˗dhɛ: «˗Bhö luuˈˈ ˈü dɔ ü ˗gɛn ˗ta.» ˈYö gɔndënën ˈö bhë ˈö ꞊luu ˗wladhö ˈö ˗ya ˈˈta ˈsü ˗sü ˗bha. 11 ˈDhɛ mɛn ꞊va ˈwo ˗kë mü bhë ˈwo ˈwɔn ˈö Pɔdhö ˗ya kë bhë ˗a yö, ˈyö ˈwo ˗ya ˈˈgbla ˗sü ˗bha Likaoni ˗wo ˈgü ˈwo˗ pö: «˗Zlan ˗nu ˗wa mɛnbhɩɩdhe ˗kwi ˗da wo ˗bha, ˗wa yɔɔˈˈ ˗wa nu kwa ˈˈpiʋ̈!» 12 ˈYö ˈwo ˗ya Baanabasö ˗dhɛ ˗sü ˗bha Zösö, ˈö ˈwo Pɔdhö ˗dhɛ Ɛɛmɛsö, ˗a ˗gɛn ˗mü ꞊dhɛ yö ˈnën ˈö kun ˗an ˗wo ˈˈdhiʋ̈ ˈsü ˗ni ˈgü. 13 ˈDhɛ ˈö ˗kë ˈˈdhʋ̈, ˈyö Zösö ˈö˗ ˗dhɔkë ˗a ˈgü ˗kɔ ˗yö kun ˗da ˈplöö ˗dhɛ ˈgü bhë, ˗a ˗bha ˈˈsaabhomɛn ˗yö nu ˗du ˗nu waa ꞊blëë ˈˈbin ˗nu ˈwo ˗an ꞊koŋ ˗kë, ˗a ˈfaan˗ ˗nu ˈka ˈˈkwipö ˈö bhë ˗a ˈˈkwee ˈˈdhi ˗nu ˈˈdhiʋ̈. ˗Yö ˗kun ˗a ˈˈpiʋ̈ ꞊dhɛ waa mɛn ꞊va ˈwo kun mü bhë, ˈwo ˈˈsaa˗ ˗nu bho.

14 ˈˈKɛɛ ˈdhɛ bɔmɛn Baanabasö waa Pɔdhö ˈwo˗ man ˈˈdhʋ̈, ˈyö ˈwo wo ˗bha sɔ ˗nu ꞊pɛɛ, ˈyö ˈwo dho ˈwo ˗sɔ mɛn ꞊va ˈwo bhë ˗an kpö ˈgü mü ˈö ˈwo ˗gbla ˈwo˗ pö: 15 «ˈMën ˗kë ˈö ˈka ˈwɔn ꞊suu ˈö ꞊nɛn ˗a ˗kë? Mɛnbhɩɩdhe ˗mü yi ˈka ˈpö ꞊dhɛ ka ˈdhö, ˈö kwaa˗ ˗nu kwa ˗bha saanˈˈ ˈdhö do. Nɔɔn˗ ˗së ˈnën ˈyi˗ pö ka ˗dhɛ, ˗yö kë ˈˈdhʋ̈ kö ˈka ˈˈkan pë ˗nu ˈö ˗an ꞊bhlëë ˈyaa ˈdhö ˈö ˈwo yö ˗an ˗bha, kö ˈka ka wë slëëˈˈ ˗Zlan ˈö ˈˈbhɩɩ˗, ˈö dhaŋ˗, ˈˈsɛ, ꞊weeyi waa ˗an ˈgüpë ˗nu ꞊gban ˈˈpɛpɛ ˗da bhë ˗a ˈˈpiʋ̈. 16 ˈÖ˗ ˗bhɔ ˈˈdhʋ̈ ꞊kwɛŋzü, ˗yö ö ˗kwaa ˈˈsɛgɔ ˈˈpɛpɛ ˈwo ˈdhö ˗an ˈgümɛn ˗nu ˗zü kö ʒiaan ˈö ˗dhi ˗an ˗dhɛ ˗wa ˈsü. 17 ˈˈKɛɛ ˗yö mɛn ˈö˗ ˈka ˗a ˗zɔn ˈwɔn ˗së ˗nu kë ˗sü ˈka ˗kplawo. ˗Ya ˗kë ˈö dha ˈˈyi ˗yö go dhaŋ˗ ˈgü ˈö ban, ˈö ka ˗bha tapë ˗nu ˗wo ˗dhi ö ˈˈtʋ̈ŋ ˗së ˗bha, ˈö ˗bhöpë ˈö ˗mɔn ka ˗bha ˗a nu ka ˗dhɛ kö ka zuʋ̈ˈˈ ꞊nii ˗yö ˗da ꞊dedewo.» 18 ˈKö ˗kë ꞊dhɛ ˗wa ˗pö ˈˈdhʋ̈, mɛn ˗nu ˈwo bhë ˗an ˗kɔ ˗bho ˈˈsaa˗ ˗bho wo ˈˈdhiʋ̈ ˗sü ˗bha ˗sü ˗yö ˗kë Pɔdhö waa Baanabasö ˗an ˗kwaa ˈˈgbɩɩ˗.

19 ˈDhɛ ˈö ˗kë ˈˈdhʋ̈, ˈyö Zuifö ˈbhaa ˗nu ˗wo go Antiɔshö ˗pö waa Ikoniɔmö ˗pö ˗nu ˈgü ˈwo nu ˈö ˈwo ˗da mɛn ꞊va ˈwo ˗kë mü bhë ˗an ˈˈtʋʋ, ˈyö ˈwo Pɔdhö ˗zuö ˗gwö ˈka. ˈDhɛ ˈwo˗ ˗ga ꞊dhɛ ˗ya ga, ˈyö ˈwo˗ ꞊gblʋʋ ˈwo go ˗a ˈka ˈplöö. 20 ˈˈKɛɛ ˈdhɛ ˈö Yesu ˗bha gwëëˈˈ ˗nu ˗wo nu ˈwo ꞊klëën ˗a ˗zü, ˈyö ꞊luu ˈö ˗da ˈplöö. ˗Dhɛkpaɔyi ˈö dɔ ˗a ˈˈpiʋ̈, ˈyö waa Baanabasö ˈwo dho Dɛɛbe. 21 ˈDhɛ ˈwo nɔɔn˗ ˗së pö ˈˈkwipö ˈö bhë ˗a ˈgü, ˈö ˈwo mɛn ꞊vadhɛ ˗kë Yesu ˗bha gwëëˈˈ ˗nu ˈka, ˈyö ˈwo wo ꞊yɛɛ ˗kë ˈwo dho Dhitrö ˗pö, Ikoniɔmö ˗pö waa Antiɔshö ˗pö ˗an ˈgü. 22 ˈDhɛ ˈwo ˗lo mü, ˗wo gwëëˈˈ ˗nu ˈwo mü ˗an ˗zo ˗gban ˈö ˈwo ˗an ꞊faanmën kö ˗wo wo ˗bha ˗zoyödhe ˈkun ˈˈgbɩɩ˗. ˈYö ˈwo˗ pö ˗an ˗dhɛ: «Kwa dua ˗mü ˈkwa bɔ ˈwɔn ˈˈgbɩɩ˗ ꞊va ꞊dede ˈgü kö ˈkwa ꞊kun ˗da ˗Zlan ˗bha ˗Gblüdëdhɛ ˈgü.» 23 ˗Ya ˈgo mü ˈzü, ˗wo mɛn zii ˗nu ˗ya ˗zlanwokɔdhi ˈdhɛ ˈö ˈdhö ˗a ˈgü, ˈö ˈwo ꞊bhɛɛ kö ˗wo ˈsunŋ˗ ˗nu ˈmën ˗ni ˈgü, ˈwo ˗an ˈˈklɔɔn bho Zoova ˈö ˈwo ˗we ˗a ˗wɔn ˗bha, ˈö ˗wa ˈdhaŋ˗ bho ˗a ˈˈdhiʋ̈ bhë ˗a ˗bha.

24 ˈDhɛ ˈwo wo bo ˈyö ˈwo bɔ Pisidi ˗sɛ ˈgü ˈö ˈwo dho ˈwo ˗lo Panfili. 25 ˈDhɛ ˈwo wo bo ˗zlanwopösü ˈka Pɛɛʒe, ˈyö ˈwo ꞊yɔɔ ˈwo dho Atadheia. 26 ˗Dhɛ ˈö bhë ˈyö ˈwo ˗ya ˈˈyitagɔ ˈgü ˗a ˗bha ˈö ˈwo dho Antiɔshö. Antiɔshö ˗pö ˈö ˈˈdhʋ̈ yö ˈnën kwa ꞊dhegblü ˗nu ˗wo ꞊bhɛɛ ˗Zlan ˗dhɛ ˗an ˗bha ˈka mü kö ˗yö ö ˗bha ˗gasitɛ kë ˗an ˗dhɛ, yö ˈwo ˈgo ˗ni ˗a kë bhë ˗a ˈgü.

27 ˈDhɛ ˈwo ˗lo mü, ˈyö ˈwo ˗zlanwokɔdhi ˈgümɛn ˗nu ˈˈpɛpɛ ˗dhɛ wo ˈkwëëdhö, ˈyö ˈwɔn ꞊va ˈö ˗Zlan ˗yö bɔ ˗an ˗ta ˈö ˗an ˗kë waa ˗kɔ ˈö ˗zo ˗yö ö ˗dhɛ ˗sü ˈˈkwee ˗pʋ ˗a ˈka ˈˈsɛ ˈˈwɛɛ ˈgümɛn ˗nu ˗gɔ bhë, ˈwo˗ ˗gɛn bho ˗an ˗dhɛ. 28 ˈDhɛ ˈö ˗kë ˈˈdhʋ̈, ˈyö ˈwo to Yesu ˗bha gwëëˈˈ ˗nu ˈwo mü bhë ˗an ˈˈpiʋ̈ ˈö ˈwo ˈˈtʋ̈ŋ ˈbhaa ˗kë.