ˈö Matiö ˗ya ˗bɛnzë
15 ˈDhɛ ˈö ˗ya kë ˈˈdhʋ̈, ˈyö Fadhiziɛn ˗nu waa ˈtɔŋ˗ ˗gɔmɛn ˗nu ˈwo go Zedhizadhɛmö ˈö ˈwo nu Yesu ˈˈpiʋ̈, ˈyö ˈwo˗ dhɛɛˈˈ kpɔ ˈwo˗ pö: 2 «ˈMën ˈö ˗kë ˈö ü ˗bha gwëëˈˈ ˗nu ˈwaa kwa ˈˈbhɛman ˗nu ˗bha wɔkɔ ˗nu ꞊bhlëë ˗ya? ˗A ˈwɔnzuan do ˈnën ˈö ˗tɔ, ˈwaa wo ˗kɔ ˈˈzu* kö ˗wo ꞊kun pë ˗bhö.»
3 ˈYö Yesu ˗ya ˗yɔ bɔ ˗an ˗gɔ ˈö˗ pö: «ˈYö ka ˗zë ꞊wɛ, ˈmën ˈö ˗kë ˈö ka ˗bha wɔkɔ ˗nu ˗wɔn ˈgü ˈkaa ˗Zlan ˗bha ˈtɔŋ˗ ˗nu ꞊bhlëë ˗ya? 4 ˗A ˈwɔnzuan do ˈnën ˈö ˗tɔ ˗Zlan ˗ya ˗pö: ‹˗Bhö ü dë waa ü dhe ˗an ꞊bhlëë ˗ya.› ˈYö go mü ˈzü ˈö˗ pö: ‹Mɛn ˈˈoo ˗mɛn ˈö ˈsi bho ö dë ɛɛnˈˈ ö dhe ˗gɔ, ˗an dua ˗mü kö ˗wa zë.› 5 ˈˈKɛɛ ka ˗zë ka˗ ˗pö: ‹Mɛn ˈö˗ pö ö dë ɛɛnˈˈ ö dhe ˗dhɛ: «Pë ˈˈpɛpɛ ˈö n ˗gɔ ˈö ˈa ꞊mɔɔn˗ ˗bha ˗be kö ˈa ü ˗takun ˗a ˈka, ˈman˗ ˗ya ˗de ˗ta kö ˈa˗ gbɔɔdhe kë ˗Zlan ˗dhɛ» bhë, 6 ˗a ˗dhɛ ˈyaa˗ ˗bha kö ˗a ˗mɛn ˗yö ö dë ꞊bhlëë ˗ya ˈzü.› ˈKa ˗Zlan ˗Wo bho ka ˈˈtʋʋ ka ˗bha wɔkɔ ˗nu ˗wɔn ˈgü. 7 ˈˈKpënŋ˗ ˗kë mɛn ˗gɔ ˗mɛn ˗nu, pë ꞊dede ˈö ˗Zlan ˗wodhiʋ̈lomɛn Izai ˗ya to ˈˈdhiʋ̈ ˈö˗ pö ˈyaa ˈnën ˈö bhë ˗ee? ˗Ya ˗pö: 8 ‹ˈˈSɛ ˈö yö ˗a ˈgümɛn ˗nu ˗wo n ꞊bhlëë ˗ya wo ˈnɛɛn˗ ˈˈdhiʋ̈, ˈˈkɛɛ ˗an zuʋ̈ga ˗zë ˗yö n ˈka ꞊gblɛɛn. 9 ˗Wo n ˗dhɔkë ˗kplawo, ˈˈkɛɛ wo ˈti ˗dho pë ˈbhaa ꞊slɔɔ ˗a ˈgü. ˈYö ˗tɔ ꞊dhɛ ˗wo ˗gban mɛnbhɩɩdhe ˗nu ˗bha ˈtɔŋ˗ ˗nu ˗ta ˈö ˈwo mɛn ˗nu ꞊klaŋ ˗kë.›» 10 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö mɛn ˗nu ˈwo kun ˗an ˗züzü mü ˗an ˗dhɛ, ˈyö˗ pö ˗an ˗dhɛ: «˗Ka ka ˈˈtʋ ˈto kö pë ˈa ˗dho ˗a pö yö ˈka˗ ˈgüman ˗së ˈka: 11 Pë ˈö dho mɛn ˈˈdhii ˈyaa ˈnën ˈö mɛn ˗kë ˗dhiisü, ˈˈkɛɛ pë ˈö go mɛn ˈˈdhii ˈö yö ˈˈkpɛnŋ yö ˈnën ˈö mɛn ˗kë ˗dhiisü.»
12 ˈDhɛ ˈö ˗kë ˈˈdhʋ̈ ˈyö˗ ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈö ˈwo˗ pö ˗a ˗dhɛ: «Ü˗ ˈwɔn ˗dɔ ꞊dhɛ ˈpë ˈü˗ pö bhë, ˗yö ˗yɛ Fadhiziɛn ˗nu ˗bha ˗ee?» 13 ˈYö˗ ˗yɔ bɔ ˗an ˗gɔ ˈö˗ pö: «ˈˈDhü ˈˈpɛpɛ ˈö n Dë ˈö dhaŋ˗ ˈgü yö ˈti˗ ta, ˗wo ˗dho ˗a ˗wo. 14 ˗Ka ka ꞊kwaa ˗an ˗zü. Ʒiaan ˗bho mɛn ˈka ˗mɛn ˗nu ˈö ˗an ˈˈɲɛɛn ˈdhö tii wo ˗mü ˗an ˈka. ˈˈƝɛɛntiimɛn ˗ya ʒiaan bho ˈˈɲɛɛntiimɛn ˈka, ˗an ꞊plɛ ꞊gban ˗wo ˗dho ˗puö ˗gblüga ˈgü.» 15 ˈYö Piɛɛ ˗ya pö ˗a ˗dhɛ: «ˈWɔnzuan ˈü˗ sü bhë, ˗a ˈgü ˈˈpʋ yi ˗dhɛ ˗së ˈka.» 16 ˈYö Yesu ˗ya pö: «Ka ˗de ˈpö ˈwɔn ˈgüman ˗tʋ ˈyaa ka ˗gɔ ꞊köŋ ˗ee? 17 ˗A ˈwɔn ˈnën ˈkaa˗ dɔ ꞊dhɛ pë ˈˈpɛpɛ ˈö mɛn ˗ya ˗da ö ˈˈdhii, ˗yö ˗dho ˗a ˗boŋ ˈgü ˈö ˗ʒiö mü ˈö ꞊gɛan ˈö yö ˈˈkpɛnŋ* ˗ee? 18 ˈˈKɛɛ pë ˈö go mɛn ˈˈdhii ˈö yö ˈˈkpɛnŋ bhë, ˗yö ˗go mɛn zuʋ̈ˈˈ ˈgü. Yö ˈnën ˈö mɛn ˗kë ˗dhiisü. 19 ˗A ˈwɔnzuan ˈnën ˗tɔ, ˗dhɛ ˈö mɛn zuʋ̈ˈˈ ˈgü ˈyö ˈwɔn yaa ˗nu ˈwo ˗kë ꞊dhɛ mɛn zë ˗sü, ö ꞊gɔn ɛɛnˈˈ ö ˗bha dhebɔ ˈto ˗sü ˈwo ꞊niënŋ, ˈˈɲangüyaa* kë ˗sü, ꞊kwaan ˗sü, ꞊sua ˗kë mɛn ˗bha ˗sü waa dhiaŋ yaa zë ˗sü ˗nu ˈdhö bhë, mɛn ˗an ˗yökodhiʋ̈ ˗kë ˗a ˗bha. 20 Pë ˗nu ˈwo bhë, wo ˈnën ˈwo mɛn ˗kë ˗dhiisü. ˈˈKɛɛ pë ˗bhö ˗sü kö wo ˈti wo ˗kɔ ˈˈzu bhë, ˈyaa mɛn kë ˗dhiisü.»
21 Yesu ˗yö ˗go ˗dhɛ ˈö bhë ˗a ˈgü ˈö dho ˈTii˗ waa Sidɔn ˗pö ˗nu ˈgü. 22 ˈDhɛ ˈö ˗kë ˈˈdhʋ̈, ˈyö Fenisi dhebɔ do ˈö go ˈˈpian ˈö bhë ˗a ˗ta ˈö nu Yesu ˈˈpiʋ̈, ˈö ˗ya ˈˈgbla ˗sü ˗bha ˈö˗ pö: «N Dëmɛn, Davi Gbö, ˗bhö n ˗wëëdhɛ yö! ˗Zuu yaa ˗yö n ˈdhu saanˈˈ ˗kë wo ˗ni ˈgü.» 23 ˈˈKɛɛ Yesu yö ˈti ö ˈˈdhi bho ˈkwëë˗ kö ˗ya ˗daa kë ˗a ˗gɔ. ˈYö˗ ˗bha gwëëˈˈ ˗nu ˗wo ꞊ɲɔɔn ˗a ˗bha ˈö ˈwo˗ pö ˗a ˗dhɛ: «˗A pö dhebɔnën ˈö bhë ˗a ˗dhɛ ˗yö ˈgo kwa ꞊kee˗, ˗a ˗gɛn ˗mü ꞊dhɛ ˗a ˈˈgblawo ˈö ʒiö ˗ni ˈgü ˗a ˈka kwa ꞊kee˗ bhë ˗ya kë ˗fɛɛsü.» 24 ˈYö Yesu ˗ya pö: «˗Zlan ˗yö n bɔ Izraɛdhö ˈˈsɛ ˈgümɛn ˗nu ˈö ˈwo ꞊dhɛ ˈˈbhlaa ˗nu ˈö ˗wa ꞊dhiɔŋ ˗an ˈdhö bhë wo dosɛnŋ ˗an ˈˈpiʋ̈.» 25 ˈˈKɛɛ ˈyö dhebɔnën ˈö bhë ˈö nu ˈö ˈˈgblëënnu Yesu ˈˈdhiʋ̈ ˈö˗ pö ˗a ˗dhɛ: «N Dëmɛn, ˗bhö nu n ˗dhɛ!» 26 ˈYö Yesu ˗ya ˗yɔ bɔ ˗a ˗gɔ ˈö˗ pö: «˗A ˗dhɛ ˈyaa˗ ˗bha kö ˗wo ˈnën ˗nu ˗bha ˗bhöpë ˈsü kö ˗wa ˗zuö ˈgbɛnnën ˗nu ˗dhɛ.» 27 ˈYö dhebɔnën ˗ya pö: «Yö ˈˈdhʋ̈ n Dëmɛn, ˈˈkɛɛ ˈgbɛn˗ Dëmɛn ˗nu ˗wa pë ˗bhö ˗a ˗dhɛ ˗nu ˈwo dha ˗an ˗bɛn ˗gɔ ˈwo ˗lo ˈˈshia˗ bhë ˈgbɛnnën ˗nu ˗wa ˗bhö.» 28 ˈYö Yesu ˗ya pö ˗a ˗dhɛ: «Dhebɔnën, ü ˗bha ˗zoyödhe ˗yö ˈkpii˗, pë ˈü˗ ˈˈpiʋ̈ bhë ˗yö kë ü ˗dhɛ.» ˈˈTʋ̈ŋ ꞊dede ˈö bhë ˗a ˈgü ˈyö ˗a ˈdhu ˗yö ö ˗de ꞊slɔɔ.
29 ˈDhɛ ˈö ˗ya kë ˈˈdhʋ̈, ˈyö Yesu ˗yö go ˗dhɛ ˈö bhë ˗a ˈgü ˈö dho ˈö ˗lo ꞊weeyi ˈö Galile bhë ˗a ˈˈsuee, ˈyö dho ˈö ˈɲaannu ˗tɔn do ˈbhaa ˗ta. 30 ˈYö mɛn ꞊va ꞊dede ˗wo nu ˗a ˈˈpiʋ̈, ꞊niɔɔnmɛn ˗nu, ˈˈɲɛɛntiimɛn ˗nu, ˈˈbhʋbhʋ ˗nu waa ˈˈyuamɛn ˗nu ꞊va ꞊dede ˈka, ˈyö ˈwo ˗an ˗lo ˗a ꞊gɛnŋdhö, ˈyö ˗an ꞊gban dha. 31 ˈDhɛ ˈö mɛn ˗nu ˈwo bhë ˈwo˗ yö ꞊dhɛ ˈˈbhʋbhʋ ˗nu ˗wo dhiaŋ zë ˗ni ˈgü, ꞊niɔɔnmɛn ˗nu ˗dhɛ ˗ya bo, ˈˈɲɛɛntiimɛn ˗nu ˈˈɲan ˗ya ˈˈpʋ, ˈyö˗ ˈwɔn ˗yö ˗an kun ꞊dedewo, ˈyö ˈwo ˗ya Izraɛdhö ˗bha ˗Zlan ˈtɔ bhɔ ˗sü ˗bha.
32 ˈDhɛ ˈö ˗kë ˈˈdhʋ̈ ˈyö Yesu ˗yö ö ˗bha gwëëˈˈ ˗nu ˗dhɛ ˈö˗ pö ˗an ˗dhɛ: «Mɛn ˗nu ˈwo yö ˗wa kë n ˗dhɛ ˗wëësü, ˗a ˗gɛn ˗mü ꞊dhɛ ˗wa ˗dhɛkpaɔyi ˗yaaga kë kwa ˈˈpiʋ̈ yö, ˈˈkɛɛ pë ˈbhaa ˈyaa ˗an ˗gɔ kö ˗wa ˗bhö. ˈYaa n ˈˈpiʋ̈ ꞊dhɛ ˈa n ꞊kwaa ˗an ˗zü kö ˗wo ˗ʒiö din˗ ˈka, ˈyaa ˈˈdhʋ̈ ˗wo ꞊mɔɔn˗ ˗bha ˈwo ꞊fëë ʒiaan ˗ta.» 33 ˈˈKɛɛ ˈyö˗ ˗bha gwëëˈˈ ˗nu ˗wa pö ˗a ˗dhɛ: «ˈPödhɛ ˈbhaa ˈyaa ˗dhɛ ˈö yö ˗a ˈˈsuee, mɛn ꞊va ꞊suu ˈwo yö kwa ˗dho ˈgo ˗an ˗bhöpë ˈka ˈˈmɛn?» 34 ˈYö Yesu ˗yö ˗an dhɛɛˈˈ kpɔ ˈö˗ pö: «ˈBluu˗ bhɛ ꞊dhɛ ˈö ka ˗gɔ?» ˈYö ˈwo˗ pö: «ˈBluu˗ bhɛ ˈˈsɔɔplɛ waa ˈyuö˗ ˈsɛɛnnën ˈbhaa ˗nu ˈnën ˈwo yi ˗gɔ.» 35 ˈYö Yesu ˗ya pö mɛn ˗nu ˈwo bhë ˗an ˗dhɛ ˗wo ˈɲaannu ˈˈshia˗. 36 ˈYö ˈbluu˗ bhɛ ˈˈsɔɔplɛ waa ˈyuö˗ ˗nu ˈwo bhë ˗an sü ˈyö ꞊bhɛɛ ˗an ˗ta, ˈö ˗Zlan ˈˈnuɛ bho ˗an ˗wɔn ˈgü. ˈDhɛ ˈö ö bo ˈyö˗ ˈˈkluklu bho ˈö˗ nu ö ˗bha gwëëˈˈ ˗nu ˗dhɛ. ˈYö˗ ˗bha gwëëˈˈ ˗nu ˗wa ˗gblü mɛn ˗nu ˈwo bhë ˗an ˗ta. 37 ˈYö mɛn ꞊gban pë ˗bhö ˈö ˗an ˈgwü ˗yö dɔ. ˈYö ˗a ˗bhöpë ˈˈklu ˈö to ˈwo ˗an ˗lo ˈkwëëdhö, ˈyö ˈwo ꞊töö ˈˈgblʋ̈gblʋ̈ ˈˈsɔɔplɛ pa. 38 Mɛn ˗nu ˈwo pë ˈö bhë ˗a ˗bhö, ˈˈkɛɛ kö wo ˈti dhebɔ ˗nu waa ˈnën ˈsɛɛn˗ ˗nu ˗an dhʋŋˈˈ, ˗wo ˗kun mɛn ˈˈgblü ˗yiishiö (4.000). 39 ˈDhɛ Yesu ˗yö ö ˗wo bho mɛn ˗nu ˈwo bhë ˗an ˗ta ˈö ˈwo dho, ˈyö ˗da ˈˈyitagɔ ˈgü ˈö dho Magadanö ˗sɛ ˈgü.