ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

5 ˈDhɛ ˈö ˗kë ꞊dhɛ ˈkwa kë kpɛnŋdhö ˗Zlan ˈˈɲan ˈˈdhiʋ̈ kwa ˗bha ˗zoyödhe ˗wɔn ˈgü bhë, ˗kwa pë ꞊gban ˈˈpɛpɛ kë kö ˗dhikodhɛ ˗yö ˈto kwaa ˗Zlan kwa ꞊zinŋgü kwa Dëmɛn Yesu Klito ˈsaa˗ ˈgü. 2 Kwa ˗bha ˗zo ˗yö ˗a ˗dhɛ ˗sü ˈnën ˈö˗ ˗kë ˈö ˗Zlan ˗yö ö ˗bha ˗gasitɛ ˗kë kwa ˗dhɛ, ˈö ˈkwa˗ ˈgüwɔn ˗së ꞊slɔɔ ˗ni ˈgü ꞊dɛɛ. ˈDhɛ ˈö ˈˈdhʋ̈, kwa zuʋ̈ˈˈ ˈˈgblü ˗yö dhi ˗kë ˗Zlan ˗bha ˈtɔbhɔdhe ˈgümɛn ˗nu ˈka ˗sü ˈö kwa ˗zo ˈdhö˗ ˗dhɛ bhë ˗a ˗wɔn ˈgü. 3 ˈˈKɛɛ ˗ya ˈgo ˗a ˈdhɛ ˈö bhë ˗a ˈgü, ˈkwa kë ˈˈklʋʋbhɔdhe ˗nu ˈgü kwa zuʋ̈ˈˈ ˈˈgblü ˗yö dhi, ˈyö ˗tɔ kwa˗ ˈwɔn ˗dɔ ꞊dhɛ ˈˈklʋʋbhɔdhe ˗yö mɛn ˈgü ˗kë ˈˈgbɩɩ˗. 4 ˈGügbɩɩdhɛ ꞊suu ˈö ˈˈdhʋ̈ ˗ya ˗kë ˈö kwa ˈˈdhiaa ˗yö mën ˗Zlan ˈgü, ˈyö kwa ˈˈdhiaa ˗ya ˈmën ˗Zlan ˈgü ˈpö, ˈö ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö ˗kë kwa ˗gɔ. 5 ˗Zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˈö ˈˈdhʋ̈ bhë, ˗a ˈgüwɔn ˈyii ˗dho ˈto ˈˈdhʋ̈ ˈˈwɛɛwɛ, ˈyö sü ꞊dhɛ ˗Zlan ˗dhɔ ˗ya pa* kwa zuʋ̈ˈˈ ˈgü ˗zuu ˈˈslʋ̈ʋ̈slʋ̈ ˈö˗ nu kwa ˗dhɛ bhë ˗a ˈsaa˗ ˈgü.

6 ˗A pö ˈa˗ wo ˈˈdhʋ̈ bhë ˗a ˈklɔɔ˗ ˗mü ꞊dhɛ, ˈdhɛ ˈö ˈˈtʋ̈ŋ ˈö ˗Zlan ˗ya ˗ya ˗yö ˗wo, Klito ˗yö ˗ga ˈwɔnyaakëmɛn ˗nu ˗wɔn ˈgü. ˗Yö ˗kë ˈˈdhʋ̈ kö kwa ꞊kun kwa ˗bha ˈˈtëëtëdhɛ ˈgü. 7 Mɛn ˗nu ˈö ˈwo ˗dho ˈˈwɩ ˗a ˗bha kö ˈwo ga mɛn ˈö kpɛnŋdhö ˗a ˗wɔn ˈgü, ˗wo do do. Mɛn ˈö˗ zuʋ̈ˈˈ ˈdhö ˗së, yö ˈnën˗ ˈbhaa ˗ya kë ˈö mɛn ꞊mɔɔn˗ ˗bha ˈö ö ˗de nu ˗a ˗wɔn ˈgü. 8 ˈˈKɛɛ ˗kɔ ˈö ˗Zlan ˗yö kwa ˗dhɔ ˈö˗ ˈgü ˗a ˗zɔn ˗a ˈka ˈyö ꞊nɛn: Klito ˗yö ˗ga kwa ˗wɔn ˈgü kö kwa ꞊kun ˈwɔnyaakëmɛn ˗nu ˈka ꞊köŋ. 9 ˗A ˗wɔn ˈgü, ˈdhɛ ˈö ˗kë ꞊dhɛ ˈkwa bɔ ˗a ꞊ɲɔɔn ˗ta ˈkwa kë kpɛnŋdhö ˗Zlan ˈˈɲan ˈˈdhiʋ̈ bhë, ˗yö ꞊mɔɔn˗ ˗bha ˈö ga kwa ˈgü ꞊dhɛ kwa ˗dho dha ˗Zlan ˗bha ˗naanzuëëdhe ˗gɔ ˗a ˈsaa˗ ˈgü. 10 ˈDhɛ ˈkwa kun ˗Zlan ˈyɔɔ˗ ˗nu ˈka, ˗a Gbö ˗bha ga ˗sü ˗ya ˗kë ˈö ˗mlɛɛn ˗së ˗yö ˗kë kwaa ˗Zlan kwa ꞊zinŋgü ˈzü. ˗Ya kë ˈˈdhʋ̈ kö ˗yö ꞊mɔɔn˗ ˗bha ˈö ga kwa ˈgü ˈzü ꞊dedewo ꞊dhɛ, ˗dhɛ ˈkö ˗mlɛɛn ˗së ˗ya ˗da kwaa˗ ˗nu kwa ꞊zinŋgü, kwa ꞊mɔɔn˗ ˗bha ˈkwa bɔ ˗a Gbö ˗bha ˗kë ö ˈˈɲaan ˗sü ˗ta ˈkwa dha. 11 ˗Ya ˈgo ˗a ˗dhɛ ˈö bhë ˗a ˈgü ˈzü, pë ˈö ˗Zlan ˗yö bɔ kwa Dëmɛn Yesu Klito ˗ta ˈö˗ ˗kë bhë, ˗yö kwa zuʋ̈ˈˈ ꞊nii ˗da. ˗A ˗gɛn ˗mü ꞊dhɛ yö ˈnën ˈö˗ ˗kë ˈö ˗mlɛɛn ˗së ˗yö ˗da kwaa ˗Zlan kwa ꞊zinŋgü ˈzü.

12 Mɛn dosɛnŋ ˈnën ˈö ꞊sɔŋ yaa ˗yö bɔ ˗a ˗ta ˈö ˗da ˈˈkpɔnŋ ꞊taa, ˈyö ga ˗yö bɔ ꞊sɔŋ yaa ˗ta ˈpö ˈö nu. ˈDhɛ ˈö ˗kë ˈˈdhʋ̈, ˈyö ga ˗yö ˗pɛn ˈö yö mɛn ꞊gban ˈˈpɛpɛ ˗bha, ˈyö sü ꞊dhɛ mɛn ꞊gban ˈˈpɛpɛ ꞊sɔŋ yaa kë ˗mɛn ˈka. 13 ꞊Sɔŋ yaa ˗yö ˗nu ˈˈkpɔnŋ ꞊taa kö ˈTɔŋ˗ ˈyaa ˗dhö ꞊köŋ. ˈˈKɛɛ ˈtɔŋ˗ ˈyaa ˈdhö ˗be, wo ˈti ˗dho za ˗ya mɛn ˈbhaa ˗bha kö ˗wa pö ˗ya ˈwɔn yaa kë. 14 ˈˈKɛɛ ˈsa ˈö go Adan ˗bha ˈˈtʋ̈ŋ ˗bha ˈö yö ˗a ˈka Moizö ˗bha ˈˈtʋ̈ŋ ˗bha, ga ˗yö ˗kun ˗gblüdëdhɛ kë ˗ni ˈgü mɛn ꞊gban ˈˈpɛpɛ ˗ta, ˈö kun ˗a kë ˗ni ˈgü ˗ʒiaanwo mɛn ˗nu ˈö wo ˈti ˈwɔn yaa ꞊suu ˈö Adan ˗ya ˗kë bhë ˗a kë, ˗an ˗ta. Adan ˈö ˈˈdhʋ̈, ˗yö ˗kun mɛn ˈö˗ nu ˗wɔn kun ˗dhö bhë ˗a ˗bhɔ ˗bha* ˈka.

15 ˈˈKɛɛ ˗Zlan ˗bha gbɔɔdhe waa Adan ˗bha ˈwɔn yaa ˈö˗ ˗kë bhë ˈwaa do. ˗A ˗gɛn ˗mü ꞊dhɛ mɛn dosɛnŋ ˗bha ˈwɔn yaa ˈö˗ ˗kë yö ˈnën ˈö˗ ˗wɔn ˈgü ˈö mɛn ꞊va ꞊dede ˗wo ga. ˈˈKɛɛ ˗Zlan ˗bha ˈˈgblüsë* waa gbɔɔdhe ˈö˗ ˗kë ˈˈwɛɛwɛ mɛn dosɛnŋ ˈö ˗kë Yesu Klito ˈka ˗a ˗bha ˗gasitɛ ˈö˗ ˗kë ˗a ˈsaa˗ ˈgü bhë, ˗a ꞊bhlëë ˗yö ˈkpii˗ ˈö ˗ʒiö ˗a ˈka mü. ˗A gbɔɔdhe ˈö ˈˈdhʋ̈ ˗Zlan ˗yö ˗bɔ ˗a ˗ta ˈö ˈwɔn ˗së ꞊va ꞊dede kë ˗ni ˈgü mɛn ꞊va ˗dhɛ. 16 ˗Ya ˈgo ˗a ˈgü ˈzü, gbɔɔdhe ˈö ˗Zlan ˗ya ˗kë ˈˈwɛɛwɛ waa pë ˈö go mɛn dosɛnŋ ˈö bhë ˗a ˗bha ˈwɔn yaa kë ˗sü ˈgü, ˗an ˗gokopiʋ̈dhɛ ˈˈwɛɛ ˈbhaa ˗yö mü. ˗A ˗gɛn ˗mü ꞊dhɛ ˈwɔn yaa dosɛnŋ ˈö ˗kë bhë, ˗ya ˗kë ˈö za ˗yö mɛn ꞊gban ˈˈpɛpɛ kun. ˈˈKɛɛ ˗Zlan ˗yö ˗bɔ ö ˗bha gbɔɔdhe ˗ta ˈö mɛnbhɩɩdhe ˗nu yö ꞊dhɛ mɛn kpɛnŋdhö ˗nu ˈdhö, ˈkö ˗kë ꞊dhɛ ˗wo ˈwɔn yaa ˗kë. 17 Ga ˗yö ˗gblüdëdhɛ ˗kë mɛnbhɩɩdhe ˗nu ˗ta mɛn dosɛnŋ ˈö bhë ˗a ˗bha ˈwɔn yaa ˗wɔn ˈgü. ˈˈKɛɛ ˈyaa za ˈgü ꞊dhɛ mɛn ˗nu ˈö ˗Zlan ˗yö ˗gasitɛ ˈkpii˗ ˗kë ˗an ˗dhɛ, ˈö ˈˈgblüsë ˗kë ˗an ˈka ˈˈwɛɛwɛ, ˈö ˗an yö ꞊dhɛ mɛn kpɛnŋdhö ˗nu ˈdhö bhë, ˗wo ˗dho ˗tosɛta kë, ˈö ˈwo ˗gblüdëdhɛ ˗kë ˈpö mɛn dosɛnŋ ˈö ˗kë Yesu Klito ˈka bhë ˗a ˈsaa˗ ˈgü.

18 ˈDhɛ ˈö ˈˈdhʋ̈, ˗kɔ ˈö za ˗yö mɛn ꞊suu ꞊gban ˈˈpɛpɛ kun ˈwɔn yaa dosɛnŋ ˈö ˗kë ˗a ˗wɔn ˈgü bhë, ˗kɔ do ˈö bhë ˗a ˈka ˈpö ˈwɔn kpɛnŋdhö dosɛnŋ ˈˈkpaan ˈö ˗kë ˗a ˗wɔn ˈgü, ˗Zlan ˗yö mɛn ꞊suu ꞊gban ˈˈpɛpɛ yö ˗ni ˈgü ꞊dhɛ mɛn kpɛnŋdhö ˗nu ˈdhö kö ˗wo ˗tosɛta kë. 19 ˗A ˗gɛn ˗mü ꞊dhɛ ˗kɔ ˈö mɛn dosɛnŋ ˗bha ˗Zlan ˗wo ˗lögü ˗sü ˗yö mɛn ꞊va ꞊dede ˗kë ˈwɔnyaakëmɛn ˈka bhë, ˗kɔ do ˈö bhë ˗a ˈka ˈpö mɛn dosɛnŋ ˗bha ˈwɔn ˗man ˗Zlan ˗ta ˗sü ˗dho ˗a kë ˈö mɛn ꞊va ꞊dede ˗kë kpɛnŋdhö ˗Zlan ˈˈɲan ˈˈdhiʋ̈. 20 ˈTɔŋ˗ ˗yö ˗nu kö mɛnbhɩɩdhe ˗nu ˗wa ˈwɔn dɔ ꞊dhɛ wo kë ˗sɔŋ yaa ˗yö ꞊va ꞊dedewo. ˈˈKɛɛ ˈdhɛ ˈö mɛnbhɩɩdhe ˗nu ˗bha ꞊sɔŋ yaa ˗yö ˗kë ˈgbɛ ˈˈdhʋ̈, ˈyö ˗Zlan ˗bha ˗gasitɛ ˗kë ˗an ˗dhɛ ˗sü ˗yö ˗dadhiʋ̈. 21 ˗Yö ˗kë ˈˈdhʋ̈ ˗mën ˗wɔn ˈgü? ˗Yö ˗kë ˈˈdhʋ̈ kö ˗kɔ do ˈö ˈwɔnyaakësü waa ga ˗wo ˗gblüdëdhɛ ˗kë ˗a ˈka bhë, ˗kɔ do ˈö bhë ˗a ˈka ˈpö kö ˗Zlan ˗bha ˗gasitɛ kë ˗sü ˗yö bɔ kpɛnŋdhödhɛ ˗ta ˗yö ˗gblüdëdhɛ kë, kö mɛnbhɩɩdhe ˗nu ˗wo ˗tosɛta ˈö ˈyaa ɲën ˗a ꞊slɔɔ kwa Dëmɛn Yesu Klito ˈsaa˗ ˈgü.